„მთავარი არხის“ დამფუძნებელი ნიკა გვარამია პარტიულ თანამდებობას უახლოეს დღეებში დაიკავებს. აღნიშნულის შესახებ ინფორმაციას თავად გვარამია სოციალურ ქსელში ავრცელებს.
გვარამია ამბობს, რომ „მთავარ არხში“ 12%-იანი წილის ქონა, არ იყო თავსებადი პარტიულ თანამდებობასთან.
„მთავარი არხის დირექტორის თანამდებობას ციხიდან გამოსვლის შემდეგ აღარ ვასრულებ (არც ციხიდან ვასრულებდი, ცხადია). დირექტორის მოვალეობას შესანიშნავად გაუმკლავდა გიორგი გაბუნია და ის უკვე ოფიციალურად დაინიშნა არხის დირექტორად. ძალიან დიდი მადლობა არხის ყველა დამფუძნებელს ერთსულოვანი გადაწყვეტილებისთვის.
რაც შეეხება ჩემს 12%-იან წილს მთავარში, იგი არაა თავსებადი პარტიულ თანამდებობასთან, რომელსაც უახლოეს დღეებში დავიკავებ. ამიტომაც კანონის მოთხოვნა დავიცავი და წილი ჩემს სოფოს გადავუფორმე. წარმატებები მთავარს, დანარჩენზე – შემდეგ კვირაში“, – აცხადებს გვარამია.
ინფორმაციისთვის, „მთავარი არხის“ დამფუძნებელი და გენერალური დირექტორი ნიკა გვარამია ამავე ტელევიზიაში თავის წილსა და პოსტს ტოვებს.
„მთავარი არხის“ პარტნიორთა კრების ოქმის მიხედვით, ნიკა გვარამია თავის 12%-იან წილს უსასყიდლოდ გადასცემს თავის მეუღლეს, სოფო ლილუაშვილს, კომპანიის გენერალური დირექტორი კი, გიორგი გაბუნია გახდება.
