ფრაქცია „ქართული ოცნების“ თავმჯდომარის მოადგილე, ლევან მაჭავარიანი ე.წ. ქოლ-ცენტრების საქმეზე დაკავებულთა პროცესს ეხმიანება.
„საზოგადოებას შევახსენებ, როდესაც ჩვენ სერიოზული კომენტარებიც არ გაგვიკეთებია „ჰელსინკის კომისიის“ ჰაერიდან მოტანილ ბრალდებაზე, თითქოსდა, „ქართული ოცნების“ სქემაა ეს მთელს მსოფლიოში გაშლილი, კიდევ ერთხელ დასტურდება, რომ „ჰელსინკის კომისიამ“ ეს ყველაფერი აბსოლუტურად არანაირ ფაქტზე, არანაირ არგუმენტზე დაყრდნობით გააკეთა და რაღაც ჰაერიდან მოიტანა ბრალდება. ამასთან დაკავშირებით ჩვენ სერიოზული კომენტარიც არ გაგვიკეთებია. საზოგადოება კიდევ ერთხელ დარწმუნდა, რამდენად არასერიოზული იყო, „ჰელსინკის კომისიის“ ის განცხადება“, – აღნიშნა მაჭავარიანმა.
ტრანსნაციონალური დანაშაულის გამოძიების ფარგლებში, ე.წ. ქოლ-ცენტრების საქმეზე დაკავებულებს სასამართლომ აღმკვეთი ღონისძიების სახით პატიმრობა შეუფარდა.
საქართველოს პროკურატურამ გერმანიის ფედერაციული რესპუბლიკის სამართალდამცავებთან თანამშრომლობით, საგამოძიებო ჯგუფის ფარგლებში, რომელშიც ასევე ჩართული არიან საქართველოს სახელმწიფო უსაფრთხოების სამსახური და ფინანსთა სამინისტროს საგამოძიებო სამსახური, მორიგი ტრანსნაციონალური დანაშაული გახსნა.
