ამერიკის შეერთებული შტატების ყოფილ სენატორს, ბობ მენენდესს ქრთამის აღების საქმეზე 11 წლით თავისუფლების აღკვეთა მიესაჯა.
მენენდესი პატიმრობის მოხდას 6 ივნისიდან დაიწყებს, რაც საშუალებას მისცემს, დაესწროს მისი მეუღლის, ნადინ მენენდესის კორუფციულ საქმეზე სასამართლო პროცესს, რომელიც მარტში იწყება.
მენენდესი დემოკრატიული პარტიის წევრი იყო. 18 წელზე დიდხანს წარმოადგენდა ნიუ ჯერსის შტატს სენატში, ის ასევე გახდა პირველი სენატორი აშშ-ის ისტორიაში, რომელიც დამნაშავედ ცნეს უცხო ქვეყნის აგენტად მოქმედებაში.
მენენდესმა სენატორის თანამდებობა აგვისტოში დატოვა. მენენდესის საქმეზე ასევე დამნაშავედ ცნეს ორი ნიუჯერსელი ბიზნესმენი.
ამერიკელი სენატორი ბობ მენენდესი 16 ივლისს ცნეს დამნაშავედ. სენატორ მენენდესს თაღლითობაში, უცხოურ აგენტად მოქმედებაში, მართლმსაჯულებისთვის ხელის შეშლასა და სხვა დანაშაულებში ედებოდა ბრალი. პროკურორების განცხადებით, ამერიკელი სენატორი ქრთამის აღების რამდენიმე სქემაში მონაწილეობდა, რომლის დროსაც სენატორმა და მისმა მეუღლემ, ეგვიპტის მთავრობის დახმარების სანაცვლოდ, სამი ბიზნესმენისგან ასობით ათასი დოლარის ოდენობის ნაღდი ფული, ოქროს ზოდები და ძვირადღირებული მანქანა მიიღეს.
