დღეს 7 ნოემბერია, მე ვფიქრობ, ჩვენი თაობისთვის და საერთოდ თანამედროვე საქართველოს ისტორიისთვის ერთ-ერთი ყველაზე სამარცხვინო დღე, როდესაც ხელისუფლებაში მყოფმა ყაჩაღებმა საკუთარი საზოგადოება, ხალხი სისხლში ჩაახრჩვეს, – ამგვარად იხსენებს კინორეჟისორი გოგა ხაინდრავა 2007 წლის 7 ნოემბრის მოვლენებს.
„ამ ლაქას ძალიან ძნელად მოიშორებს ჩვენი ქვეყანა. აი, ამ გარეწრებს 700 000 კაცი აძლევს ხმას საქართველოში. ჩვენ ყველას გვახსოვს 7 ნოემბერი, ვისაც არ უნახავს, ნახოს, რა ჩაიდინეს ამ გარეწრებმა, რა უქნეს საკუთარ ხალხს. აი, ამის მნახველი ადამიანი რომ მერე გვარამიას, თინა ბოკუჩავას, ხაზარაძე ხმას მისცემს, ეს რა თქმა უნდა, დიდი პრობლემაა საზოგადოებისთვის, ქვეყნისთვის იმიტომ, რომ მორალი მორღვეულია აბსოლუტურად და სადაც მორალი მორღვეულია, ძალიან ძნელია ლაპარაკი განვითარებაზე. მადლობა, ღმერთს ეს მორალი მორღვეულია დიდ უმცირესობაში და არა უმრავლესობაში“, – განაცხადა გოგა ხაინდრავამ.
2007 წლის 7 ნოემბრის მოვლენებიდან 17 წელი გავიდა. სამი დარბევა ერთ დღეს, აქციის დაშლა რუსთაველის გამზირსა და რიყეზე, შეჭრა ტელეკომპანია „იმედში“ – გამთენიისას, სამართალდამცველებმა თავისუფლების მოედანზე მცირერიცხოვანი აქციის დარბევა დაიწყეს.
