„ნიუ იორკ თაიმსის“ ინფორმაციით, აშშ-ის შუამავლობით მომზადებულია ორეტაპიანი გეგმა, რომელიც ისრაელელი მძევლების გათავისუფლებასა და საბრძოლო მოქმედებებში ორთვიან პაუზას მოიცავს.
დოკუმენტის მიხედვით, პირველ ფაზაში საბრძოლო მოქმედებები 30 დღით უნდა შეწყდეს, რა დროსაც „ჰამასი“ გაათავისუფლებს ქალებს, ხანდაზმულებსა და დაჭრილ მძევლებს. ამ პერიოდის განმავლობაში მხარეები იმუშავებენ მეორე ფაზის დეტალებზე, რომელიც კიდევ 30 დღით სამხედრო ოპერაციების შეწყვეტას ითვალისწინებს. ისრაელის საპატიმროებიდან გასათავისუფლებულ პალესტინელთა რიცხვი ჯერ კიდევ დაუზუსტებელია.
შეთანხმება ასევე ითვალისწინებს უფრო მეტ ჰუმანიტარულ დახმარებას ღაზისთვის.
„ჰამასი“ ცეცხლის სრულ შეწყვეტას მოითხოვს, თუმცა, როგორც „თაიმსი“ წერს, „მაღალჩინოსნებს, რომლებიც მოლაპარაკებებში ჩართული არიან, მიაჩნიათ, რომ თუ ისრაელი ორი თვით შეწყვეტს ომს, ნაკლებ სავარაუდოა, რომ ის ისეთივე ფორმით განახლდეს, როგორც აქამდე იყო“, რაც ცეცხლის მუდმივის შეწყვეტისთვის გარკვეული შესაძლებლობა იქნება.
გავრცელებული ცნობით, ვაშინგტონის მიერ შემუშავებული გეგმა დღეს პარიზში დაგეგმილ სამიტზე უნდა განიხილონ, რომელსაც ისრაელის, კატარის, ეგვიპტისა და აშშ-ის წარმომადგენლები დაესწრებიან.
„ნიუ იორკ თაიმსის“ მიერ მოპოვებულ ინფორმაციას ადასტურებენ „ასოშიეთიდ პრესშიც“. სააგენტო იუწყება, რომ აშშ-ის ცენტრალური დაზვერვის სააგენტოს დირექტორი ბილ ბარნსი ამ შეთანხმების განხილვას სწორედ პარიზის დღევანდელ სამიტზე გეგმავს, სადაც ის ისრაელის „მოსადის“ (დაზვერვის) სააგენტოს ხელმძღვანელს, დევიდ ბარნეას, კატარის პრემიერ-მინისტრს, მოჰამედ ბინ აბდულრაჰმან ალ თანისა და ეგვიპტის დაზვერვის უფროსს, აბას ქამელს შეხვდება.
„ასოშიეთიდ პრესი“ აღნიშნავს, რომ ბარნსი ამ მაღალი დონის შეხვედრაზე თეთრი სახლის უფროსი მრჩევლის, ბრეტ მაკგურკის ახლო აღმოსავლეთიდან დაბრუნების შემდეგ მიემგზავრება. იმ შემთხვევაში, თუ პარიზის მოლაპარაკებები შედეგს გამოიღებს, პრეზიდენტი ჯო ბაიდენი მაკგურკს შეთანმხების დასასრულებლად კვლავ ახლო აღმოსავლეთში გაგზავნის.
