უკრაინის საგარეო საქმეთა მინისტრის, დმიტრო კულებას განცხადებით, ევროკავშირი ვერ შეასრულებს უკრაინისთვის 2024 წლის მარტამდე მილიონი საარტილერიო ჭურვის მიწოდების გეგმას თავდაცვის წარმოების მდგომარეობისა და ბიუროკრატიული დაბრკოლებების გამო.
მისი განმარტებით, ამ პრობლემის მიზეზია არა ევროკავშირში პოლიტიკური ნების არ არსებობა, არამედ თავდაცვითი ინდუსტრიის სავალალო მდგომარეობა და ასევე ბიუროკრატია.
„ევროკავშირი მუშაობს ამ პრობლემების აღმოსაფხვრელად და სწორედ ამიტომ, ბერლინში ყოფნისას მოვუწოდე ევროკავშირს, შეემუშავებინა ჰოლისტიკური პოლიტიკა თავდაცვის მრეწველობის სფეროში“, – აღნიშნა უკრაინის საგარეო საქმეთა სამინისტროს ხელმძღვანელმა.
მისი თქმით, ევროკავშირმა უკვე დაიწყო გარკვეული ნაბიჯების გადადგმა სიტუაციის გამოსასწორებლად. ”მაგრამ საჭიროა უფრო სწრაფად მოქმედება და უფრო მეტის გაკეთება. ჩვენს თვალწინ უკრაინელი ქვეითი დგას და მას ჭურვები სჭირდება”, – აღნიშნა კულებამ.
