თუ გვინდა გვქონდეს ევროპული სახელმწიფო, პირველ რიგში პატივი უნდა ვცეთ კონსტიტუციას, – ამის შესახებ პარლამენტის ვიცე-სპიკერმა არჩილ თალაკვაძემ ჟურნალისტებს განუცხადა.
„საკონსტიტუციო რეფორმის შემდეგ, პირველად ხდება როდესაც სერიოზული დისკუსია წარმოიშვა ახალ კონსტიტუციასთან დაკავშირებით და მას ნამდვილად სჭირდება საკონსტიტუციო სასამართლოს სამართლიანი, კომპეტენტური და ამომწურავი დასკვნა. მე იმედი მაქვს, რომ ასეთიც იქნება სასამართლოს გადაწყვეტილება“, – აღნიშნა არჩილ თალაკვაძემ.
საკონსტიტუციო სასამართლომ პრეზიდენტის იმპიჩმენტის შესახებ წარდგინების განხილვა დაასრულა. პლენუმის დასკვნა პარლამენტს კონსტიტუციით დადგენილ ვადაში გადაეგზავნება, ასევე გამოქვეყნდება საკონსტიტუციო სასამართლოს ვებ-გვერდზე.
სასამართლოს მსჯელობის საგანი იყო დაარღვია თუ არა პრეზიდენტმა კონსტიტუცია, როდესაც საერთაშორისო ვიზიტებში მთავრობის თანხმობის გარეშე წავიდა.
