წერილი, რომელიც დღეს გავრცელდა ე.წ. პრეზიდენტის, ყაველაშვილის სახელით, რეალურად, არის ბიძინა ივანიშვილის წერილი ამერიკის შეერთებული შტატების პრეზიდენტს, დონალდ ტრამპს. ეს კიდევ ერთხელ ადასტურებს „ქართული ოცნების“ საგარეო პოლიტიკის სრულ კრახს, – ამის შესახებ „ნაციონალური მოძრაობის“ წევრმა, ანი წითლიძემ განაცხადა.
წითლიძე გამოეხმაურა საქართველოს პრეზიდენტის, მიხეილ ყაველაშვილის ღია წერილს, რომლითაც ყაველაშვილმა აშშ-ის პრეზიდენტს, დონალდ ტრამპს მიმართა.
„გახსოვთ, წინასაარჩევნოდ როგორ ატყუებდა „ქართული ოცნება“ საკუთარ ამომრჩეველს, რომ ტრამპის გამარჯვების შემდეგ შეძლებდნენ ურთიერთობის დალაგებას აშშ-სთან და ტრამპი მათ მხარს დაუჭერდა, არ იქნებოდა სანქციები. მიუხედავად ამისა, დღეს კიდევ ერთხელ ნათლად გამოჩნდა, რომ „ქართულ ოცნებას“ საერთაშორისო ასპარეზზე არ ჰყავს ხელის ჩამომრთმევი და როგორც ანტიდემოკრატიული, პრორუსული ძალა, ვერანაირ ურთიერთობას ვერ დაალაგებს ვერც აშშ-სთან და ვერც საერთაშორისო პარტნიორებთან. მით უმეტეს, როდესაც საუბარია აშშ-სთან ურთიერთობის გადატვირთვაზე. „ქართულ ოცნებას“ ამის შესაძლებლობა ძალიან ბევრჯერ ჰქონდა, მათ შორის იმ გზამკვლევით, რაც არსებობს საქართველოსთვის ევროინტეგრაციის გზაზე და გულისხმობს იმ ვალდებულებების შესრულებას, რომლებიც საქართველოს აქვს ევროპული განვითარების გზაზე. ეს წერილი სასაცილო იქნებოდა, ტრაგედია რომ არ იყოს და არ ეხებოდეს ამ ქვეყნის ევროპულ მომავალს. როგორიც არ უნდა იყოს მცდელობა ბიძინა ივანიშვილის, „ქართულ ოცნებას“ კიდევ უფრო მძიმე სანქციები დაეკისრება, მეტად მძიმე იქნება მათი მდგომარეობა საერთაშორისო ასპარეზზე და კიდევ უფრო რთული იქნება მათთვის, მათი ოჯახებისთვის, რადგან ამ ქვეყნის ღალატია გზა, რომელსაც ისინი ადგანან“, – განაცხადა ანი წითლიძემ.
