უკრაინის საკითხებში დონალდ ტრამპის არჩეულმა სპეციალურმა წარმომადგენელმა, გენერალმა კიტ კელოგმა განაცხადა, რომ აშშ-ს სურს უკრაინაში არჩევნების ჩატარება, განსაკუთრებით იმ შემთხვევაში, თუ მიღწეული იქნება შეთანხმება ცეცხლის შეწყვეტის შესახებ.
კელოგის თქმით, უკრაინაში „უნდა ჩატარდეს“ საპრეზიდენტო და საპარლამენტო არჩევნები, რაც უკრაინის კანონმდებლობით აკრძალულია საომარი მდგომარეობის დროს.
„დემოკრატიული ქვეყნების უმეტესობაში ომის დროს არჩევნები იმართება. მე ვფიქრობ, რომ ეს ძალიან მნიშვნელოვანია. ვფიქრობ, რომ ეს კარგია დემოკრატიისთვის. ეს არის ძლიერი დემოკრატიის სილამაზე, რომ გყავს ერთზე მეტი ადამიანი, რომელსაც შეუძლია პოტენციურად კენჭისყრა”, – აღნიშნა კელოგმა.
„როიტერის“ ცნობით, უკრაინაში არჩევნების ჩატარება ერთ-ერთი საკითხია, რომელსაც ტრამპის გარემოცვა უკრაინაში ომის დასრულების გეგმის კონტექსტში განიხილავს.
უკრაინის მთავრობის ორი წყაროს თანახმად, ტრამპის ადმინისტრაციას უკრაინული მხარისთვის ოფიციალურად ჯერ არ მიუმართავს საპრეზიდენტო არჩევნების 2025 წლის ბოლომდე ჩატარებასთან დაკავშირებით.
