ნიდერლანდებმა უკრაინას F-16-ის ტიპის ავიაგამანადგურებლების პირველი პარტია გადასცა. სამხედრო დახმარება ქვეყნის თავდაცვის მინისტრმა, რუბენ ბრეკელმანსმა დაადასტურა, რომელიც დაუანონსებელი ვიზიტით, გუშინ უკრაინაში ჩავიდა. მინისტრმა ისიც აღნიშნა, რომ დაპირებული 24 თვითმფრინავიდან დანარჩენი F-16 -ები უკრაინას უახლოეს თვეებში მიეწოდება, ასევე ნიდერლანდები უკრაინასთან დრონების წარმოებაში 400 მილიონ ევროს ჩადებს.
„ოფიციალურად ვადასტურებ, რომ ნიდერლანდებმა ცოტა ხნის წინ უკრაინას, ნიდერლანდური F-16-ების პირველი პარტია გადასცა. ისინი უკვე უკრაინის საჰაერო სივრცეშია. ასევე ვაცხადებ, რომ ჩვენ გვაქვს უკრაინისთვის დრონების მიწოდების სამოქმედო გეგმა. ამისთვის ნიდერლანდებმა 400 მილიონი ევროს ოდენობით ინვესტიცია გამოყო. მე ვიყავი ხარკოვში, ქალაქის დაცვის ერთადერთი საშუალება, რუსეთის სამხედრო ობიექტების მწყობრიდან გამოყვანაა. ამისთვის კი, დრონებია საჭირო. ომი ყოველდღიურად უფრო აქტიურდება და უკრაინას მეტი და უწყვეტი სამხედრო მხარდაჭერა სჭირდება“, – აღნიშნა ბრეკელმანსმა.
