უკრაინის ეროვნული უსაფრთხოებისა და თავდაცვის საბჭოს მდივნის, ოლექსი დანილოვის განცხადებით, რუსეთის პრეზიდენტი ვლადიმერ პუტინი „შეშინებული ადამიანია“ და იმის დაშვება, რომ ის შეიძლება ხერსონსა და ლუგანსკში ჩასულიყო, შეუძლებელია. დანილოვის თქმით, უკრაინის დროებით ოკუპირებულ ტერიტორიებზე არა პუტინი, არამედ მისი ორეულებიდან ერთ-ერთი იმყოფებოდა.
„ჯერ ერთი, არანაირი პუტინი იქ არ ყოფილა. ეს ცნობილი ფაქტია. იმისთვის, რომ ნამდვილ პუტინთან კონტაქტში შეხვიდე, მინიმუმ 10-14 დღე კარანტინში უნდა გაატარო. არავითარი პუტინი იქ არ ყოფილა, იქ იყო ჩვეულებრივი ორეული, რომელიც მას არაერთი ჰყავს – ეს ასევე ცნობილი ფაქტია“, – განაცხადა დანილოვმა ეროვნული სიახლეების მარათონის ეთერში.
დანილოვმა უკრაინის პრეზიდენტ ვოლოდიმირ ზელინსკისთან გაავლო პარალელი.
„სრულებით საპირისპიროა ჩვენი პრეზიდენტი, რომელსაც შეუძლია, ნებისმიერ დროს მოინახულოს ფრონტის ხაზი და დადგეს ჩვენი სამხედროების გვერდით. ამაშია განსხვავება – სხვაობა „ბუნკერის ბაბუა პუტინთან“, რომელსაც მალე საკუთარი თავის შეეშინდება“, – აცხადებს დანილოვი.
