ავიაკატასტროფასთან დაკავშირებით, აზერბაიჯანი ჩეჩნეთისგან რაიმე სახის დახმარების მიღებას არ აპირებს, – ამის შესახებ აზერბაიჯანის პრეზიდენტის ადმინისტრაციაში განაცხადეს.
მანამდე, ჩეჩნეთის ხელისუფლებამ განაცხადა, რომ რამზან კადიროვის მითითებით, ისინი მზად არიან, ფინანსური და სხვა სახის დახმარება გაუწიონ თვითმფრინავის ჩამოვარდნისას დაღუპულთა და დაშავებულთა ყველა ოჯახს, რომელიც ბაქოდან გროზნოში მიფრინავდა.
როგორც აზერბაიჯანულ მედიას აზერბაიჯანის პრეზიდენტის ადმინისტრაციაში განუცხადეს, ქვეყანას დახმარება არ სჭირდება და არ მიიღებს.
„აზერბაიჯანს დახმარება არ სჭირდება. ასეთ დახმარებას არც სახელმწიფო მიიღებს და არც მოქალაქეები. ჩვენ ვუწევთ და გავაგრძელებთ საჭირო დახმარებას ჩვენს მოქალაქეებს. აზერბაიჯანი ფაქტის აღიარებას, ბოდიშის მოხდას და შესაბამისი კომპენსაციის გადახდას ითხოვს”, – განაცხადა აზერბაიჯანის პრეზიდენტის ადმინისტრაციის წარმომადგენელმა.
თვითმფრინავის შავი ყუთი უკვე აღმოჩენილია და მიმდინარეობს პროცედურები მის გასაანალიზებლად საერთაშორისო საავიაციო კონვენციების შესაბამისად. ამჟამად მიმდინარეობს გამოძიება კატასტროფის მიზეზებზე. აზერბაიჯანული მედიის თანახმად, საბოლოო დასკვნები გაკეთდება ყველა საჭირო კვლევისა და მონაცემთა ანალიზის დასრულების შემდეგ.
