თუკი ვინმე თენგოს და ბატონი გეგელიას „ტოპ ტვინების“ იმედად არის ამ ქვეყანაში, მათი დიდი შეცდომაა – ევროპელ პოლიტიკოსებს, ჩინოსნებს თუ დიპლომატებს არა ერთხელ დაუშვიათ ეს შეცდომა საქართველოს წინაშე და გავიგე, ერთხელ შეგეშალა, ორჯერ, სამჯერ, ხუთჯერ, მაგრამ შვიდჯერ?! სადღაც ხომ უნდა გაჩერდნენ, ხომ?!, – ამის შესახებ საქართველოს პარლამენტის თავმჯდომარემ, შალვა პაპუაშვილმა ბრიფინგზე განაცხადა.
მისივე თქმით, დასავლელი პოლიტიკოსები საქართველოს და ქართველ ხალხს აბრალებენ, თითქოს არჩევნებზე წესების დარღვევა იყო და როცა დადასტურდება რომ ეს ასე არ არის, ბოდიშსაც არ მოიხდიან.
პაპუაშვილმა ყველას მოუწოდა, აღიარონ ეუთო/ოდირის დასკვნა. მისი თქმით, ვერ გაიქცევიან ვერც ამ დასკვნას და ვერც იმ 1 120 000-მდე ამომრჩეველს, რომელმაც „ქართული ოცნების“ მიერ გატარებულ პოლიტიკას და მომავალ გეგმებს მხარი დაუჭირა.
„გუშინ ბატონი თენგო [თევზაზე] და ბატონი გრიგოლიც [გეგელია] ვნახეთ, რომელიც „ტოპ ტვინებთან“ ერთად, ტოპ IT სპეციალისტებთან ერთად, ტოპ ანალიზს აკეთებდა. ეს ხომ სირცხვილია უბრალოდ?! ამ ხალხის იმედად არიან, მათ შორის, ის უცხოელი აქტორები, რომლებიც ახლა აკეთებენ განცხადებებს, რომლებიც მათ სხვა დროსაც გაუკეთებიათ. ასეთივე დაბრალება იყო სააკაშვილის საკითხზე. გვახსოვს უცხოელი მინისტრების, პრეზიდენტების განცხადებები ხომ?! ხომ აღმოჩნდა ტყუილი დაბრალება?! აი, როგორც დღეს, ხან სამი მინისტრი ერთად, ხან ცამეტი მინისტრი ერთად, ხან პრეზიდენტი, ხან ვინ და ხან ვინ აკეთებს განცხადებას და აბრალებს საქართველოს და ქართველ ხალხს თითქოს, რაღაცა წესების დარღვევა იყო. ზუსტად იგივე ხალხი, ზუსტად იგივე ევროპელები, ზუსტად იგივე დიპლომატები და ჩინოსნები გვაბრალებდნენ სააკაშვილის ტანჯვა-წამებას, რაც აღმოჩნდა ტყუილი და შემდეგ ბოდიშიც არ მოიხადეს. გვაბრალებდნენ სანქციების გვერდის ავლას, რაც აღმოჩნდა ტყუილი და ბოდიშიც არ მოიხადეს და ახლა გვაბრალებენ, რაც ასევე დადასტურდება, რომ ტყუილია. პრობლემა იმაშია, რომ არც ბოდიშს მოიხდიან, ეს ყველაფერი რომ დადასტურდება და ამასობაში ჩვენ ნერვებს დაგვაწყვეტენ, ერთმანეთს გადაგვკიდებენ, რა იცი კიდევ როგორ დაგვაპირისპირებენ საზოგადოებას ერთმანეთთან, რა როგორ მოხდება კაციშვილმა არ იცის, მერე ხელებს დაიბანენ და შემოგვხედავენ და წუხილს გამოთქვამენ, რომ საქართველოში არეულობა არის. ამ დონემდე მიიყვანენ ამ ქვეყანას და მერე ბოდიშსაც არ მოიხდიან იმის გამო, რაც მისი ქმედებით არის. ასე რომ, თუკი ვინმე თენგოს და ბატონი გეგელიას „ტოპ ტვინების“ იმედად არის ამ ქვეყანაში თუ სხვა ქვეყანაში, ეს მათი დიდი შეცდომაა. ეს შეცდომა მათ არა ერთხელ დაუშვიათ. ზუსტად ევროპელ პოლიტიკოსებს, ჩინოსნებს თუ დიპლომატებს არა ერთხელ დაუშვიათ ეს შეცდომა საქართველოს წინაშე და გავიგე, ერთხელ შეგეშალა, ორჯერ, სამჯერ, ხუთჯერ, მაგრამ შვიდჯერ?! სადღაც ხომ უნდა გაჩერდნენ, ხომ?! ამიტომ კიდევ ერთხელ მოვუწოდებ ყველას, აღიარონ ეუთო/ოდირის დასკვნა. ვერ გაიქცევიან ვერც ამ დასკვნას და ვერ გაექცევიან იმ მილიონ 120 ათასამდე ამომრჩეველს, რომელმაც ხმამაღლა მკაფიოდ დაუჭირა მხარი არა უბრალოდ „ქართულ ოცნებას“, არამედ „ქართული ოცნების“ მიერ გატარებულ პოლიტიკას და მომავალ გეგმებს. ასე რომ, ეს არის დემოკრატია და ყველა შეეგუოს და აღიაროს დემოკრატია,“ – განაცხადა პაპუაშვილმა.
