მოლდოვაში საპარლამენტო არჩევნები მიმდინარეობს. არჩევნებში ხუთი პარტია, ოთხი კოალიცია და ოთხი დამოუკიდებელი კანდიდატი მონაწილეობს. ისინი 101-ადგილიან პარლამენტში უმრავლესობის, ანუ 51 ადგილის მოპოვებას შეეცდებიან.
წინასწარი გამოკითხვები აჩვენებს, რომ ძირითადი დაპირისპირება ორ პოლიტიკურ ძალას შორის იქნება – მოქმედი პრეზიდენტის, მაია სანდუს პროევროპულ „მოქმედებისა და სოლიდარობის პარტიასა“ და ყოფილი პრეზიდენტის, იგორ დოდონის ხელმძღვანელობით მოქმედ პრორუსულ „პატრიოტულ ბლოკს“ შორის.
მედიის ინფორმაციით, ვარაუდობენ, რომ მიმდინარე საპარლამენტო არჩევნებში მმართველი პარტია უმრავლესობის მოპოვებას ვეღარ შეძლებს და იძულებული გახდება, კოალიცია შეკრას უფრო მცირე სუბიექტებთან, რომლებიც შესაბამის ბარიერს გადალახავენ.
საარჩევნო უბნები ადგილობრივი დროით 21:00 საათზე დაიხურება, ხოლო არჩევნების ოფიციალური შედეგები 29 სექტემბერს, ადგილობრივი დროით 15:00 საათზე გამოქვეყნდება.
