აშშ იმუქრება, რომ უკრაინაში რუსეთის შეჭრის მესამე წლისთავთან დაკავშირებით „დიდი შვიდეულის“ (G7) ერთობლივ განცხადებას მხარს არ დაუჭერს. ინფორმაციას ამის შესახებ სააგენტო Bloomberg-ი ავრცელებს.
Bloomberg-ის ცნობით, აშშ ეწინააღმდეგება განცხადებაში მოცემულ ფორმულირებებს, რომლებიც რუსეთის დაგმობას ეხება და წინა წლებში გაკეთებულ ანალოგიურ განცხადებებს ჰგავს.
გარდა ამისა, როგორც სააგენტოს წყაროები იტყობინებიან, ვაშინგტონი არ ეთანხმება მოწოდებას ენერგეტიკული სანქციების გამკაცრებისკენ, რათა მოსკოვი იძულებული გახდეს, მოლაპარაკებები აწარმოოს გრძელვადიან მშვიდობაზე.
Bloomberg-ის წყაროები აცხადებენ, რომ მიუხედავად იმისა, რომ „დიდი შვიდეულის“ განცხადების კომპრომისული ფორმულირებების განხილვა კვლავ გრძელდება, აშშ-მა მიანიშნა, რომ შესაძლოა საერთოდ უარი თქვას მის მხარდაჭერაზე.
