ამ საერთო [ოპოზიციის ერთიანი საარჩევნო] სიის შემადგენელი ნაწილების 99% იქნება სხვადასხვა ფორმით დაშლილი “ნაციონალური მოძრაობა” – ვინ არის ეს ოპოზიცია: ორთოდოქსი “ნაციონალური მოძრაობა” ხაბეიშვილი, რევიზიონისტი “ნაციონალური მოძრაობა” გვარამია და მელია, “ნაციონალური მოძრაობასთან” მჭიდროდ აფილირებული და ხშირ შემთხვევაში მისი ჩამნაცვლებელი “ლელო”, ოპორტუნისტი “ნაციონალური მოძრაობა” გირჩი ჯაფარიძე. ეს არის “ნაციონალური მოძრაობა”, – ამის შესახებ საპარლამენტო უმრავლესობის დეპუტატმა, ირაკლი ქადაგიშვილმა განაცხადა.

ქადაგიშვილის შეფასებითვე, ოპოზიციის შესაძლო ერთიან სიას არჩევნებისთვის რაიმე სიახლე ქართული პოლიტიკისთვის ვერ ექნება.

“ამ საერთო [ოპოზიციის ერთიანი საარჩევნო] სიის შემადგენელი ნაწილების 99% იქნება სხვადასხვა ფორმით დაშლილი “ნაციონალური მოძრაობა”. აქედან გამომდინარე, რა თქმა უნდა, ეს იქნება ისევ ერთ ელექტორატზე კონცენტრირებული საარჩევნო სია თავისი სალომე ზურაბიშვილის მფარველობით. აქედან გამომდინარე, ამ სიას განსაკუთრებული სიახლე ქართულ პოლიტიკაში ვერ ექნება. როგორი წინასაარჩევნო ტაქტიკა სჯობია, მე ამას არ ვურჩევ.

კიდევ ერთხელ ჩამოვთვლი ვინ არის ეს ოპოზიცია. ორთოდოქსი “ნაციონალური მოძრაობა” ხაბეიშვილი, რევიზიონისტი “ნაციონალური მოძრაობა” გვარამია და მელია, “ნაციონალური მოძრაობასთან” მჭიდროდ აფილირებული და ხშირ შემთხვევაში მისი ჩამნაცვლებელი “ლელო”, ოპორტუნისტი “ნაციონალური მოძრაობა” გირჩი ჯაფარიძე. ეს არის “ნაციონალური მოძრაობა”. იმ “ლელოს” სამი პროცენტი რომ ჰქონდა, შეიძლება ისიც ვეღარ მიიღოს იმიტომ, რომ მისი ამომრჩევლის დიდ ნაწილს, რომელსაც “ლელო” რაღაცა სხვა ეგონა, სულ არ უნდა “ნაციონალურ მოძრაობაში” რომ იყოს მისი სამი პროცენტი პორტირებული. ეს არის საბოლოოდ ერთ ამომრჩეველზე გათვლილი ან სია ან ნაწილ-ნაწილ მოქმედება”, – აღნიშნა ქადაგიშვილმა.

„თუკი ჩვენ დავინახავთ კონკრეტულ ნაბიჯებს სტრატეგიული პარტნიორის მხრიდან, გამჭვირვალობის კანონის აუცილებლობაც აღარ იქნება“, – ასე გამოეხმაურა თბილისის მერი კახა კალაძე ჟურნალისტებთან საუბრისას აშშ-ის კონგრესში საქართველოსთან დაკავშირებით დარეგისტრირებულ კანონპროექტს.

კითხვაზე, „ქართული ოცნების“ პოლიტსაბჭოს დღევანდელი განცხადება არის თუ არა მკაფიო უარი აშშ-ის შემოთავაზებაზე, კახა კალაძე პასუხობს, რომ პირიქით, ეს არის დასტური, რომ „თუ ვინმეს რამის გაკეთება უნდა, ამის წინააღმდეგი არავინაა“.

„ეს არის მკაფიო დასტური იმისა, რომ თუ ვინმეს რაიმეს გაკეთება უნდა, აბსოლუტურად არავის აქვს წინააღმდეგობა ამასთან მიმართებით. მინდა, ცოტა უკან დავბრუნდე და კიდევ ერთხელ ხაზი გავუსვა, რომ არასამთავრობო ორგანიზაციების გამჭვირვალობის კანონი, რომელიც მივიღეთ, რატომ იყო მნიშვნელოვანი: ჩვენ ბოლო წლების განმავლობაში ვნახეთ არაერთი რევოლუციის მცდელობა არასამთავრობო ორგანიზაციების ჩართულობით, პირდაპირი მოწოდებები და განცხადებები არასამთავრობო ორგანიზაციების მხრიდან, რომ მთავრობა უნდა გადადგეს. ნორმალურ ქვეყნებში წარმოუდგენელია, რომ არასამთავრობო ორგანიზაცია კადრულობდეს იმას, რასაც საქართველოში აკეთებენ. ასევე კარგად გვესმის, ვისი დაფინანსებით ხდება ეს ყველაფერი, ვინ არიან ის დონორი ორგანიზაციები, ვინც დგას ამ ყველაფრის უკან. შესაბამისად, გამჭვირვალობა არის მნიშვნელოვანი, რომ საზოგადოებამ იცოდეს, ვისგან ფინანსდებიან და რა პროექტებში იხარჯება ეს თანხები.

ჩვენ ასევე გვიწევს თავის და ქვეყნის დაცვა იმ განცხადებებისგან, რომელიც მოდის დასავლეთიდან, რომელიც აბსოლუტურად აცდენილია რეალობას, არის შეურაცხმყოფელი განცხადებები. ჩვენი მხრიდან, რა თქმა უნდა, არის პასუხები. თუკი ჩვენს სტრატეგიულ პარტნიორს აქვს სურვილი, რომ იყოს უვიზო მიმოსვლა, პირდაპირი ფრენები, თავისუფალი ვაჭრობის შეთანხმება მოხდეს, ჩვენ აბსოლუტურად ღია ვართ, მივესალმებით ამ ყველაფერს და ეს არ უნდა დარჩეს უბრალო სიტყვებად, არამედ გადაიდგას კონკრეტული ნაბიჯები. ასევე, მიუღებელია ის შანტაჟი, რომელიც ევროკავშირთან მოლაპარაკებების გახსნასთან დაკავშირებით ხდება, გადაიდგას კონკრეტული ნაბიჯები – ეს არის მოლაპარაკებების გახსნა, ვიზალიბერალიზაცია ამერიკასთან, სავაჭრო ურთიერთობების გაღრმავება, პირდაპირი ფრენები. თუ ეს მიდგომა და დამოკიდებულება იქნება და სტრატეგიული პარტნიორისგან დავინახავთ არა მხოლოდ სიტყვებით, რადგან ჯერ არავინ იცის, ეს ინიციირებული კანონპროექტი სად იქნება და რა დონემდე მივა, მაგრამ თუკი ჩვენ დავინახავთ კონკრეტულ ნაბიჯებს, რომელიც შეუძლიათ გადადგან, რა თქმა უნდა, კანონის აუცილებლობაც არ იქნება საჭირო“, – განაცხადა კახა კალაძემ.

მისივე თქმით, ამ მიმართულებით გადადგმული კონკრეტული ნაბიჯი იმის მანიშნებელი იქნება, რომ არის სურვილი, ურთიერთობები დალაგდეს და დამშვიდდეს და ისეთი იყოს, როგორც პარტნიორებს შეესაბამება.

„ბურთი მათ მხარესაა. მთელი ამ ხნის განმავლობაში, მოყოლებული 2012 წლიდან დღემდე, თქვენ ვერ მოიყვანთ ვერც ერთ მაგალითს, რომ ჩვენ რაიმე არასწორი გაგვეკეთებინოს ან ისეთი ნაბიჯები გადაგვედგას, რაც რუსულ ინტერესში შედის. პირიქით, თუკი რაიმე წარმატებას მივაღწიეთ ევროინტეგრაციის გზაზე, ყველაფერი მოხდა „ქართული ოცნების“ ხელისუფლების პირობებში. რაც შეეხება რიტორიკას. ჩვენ გვიწევს დავიცვათ ჩვენი ქვეყანა და საკუთარი მოსახლეობა იმ აბსურდული და შეურაცხმყოფელი განცხადებებისგან, რასაც ვისმენთ ბოლო თვეების განმავლობაში“, – აღნიშნა თბილისის მერმა.

პირდაპირ იკვეთება კონსტიტუციის დარღვევა იმიტომ, რომ არანაირი ახსნა-განმარტება არ არის გაკეთებული, თუ რატომ იქნა დადებული ვეტო, – ასე შეაფასა თბილისის მერმა, კახა კალაძემ პრეზიდენტის მიერ „უცხოური გავლენის გამჭვირვალობის შესახებ“ კანონპროექტზე ვეტოს დადება.

კალაძის განცხადებით, პრეზიდენტმა ამ გადაწყვეტილებით კანონპროექტზე მსჯელობის ყველა შესაძლებლობა ჩაკეტა.

„შეურაცხმყოფელი იყო ის, რომ ერთი დღით მივიღოთ კანონიო, რაც ეწერა, თუმცა ყველაფერ ამის მიუხედავად, ჩვენ შევძლებთ ვეტოს დაძლევას. ვეტოთი იყო შესაძლებლობა, ყოფილიყო მსჯელობა, დეტალებში შევსულიყავით, თუ იქნებოდა სამართლებრივი შენიშვნები კანონთან დაკავშირებით გაგვეთვალისწინებინა, თუ იქნებოდა რაიმე კონკრეტული არგუმენტი კანონთან დაკავშირებით, რატომ შეიძლება იყოს ცუდი, რატომ ეწინააღმდეგება ევროპულ ღირებულებებს და ევროპულ მომავალს, შეიძლება ეს ყველაფერი გაგვეთვალისწინებინა, თუმცა მან მიიღო ეს გადაწყვეტილება, ჩაკეტა ყველაფერი და შეუძლებელი გახადა ამ ყველაფრის ირგვლივ მსჯელობა. ერთი მხრივ, გასაგებია იმიტომ, რომ არანაირი არგუმენტი არ არსებობს ბუნებაში, ვინმემ წარმოადგინოს, რატომ არის გამჭვირვალობა ცუდი ან რატომ შეიძლება ევროპულ ღირებულებებს ეწინააღმდეგებოდეს, ამის არგუმენტი არ არსებობს და ამიტომ იყო ეს გადაწყვეტილება მისი მხრიდან მიღებული“, – განაცხადა კალაძემ.

გარდა ამისა, თბილისის მერმა აღნიშნა, რომ ახლა ბურთი არის პარტნიორების მხარეს, რომლებმაც კალაძის განმარტებით, შანტაჟი უნდა შეწყვიტონ და ამ კანონპროექტის აუცილებლობაც დღის წესრიგში არ დადგება. “ბურთი არის მათ მხარეს, მათ შეუძლიათ ხვალვე გადადგან ნაბიჯები და კონგრესის ჩართულობის გარეშე მიიღონ გადაწყვეტილება უვიზო მიმოსვლასთან, ვიზალიბერალიზაციასთან, სავაჭრო ურთიერთობების გაღრმავებასთან, ინვესტიციების ჩადებასთან, პირდაპირ ფრენებთან დაკავშირებით. ევროკავშირის შანტაჟი შეწყდეს და ამ კანონის აუცილებლობა, მერწმუნეთ, დღის წესრიგში არ იქნება”,-განაცხადა კალაძემ.

ამ რადიკალურ ქმედებებში, რომელიც დღეს ქვეყანაში ხდება, დავით კეზერაშვილის თანხებიც არის ჩართული, – ამის შესახებ დედაქალაქის მერმა, კახა კალაძემ მედიასთან ისაუბრა.

მისი თქმით, ქვეყანაში წამოწყებული საპროტესტო ტალღის უკან ასევე, დგანან კონკრეტული არასამთავრობო ორგანიზაციები, რომლებიც უცხოეთიდან ფინანსდებიან.

„პროტესტი, რაც წინა დღეების განმავლობაში იყო, ცხადია მართულია. ვიცით, ამ ყველაფრის უკან ვინ დგანან – კონკრეტული არასამთავრობო ორგანიზაციები, რომლებიც უცხოეთიდან ფინანსდებიან. ასევე, ამ რადიკალურ ქმედებებში ჩართულია დავით კეზერაშვილის თანხები.

რა თქმა უნდა, ეს ყველაფერი წამგებიანია. არასდროს ამ ქვეყანაში რადიკალიზმი არ და ვერ გაიმარჯვებს. თუ ვინმეს უნდა ხელისუფლების ცვლილება, არ მოსწონს აღნიშნული კანონი, ამისთვის არსებობს არჩევნები. თუ აქვთ მხარდაჭერა, არჩევნების გზით ცივილურად და დემოკრატიულად შეუძლიათ ხელისუფლება შეცვალონ და მიიღონ ისეთი კანონი, რომელიც მათთვის არის მისაღები. თუმცა, აქაც ძალიან კარგად იციან, რომ მათ საზოგადოების მხრიდან არანაირი მხარდაჭერა არ აქვთ“, – განაცხადა თბილისის მერმა.

მისივე თქმით, ხელისუფლება ყველაფერს გააკეთებს, რომ ქვეყანაში მშვიდობა შენარჩუნდეს და არ მოხდეს ის, რაც უკრაინაში მოხდა.

„მოსახლეობის უმრავლესობა მხარს უჭერს „ქართულ ოცნებას“ და იმ პოლიტიკას, რომელსაც ეს პარტია ატარებს. ყველა კარგად ხედავს, რომ დღეს, ქვეყანა საფრთხის წინაშე დგას. ამიტომაც მნიშვნელოვანია, შევინარჩუნოთ მშვიდობა და არ მოხდეს ის, რაც უკრაინაში მოხდა. ეს იქნება ჩვენი ქვეყნისთვის უმძიმესი ფაქტი. ჩვენ ყოველთვის ქვეყნის სადარაჯოზე ვიდგებით“, – აღნიშნა კახა კალაძემ.

“ის, რასაც აშშ-ს პოზიციად, ცდილობენ, დღეს გაყიდონ, ჯერჯერობით მხოლოდ ერთი კონგრესმენის ინიციატივაა, რომლის მსგავსი არაერთი დაინიცირებულა, თუმცა უშედეგოდ- ასე ეხმაურება სოციალურ ქსელში საპარლამენტო უმრავლესობის ლიდერი, მამუკა მდინარაძე  ამერიკელი კონგრესმენის, ჯო უილსონის მიერ შემუშავებულ კანონპროექტს,  რომელშიც ნათქვამია, რომ, ჯო უილსონის კანონპროექტის მიხედვით, „საქართველო დემოკრატიის განმტკიცებაში მდგრად პროგრესს თუ აჩვენებს, აშშ საქართველოსთვის მნიშვნელოვანი სამხედრო, სავაჭრო პაკეტის გადაცემასა და სავიზო რეჟიმის ლიბერალიზაციას განიხილავს“.

1. ის, რასაც აშშ-ს პოზიციად, ცდილობენ, დღეს გაყიდონ, ჯერჯერობით მხოლოდ ერთი კონგრესმენის ინიციატივაა, რომლის მსგავსი არაერთი დაინიცირებულა, თუმცა უშედეგოდ;

2. ⁠ინიციატივა ერთდროულად შეიცავს მუქარას და ქვეყანასთან ვაჭრობას მის სუვერენიტეტზე. მუქარას – სანქციებით, ვაჭრობას – ვიზალიბერალიზაციით, სამხედრო დახმარებით და თავისუფალი ეკონომიკური ურთიერთობით;

3. რეალურად, ამ სატესტო ინიციატივის მიზანია ჩამქრალი საპროტესტო მუხტის ხელახლა გაღვივება. ის ახალი მაშველი რგოლია ჩამოშლილი ოპოზიციისთვის. ვხედავთ მათ შესაბამის, ისტერიულ რეაქციებსაც;

4. ⁠წარმოუდგენელია მეგობარი ქვეყნის კანონმდებლისგან სანქციებით მუქარაც და ქვეყნის ბედზე და მის სუვერენიტეტზე ვაჭრობაც.

სტრატეგიული პარტნიორობა და მეგობრობა ნიშნავს, რომ უვიზო მიმოსვლაც, თავისუფალი ეკონომიკური ურთიერთობები და პირდაპირი ფრენებიც გაიხსნას ყოველგვარი ვაჭრობისა და მუქარის გარეშე, რაც ჩვენი არაერთგზის მოწოდებაც იყო!

სანაცვლოდ გაუმჭვირვალობისა და დამოუკიდებლობაზე უარის თქმის მოთხოვნა კიდევ უფრო მიუღებელია, ვიდრე აქამდე უსაფუძვლო უარი ზემოთ ჩამოთვლილ პარტნიორულ საკითხებზე.

ეს ყოველწლიური, გამუდმებული, ხელოვნური ტურბულენტობა და რევოლუციების მცდელობები ამ ქვეყანაში უნდა დასრულდეს და ჩვენ მეგობრებისგან ამაში მხარდაჭერას ველოდებით და არა – პირიქით!“ – წერს მამუკა მდინარაძე.

https://www.facebook.com/GDMamukaMdinaradze/posts/1031979584958336?ref=embed_post

ეს არის უბრალოდ შანტაჟისა და მუქარის ენა, – ასე შეაფასა თბილისის მერმა, კახა კალაძემ გამოცემა Politico-ს მიერ გავრცელებული ინფორმაცია, რომლის თანახმად, ამერიკის შეერთებული შტატების კონგრესს წარედგინება კანონპროექტი, რომლითაც საქართველოში რუსული სტილის „უცხოური აგენტების“ წარდგენაზე პასუხისმგებელ პირებს აქტივების გაყინვა და მოგზაურობის აკრძალვა ემუქრებათ.

კალაძის შეფასებით, სანქციების დაწესების არავის ეშინია, თუმცა ეს არ არის სწორი დამოკიდებულება.

“არ მგონია, რომ ეს ნაბიჯი გადაიდგას, იმიტომ, რომ პარტნიორებს, მეგობრებს ასე არ ელაპარაკებიან, ეს არ არის სწორი დამოკიდებულება. ჩვენ თუ გვინდა მართლა მეგობრობა, პარტნიორობა, კარი ღია არის, არავინ შეზღუდული არ არის ამ მიმართულებით, მაგრამ ქმედითი ნაბიჯები უნდა გადაიდგას და ჩვენ ამას მხოლოდ და მხოლოდ მივესალმებით. კიდევ ერთხელ ვიმეორებ, არავის ეშინია ამ სანქციების და არანაირი პრობლემა არ იქნება ამ თვალსაზრისით, თუმცა წარმოუდგენელია ხელისუფლების წარმომადგენლები იყვნენ დასანქცირებული რის გამო? იმის გამო, რომ შენს ქვეყანაში შენი ქვეყნის მოსახლეობის უმრავლესობის მიერ არჩეული პარლამენტის უმრავლესობის წარმომადგენლები იღებენ კანონს მის ქვეყანაში, რისი პირდაპირი ვალდებულებაც არის. ამის გამო დასანქცირდნენ ადამიანები? წარმოუდგენელი მგონია ეს ყველაფერი, თუმცა ისეთი უსამართლობა ხდება დღეს მსოფლიოში, გასაკვირი არაფერი იქნება”, – განაცხადა კალაძემ.

ცნობისთვის, Politico-ს სცნობით, ამერიკის შეერთებული შტატების კონგრესს წარედგინება კანონპროექტი, რომლითაც საქართველოში რუსული სტილის „უცხოური აგენტების“ წარდგენაზე პასუხისმგებელ პირებს აქტივების გაყინვა და მოგზაურობის აკრძალვა ემუქრებათ. გამოცემის მტკიცებით, კანონპროექტში აღნიშნულია, რომ მმართველი პარტია „ქართული ოცნება“ „მზარდად და სამწუხაროდ ადგას რუსეთის ფედერაციასთან შეთანხმების პოლიტიკას“. კანონპროექტის თანახმად, თბილისი ღიად ესხმის თავს აშშ-სა და დასავლური დემოკრატიის სხვა ხელშემწყობ ორგანიზაციებს, ასევე ადგილობრივ და საერთაშორისო სამოქალაქო საზოგადოებას მაშინ, როცა ზრდის კავშირებს რუსეთთან და ჩინეთთან.

Politico-ს ინფორმაციით, კანონპროექტს კონგრესს „რესპუბლიკელი“ ჯო უილსონი, სავარაუდოდ, დღეს წარუდგენს. მისი პირობები ავალდებულებს ამერიკელ მაღალჩინოსნებს, აცნობონ კონგრესს „საქართველოში არსებული არასათანადო პოლიტიკური გავლენის, კლეპტოკრატიისა და ელიტური კორუფციის კვანძების შესახებ“, ასევე რუსეთისა და ჩინეთის სადაზვერვო აქტივების შესახებ, რომლებიც ქვეყანაში მოქმედებენ.

შეაჩერეთ „უცხოური აგენტების შესახებ კანონი“, საქართველოს მომავალი ევროკავშირია და არა რუსეთი, – ამის შესახებ გერმანიის პარლამენტის (ბუნდესტაგის) საგარეო საქმეთა კომიტეტის თავმჯდომარე, მაიკლ როთი X-ზე წერს.

„კიდევ ერთი კვირა, რათა ევროკავშირმა თბილისს სოლიდარობის ძლიერი სიგნალი გაუგზავნოს: ჩვენ ყველა იმ ქართველის გვერდით ვდგავართ, რომლებიც ევროპის გულში თავისუფალი და დემოკრატიული საქართველოსთვის მშვიდობიან დემონსტრაციებში მონაწილეობენ. შეაჩერეთ „უცხოური აგენტების შესახებ კანონი“, საქართველოს მომავალი ევროკავშირია და არა რუსეთი“, – წერს მაიკლ როთი.

„ერთი კონგრესმენის იდეა, მთლიან კონგრესს არ წარმოადგენს! მხოლოდ კონგრესმენები ვერ წყვეტენ ასეთი დონის პოლიტიკურ საკითხს! ჰიპოთეტურად, პოლიტიკური ნებელობის შემთხვევაშიც კი საჭიროა კონგრესის ორივე პალატა, სენატი თავისი ვიცე-პრეზიდენტით, სახელმწიფო დეპარტამენტი და ბაიდენის ადმინისტრაცია“, – ამის შესახებ „ხალხის ძალის” წევრი, ზურაბ ქადაგიძე, Politico-ს მიერ გავრცელებულ ინფორმაციასთან დაკავშირებით წერს, რომლის მიხედვით, აშშ ვიზალიბერალიზაციას, სამხედრო მხარდაჭერას და შეღავათიან სავაჭრო რეჟიმს სთავაზობს საქართველოს, თუ ხელისუფლება შეწყვეტს ანტიდემოკრატიულ ნარატივს.

ქადაგიძის განცხადებით, საქართველო არ ვაჭრობს საკუთარი სუვერენიტეტით, ხოლო აშშ-ს თუ სტრატეგიული თანამშრომლობის გაღრმავება სურს, მისი ნებაა.

„იდიოტ საზოგადოებად გვთვლიან?! 1) ერთი კონგრესმენის იდეა, მთლიან კონგრესს არ წარმოადგენს! 2) მხოლოდ კონგრესმენები ვერ წყვეტენ ასეთი დონის პოლიტიკურ საკითხს! 3) ჰიპოთეტურად, პოლიტიკური ნებელობის შემთხვევაშიც კი საჭიროა კონგრესის ორივე პალატა, სენატი თავისი ვიცე-პრეზიდენტით, სახელმწიფო დეპარტამენტი და ბაიდენის ადმინისტრაცია. თვალსაჩინოებისათვის, აქამდე რა არ იყო საკმარისი საფუძველი, ამერიკას მიეღო ე.წ „მეგობრობის აქტი” საქართველოსთან მიმართებაში, როდესაც: „ნატოს” ყველა სამხედრო მისიაში ვმონაწილეობდით! მოსახლეობის მიხედვით, ერთ ერთი მთავარი კონტრიბუტორი ვართ მისიებისა, სამხედრო კონტინგენტის თვალსაზრისით! ათობით დაღუპული ქართველი და ასობით დაზარალებული, გლობალური უსაფრთხოების უზრუნველსაყოფად! ყველა საერთაშორისო რეზოლუციითა და აქტით, საქართველო პასუხისმგებლობით ეკიდება აღებულ ვალდებულებებს! ნუ თუ საკმარისი არ იყო?

და ბოლოს: საქართველო არ ვაჭრობს საკუთარი სუვერენიტეტით! გინდათ სტრატეგიული თანამშრომლობის გაღრმავება? ნება თქვენია, თუმცა როგორც ერთი მერცხალი გაზაფხულს ვერ მოიყვანს ასევეა, ერთი კონგრესმენის სურვილები, ამერიკის რეპუტაცია გადაარჩინოს ქართველების თვალში, რომელიც კელი დეგნანისა და ზოგიერთი უპასუხისმგებლო ამერიკელის განცხადებებითა და მოქმედებებით სერიოზულად დაზიანდა! P.S. დაგიძველდათ მეთოდები. თქვენი გენმოდიფიცირებული თაფლა კვერი დაობდა და მათრახით ქართველებს ვეღარ შეაშინებთ!“, – წერს ზურაბ ქადაგიძე.

„ქართული ოცნება“ დაადგა ღალატის გზას, მაგათ არაფერი არ ეშველებათ – ქვეყანას თავი დაანებონ და პოლიტიკურად კისერიც უტეხიათ, – ასე გამოეხმაურა „სტრატეგია აღმაშენებლის“ დეპუტატი, პაატა მანჯგალაძე  „ქართული ოცნების” პოლიტსაბჭოს მიერ გავრცელებულ განცხადებას.

მანჯგალაძის შეფასებით, ვინც ამბობს რომ დასავლეთი, დასავლური სტრუქტურები, ევროპა და ამერიკა საფრთხეს უქმნის სუვერენიტეტს – რუსია.

„ეს არის სინამდვილე და ახლაც რომ აგრძელებენ რიტორიკას, თუნდაც ამ წერილში, რომ თურმე დასავლეთიდან მოდის საფრთხე, რუსეთი არანაირ საფრთხეს არ ქმნის და მთავარი მტერი ამერიკა და ევროპა ყოფილა – ეს არის მავნებლობა და საქართველოს სუვერენული და ეროვნული ინტერესების წინააღმდეგ გადადგმული ნაბიჯი. ძალიან მარტივი შეფასებაა, როგორ უნდა ამოვიცნოთ რუსი: თუ გვეუბნებიან, რომ საფრთხე დასავლეთიდან მოდის, ამერიკა პარტნიორი კი არა მტერია, რუსეთიდან მოდის სიკეთე, თუ გვეუბნებიან რომ ამერიკა და რუსეთი, ორივე მტერია იცოდეთ, რომ ამის უკან რუსები დგანან”,- აღნიშნა მანჯგალაძემ.

ამავე თემაზე საუბრისას დეპუტატმა აღნიშნა, რომ “ქართული ოცნება” უამრავ მიზეზს იპოვის, რომ ამერიკის მხრიდან საქართველოს მოსახლეობისთვის „ამ უპრეცედენტო შეთავაზების რეალიზება არ მოხდეს“.

„ქართული ოცნება” დაადგა ღალატის გზას, მაგათ არაფერი ეშველებათ. ქვეყანას თავი დაანებონ და პოლიტიკურად კისერიც უტეხიათ.

ეს საქართველოსთვის და მისი მოქალაქეებისთვის არის უპრეცედენტო შეთავაზება. [“ქართული ოცნება”] უამრავ მიზეზს იპოვის, რომ ამისი რეალიზება არ მოხდეს. ნუთუ მათ არ შეუძლიათ, რომ საგარეო საქმეთა მინისტრის დონეზე გაარკვიონ ეს არის რეალობა თუ არის ერთი კონგრესმენის შეთავაზება. ასევე, დიპლომატის ენაზე შეეძლოთ ეთქვათ, რომ თუ ეს კონგრესმენის ინიციატივა გადაიქცევა სახელმწიფო პოლიტიკად, მზად ვართ, რომ განვიხილოთ პარტნიორის შემოთავაზებები. ეს არ გვინახავს, ჩვენ ვნახეთ კიდევ უფრო დიდი ბრალდება, რომ ამერიკა ორჯერ აპირებდა თურმე რევოლუციის მოწყობას. ეს წერია ამ წერილში და ვინც ამას წერს, კარგად მოიკითხონ, დარწმუნებული ვარ “ეფესბეს” ან “გერეუს” ინსტიტურები უწერენ ამას “ქართულ ოცნებას”, – აღნიშნა მანჯგალაძემ.

ინფორმაციისთვის, “ქართული ოცნების” პოლიტიკურმა საბჭომ გაავრცელა განცხადება რითაც მმართველი პარტია გამოცემა Politico-ს მიერ გავრცელებულ ინფორმაციას გამოეხმაურა.

როგორც განცხადებაშია აღნიშნული, “ქართულ-ამერიკული ურთიერთობების გაჯანსაღება მთლიანად ამერიკული მხარის სწორ ქმედებებზეა დამოკიდებული, ამისათვის კი, არა სრულიად ბუნდოვანი პერსპექტივის მქონე დაპირებები და შეურაცხმყოფელი შანტაჟი, არამედ ქართული სახელმწიფოს და ქართველი ხალხის მიმართ პატივისცემის გამოვლენაა საჭირო – საქართველოს ხელისუფლება არ თამაშობს.”

განცხადების თანახმად, ურთიერთობების თვისებრივად გადალაგება საქართველოს პარტნიორებს მაქსიმუმ ერთ წელიწადში შეუძლიათ და „თუ ისინი ამას გააცნობიერებენ, ურთიერთობები ძალიან სწრაფად დალაგდება, მაგრამ თუ საქართველოს მიმართ იგივე მიდგომებით განაგრძობენ მოქმედებას, ამით საქართველოს ინტერესებსაც დააზარალებენ და ამერიკისაც“.