Home Blog

“ფსევდოლიბერალურ პროპაგანდასთან დაკავშირებული ინიციატივით, სავარაუდოდ, გამოხატვის თავისუფლების შეზღუდვას აპირებენ”

ფსევდოლიბერალურ პროპაგანდასთან დაკავშირებული ინიციატივით, სავარაუდოდ, გამოხატვის თავისუფლების შეზღუდვას აპირებენ, – ამის შესახებ „გირჩის“ ლიდერმა იაგო ხვიჩიამ განაცხადა.

ხვიჩიას კითხვა დაუსვეს „ქართული ოცნების“ გადაწყვეტილებასთან დაკავშირებით, მომზადდეს საკანონმდებლო ინიციატივა, რომელიც საზოგადოებას ფსევდოლიბერალური იდეოლოგიისა და მისი გარდაუვალი მავნე შედეგებისგან დაიცავს.

„ზოგადად, ვერასდროს წარმომედგინა, თუ მთავრობის საქმე ადამიანების უკანალის დაცვა იქნებოდა. მგონი, ჩვენი მთავრობა ერთადერთია სამყაროში, რომელმაც ჩათვალა, რომ მისი მთავარი კომპეტენციაა, რაღაცნაირად გაუფრთხილდეს ამ ღირებულებას და სიკეთეს. მინდა, წარმატება ვუსურვო ამ ყველაფერში. ვიცი, რომ ამ მიზნით – ადამიანების უკანალები დაიცვან, საბოლოო ჯამში, გამოხატვის თავისუფლების შეზღუდვას მოიფიქრებენ. მათ განცხადებაში ასე იგრძნობოდა. მოგეხსენებათ, პოსტსაბჭოთა ქვეყანა ვართ და ყველაფერში ვითხოვთ მთავრობის დახმარებას, მაგრამ ეს ერთადერთი საკითხია, როცა ქართველ ხალხს მთავრობისთვის არ გვითხოვია დახმარება, არ გვითხოვია, დაგვეხმარეთ ჩვენი სხეულის ნაწილების დაცვაშიო. ასეთი არც თხოვნა და არც საარჩევნო დაპირება ყოფილა. ნაცვლად იმისა, რომ მთავრობა მართლა ზრუნავდეს ევროინტეგრაციის პროცესში არსებულ პრობლემებზე, მოიგონეს არარსებული საჭიროების თემა – ქართველი ხალხის უკანალების დაცვა და შეუდგნენ ამ ფუნქციის განხორციელებას. ეს ცოტა სასაცილო მგონია, მაგრამ მთლად ირონიულიც არ არის. სავარაუდოდ, ამ მოტივით აპირებენ გამოხატვის თავისუფლების შეზღუდვას. დავაკვირდებით, ჩვენ ყველაფერს ვაკვირდებით, თან ეს ისეთი პროცესია, ამ პროცესში ჩართული მთავრობა სულ სხვანაირად არის სანახავი“, – განაცხადა იაგო ხვიჩიამ.

„საქართველოს თავისი მნიშვნელოვანი წვლილი შეაქვს ევროპის გაზით მომარაგების და ენერგოუსაფრთხოების კუთხით” – ლევან დავითაშვილი

„საქართველო  სამხრეთის გაზის დერეფნის უმნიშვნელოვანეს რგოლს წარმოადგენს. პროექტი 10 წლის წინ დაიწყო და დღეს ძალიან მნიშვნელოვანი როლი აქვს ევროპის გაზით მომარაგების კუთხით, ასევე ევროპის ენერგოუსაფრთხოებისთვის, რაშიც საქართველოს თავისი მნიშვნელოვანი წვლილი შეაქვს”, – განაცხადა პირველმა ვიცე-პრემიერმა, ეკონომიკისა და მდგრადი განვითარების მინისტრმა. ლევან დავითაშვილმა დღეს  ბაქოში მიმდინარე სამხრეთის გაზის დერეფნის მრჩეველთა საბჭოს მე-10 მინისტერიალის სხდომაში მიიღო მონაწილეობა.

მინისტერიალზე სამხრეთის გაზის დერეფნის მონაწილე ქვეყნების მთავრობათა წარმომადგენლებმა, ასევე ევროკომისარმა ენერგეტიკის საკითხებში კადრი სიმსონმა პროექტის მიმდინარე საკვანძო საკითხები და მისი განვითარების სამომავლო ხედვა და გეგმები განიხილეს. მინისტრთა სესიაზე სიტყვით გამოვიდა საქართველოს პირველი ვიცე-პრემიერი ლევან დავითაშვილი.

ეკონომიკისა და მდგრადი განვითარების მინისტრი აქცენტს იმ გარემოებაზე აკეთებს, რომ სამხრეთის გაზის დერეფნის უმნიშვნელოვანესი მაგისტრალები სწორედ საქართველოზე გადის და კასპიის ზღვიდან გაზის მიწოდება საქართველოს აქტიური თანამონაწილეობის და ჩართულობის გარეშე ვერ მოხდებოდა.

„ჩვენ მჭიდრო თანამშრომლობა გვაქვს როგორც ევროპელ პარტნიორებთან, ისე, რა თქმა უნდა, აზერბაიჯანთან და თურქეთთან, იმისთვის, რომ ამ პროექტის შესაძლებლობები მომავალ წლებში კიდევ უფრო გაიზარდოს და მან კიდევ უფრო დიდი როლი შეასრულოს ევროპის გაზით მომარაგების მიმართულებით. რა თქმა უნდა, საქართველოსაც აქვს თავისი ეკონომიკური ინტერესები და ისინი მაქსიმალურად უნდა იყოს გამოხატული”, – აღნიშნა ლევან დავითაშვილმა.

ეკონომიკისა და მდგრადი განვითარების მინისტრის განცხადებით, ბაქოში მიმდინარე  შეხვედრა საქართველოსთვის ასევე სასარგებლოა იმ თვალსაზრისით, რომ ის კარგი შესაძლებლობაა პარტნიორ ქვეყნებთან ენერგეტიკულ უსაფრთხოებასა და ამ კუთხით თანამშრომლობის სამომავლო გეგმებზე სასაუბროდ.

“კანონპროექტი, რომელიც „საზოგადოების ფსევდოლიბერალური იდეოლოგიისგან და მისი გარდაუვალი მავნე შედეგებისგან დაცვას გულისხმობს“, ქვეყანაში არსებული მნიშვნელოვანი პრობლემებიდან ყურადღების გადატანის მცდელობაა”

„ერთიანი ნაციონალური მოძრაობის“ ერთ-ერთი ლიდერის, თინა ბოკუჩავას განაცხადებით, „ქართული ოცნების“ მიერ დაანონსებული ახალი ინიციატივა, რომელიც „საზოგადოების ფსევდოლიბერალური იდეოლოგიისგან და მისი გარდაუვალი მავნე შედეგებისგან დაცვას გულისხმობს“, ქვეყანაში არსებული მნიშვნელოვანი პრობლემებიდან ყურადღების გადატანის მცდელობაა.

როგორც თინა ბოკუჩავამ ჟურნალისტებთან საუბრისას აღნიშნა, პარლამენტში იმგვარი ინიციატივების შემოტანაა საჭირო, რომელიც ებრძვის ფასების ზრდას, უმუშევრობას, უპერსპექტივობას.

„საქართველოს მოქალაქეების აბსოლუტურ უმრავლესობას აღელვებს გაზრდილი ფასები, სიღარიბე, უმუშევრობა, უპერსპექტივობა, ის, რომ პრაქტიკულად, ოჯახი არ არის დარჩენილი საქართველოში, საიდანაც ოჯახის წევრი ან წასული არ არის საზღვარგარეთ სამუშაოდ ან არ განიხილავს ამ პერსპექტივას სწორედ იმ უპერსპექტივობის, უმუშევრობისა და სიდუხჭირის გამო, რომელშიც ივანიშვილის 12-წლიანმა მმართველობამ შეიყვანა ჩვენი ქვეყანა. ეს არის ის რეალური პრობლემები, რაზეც უნდა საუბრობდეს, ზრუნავდეს და რის გადაჭრასაც უნდა ცდილობდეს ივანიშვილის პარტია, მაგრამ ნაცვლად ამისა, ჩვენ ვხედავთ ამ უმნიშვნელოვანესი თემებიდან ყურადღების გადატანის მცდელობას. გამარჯვების კოალიციისთვის, “ერთიანი ნაციონალური მოძრაობისთვის” მთავარია ამ პრობლემების მოგვარება, საუბარი და ერთობლივად გზების მოძებნა იმისთვის, რომ ეს პრობლემები, რომლის წინაშეც საქართველოს მოქალაქეთა აბსოლუტური უმრავლესობა დგას, გადაიჭრას.

პარლამენტში იმგვარი ინიციატივების შემოტანაა საჭირო, რომელიც ებრძვის ფასების ზრდას, უმუშევრობას, უპერსპექტივობას. ეკონომიკური რეფორმები, რომელიც გაწმენდს სისტემას კორუფციისგან და რომელიც უზრუნველყოფს იმას, რომ მხოლოდ ივანიშვილის პარტიის ინტერესში კი არ მუშაობდეს ეკონომიკა, არამედ საქართველოს მოქალაქის ინტერესში. იზრუნონ პენსიების ზრდაზე, ახალგაზრდებისთვის სამუშაო ადგილების პერსპექტივის გაჩენაზე. ნაცვლად ამისა, ისინი საუბრობენ ყველაფერზე, გარდა იმისა, რაც აქტუალური და პრობლემურია“, – განაცხადა ბოკუჩავამ.

ცნობისთვის, “ქართულმა ოცნებამ” მიიღო გადაწყვეტილება, მოამზადოს საკანონმდებლო ინიციატივა, რომელიც საზოგადოებას “ფსევდოლიბერალური იდეოლოგიისგან და მისი გარდაუვალი მავნე შედეგებისგან დაიცავს”. შესაბამისი განცხადება „ქართული ოცნების“ აღმასრულებელმა მდივანმა მამუკა მდინარაძემ უმრავლესობის სხდომის დასრულების შემდეგ ბრიფინგზე გააკეთა.

მდინარაძის თქმით, კანონპროექტი უახლოესი ორი კვირის განმავლობაში მომზადდება და პარლამენტში დაინიცირდება.

„ვლადიმერ პუტინი უკრაინის კონფლიქტის გამო დასავლეთს აფრთხილებს“ – Financial Times

ბრიტანული გაზეთი „ფაინენშელ თაიმსი“ (Financial Times) აქვეყნებს სტატიას სათაურით „ვლადიმერ პუტინი უკრაინის კონფლიქტის გამო დასავლეთს აფრთხილებს“ (ავტორები – მაქს სედონი და კორტნი უივერი), რომელშიც მიმოხილული და კომენტირებულია რუსეთის პრეზიდენტის მოხსენება „ქვეყნის მდგომარეობის შესახებ“.

გთავაზობთ პუბლიკაციას შემოკლებული სახით:

ვლადიმერ პუტინმა, ქვეყნის მდგომარეობის შესახებ რუსეთის ფედერალური კრების სხდომაზე მოხსენებით გამოსვლისას, განაცხადა, რომ დასავლეთის მიერ უკრაინის მხარდაჭერა სარისკოა და ბიძგს აძლევს გლობალური ომის პროვოცირებას – ეს სწორედ ის აშკარა მუქარა იყო ბირთვული იარაღის შესაძლო გამოყენებაზე მას შემდეგ, რაც რუსეთის პრეზიდენტმა ბრძანება გასცა უკრაინის წინააღმდეგ სრულმასშტაბიანი ომის დაწყების შესახებ ორი წლის წინათ.

მართალია, მან ქვეყნის პოლიტიკურ ელიტას განუცხადა, რომ დასავლეთში გავრცელებული შიში, თითქოსდა რუსეთი ევროპის ქვეყნებს თავდასხმას უპირებს, სისულელეა, მაგრამ იქვე ხაზი გაუსვა, რომ უკრაინისადმი დახმარების ყოველ ნებისმიერ ზრდას „ნამდვილად შეუძლია ომის ესკალაციის გამოწვევა ბირთვული იარაღის გამოყენებით, რაც დედამიწაზე ადამიანთა ცივილიზაციის დაღუპვას ნიშნავს“.

გამოეხმაურა რა თავისი ფრანგი კოლეგის ემანუელ მაკრონის ნათქვამს – „გამორიცხული არ არის უკრაინაში დასავლეთის ქვეყნების ჯარების გაგზავნაო“ – ვლადიმერ პუტინმა ხაზგასმით განაცხადა, რომ „რუსეთს ახსოვს თუ რა ბედი ეწია მათ, ვინც ჩვენს წინააღმდეგ თავიანთ სამხედრო კონტინგენტს გზავნიდა, მაგრამ ახლა სავარაუდო ინტერვენტებისათვის შედეგები უფრო ტრაგიკული იქნება“. მან მცირე პაუზა გააკეთა და დაამატა: „ჩვენ ახლა გვაქვს ისეთი იარაღი, რომლითაც ინტერვენტი ქვეყნის ტერიტორიას დავარტყამთ და გავანადგურებთ“.

ვლადიმერ პუტინის თქმით, უკრაინისათვის დასავლური თანამედროვე იარაღის მიწოდებას და ნატოს ჯარების განლაგების პერსპექტივას ბირთვული კონფლიქტის გამოწვევა შეუძლია: „ზოგიერთები ფიქრობენ, რომ რუსეთს ეთამაშებიან. ისინი საკუთარი უპირატესობის კომპლექსით არიან დაბრმავებულები“, – აღნიშნა რუსეთის ლიდერმა და დასძინა, რომ ქვეყნის ბირთვული ძალები მუდამ მზად არიან გამოსაყენებლად საჭირო მომენტში. რუსეთი აგრძელებს მუშაობას ისეთი ახალი იარაღის შესაქმნელად, რომლის ჩამოგდება შეუძლებელია.

რუსეთის პრეზიდენტმა უარყო აშშ-ის განცხადება, თითქოსდა კრემლი ბირთვული იარაღის კოსმოსში განთავსებას აპირებს: „დასავლეთს სურს რუსეთი გამალებულ შეიარაღებაში ჩაითრიოს – ისინი იმეორებენ იმ ტრიუკს, რაც საბჭოთა კავშირს 1980-იან წლებში გაუკეთეს [ვარსკვლავური ომების სახით], როცა მოსკოვმა უდიდესი თანხები გადახარჯა თავდაცვის სფეროში და ამით 1991 წელს საბჭოთა კავშირის დაშლა დააჩქარა. „ყველამ უნდა იცოდეს, რომ სუვერენული და ძლიერი რუსეთის გარეშე სტაბილური მსოფლიო წესრიგი არ დამყარდება“, – თქვა ვლადიმერ პუტინმა.

ევროკავშირში უკვე განაცხადეს, რომ ვლადიმერ პუტინის მიერ ბირთვული იარაღის გამოყენების შესაძლებლობაზე ლაპარაკი „სრულიად მიუღებელი და უადგილოა“, ვინაიდან სწორედ კრემლმა დაიწყო ომი უკრაინის წინააღმდეგ და რეგიონული სტაბილურობა დაარღვია.

„რუსეთის პრეზიდენტი მოახლოებული არჩევნების ფონზე რუს ხალხს ატყუებს და ისეთ რეპრესიებს მიმართავს, რომლებიც იოსებ სტალინის მმართველობის პერიოდისათვის იყო დამახასიათებელი“, – ნათქვამია ევროკომისიის განცხადებაში.

კრემლმა ვლადიმერ პუტინის გამოსვლა ისეთი სახით წარმოადგინა, რომელიც ერთგვარი სახელმძღვანელო დოკუმენტი იქნება მომავალი ექვსი წლის განმავლობაში, 2030 წლამდე. კრემლი დარწმუნებულია, რომ მარტში დაგეგმილ საპრეზიდენტო არჩევნებში ვლადიმერ პუტინი აუცილებლად გაიმარჯვებს. ხელისუფლებაში 24-წლიანი ყოფნის შედეგად მას არცერთი ძლიერი მეტოქე არ ჰყავს, რადგან ოპოზიციას ძლიერ წნეხში ამყოფებს და სხვაგვარად აზროვნება კანონგარეშედ არის გამოცხადებული.

საინტერესოა, რომ კინოთეატრების პროკრემლურმა მფლობელებმა მთელი რუსეთის მასშტაბით [დარბაზებში] უფასოდ გაუშვეს მისი სიტყვით გამოსვლა, რაც იმას აჩვენებს, თუ რა დონით უთმობს ყურადღებას უკრაინის კონფლიქტს პრეზიდენტი.

უილიამ ალბერკე, სტრატეგიული კვლევების საერთაშორისო ინსტიტუტის დირექტორი, ამბობს, რომ ვლადიმერ პუტინის მიერ ბირთვული იარაღის გამოყენებაზე ლაპარაკი მიმართულია დასავლეთის დასაშინებლად, რათა ვაშინგტონმა და ბრიუსელმა შეწყვიტონ უკრაინისადმი დახმარება ომის გადამწყვეტ მომენტში: „იგი იმედოვნებს, რომ ომის ესკალაციის მუქარით დასავლელ ლიდერებს შიშის გრძნობას აღუძრავს და რომ ისინი ყოყმანს დაიწყებენ, თუ რამდენად უღირთ უკრაინისათვის იარაღის მიწოდება“, – ამბობს უილიამ ალბერკე.

თავის მხრივ, რუსმა ანალიტიკოსებმა განაცხადეს, რომ მუქარებისა და უხვსიტყვაობის მიუხედავად, კრემლი ბირთვულ იარაღს არ გამოიყენებს. „ვლადიმერ პუტინის რიტორიკა ფორმალურია – სინამდვილეში ბირთვული ომის დაწყება თვითონ კრემლს ეშინია. ეს მხოლოდ შანტაჟია და სხვა არაფერი“, – ამბობს ანდრეი კოლესნიკოვი, ამერიკული კარნეგის ფონდის მოსკოვის ფილიალის უფროსი მეცნიერ-თანამშრომელი.

ვენის (ავსტრია) ჰუმანიტარული მეცნიერების ინსტიტუტის მიწვეული მეცნიერ-მუშაკის კირილ როგოვის თქმით, ვლადიმერ პუტინის გამოსვლაში უფრო მეტი ყურადღება ბირთვული ომის შესაძლებლობას იმიტომ დაეთმო, რომ კრემლმა სტიმული შეუქმნა ამერიკის მხარეს მოლაპარაკებაზე წამოსასვლელად“. მისი აზრით, ბრძოლის ველზე რუსეთის არმიის მიერ ამას წინათ მოპოვებული წარმატებები იმის თქმის საფუძველს იძლევა, რომ ვლადიმერ პუტინი ბირთვული იარაღით არ ისარგებლებს – „ომის იმ წარუმატებელი პერიოდისაგან განსხვავებით, როცა მის რეჟიმს ეგზისტენციალური საფრთხე შეექმნება“.

წყარო

“კომენტარის გაკეთებაც არ შეიძლება იმ განცხადებაზე, რომელიც სალომე ზურაბიშვილმა საპატრიარქოსთან დაკავშირებით გააკეთა”

კომენტარის გაკეთებაც კი არ შეიძლება იმ განცხადებაზე, რომელიც სალომე ზურაბიშვილმა საპატრიარქოსთან დაკავშირებით გააკეთა, – ამის შესახებ საქართველოს პრემიერ-მინისტრმა, ირაკლი კობახიძემ განაცხადა.

კობახიძეს კითხვა დაუსვეს საქართველოს პრეზიდენტის, სალომე ზურაბიშვილის ლონდონში, Chatham House-ის მიერ ორგანიზებულ ღონისძიებაზე გაკეთებულ განცხადებაზე, სადაც საქართველოს ეკლესიის როლის შესახებ დასმულ კითხვაზე საპასუხოდ აღნიშნა: „ეკლესიასთან დაკავშირებით კომპლექსური ვითარებაა, ერთ-ერთი მიზეზია პატრიარქის სისუსტე. ვიმედოვნებ, ეკლესია შეძლებს, აირჩიოს პროქართველი, პროევროპელი და არა პრორუსი პატრიარქი“.

ირაკლი კობახიძის შეფასებით, ასეთი განცხადებები გამაოგნებელია.

„ყველაფერს რომ თავი დავანებოთ, ასეთი განცხადებები გამაოგნებელია. ამ თემაზე მეტი კომენტარის გაკეთება არ მინდა“, – განაცხადა კობახიძემ.

ამასთან, ირაკლი კობახიძეს კითხვა დაუსვეს, რამდენად მოსალოდნელია, რომ პრეზიდენტმა მიხეილ სააკაშვილი შეიწყალოს, რაზეც კობახიძემ განაცხადა, რომ სალომე ზურაბიშვილისგან ყველაფერი მოსალოდნელია.

„სალომე ზურაბიშვილისგან ყველაფრის მოლოდინი შეიძლება გვქონდეს. იმდენი უხეში ქმედება განახორციელა სახელმწიფო ინტერესების წინააღმდეგ, რომ შეიძლება, ყველაფერი გააკეთოს, თუმცა ამ მარჩიელობაში ვერ შევალ“, – აღნიშნა კობახიძემ.

“საქართველოს აქვს ძლიერი ინსტიტუტები, რომლებსაც ეროვნული ინტერესების დაცვა განუხრელად, მყარად შეუძლიათ” – ირაკლი კობახიძე

საქართველოს აქვს ძლიერი ინსტიტუტები, რომლებსაც ეროვნული ინტერესების დაცვა განუხრელად, მყარად შეუძლიათ, – ამის შესახებ პრემიერ-მინისტრმა ირაკლი კობახიძემ საქართველოს ბიზნეს ასოციაციის კონფერენციაზე სიტყვით გამოსვლისას განაცხადა.

პრემიერ-მინისტრის თქმით, გასული ერთი წლის განმავლობაში ჩატარებული სოციოლოგიური კვლევები ადასტურებს, რომ მმართველი გუნდის მხარდაჭერა მოსახლეობის მხრიდან არის 55 დან 60% მდე.

„ვერავითარი ეკონომიკური წარმატება ვერ მიიღწევა მშვიდობისა და პოლიტიკური სტაბილურობის გარეშე. ყველას გახსოვთ, როგორ წარიმართა მოვლენები გასული სამი წლის განმავლობაში. იყო სერიოზული მცდელობა, საქართველოში დაერღვიათ პოლიტიკური სტაბილურობა და ჩვენი ქვეყანა ექციათ იმ სცენარის შემადგენელ ნაწილად, რომელი სცენარიც სამწუხაროდ, ჩვენს მეგობარ ქვეყანაში, უკრაინაში განვითარდა. საბედნიეროდ, ჩვენმა ქვეყანამ, ხელისუფლებამ გაუძლო ზეწოლას და შეძლო როგორც სახელმწიფოებრივი სიმტკიცის, ისე ქვეყანაში მშვიდობის შენარჩუნება. ამით დადასტურდა, რომ საქართველოს აქვს ძლიერი ინსტიტუტები, რომლებსაც ეროვნული ინტერესების დაცვა განუხრელად, მყარად შეუძლიათ.

დღეს ჩვენს პოლიტიკურ გუნდს აქვს მყარი პოზიციები და ძლიერი მხარდაჭერა საზოგადოებისგან. გასული ერთი წლის განმავლობაში ჩატარებული სოციოლოგიური კვლევები ადასტურებს, რომ ჩვენ მმართველი გუნდის მხარდაჭერა მოსახლეობის მხრიდან არის 55 დან 60% მდე. ეს არის რა თქმა უნდა, პარტიული რეიტინგი, მაგრამ ეს ყველაფერი თავისთავად მეტყველებს იმაზე, რამდენად ძლიერია მთავრობის, ხელისუფლების მიმართ მოსახლეობის მხარდაჭერა. იგივე კვლევები, სოციოლოგიური კვლევები ადასტურებს, თუ რა არის ამ ყველაფრის მიზეზი. ძირითადად, ორი ფაქტორი განაპირობებს მოსახლეობის ძლიერ მხარდაჭერას ჩვენი გუნდის მიმართ. ეს არის მშვიდობის შენარჩუნება, პირველი ფაქტორი, ხალხი ხედავს, თუ რა ხდება ჩვენს გარშემო, მსოფლიოში არაერთი ცხელი წერტილია. ამ ვითარებაში, მიუხედავად სერიოზული რისკებისა, ჩვენი ქვეყანა ინარჩუნებს მშვიდობას და მეორე ფაქტორი, რაც განაპირობებს მოსახლეობის ძლიერ მხარდაჭერას, ეს არის სწორედ ეკონომიკური ზრდა, ეკონომიკური წინსვლა, რაც აისახება ბუნებრივია მოსახლეობის სოციალურ პირობებზე. ჩვენ შეგვიძლია დავდოთ ძალიან მყარი პირობა როგორც ფართო საზოგადოების, ისე ბიზნესის წინაშე, რომ მშვიდობას, პოლიტიკურ სტაბილურობას და ეკონომიკური ზრდის მაღალ ტემპს მომავალშიც აუცილებლად შევინარჩუნებთ. ამ ყველაფერზე ვსაუბრობთ იმის გამო, რომ შეგიქმნათ სიმყარის განცდა. რეალურად გვაქვს ყველანაირი საფუძველი იმისთვის, რომ სტაბილურად, მყარად განვაგრძოთ ზრუნვა ჩვენი ქვეყნის წინსვლისა და განვითარებისთვის. პირადად მე, როგორც პრემიერ მინისტრმა კიდევ ერთხელ მინდა დაგიდასტუროთ ღიაობის სრული მზადყოფნა ბიზნესთან, ბიზნეს ასოციაციასთან მჭიდრო თანამშრომლობის მზადყოფნა”,-განაცხადა ირაკლი კობახიძემ.

“ადამიანი, რომელიც პატრიარქზე ამბობს, რომ სუსტია, ეკლესიის პროცესებში ჩაერია” – გურამ მაჭარაშვილი

ბრაზი გადამივიდა სინანულში. ადამიანი, რომელიც პატრიარქზე ამბობს, რომ სუსტია, ეკლესიის პროცესებში ჩაერია, ადვილი მისახვედრია, რომ ფსიქოლოგიურად ჯანმრთელი ვერ არის, – ამის შესახებ მოძრაობა „ხალხის ძალის“ წევრმა, გურამ მაჭარაშვილმა განაცხადა.

მაჭარაშვილს კითხვა დაუსვეს საქართველოს პრეზიდენტის, სალომე ზურაბიშვილის ლონდონში, Chatham House-ის მიერ ორგანიზებულ ღონისძიებაზე გაკეთებულ განცხადებაზე, სადაც საქართველოს ეკლესიის როლის შესახებ დასმულ კითხვაზე საპასუხოდ აღნიშნა: „ეკლესიასთან დაკავშირებით კომპლექსური ვითარებაა, ერთ-ერთი მიზეზია პატრიარქის სისუსტე. ვიმედოვნებ, ეკლესია შეძლებს, აირჩიოს პროქართველი, პროევროპელი და არა პრორუსი პატრიარქი“.

„საქართველოს კათოლიკოს-პატრიარქზე, რომელზეც არა მხოლოდ ქართული საზოგადოება, მსოფლიო საეკლესიო საზოგადოებაა შეთანხმებული, მათ შორის არაქრისტიანული, სხვა კონფესიის ლიდერებიც კი აღიარებენ, რომ საქართველოს კათოლიკოს-პატრიარქი არის წმინდა ადამიანი და ამ ფონზე, შეურაცხყოფას აყენებ, ფაქტია, რომ ჯანსაღად ვერ ხარ. ასეთი ადამიანი უნდა შეგეცოდოს“, – განაცხადა გურამ მაჭარაშვილმა.

“დღეს ბიზნესი არა მხოლოდ თავისუფალია, არამედ სარგებლობს ფართო მხარდაჭერით ხელისუფლების მხრიდან” – პრემიერი

ხელისუფლების და ბიზნესის თანამშრომლობას, ბუნებრივია, ბიზნესის განვითარებას, ქვეყნის წინსვლისთვის, განვითარებისთვის განსაკუთრებული, საკვანძო მნიშვნელობა ენიჭება, – ამის შესახებ პრემიერ-მინისტრმა ირაკლი კობახიძემ საქართველოს ბიზნესასოციაციის კონფერენციაზე სიტყვით გამოსვლისას განაცხადა, სადაც ქვეყნის ეკონომიკისა და სწრაფად მზარდი სექტორების პერსპექტივები განიხილეს.

მთავრობის მეთაურის თქმით, ზედიზედ მე-4 წელია საქართველოს აქვს სწრაფი ეკონომიკური წინსვლა.

„ხელისუფლების და ბიზნესის თანამშრომლობას, ბუნებრივია, ბიზნესის განვითარებას, ქვეყნის წინსვლისთვის, განვითარებისთვის განსაკუთრებული, საკვანძო მნიშვნელობა ენიჭება. ქვეყნის ეკონომიკურ განვითარებაზე გადის გზა, ჩვენი მთავარი როლი ამოცანების შესრულებისკენ, იქნება ეს სიღარიბის დაძლევა, თუ ჩვენი ქვეყნის გაერთიანება და გამთლიანება.

ეკონომიკის განვითარებაში, რა თქმა უნდა, გადამწყვეტ როლს ასრულებს ბიზნესი. თქვენ იცით ეკონომიკური განვითარების მონაცემები, მაგრამ მე მინდა კიდევ ერთხელ გავამახვილო ამ მონაცემებზე ყურადღება. ზედიზედ მე-4 წელია საქართველოს აქვს სწრაფი ეკონომიკური წინსვლა. როგორც მოგეხსენებათ, 2021 და 2022 წლებში ჩვენ გვქონდა ორნიშნა ეკონომიკური ზრდა. შარშან ჩვენი ეკონომიკა გაიზარდა 7.5%-ით. წელსაც გვაქვს ძალიან დადებითი პროგნოზი ეკონომიკური ზრდის თვალსაზრისით. ასევე იცით, რომ მიზნობრივ მაჩვენებელს ქვემოთ ვინარჩუნებთ საგარეო ვალის დონეს, ასევე ინფლაციის დონეს, 5%-ს ჩამოცდა მიმდინარე ანგარიშის დეფიციტი. მხოლოდ შარშან დასაქმებულთა რაოდენობა გაიზარდა 51 000-ით. შესაბამისად, დაფიქსირდა დასაქმების რეკორდულად მაღალი მაჩვენებელი. დადებითი დინამიკა გვაქვს ასევე ტურიზმის სფეროში, სადაც პანდემიამდელ მაჩვენებელს გადავაჭარბეთ შემოსავლების ნაწილში 26%-ით. დღეს, მოგეხსენებათ, საქართველო სარგებლობს თავისუფალი ვაჭრობის რეჟიმით მსოფლიოს 45 ქვეყანასთან, ეს არის მსოფლიოს სამომხმარებლო ბაზრის ერთი მესამედი და მრავალი ქვეყნის რეიტინგის გაუარესების ფონზე ჩვენ ვინარჩუნებთ სუვერენულ საკრედიტო რეიტინგს. ეს ყველაფერი, ეს და სხვა მონაცემები მეტყველებს იმაზე, რომ ჩვენ ქვეყანას აქვს ეფექტიანი ეკონომიკური პოლიტიკა. ჩვენ გვაქვს ლიბერალური ეკონომიკური პოლიტიკა, ეფექტიანი ლიბერალური საგადასახადო პოლიტიკა. ეს ყველაფერი, რა თქმა უნდა, ხელს უწყობს ეკონომიკის განვითარებას და ბიზნესის წინსვლას. ეკონომიკური ზრდის ერთ-ერთი უმთავრესი ფაქტორი არის, ბუნებრივია, ბიზნესის თავისუფლება. ყველას გვახსოვს, რა ვითარება იყო ამ თვალსაზრისით 2012 წლამდე, წინა ხელისუფლების პირობებში. ბიზნესზე ზეწოლა იყო წინა ხელისუფლების სისტემური დანაშაულის ერთ-ერთი უმთავრესი გამოვლინება. მოგეხსენებათ, რომ 2012 წლის შემდეგ ეს დამოკიდებულება, მიდგომა ბიზნესის მიმართ ფუნდამენტურად შეიცვალა. ეს მოხდა 2012 წელს, როდესაც ბიძინა ივანიშვილმა, რომელსაც ყველაზე კარგად ესმოდა და ესმის ბიზნესის თავისუფლების ფასი, ქვეყნის განვითარებაში გარდატეხა შეიტანა. ალბათ ყველა დამეთანხმებით, რომ დღეს ბიზნესი არა მხოლოდ თავისუფალია, არამედ ბიზნესი სარგებლობს ასევე ფართო მხარდაჭერით ხელისუფლების მხრიდან. ეს, ბუნებრივია, ასეც უნდა გაგრძელდეს”, – განაცხადა პრემიერმა.

“ჯანდაცვის მინისტრთან კომუნიკაციის კუთხით იყო უკმაყოფილება სამედიცინო საზოგადოებაში” – ირაკლი კობახიძე

ჯანდაცვის მინისტრთან კომუნიკაციის კუთხით იყო უკმაყოფილება სამედიცინო საზოგადოებაში, რაშიც მე თვითონ დავრწმუნდი რესპუბლიკური საავადმყოფოს მაგალითზე, – ამის შესახებ საქართველოს პრემიერ-მინისტრმა, ირაკლი კობახიძემ განაცხადა.

როგორც კობახიძემ ჟურნალისტებთან აღნიშნა, მას დღეს დილით შეხვედრა ჰქონდა ზურაბ აზარაშვილთან.

„მე ვხედავდი პრობლემებს მართვის, კომუნიკაციის კუთხით. ამასთან დაკავშირებით იყო უკმაყოფილება სამედიცინო საზოგადოებაში. მე თვითონ დავრწმუნდი რესპუბლიკური საავადმყოფოს მაგალითზე, რომ ასეთი პრობლემები ნამდვილად არსებობდა. ჩვენ გვქონდა აბსოლუტურად ჯანსაღი საუბარი ამ ყველაფერთან დაკავშირებით და ამის საფუძველზე იქნა  მიღებული ეს გადაწყვეტილება, რომ ჯანდაცვის მინისტრი ტოვებდა თანამდებობას“, – განაცხადა ირაკლი კობახიძემ.

ამასთან, კობახიძის თქმით, სამთავრობო პროგრამაშის წარდგენისას ისაუბრა იმაზე, რომ საჭიროა მაქსიმალურად მჭიდრო კომუნიკაცია, თანამშრომლობა, განსაკუთრებით დარგის სპეციალისტებთან.

„საქმე როდესაც გვაქვს დარგობრივ სამინისტროსთან, საჭიროა მაქსიმალურად მჭიდრო თანამშრომლობა, პირველ რიგში, დარგის სპეციალისტებთან, წარმომადგენლებთან. ამ თვალსაზრისით, საჭიროა სწორი მიდგომა. მე არ მინდა შევიდე ნიუანსებში, რა დონეზე იყო ეს პრობლემა, ვისგან იყო ეს პრობლემა და ასე შემდეგ, მაგრამ, ფაქტია, დავინახეთ, იგივე რესპუბლიკური საავადმყოფოს შემთხვევაში, იყო სხვა შემთხვევები, ასეთი კომუნიკაციის პრობლემა არსებობდა.

თქვენ ასევე ხედავდით, რომ ზუსტად ამ სექტორში არაერთი თხოვნა იყო იმასთან დაკავშირებით, მაგალითად, კონკრეტულ წარმომადგენლებს, სპეციალისტებს, პაციენტებს ჰქონოდათ შეხვედრა პრემიერთან. ასეთი საკითხები სამინისტროს დონეზე უნდა გვარდებოდეს, ასეთ საკითხებს არ სჭირდება უფრო მაღალ დონეზე ატანა, უფრო დაბალ დონეზე შესაძლებელია ამ საკითხების მოგვარება. აქ დავინახე მე პრობლემები, რომლებიც უნდა გამოსწორდეს არა მარტო ჯანდაცვის სფეროში, ყველა სფეროში. ეს იქნება ჩემი თხოვნა.

ჩემი მოწოდებაა, არა მარტო ყველა მინისტრის, არამედ ყველა საჯარო დაწესებულების, თვითმმართველობის მიმართ, ყველას უნდა ჰქონდეს ძალიან მჭიდრო თანამშრომლობა, კომუნიკაცია ადამიანებთან, დარგის წარმომადგენლებთან, ეს არის ყველაზე სათანადო გზა იმისთვის, რომ პრობლემები გადაიჭრას. მე პირადად როდესაც მქონდა შეხვედრა რესპუბლიკური საავადმყოფოს წარმომადგენლებთან, პერსონალთან, მოვიდა რვა ადამიანი, ინტელიგენტი ექიმი ხალხი, რომელსაც ჰქონდათ თვიანთი არგუმენტები. ასეთ არგუმენტებს სჭირდება მოსმენა და გათვალისწინება. არის შემთხვევები, როდესაც, მაგალითად, არასწორი პოზიციაა, თუნდაც დარგის წარმომადგენლების მხრიდან. აქ თავისი გადაწყვეტილება უნდა მიიღოს სახელმწიფომ, მაგრამ როდესაც მოდიან დარგის წარმომადგენლები, გისაბუთებენ, რომ რაღაცის გაკეთება შეიძლება სხვანაირად, უკეთესად, იქ საჭიროა ჯანსაღი მიდგომა, საჭიროა ამ ყველაფრის გათვალისწინება“, – განაცხადა ირაკლი კობახიძემ.

საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრმა, ზურაბ აზარაშვილმა თანამდებობა დღეს დატოვა.

ერთიანი ეროვნული, საერთო სამაგისტრო გამოცდებისა და სტუდენტთა საგრანტო კონკურსისთვის რეგისტრაცია 4 მარტს დაიწყება

2024 წლის ერთიანი ეროვნული გამოცდებისათვის, საერთო სამაგისტრო გამოცდისათვის, ასევე სტუდენტთა საგრანტო კონკურსისათვის რეგისტრაცია 4 მარტს, 10:00 საათზე დაიწყება და 4 აპრილის 18:00 საათზე დასრულდება.

აღნიშნულის შესახებ შეფასებისა და გამოცდების ეროვნული ცენტრში გამართულ ბრიფინგზე შეფასებისა და გამოცდების ეროვნული ცენტრის ახალმა ხელმძღვანელმა ბრიფინგი გამართა.

ნინო წერეთლის თქმით, აუცილებელია, რეგისტრაციის მსურველებმა გაითვალისწინონ ამ პროცესისათვის დადგენილი ვადები და პროცედურები, რათა შეძლონ წლევანდელ გამოცდებში მონაწილეობა. მისივე განცხადებით, იმ პირებისთვის, რომლებიც წელს მასწავლებლის გამოცდაზე გასვლას გეგმავენ, რეგისტრაციის თარიღები ცნობილი მოგვიანებით გახდება.

„2024 წლის ერთიან ეროვნულ გამოცდებზე, საერთო სამაგისტრო გამოცდასა და სტუდენტთა საგრანტო კონკურსზე რეგისტრაცია 4 მარტიდან შესაძლებელი იქნება ვებგვერდზე: online.naec.ge. მანამდე კი (რეგისტრაციის დღეს) როგორც რეგისტრაციის პროცესის, ასევე გადახდის შესაძლო საშუალებების შესახებ დეტალური ინფორმაციის მისაღებად გამოსაცდელები უნდა ეწვიონ შეფასებისა და გამოცდების ეროვნული ცენტრის ვებგვერდს  www.naec.ge.

საგამოცდო ცენტრები კვლავ გაიხსნება: თბილისში, რუსთავში, თელავში, გორში, ზუგდიდში, ქუთაისში, ფოთში, ოზურგეთში, ბათუმში, ახალციხეში, ხულოსა და ამბროლაურში.

რეგისტრაციის პროცესი წელსაც რამდენიმეეტაპიანია. ძირითად ეტაპზე – 4 აპრილის 18:00 საათამდე გამოსაცდელმა უნდა შეავსოს პირადი მონაცემები, აირჩიოს საგამოცდო ქალაქი, ჩასაბარებელი საგნები. ამ ვადის ამოწურვის შემდეგ გამოსაცდელი გამოცდებზე ვეღარ დარეგისტრირდება. საგნის შეცვლა ან დამატება, ასევე გამოცდის ენის შეცვლა გამოსაცდელებს 15 აპრილის 18:00 საათამდე შეეძლებათ. საგანმანათლებლო პროგრამების ჩამონათვალში ცვლილებების შეტანის შესაძლებლობა კი მათ აპელაციის შედეგების გამოქვეყნებიდან მომდევნო დღის ჩათვლით ექნებათ.

შეფასებისა და გამოცდების ეროვნული ცენტრი შეახსენებს აბიტურიენტებს, რომ შეუძლიათ სასურველი რაოდენობის იმ საგანმანათლებლო პროგრამების არჩევა, რომელზეც მათ მიერ არჩეული საგნები ბარდება. 2024 წლის გამოსაცდელებს ცენტრი სთავაზობს საგანგებოდ მათთვის მომზადებულ ელექტრონულ კრებულებს, რომლებიც თავს უყრის აპლიკანტებისათვის საჭირო ყველა მნიშვნელოვან ინფორმაციას.

აბიტურიენტები გაეცნობიან გამოცდებთან დაკავშირებულ ინფორმაციას: სიახლეებს, რეგისტრაციის ინსტრუქციას, ინფორმაციას საგანმანათლებლო პროგრამების არჩევის, საგამოცდო პროცესის, შედეგების გამოქვეყნების, აპელაციის პროცედურის, ჩარიცხვისა და სახელმწიფო სასწავლო გრანტის მოპოვების წესის შესახებ. ცნობარში ასევე მოცემულია ცხრილი, რომელშიც ასახულია უმაღლესი საგანმანათლებლო დაწესებულებების მონაცემები, თითოეული გამოცდისათვის მინიჭებული კოეფიციენტები, კომპეტენციის ზღვარი, სწავლის საფასური და სხვა მნიშვნელოვანი დეტალები“, – აცხადებენ შეფასებისა და გამოცდების ეროვნულ ცენტრში.

“სალომე ზურაბიშვილმა კეთილი სურვილი გამოთქვა, რომ პრორუსი პატრიარქი არ გვჭირდება, ეს სურვილია”

სალომე ზურაბიშვილმა კეთილი სურვილი გამოთქვა, რომ პრორუსი პატრიარქი არ გვჭირდება. ეს სურვილია, უფრო სადღეგრძელოდ შეიძლება ჩავთვალოთ, – ამის შესახებ „სტრატეგია აღმაშენებლის“ წევრმა, პაატა მანჯგალაძემ განაცხადა.

მანჯგალაძეს კითხვა დაუსვეს საქართველოს პრეზიდენტის, სალომე ზურაბიშვილის ლონდონში, Chatham House-ის მიერ ორგანიზებულ ღონისძიებაზე გაკეთებულ განცხადებაზე, სადაც საქართველოს ეკლესიის როლის შესახებ დასმულ კითხვაზე საპასუხოდ აღნიშნა: „ეკლესიასთან დაკავშირებით კომპლექსური ვითარებაა, ერთ-ერთი მიზეზია პატრიარქის სისუსტე. ვიმედოვნებ, ეკლესია შეძლებს, აირჩიოს პროქართველი, პროევროპელი და არა პრორუსი პატრიარქი“.

მანჯგალაძის თქმით, პატრიარქის არჩევის საკითხი საპატრიარქოს გადასაწყვეტია.

„პატრიარქი რომ მხცოვანია და ასაკშია, ყველამ ვიცით. საპატრიარქოს თავისი მართლგამგეობის შესახებ დამტკიცებული აქვს წესი და ყველაფერი იმის მიხედვით უნდა მოხდეს. კარგი არის ის, რომ ხელისუფლება არ უნდა ჩაერიოს საპატრიარქოს საქმეებში და არც საპატრიარქო ერევა საერო საქმეებში. მე ასე ვხედავ ამ საკითხს. ჩემი გადასაწყვეტი არ არის, ეს უნდა გადაწყვიტოს იმ ორგანიზაციამ, საპატრიარქომ, ვინც ირჩევს პატრიარქს“, – განაცხადა პაატა მანჯგალაძემ.

კითხვაზე, რა იგულისხმა სალომე ზურაბიშვილმა სიტყვა „სუსტში“, მანჯგალაძემ აღნიშნა:

„ალბათ მხცოვანი უფრო სწორი სიტყვა იქნებოდა და არა – სუსტი. ეს მისი პოზიციაა“, – აღნიშნა პაატა მანჯგალაძემ.

ალექსეი ნავალნის დღეს მოსკოვში, ბორისოვის სასაფლაოზე დაკრძალავენ

პატიმრობაში გარდაცვლილ რუს ოპოზიციონერ პოლიტიკოსს, ალექსეი ნავალნის დღეს მოსკოვში, ბორისოვის სასაფლაოზე დაკრძალავენ.

ოპოზიციონერის პრესმდივნის კირა იარმიშს ინფორმაციით, ნავალნის დაკრძალვა ღვთისმშობლის ხატის სახელობის ტაძარში ადგილობრივი დროით 14:00 საათზე გაიმართება.

სასაფლაოს მიმდებარე ტერიტორიაზე უსაფრთხოების ზომები მაქსიმალურად არის გამკაცრებული. ადგილზე სამართალდამცველები პატრულირებენ.

ალექსეი ნავალნი იამალო-ნენეცის ავტონომიური ოლქის კოლონიაში 16 თებერვალს გარდაიცვალა.

რუსეთის ფედერალური სასჯელაღსრულების სამსახურის მტკიცებით, ნავალნიმ თავი ცუდად იგრძნო და გონება დაკარგა, რის შემდეგაც მედიკოსებმა მის გადასარჩენად რეანიმაციული ღონისძიებები განახორციელეს, მაგრამ უშედეგოდ.ალექსეი ნავალნის ცხედარი დედას 24 თებერვალს გადასცეს.