უკრაინაში ომის შემდგომი რეკონსტრუქციის ღირებულება 486 მილიარდ ამერიკულ დოლარს შეადგენს, – ამის შესახებ ინფორმაციას მსოფლიო ბანკი ავრცელებს.
მსოფლიო ბანკის, გაერო-სა და ევროკომისიის ერთობლივი კვლევის მიხედვით, უკრაინაში ომის შემდგომი რეკონსტრუქციის ღირებულება გასული წლის ბოლოსთვის 75 მილიარდი დოლარით გაიზარდა და საერთო ჯამში 486 მილიარდ დოლარს შეადგენს.
კვლევა უკრაინაში რუსეთის შეჭრიდან, 2022 წლის 24 თებერვლიდან 2023 წლის 31 დეკემბრამდე პერიოდს მოიცავს.
„486 მილიარდი ამერიკული დოლარი წარმოუდგენლად დიდი თანხაა და, რა თქმა უნდა, ის რეალურ საჭიროებებს ასახავს“, – განაცხადა მსოფლიო ბანკის აღმოსავლეთ ევროპის ქვეყნების რეგიონულმა დირექტორმა, არუპ ბანერჯიმ.
მსოფლიო ბანკის კვლევის მიხედვით, 2024 წლისთვის უკრაინას ყველაზე გადაუდებელი საჭიროებების აღდგენისთვის 15 მილიარდი დოლარი ესაჭიროება. აღნიშნული თანხის მესამედი საერთაშორისო პარტნიორებისა და თავად უკრაინის სახელმწიფო ბიუჯეტის მიერ უკვე უზრუნველყოფილია. დარჩენილი ნაწილი კი ჯერ კიდევ დაუფინანსებელია.
კვლევაში ნათქვამია, რომ ომმა ყველაზე დიდი გავლენა საცხოვრებელ, სატრანსპორტო, სავაჭრო, სამრეწველო, ენერგეტიკისა და სოფლის მეურნეობის სექტორებზე იქონია. გეოგრაფიული თვალსაზრისით, ომის შედეგად, ყველაზე მეტად დონეცკის, ხარკოვის, ლუგანსკის, ზაპოროჟიეს, ხერსონისა და კიევის ოლქები დაზარალდა.
