გაერო-ს სამი თვე აქვს მარცვლეულის შეთანხმების რუსული ნაწილის შესასრულებლად, – ამის შესახებ რუსეთის საგარეო საქმეთა სამინისტროს წარმომადგენელმა, მარია ზახაროვამ განაცხადა.
როგორც „როიტერი“ წერს, რუსეთში აღნიშნეს, რომ თუ გაერო არ განახორციელებს მემორანდუმის პირობებს რუსული სოფლის მეურნეობის პროდუქციის ექსპორტის შესახებ სამი თვის განმავლობაში, მოსკოვი არ განაახლებს მოლაპარაკებებს შავი ზღვის გავლით უკრაინის ექსპორტის დაშვების შესახებ შეთანხმებაზე.
„გაეროს ჯერ კიდევ სამი თვე აქვს კონკრეტული შედეგების მისაღწევად. თუ იქნება კონკრეტული შედეგები, ჩვენ დავუბრუნდებით ამ საკითხის განხილვას“, – განაცხადა ზახაროვამ.
შეგახსენებთ, რუსეთმა „შავი ზღვის მარცვლეულის შეთანხმება“ შეაჩერა. კრემლის პრესსპიკერის, დიმიტრი პესკოვის განცხადებით, რუსეთთან დაკავშირებული შეთანხმებების ნაწილი არ შესრულდა. კრემლის ოფიციალურმა წარმომადგენელმა თქვა, რომ მოსკოვი დაუყოვნებლივ დაუბრუნდება შავი ზღვის შეთანხმებების შესრულებას, როგორც კი „მარცვლეულის შეთანხმების“ რუსული ნაწილი შესრულდება.
