„ძალიან ბევრი კითხვის ნიშანია მის {გიორგი გახარია} გადადგომასთან დაკავშირებით. როდესაც მან პირველი განცხადება გააკეთა, იქ ნიკანორ მელია იყო ამის მიზეზი. დღესაც გაუგებრად პასუხობდა, რომ ეს ჩამოაქცევდა ქვეყანას. იყო ძალიან ბევრი საფრთხე, როდესაც ჩვენ ვიხილეთ, რომ აბსოლუტურად არცერთი თმის ღერი არავისგან ჩამოვარდნილა, ისე შეასრულა ეს ოპერაცია ბატონმა გომელაურმა“, – ამის შესახებ „დღის ქრონიკაში“ საპარლამენტო ფრაქცია „ქართული ოცნების“ თავმჯდომარის მოადგილემ, ლევან მაჭავარიანმა განაცხადა.
„შეგახსენებთ, რამდენიმე თვის წინ ჰქონდა ინტერვიუ, სადაც მან აბსოლუტურად სხვა მიზეზი დაასახელა თუ რატომ ჩამოშორდა ჩვენ გუნდს. იქ მან ახსენა, რომ კორუფციის ნიშებს ვხედავდი „ქართულ ოცნებაშიო“, ამიტომ, დავტოვე ეს გუნდიო და დღეს საერთოდ ბიძინა ივანიშვილს აბრალებს იმას, რომ ოპოზიციაშია გადასული. ეს ყველაფერი, ძალიან ურთიერთგამომრიცხავია და მადლობა ღმერთს, ყველაფრის არქივი არსებობს. დღესაც ყველა უყურებს ამ ყველაფერს.
შესაბამისად, ვისაც სურს, რომ ობიექტური დასკვნა გამოიტანოს ამ ყველაფრიდან, ობიექტური დასკვნა ის არის, რომ ეს კაცი იქ მივიდა იმისთვის, რათა ან ტყუილი ელაპარაკა, ან რაზეც იცოდა, რომ მაშინვე ამხელდნენ იმ ტყუილში, ეთქვა უბრალოდ – „არ მახსოვს,“ – განაცხადა ლევან მაჭავარიანმა.
ამასთან, მაჭავარიანის განცხადებით, კომისიის დღევანდელ სხდომაზე გახარიამ ბევრი ურთიერთგამომრიცხავი განცხადება გააკეთა.
„ბატონმა გახარიამ დღეს უამრავი ურთიერთგამომრიცხავი განცხადება გააკეთა. 20 ივნისი, რითაც დაიწყო დღევანდელი სხდომა, დარწმუნებული ვარ რომ ნახევარი საქართველო უყურებს და ჩვენი მოქალაქეები ძალიან კარგად გაიაზრებენ.
ძალიან ბევრი რამ არის გაურკვეველი. მაგალითად, რატომ გამოიყენეს თავდაპირველად რეზინის ტყვიები. როდესაც ბატონი გახარია ბევრ ეთერში ამბობდა იმას, რომ ყველა ბრძანება მის მიერ იყო გაცემული, დღეს რატომღაც თქვა, რომ რეზინის ტყვიებთან დაკავშირებით საქმის კურსში არ იყო.
ძალიან გასაკვირია, რატომ არ გამოიყენა ჯებირები და რატომ დაუპირისპირა პოლიცია პირდაპირ მოქალაქეებს. ბატონ გახარიას თუ არ ჰქონდა ამ ყველაფრის გამოცდილება, მას შეეძლო უფრო გამოცდილი ხალხისთვის ეკითხა, იგივე ბატონი გომელაურისთვის. ეგეც ვერ გაიხსენა დღეს რა თემაზე ესაუბრა და როდის ესაუბრა.
დაიბნა, რადგან ძალიან პროფესიონალურად დაუსვეს შეკითხვები და შესაბამისად, ძალიან დაბნეულად გამოიყურებოდა“, – აცხადებს მაჭავარიანი.
