კომპანია IDS ბორჯომი საქართველო, რომელიც წყალ “ბაკურიანი ციდას” აწარმოებს, სოციალურ ქსელში გავრცელებულ ინფორმაციასთან დაკავშირებით განცხადებას ავრცელებს.
კერძოდ, სოციალურ ქსელში გავრცელდა ინფორმაცია, რომ „ბაკურიანი ციდას“ ბოთლიდან წყლის დალევის შედეგად მცირეწლოვან ბავშვს ჰოსპიტალიზაცია დასჭირდა.
კომპანია IDS ბორჯომი საქართველოს აცხადებს, რომ მათ მიერ მყისიერი რეაგირების შედეგად, გადამოწმდა ნიმუშები კონკრეტულ მაღაზიაში და დარღვევა არ გამოვლენილა.
“სოციალურ ქსელში გავრცელდა ინფორმაცია, რომ „ბაკურიანი ციდას“ ბოთლიდან დალეული სითხით მოხდა მცირეწლოვანი ბავშვის ჰოსპიტალიზაცია. გაცნობებთ, რომ კომპანიის მხრიდან მყისიერი რეაგირების შედეგად, გადამოწმდა კონკრეტულ მაღაზიაში (სადაც ჩვენს ხელთ არსებული ინფორმაციით მოხდა პროდუქტის შეძენა) ნიმუშები და დარღვევა არ გამოვლენილა. პარალელურ რეჟიმში, შევამოწმეთ ამჟამად ქსელში არსებული ყველა პარტიის ნიმუში და ვადასტურებთ, რომ აღნიშნულ ნიმუშებში დარღვევა არ დაფიქსირებულა.
ასევე გადამოწმდა საწარმოო პროცესის სრული ტექნოლოგიური ციკლი, რომელიც გამორიცხავს პროდუქტში რაიმე უცხო ნივთიერების მოხვედრას.“ – ნათქვამია განცხადებაში.
არსებული ინფორმაციით, მოზარდი იაშვილის კლინიკაშია გადაყვანილი.
