კრემლს ეჭვი არ ეპარება, რომ რუსეთის პრეზიდენტის განცხადება რუსეთის ტერიტორიის სიღრმეში დასავლური იარაღით დარტყმების შესაძლო შედეგების შესახებ ადრესატებამდე მივიდა, – ამის შესახებ კრემლის პრესმდივანმა, დიმიტრი პესკოვმა ჟურნალისტებთან საუბრისას განაცხადა.
„ეჭვი არ გვეპარება, რომ ამ განცხადებამ ადრესატებამდე მიაღწია“, – განაცხადა პესკოვმა.
რუსეთის პრეზიდენტის პრესმდივნის თქმით, პუტინის სიტყვები გამორიცხავს რამე არასწორ ინტერპრეტირებას.
„პუტინის მიერ გუშინ გაკეთებული განცხადება ძალიან მნიშვნელოვანია. ის არის უკიდურესად მკაფიო, ცალსახა და არ უშვებს არანაირ ორმაგ განმარტებას“, – აღნიშნა პესკოვმა.
ვლადიმერ პუტინის განცხადებით, უკრაინის შეიარაღებულ ძალებს თუ დართავენ ნებას, დასავლური იარაღით რუსეთის ტერიტორიის სიღრმეში განახორციელონ დარტყმები, ეს ნიშნავს ნატო-ს, აშშ-სა და ევროპული ქვეყნების პირდაპირ მონაწილეობას ომში. მისი თქმით, ეს არსებითად ცვლის კონფლიქტის არსს.
„ეს იქნება იმის მანიშნებელი, რომ ნატო-ს ქვეყნები, აშშ, ევროპული ქვეყნები ომობენ რუსეთთან და თუ ასეა, მაშინ, ამ კონფლიქტის არსის ცვლილების გათვალისწინებით, ჩვენ მივიღებთ შესაბამის გადაწყვეტილებებს შექმნილი საფრთხეებიდან გამომდინარე“, – განაცხადა პუტინმა.
