2013 წლის დასაწყისში საპარლამენტო დელეგაცია ვიყავით ლიეტუვის სეიმში, გიორგი ვაშაძემ მითხრა, აბა, რა გეგონა, შეურაცხყოფა რომ მიაყენე პრეზიდენტსო, – ამის შესახებ ყოფილმა დეპუტატმა, ვალერი გელაშვილმა „2003-2012 წლებში მოქმედი რეჟიმისა და რეჟიმის პოლიტიკური თანამდებობის პირების საქმიანობის შემსწავლელი საგამოძიებო კომისიის“ სხდომაზე განაცხადა.
ვალერი გელაშვილმა ეს ფაქტი მას შემდეგ გაიხსენა, რაც კომისიის თავმჯდომარე თეა წულუკიანმა მიმართა, „ნაციონალური მოძრაობიდან“ ვინმემ მაინც თუ მოუხადა მას ბოდიში.
„ერთი ფაქტი იყო 2013 წლის დასაწყისში, როცა საპარლამენტო დელეგაცია ვიყავით წასული ლიეტუვის სეიმში. მაშინ დავით უსუფაშვილი იყო პარლამენტის თავმჯდომარე. ჩემს თავდასხმაზე ვსაუბრობდით და გიორგი ვაშაძემ მითხრა, აბა, რა გეგონა, შეურაცხყოფა რომ მიაყენე პრეზიდენტსო. პარლამენტში ვიყავით, თორემ პასუხს გავცემდი ვაშაძეს. ესე იგი, მათთვის ნორმაა ადამიანების წიხლებით ცემა“, – განაცხადა ვალერი გელაშვილმა.
