„ეს კანონი თავდაპირველადვე პრობლემას წარმოადგენდა კოლექტიური გიგაურებისთვის, ლომჯარიებისთვის და ა.შ. რომლებიც ძირის გამომთხრელ სამუშაოებს ეწევიან ჩვენს ქვეყანაში და მუდმივად არიან ჩართულები რევოლუციური სცენარების მოწყობაში“, – ამის შესახებ ფრაქცია „ქართული ოცნების“ თავმჯდომარის მოადგილემ ლევან მაჭავარიანმა FARA-ს ანალოგ კანონზე საუბრისას განაცხადა.
მისი თქმით, ეს არის ერთ-ერთი ინსტრუმენტი იმისთვის, რომ ქვეყანა მეტად დაცული იყოს.
„იქიდან გამომდინარე, რომ გამჭვირვალობის ქართულმა კანონმა ისეთი ეფექტი ვერ მოგვცა, ვინაიდან მდიდარ „ენჯეოებს“ ერჩიათ, ჯარიმები გადაეხადათ, ნაცვლად იმისა, რომ გაესაჯაროებინათ თავიანთი მიღებული და დახარჯული თანხა, დადგა იმის აუცილებლობა, ერთი ერთში გადმოგვეღო ამერიკაში მოქმედი FARA-ს კანონი, რომელიც წერტილ-მძიმით არის გადმოტანილი და რომელიც გაცილებით მკაცრია, ვიდრე ჩვენი კანონი, ასევე, ითვალისწინებს სისხლის სამართლის პასუხისმგებლობასაც.
გამჭვირვალობის გამოწვევა, როგორც ასეთი, მხოლოდ საქართველოში არ დგას, აშშ-მა თავადვე ამხილა ყველაზე მსხვილი დონორი ორგანიზაციები, რომლებზეც ჩვენ ვსაუბრობდით – იგივე USAID-ი, NED-ი და ა.შ. რომ ისინი ძირგამომთხრელ სამუშაოებს ეწეოდნენ მსოფლიოს მასშტაბით, იქ საქართველოც იყო ნახსენები, სადაც პირდაპირ რევოლუციებში იყვნენ ჩართულები. ეს არის ერთ-ერთი ინსტრუმენტი იმისთვის, რომ ჩვენი ქვეყანა იყოს უფრო დაცული და უსაფრთხო“, – აღნიშნავს ფრაქცია „ქართული ოცნების“ თავმჯდომარის მოადგილე.
