ევროკომისიის პრეზიდენტის ურსულა ფონ დერ ლაიენის განცხადებით, ევროკომისია ახალ ინიციატივაზე მუშაობს, რომლითაც ევროკავშირიდან უფრო მეტი მიგრანტის დეპორტაცია იგეგმება.
ამის შესახებ ფონ დერ ლაიენის წერილშია ნათქვამი, რომელშიც ევროკომისიის პრეზიდენტი აცხადებს, რომ ამჟამად ევროკავშირიდან სამშობლოში არალეგალი მიგრანტების დაბრუნების მაჩვენებელი მხოლოდ 20%-ს შეადგენს, რაც იმას ნიშნავს, რომ თავშესაფრის მაძიებელთა უმრავლესობა, რომლებიც ვალდებულნი არიან ევროკავშირი დატოვონ, ამას არ აკეთებს.
ევროკომისიის პრეზიდენტი წერილში ასევე აღნიშნავს, რომ ევროკავშირს შეუძლია, გამოიტანოს დასკვნა იტალიისა და ალბანეთის მიერ შემუშავებული სქემიდან, რომლის მიხედვითაც, ზღვაში გადარჩენილი მიგრანტების ნაწილს დროებით ალბანეთში გახსნილ ცენტრებში გადაიყვანენ, სადაც ისინი თავშესაფრის მიღების შესახებ განაცხადის დამუშავების პერიოდში დარჩებიან.
BBC-ის ინფორმაციით, იტალიისა და ალბანეთის მიერ შემუშავებული სქემით ევროკავშირის სხვა წევრი სახელმწიფოებიც დაინტერესდნენ. ნიდერლანდების მთავრობა განიხილავს გეგმას, რომლის მიხედვითაც, უგანდაში უნდა გაგზავნონ ის მიგრანტები, რომლებსაც თავშესაფრის მიღებაზე უარს ეტყვიან.
