რუსთავის გიგა ლორთქიფანიძის სახელობის პროფესიული დრამატული თეატრი სოსო ნემსაძის სპექტაკლით „ფაბრიკის გოგოები“ ექსპერიმენტული სპექტაკლების მეშვიდე საერთაშორისო ფესტივალში „ბალაუსა“ მიიღებს მონაწილეობას. ფესტივალი მსოფლიოს სხვადასხვა თეატრალურ კოლექტივს აერთიანებს და თანამედროვე სცენური ხელოვნების ახალი ფორმების წარმოჩენას ისახავს მიზნად.
ფესტივალში რუსთავის თეატრის მონაწილეობა საშუალებას მისცემს ქართულ სცენას საერთაშორისო არენაზე წარმოაჩინოს როგორც სოსო ნემსაძის რეჟისორული ხედვა, ასევე თეატრის მრავალწლიანი გამოცდილება და შემოქმედებითი პოტენციალი.
სპექტაკლი „ფაბრიკის გოგოები“ რეჟისორ სოსო ნემსაძის თანამედროვე ინტერპრეტაციაა, რომელიც სოციალურ, პოლიტიკურ და ადამიანური ურთიერთობების თემებზე ამახვილებს ყურადღებას. რუსთავის თეატრის მრავალფეროვან რეპერტუარში „ფაბრიკის გოგოები“ გამორჩეულ ადგილს იკავებს და მისი ნახვა ქართველ მაყურებელს რუსთავის დრამატული თეატრის სცენაზე, თეატრის 59-ე სეზონზეც შეეძლება.
