ის მენტალური მდგომარეობა, როდესაც თითქოს ომები აღარ არის პრობლემის გადაწყვეტის გზა და თითქოს ადამიანი გაიზარდა ამ მორალურ დონემდე, რომ მას შეუძლია ომების გარეშე მოაგვაროს პრობლემა, ამან შექმნა ძალიან დიდი ილუზია ისეთ საკითხებთან მიმართებაში, რომელიც როგორც აღმოჩნდა, ომების გარეშე ვერ გადაწყდება, – ამის შესახებ „ქრონიკას“ საზოგადოებრივი ორგანიზაცია „პოლიტიკური არჩევანის“ დამფუძნებელმა, რომან კაკულიამ განუცხადა.
„მიამიტური შეხედულება, რომელიც ჩვენს ქვეყანაში დომინირებს, ჩვენ ხელს შეგვიშლის შევაფასოთ მოვლენები, რომ თითქოს სამყარო არის ცივილიზებული და არაცივილიზებული სამყაროს ურთიერთდაპირისპირება. ჩვენ უნდა გავითვალისწინოთ, რომ დაბრუნდა ძალთა ბალანსის ის თეორია, რომელმაც უნდა გააკეთოს და დაამყაროს ახალი ძალთა ბალანსი. გამოკვეთილია ორი რამ: ამერიკისა და ჩინეთის დაპირისპირებისათვის მსოფლიო ემზადება. ეს დაპირისპირება დაახლოებით 2027 წლისთვის არის ნავარაუდები. სწორედ ამან განაპირობა, რომ უკრაინის მიმართ გარკვეულად შემცირდა ყურადღება. ახლა ჩვენ ვხედავთ ერთ ახალ მოვლენას – როდესაც თითქოს ძალიან მნიშვნელოვანი იყო შეიარაღებისთვის მაღალი ღირებულების ტექნიკა, მაგრამ აღმოჩნდა, რომ სამობილიზაციო რესურსი: არტილერია, ჭურვების რაოდენობა და დრონები, გაცილებით უფრო მნიშვნელოვანია. გაჩნდა ახალი ტერმინი – ომი გამოფიტვამდე“, – აღნიშნა რომან კაკულიამ.
