გუშინ სალომე ზურაბიშვილმა განაცხადა, რომ საქართველოსთვის ერთადერთი მშვიდობიანი გზა ახალი არჩევნებია, რითაც ის საქართველოს მოსახლეობის უმრავლესობას სისხლისღვრით დაემუქრა, თუ ისინი არ დათმობენ 26 ოქტომბერს გაკეთებულ არჩევანს, – ამის შესახებ საქართველოს პარლამენტის თავმჯდომარემ, შალვა პაპუაშვილმა დღევანდელ ბრიფინგზე განაცხადა.
პაპუაშვილის თქმით, „საქართველოს დამოუკიდებლობის განმავლობაში ბევრი ავი რამ გვინახავს, თუმცა პირველად ვართ მომსწრე, რომ საქართველოს მოქმედი პრეზიდენტი მოსახლეობას სისხლისღვრით ემუქრება“.
„თავისი პრეზიდენტობის მიწურულს, სალომე ზურაბიშვილმა მორიგ ჯერზე გადაწყვიტა არა მხოლოდ სახელმწიფო ინსტიტუტების მოშლა და მორყევა, არამედ ქვეყანაში მსოფლიოს დასანახად სამარცხვინო არეულობისა და ფარსის მოწყობა. გუშინ სალომე ზურაბიშვილმა განაცხადა, რომ საქართველოსთვის ერთადერთი მშვიდობიანი გზა ახალი არჩევნებია, რითაც ის საქართველოს მოსახლეობის უმრავლესობას სისხლისღვრით დაემუქრა, თუკი ისინი არ დათმობენ 26 ოქტომბერს გაკეთებულ არჩევანს. ჩვენი დამოუკიდებლობის განმავლობაში ბევრი ავი რამ გვინახავს, თუმცა პირველად ვართ მომსწრე იმისა, რომ საქართველოს მოქმედი პრეზიდენტი მოსახლეობას სისხლისღვრით ემუქრება. ჩვენ უნდა გვახსოვდეს, რომ სალომე ზურაბიშვილი არის გამტყუნებული იმპიჩმენტის პროცესში, თუმცა მთავარი პოლიტიკური და მორალური დანაშაული, რაც მან ჩაიდინა, ესაა არჩევნებში მოსახლეობის მიერ გამოხატული ნების არცნობა, რითაც მისთვის არასასურველი და მიუღებელი შედეგის აყირავება სცადა. სალომე ზურაბიშვილი იქცა კიდევ ერთ პრეზიდენტად, რომელიც პირდაპირაა დაკავებული საკუთარი ქვეყნის უცხო გავლენებისთვის ჩაბარებით. იგი მოქმედებს ზუსტად იმავე ძალების მიერ დაწერილი იდენტური სცენარით, რაც მისი ერთ-ერთი წინამორბედისთვის შეიქმნა. გავიხსენოთ 2021 წლის ადგილობრივი არჩევნები. გავიხსენოთ ზუსტად არჩევნების ღამისთვის საარჩევნო შედეგის ამოსატრიალებლად, დადასტურებულად უცხო ქვეყნის სპეცსამსახურების ორგანიზებით საქართველოში შემოპარებული ყოფილი პრეზიდენტი სააკაშვილი. ახლაც ვხედავთ, რომ ქვეყნის დესტაბილიზაციის და რევოლუციური პროცესის განსავითარებლად შერჩეულია ქვეყნის ყოფილი მაღალჩინოსნები, შერჩეულია არჩევნების პროცესი, შერჩეულია ადგილობრივი უცხო ძალის გავლენის ქვეშ მოქმედი ჯგუფები. ხელწერა არის აბსოლუტურად იგივე. ცრუ პრეზიდენტი ზურაბიშვილი არ ცნობს სამართლიანად ჩატარებულ არჩევნებს, სადაც თავისუფლად გამოიხატა 2 მილიონ 60 ათასი მოქალაქის ნება; არ ცნობს ქართველი ხალხის არჩევანს, არჩეულ ხელისუფლებას, არჩეულ პრეზიდენტს. უცხო ქვეყნებისგან ითხოვს მხარდაჭერას ანტიკონსტიტუციური, ძალადობრივი პროცესების წასახალისებლად. საკუთარი ქვეყანა, რომელიც მისთვის საბოლოოდ ვერ იქცა სამშობლოდ, მისი ხელიდან განწირულია არეულობისთვის, დესტაბილიზაციისთვის და ქაოსისთვის. საბედნიეროდ, დღევანდელ ხელისუფლებას ყველანაირი ბერკეტი აქვს, რათა არ დაუშვას მტრული ძალების შავბნელი ზრახვების ასრულება. ამ საქმეში საქართველოს ხელისუფლების მთავარი დასაყრდენი ქართველი ხალხია, რომელმაც ამ დღეების განმავლობაში კიდევ ერთხელ დაახანა ყველას შინ თუ გარეთ, რომ კარგად ხვდება თუ რა პროცესებთან გვაქვს საქმე და რადიკალური ოპოზიცია რამდენიმე ასეულ მხარდამჭერთან მარტოდ დატოვა“, – აღნიშნა პაპუაშვილმა.
