აშშ-ის ყოფილი პრეზიდენტი და პრეზიდენტობის კანდიდატი დონალდ ტრამპი სოციალურ ქსელ X-ზე დაბრუნდა.
აშშ-ის პრეზიდენტობის კანდიდატმა სოციალურ ქსელში რამდენიმე შეტყობინება გამოაქვეყნა, მათ შორის რესპუბლიკური პარტიის საარჩევნო კამპანიის ვიდეო, რომელშიც ტრამპი ამბობს: „მათ უნდათ ჩემი გაჩუმება, რადგან მე არასოდეს მივცემ უფლებას, რომ თქვენ გაგაჩუმონ“.
ამასთან, დონალდ ტრამპმა დააანონსა ილონ მასკთან ინტერვიუ, რომელიც დღეს, ადგილობრივი დროით ღამის 04:00 საათზე გაიმართება. „ეს იქნება საუკუნის ინტერვიუ!“ – წერს ტრამპი.
შეგახსენებთ, დონალდ ტრამპის ანგარიში, რომელსაც 88 მილიონზე მეტი გამომწერი ჰყავდა, 2021 წლის 8 იანვარს ძალადობის წაქეზების ბრალდებით აიკრძალა, თუმცა ილონ მასკმა, რომელმაც 2022 წელს სოციალური ქსელი იყიდა, ტრამპის ანგარიში აღადგინა. სანაცვლოდ, ყოფილი პრეზიდენტი საკუთარ სოციალურ ქსელს, Truth Social-ს იყენებდა.
