„ქართული ოცნება“ 14 მილიარდ ევროზე მეტ ზიანს აყენებს ქვეყანას არასწორი პოლიტიკით, უბრალოდ, „ნაცებს“ ყოველთვის არ გააჩნიათ კვალიფიკაცია და სწორად არ აკრიტიკებენ, – ამის შესახებ „გირჩის“ ლიდერმა, იაგო ხვიჩიამ განაცხადა.
მისივე თქმით, საქართველო კარგავს იმ რეპუტაციას, რომელიც აქვს, როგორც ევროპისკენ მიმავალ ქვეყანას.
„მგონია, 14 მილიარდ ევროსთან დაკავშირებით ყველაფერი მთლად ზუსტი არ იყო, იქიდან გამომდინარე, რომ ეს მარტო საქართველოს ფული არ არის, კონკრეტულ პროექტებს ეხება. ასევე, მგონია, ეს არ ნიშნავს, რომ „ქართული ოცნება“ გასაკრიტიკებელი არ არის. ისინი 14 მილიარდზე მეტ ზიანს აყენებენ ქვეყანას საკუთარი არასწორი პოლიტიკით ჩვენს პარტნიორებთან. უბრალოდ, „ნაცებს“ ყოველთვის არ გააჩნიათ კვალიფიკაცია და სწორად არ აკრიტიკებენ, თორემ განა 14 მილიარდზე მეტით არ არიან „ქოცები“ გასაკრიტიკებლები? ის 14 მილიარდი, რაზეც ლაპარაკობენ, ყველა საქართველოსი არ არის.
მე ამ კამპანიას სრულად ვერ ვადევნე თვალი, მაგრამ ევროკავშირთან დაახლოების ფულად ღირებულებებზე გადაყვანა და რაოდენობებში თვლა, მგონი, სწორი არ არის. ჩვენ ბევრად მეტ მორალურ ზიანს ვიღებთ და ვკარგავთ იმ რეპუტაციას, რომელიც გაგვაჩნია, როგორც ევროპისკენ მიმავალ ქვეყანას. ეს, ცხადია, ბევრ პრობლემას გამოიწვევს, მათ შორის, საინვესტიციო გარემოს თვალსაზრისით. ასე პირდაპირ დათვლა, ეს 14 მილიარდია თუ სხვა, მე მგონი, ცოტა რთულია, შეიძლება, უფრო მეტიც იყოს“, – აღნიშნა ხვიჩიამ.
