![4b90ae84-7493-4e57-bc41-2f3c4bd7b595](https://geotimes.ge/wp-content/uploads/2023/11/4b90ae84-7493-4e57-bc41-2f3c4bd7b595-1068x534.jpg)
ავსტრიული გაზეთი „დერ სტანდარდი“ (Der Standard) ბეჭდავს სამხედრო მიმომხილველის ფლორიან ნიდერნდორფერის სტატიას სათაურით „უკრაინის წინასაზამთრო იმედგაცრუება: კონტრშეტევის კრახი და სიცივის მოლოდინი“.
გთავაზობთ პუბლიკაციას შემოკლებით:
ომის მეორე ზამთარი უკრაინაში მძიმე პროგნოზებით ახლოვდება, რაც პირდაპირი მნიშვნელობით უნდა გავიგოთ: უეჭველია, რომ რუსეთი შარშანდელივით ისევ გააგრძელებს უკრაინის კრიტიკული ინფრასტრუქტურის – ენერგოსისტემის ობიექტების დაბომბვას, რომელიც ისედაც დაზიანებული 20-თვიანი ომით. წინ უკრაინას ისევ სიბნელე და სიცივე ელოდება. არსებული მონაცემების თანახმად, ბოლო თვეებში რუსეთის არმია სპეციალურად აგროვებდა ამ მიზნით ასობით ფრთოსან რაკეტას, რომლებსაც ყირიმში ინახავს.
თუმცა ისიც გასათვალისწინებელია, რომ უკრაინის ჰაერსაწინააღმდეგო დაცვა ისეთი სუსტი არარ არის, როგორიც შარშან იყო. დასავლეთმა უკრაინის საჰაერო სივრცის ეფექტური გაკონტროლებისათვის კიევს თანამდროვე სისტემები გადასცა. შედეგიც არ აყოვნებს: რუსეთის მიერ გაშვებული დრონების უმეტეს ნაწილს უკრაინელთა რადარები დროულად პოულობენ, ხოლო სარაკეტო დანადგარები და საზენიტო ქვემეხები ასევე დროულად ანადგურებენ.
ამის მიუხედავად, ჯერ-ჯერობით უკრაინას არ ჰყოფნის ისეთი შეიარაღება, რომ რუსეთის არმიის მიწისქვეშა საწყობები გაანადგუროს (გერმანია უარს აცხადებს კიევისათვის „ტაურუსის“ რაკეტების გადაცემაზე), ამასობაში კი თბილი შემოდგომა იწურება და ცივი ზამთარი დგება: ფრონტის ხაზზე ჰაერის ტემპერატურა თანდათან ნულს უახლოვდება.
პოზიციური ომი ფრონტებზე
დღეს უკრაინის ფრონტებს, განსაკუთრებით სამხრეთის ფრონტის ჯარებს, რომლებიც კონტრშეტევის წარმატების შემთხვევაში ყირიმისა და აზოვის ზღვის სანაპიროს დაბრუნებას გეგმავდნენ, პოზიციური ომი ელოდება – ეს სწორედ ისაა, რაც კიეველ სამხედრო სტრატეგებს და მათ დასავლელ მოკავშირეებს არ მოსწონთ. მართალია, უკრაინის არმია ჯერ კიდევ აყენებს დარტყმებს რუსეთის გამაგრებულ პოზიციებს (მაგალითად, დნეპრის მარცხენა ნაპირზე), მაგრამ კიევის ძალები სუსტდება, განსაკუთრებით კონტრშეტევის ჩაშლის კვალობაზე.
ამჟამად უკრაინის არმიას იარაღის დიდი რაოდენობა ესაჭიროება. ამიტომაც უკრაინის ხელმძღვანელობა ცდილობს ისე მიუდგეს იარაღით მომარაგების საქმეს, რომ დასავლეთი აიძულოს და თავისი დაპირება შეასრულოს, კერძოდ, ამერიკული რაკეტების და F-16 ავიაგამანადგურებლების მიწოდების საქმეში.
დღეისათვის არც დასავლეთში და არც უკრაინაში არავინ აღარ ამბობს, რომ რუსეთის მიერ ოკუპირებულ ტერიტორიებს მთლიანად გაათავისუფლებენ და დაიბრუნებენ. მხედველობაშია მისაღები, რომ სანამ უკრაინის არმია დასავლეთის დახმარებას ელოდებოდა, რუსები გამალებული ტემპით აგებდნენ თავდაცვით ზღუდეებს ქვეყნის სამხრეთში – ხერსონისა და ზაპოროჟიეს ოლქების ტერიტორიებზე. რუსების მიერ შექმნილი „სუროვიკინის ხაზი“ ისეთი ძნელად მისადგომი აღმოჩნდა, რომ უკრაინის არმიამ ვერც ქალაქების – ტოკმაკისა და მელიტოპოლის დაკავება ვერ შეძლო და ბუნებრივია, ვერც აზოვის ზღვის ნაპირზე ვერ გავიდა, ყირიმზე და დონბასზე რომ არაფერი ვთქვათ.
მძიმე ზამთრისა და „სასწაულებრივი იარაღის“ მოლოდინში
უკრაინის ხელისუფლებაში არ მალავენ, რომ წინ ურთულესი ზამთარი ელოდებათ. „სიმართლეს გეუბნებით: ზამთარი ძალიან მძიმე იქნება“, – აცხადებს ანდრეი ერმაკი, პრეზიდენტის ოფისის ხელმძღვანელი. მართლაცდა, ქვეყნის კრიტიკული ინფრასტრუქტურა შარშანდელი დაბომბვებისაგან ჯერ წელში არ არის გამართული და თუ მას წლევანდელი დაბომბვების შედეგად მიყენებული ზიანიც დაემატება, მაშინ უკრაინელებს უარესი ბედი ელოდებათ.
ცხადია, მოსახლეობას მეტ-ნაკლებად უკვე მომარაგებული აქვს დიზელ-გენერატორები და საწვავი, ენერგეტიკოსებიც უქმად არ ისხდნენ და დაზიანებულ ობიექტებს აღდგენდნენ, მაგრამ ზაფხულის რამდენიმე თვეში ყველა დანგრეული თბოელექტროსადგურისა და გადამცემი ხაზების კაპიტალური აღდგენა შეუძლებელია. კიევს კიდევ დაჭირდება დიზელ-გენერატორები და სხვა დამხმარე საშუალებები, რათა თავიდან აიცილოს სრული კოლაფსი.
უკრაინას ჰაერსაწინააღმდეგო დაცვის განსამტკიცებლად და დაბომბვების თავიდან ასაცილებლად ერთგვარი „სასწაულებრივი იარაღი“ ჭირდება, რომელიც ეფექტურად დაბლოკავს რუსული დრონებისა და ფრთოსანი რაკეტების მოქმედებას, მაგრამ სადაა ასეთი იარაღი? ჯერ-ჯერობით, კიევი მკაცრი რეალობის წინაშე რჩება, გრძელდება იარაღის მწვავე დეფიციტი.
ვის აწყობს ომის გაჭიანურება?
კონტრშეტევის ჩაშლით გამოწვეული იმედგაცრუების ფონზე არის რამდენიმე დამაიმედებლი მოვლენა, რომელიც ოპტიმიზმისათვის მეტ-ნაკლებ საფუძველს იძლევა: უკრაინის არმია ცდილობს დნეპრის მარცხენა ნაპირზე გამაგრებას. ჯარისკაცებმა მოახერხეს დესანტის გადასხმა და უფრო მეტიც – წინ რამდენიმე კილომეტრითაც წაიწიეს. მართალია, თანამედროვე სადაზვერვო დრონებს დაპირისპირებული მხარეების გადაადგილებას ვერ გამოაპარებ, მაგრამ როგორც უკრაინული მხარე იუწყება, მდინარის მარცხენა ნაპირზე მათ მძიმე ტექნიკაც გადაიტანეს. ასე რომ, არ არის გამორიცხული მოვლენები უკრაინის არმიის სასარგებლოდ განვითარდეს.
ის ფაქტი, რომ რუსეთის არმია მძიმე დანაკარგებს განიცდის, როგორც ჩანს, მოსკოველ სამხედრო სარდლობას არ ადარდებს. რაც უფრო მეტად გაჭიანურდება ომი, მით უკეთესი იქნება კრემლისათვის – ვლადიმერ პუტინს იმედი აქვს, რომ უკრაინა ვერ გაუძლებს და საბოლოოდ დაქანცული ძირს დაეცემა.