“ჩვენ დავიფიცეთ, რომ გავანადგურებთ „ჰამასს“ და ამის შესახებ ენტონი ბლინკენს ვუთხარით” – ბენიამინ ნეთანიაჰუ

ჩვენ დავიფიცეთ, რომ გავანადგურებთ „ჰამასს“ და ამის შესახებ ენტონი ბლინკენს ვუთხარით, – ამის შესახებ ისრაელის პრემიერ-მინისტრმა, ბენიამინ ნეთანიაჰუმ აშშ-ის სახელმწიფო მდივანთან, ენტონი ბლინკენთან შეხვედრის შემდეგ განაცხადა.

ისრაელის მთავრობის ხელმძღვანელის თქმით, ბრძოლა მთავარი მიზნების მიღწევამდე გაგრძელდება.

„ახლახან დავასრულე შეხვედრა აშშ-ის სახელმწიფო მდივანთან, ენტონი ბლინკენთან, მას შემდეგ, რაც „ჰამასის“ მკვლელებმა ისრაელის მოქალაქეები მოკლეს იერუსალიმში. მე ვუთხარი მას, რომ ეს არის იგივე „ჰამასი“, რომელმაც საშინელი ხოცვა-ჟლეტა მოაწყო 7 ოქტომბერს, იგივე „ჰამასი“, რომელიც ყველგან ცდილობს ჩვენს მოკვლას. ჩვენ ვუთხარით მას, რომ დავიფიცეთ, მე დავიფიცე, რომ მოვსპობ „ჰამასს“. ვერაფერი შეგვაჩერებს. ჩვენ გავაგრძელებთ ამ ომს, ვიდრე არ მივაღწევთ ჩვენს სამ მიზანს, რაც არის: ყველა ჩვენი მძევლის გათავისუფლება, „ჰამასის“ ბოლომდე აღმოფხვრა და იმის უზრუნველყოფა, რომ ღაზის მხრიდან ასეთი საფრთხის წინაშე აღარასოდეს ვიქნებით“, – განაცხადა ბენიამინ ნეთანიაჰუმ.

შეგახსენებთ, ორმა შეიარაღებულმა თავდამსხმელმა ცეცხლი გაუხსნა იერუსალიმის შესასვლელში, გაჩერებაზე მყოფ ხალხს. სროლის შედეგად სამი ადამიანი დაიღუპა. ისრაელის უსაფრთხოების სამსახურის ცნობით, თავდასხმა ორმა პალესტინელმა ძმამ განახორციელა, რომლებიც „ჰამასის“ წევრები არიან და წარსულში ტერორისტული საქმიანობისთვის იყვნენ დაპატიმრებული.