პარლამენტის ფრაქცია „ქართული ოცნების“ თავმჯდომარის მოადგილის, რატი იონათამიშვილის განცხადებით, ევროკავშირის ანგარიშში ფაქტობრივად აღიარებულია, რომ საქართველო არის ლიდერი ქვეყანა როგორც ასოცირებული ტრიოს ქვეყნების, ასევე ბალკანეთის ქვეყნების თვალსაზრისით, ვისაც აქვს დღეს კანდიდატის სტატუსი.
„შესაბამისად, ეს ანგარიში არის კიდევ ერთი მყარი მტკიცებულება და არგუმენტი იმისა, რომ სამართლიანი განსჯის პირობებში საქართველო იმსახურებს კანდიდატის სტატუსის მიღებას“, – აცხადებს რატი იონათამიშვილი.
ევროკავშირმა მსოფლიოში ადამიანის უფლებებისა და დემოკრატიის მდგომარეობის შესახებ 2022 წლის ყოველწლიური ანგარიში გამოაქვეყნა, რომლის თანახმადაც, ზოგადად, საქართველოში ადამიანის უფლებათა მყარი სისტემა არსებობს, რომელიც საერთაშორისო და ევროპულ სტანდარტებთან შესაბამის კანონებსა და პოლიტიკას მოიცავს, თუმცა, მათი აღსრულება რამდენიმე მიმართულებით უნდა გაძლიერდეს.
