10 დან 27 ნოემბრის ჩათვლით, კომედიის თეატრალური ფესტივალი რუსთავის გიგა ლორთქიფანიძის სახელობის პროფესიულ მუნიციპალურ დრამატულ თეატრში ამჯერად უკვე მესამედ გაიმართა.
ფესტივალის შინაარსი დაარსების დღიდან უცვლელია. რეპერტუარში მხოლოდ კომედიური ჟანრის სპექტაკლები ერთიანდება.
როგორც “ჯორჯიან თაიმსს” აცხობეს, ფესტივალზე წელს რუსთავს თეატრალური 12 დასი ეწვია, ამასთანავე ფესტივალის ფარგლებში წელსაც, ისევე როგორც გასულ წელს ახალგაზრდა რეჟისორებისთვის კონკურსი გაიმართა, რომელში მონაწილეობაც, სტუდენტ და მაგისტრანტ რეჟისორებს შეეძლოთ. მათ კონკურსის ფარგლებში ევალებოდათ წარმოედგინათ ეპიზოდი კომედიური ჟანრის პიესიდან ეტიუდის სახით. კონკურსანტები სპეციალურად შერჩეულმა ჟიურიმ შეაფასა და გამარჯვებული ფესტივალის დახურვაზე, რუსთაველის თეატრის სპექტაკლის ,,ძუნწი“ დასრულების შემდეგ რუსთავის თეატრისა და კომედიის თეატრალური ფესტივალის სამხატვრო ხელმძღვანელმა სოსო ნემსაძემ დაასახელა. წლევანდელი ფესტივალის გამარჯვებული ახალგაზრდა რეჟისორი თეიმურაზ დვალია, რომელიც თეატრალური უნივერსიტეტის სარეჟისორო ფაკულტეტის სტუდენტია. გამარჯვებული რეჟისორის სპექტაკლი რუსთავის თეატრში დაიდგმება, მიღებული ჰონორარით კი ის სწავლის ერთი წლის საფასურს სრულად დაფარავს. კომედიის თეატრალურ ფესტივალზე წელს, 3 საუკეთესო რეჟისორული ნამუშევარი გამოვლინდა, რომლებსაც სურვილის შემთხვევაში სპექტაკლის დადგმა რუსთავის თეატრის მცირე სცენაზე შეეძლებათ. ასევე ფულადი პრიზით დაჯილდოვდა მსახიობი ვატო სანიკიძე.
კომედიის თეატრალური ფესტივალი 2023 -ზე წარმოდგენილმა სპექტაკლებმა სრული ანშლაგით ჩაიარა, ფესტივალი მაყურებელს ერთი წლით დაემშვიდობდა და უკვე შეუდგა საიუბილეო წლის სამზადისისთვის, მომავალ წელს კომედიის ფესტივალი 10 წლის იუბილეს იზეიმებს.
