უკრაინულმა არმიამ ტაქტიკურ წარმატებას მიაღწია ზაპოროჟიეს რეგიონში, – ამის შესახებ ამერიკის ომის შესწავლის ინსტიტუტი (ISW) იტყობინება.
დამკვირვებლების თქმით, 10 ივნისს უკრაინულმა ძალებმა კონტრშეტევითი ოპერაციები ჩაატარეს ფრონტის სულ მცირე ოთხ რაიონში. კერძოდ, უკრაინის შეიარაღებული ძალები აქტიურობდნენ ლუგანსკის რეგიონში, ბილოგორივკას რეგიონში, ბახმუტთან უკრაინის ჯარები დაწინაურდნენ, ასევე, დაწინაურდნენ დონეცკის და ზაპოროჟიეს რეგიონების საზღვარზე.
„10 ივნისს გამოქვეყნებული გეოლოკაციის კადრები მიუთითებს იმაზე, რომ უკრაინულმა ძალებმა ზაპოროჟიეს რეგიონის დასავლეთ ნაწილში მიაღწიეს ადგილობრივ წარმატებებს ორეხოვოს სამხრეთ-დასავლეთით და სამხრეთ-აღმოსავლეთით კონტრშეტევების დროს“, – აცხადებენ ექსპერტები.
ანალიტიკოსები აღნიშნავენ, რომ დადასტურებული უკრაინული წარმატებების ფონზე, რუსი „ბოევიკები“ აგრძელებენ მტკიცებას, რომ რუსული ძალები ამ ტერიტორიაზე წარმატებით იცავენ თავს უკრაინის თავდასხმისგან.
