საქართველოს თავდაცვის მინისტრმა, ჯუანშერ ბურჭულაძემ საკანონმდებლო ორგანოში „მინისტრის საათის“ ფორმატში სამხედრო მოსამსახურეების მიმართ მადლობის გადახდით დაიწყო მოხსენება.
როგორც ჯუანშერ ბურჭულაძემ განაცხადა, სწორედ ქართველი სამხედროები არიან ის ადამიანები, რომლებიც მზად არიან, ქვეყნის თავისუფლებისთვის, უსაფრთხოებისთვის და მშვიდობის დასაცავად გაიღონ ყველაზე მნიშვნელოვანი, მათი ჯანმრთელობა და სიცოცხლე.
„იყო შენი ქვეყნის ჯარისკაცი, არის ყველაზე საამაყო საქმე, რომელიც მოითხოვს ყოველდღიურ ძალისხმევას და თავგანწირვას“, – აღნიშნა მინისტრმა.
ჯუანშერ ბურჭულაძემ დაღუპული სამხედროები გაიხსენა, მოხსენების დასაწყისში მინისტრმა ასევე, მადლობა გადაუხადა დაჭრილ-დაშავებულ გმირებს და მათ უფრო მეტი მხარდაჭერა აღუთქვა.
„ჩვენი სამხედროები ბოლო წლების განმავლობაში სამაგალითოდ მსახურობდნენ ნატო-სა და ევროკავშირის საერთაშორისო მისიებში, მხარს უჭერდნენ სამოქალაქო სტრუქტურებს პანდემიის წინააღმდეგ ბრძოლაში, ჩვენს საამაყო მაშველებთან ერთად, მონაწილეობდნენ ბუნებრივი კატასტროფების სალიკვიდაციო სამუშაოებში. ჩვენ ყველამ ერთად ვნახეთ, რაჭის სტიქიის დროს, როგორ თავდაუზოგავად შრომობდნენ ისინი მაშველებთან ერთად სტიქიის შედეგების აღმოსაფხვრელად“, – განაცხადა ჯუანშერ ბურჭულაძემ.
მინისტრის თქმით, განსაკუთრებულ მადლობას უხდის თითოეულ სამხედრო მოსამსახურეს ღირსეული სამსახურისა და ქვეყნის ერთგულებისთვის. როგორც ჯუანშერ ბურჭულაძემ აღნიშნა, ქართული ჯარი და მისი შესაძლებლობები საქართველოს სიძლიერის ერთ-ერთი მნიშვნელოვანი ქვაკუთხედია.
