ვფიქრობ, რომ ყველა ვარიანტი, რომლის წარმოდგენაც შეგიძლიათ, პოტენციურად განიხილება. ამისთვის ჩვენ გვჭირდება საგარეო საქმეთა მინისტრების კონსესუსი და შეთანხმება, – ამის შესახებ ევროკავშირის საგარეო ქმედების სამსახურის (EEAS) ოფიციალურმა პირმა ევროპული საბჭოს საგარეო საქმეთა მინისტრების შეხვედრის გამართვამდე ბრიფინგზე განაცხადა, რითაც უპასუხა შეკითხვას, თუ რა ზომები შეიძლება დაუწესოს ევროკავშირმა საქართველოში მაღალი თანამდებობის პირებს.

მისი თქმით, მინისტრები საქართველოსთან დაკავშირებით სამ ძირითად საკითხზე იმსჯელებენ.

„საქართველოს შესახებ სამ მთავარ საკითხს გამოვყოფ: პირველი, ევროკავშირისა და წევრი სახელმწიფოების მიერ 2024 წლის ივნისიდან მიღებული ზომების შეფასება, რომელიც დაფუძნებული იყო საქართველოში დემოკრატიის უკუსვლაზე ამჟამინდელი ხელმძღვანელობის დროს.

კაია კალასი წევრ სახელმწიფოებს ასევე მოუწოდებს მეორე მიმართულებისკენ, რაც სანქციების გზით მოქმედებას გულისხმობს, რათა უზრუნველყოს, რომ წევრი სახელმწიფოების კონსესუსი მოიპოვოს და უზრუნველყოს ადამიანის უფლებების დარღვევების და მშვიდობიანი მომიტინგეების ჩაგვრის საკითხების მოგვარება.

მესამე საკითხია მინისტრების მოსაზრებების მოსმენა იმის შესახებ, თუ რას ხედავენ ისინი შემდგომ შესაძლებლობებად, რათა დარწმუნდნენ, რომ ეს არის საერთო მიმართულება ქართველი ხალხის, ქართული თავისუფალი მედიის, სამოქალაქო საზოგადოების ორგანიზაციების მხარდაჭერისა და იმის უზრუნველსაყოფად, რომ ევროპული გზა, რომელიც საქართველომ აირჩია, ნამდვილად არის ის გზა, რომელსაც ხელისუფლება უნდა გაჰყვეს. მაგრამ, სამწუხაროდ, რასაც ვხედავთ, სრულიად საპირისპიროა“, – განაცხადა მან.

„ინტერპრესნიუსის“ შეკითხვაზე, თუ რა ზომების მიღებას გეგმავს ევროკავშირი საქართველოს ხელისუფლების გარკვეული წევრების წინააღმდეგ, EEAS-ის წარმომადგენელმა განაცხადა, რომ „მაგიდაზე ყველა შესაძლო ვარიანტი“ დევს.

„ვფიქრობ, რომ ყველა ვარიანტი, რომლის წარმოდგენაც შეგიძლიათ, პოტენციურად განიხილება. და ამავდროულად, ამისთვის ჩვენ გვჭირდება საგარეო საქმეთა მინისტრების კონსესუსი და შეთანხმება“, – განაცხადა მან.

ამასთან, „ევროსკოპის“ რედაქტორის, თამარ ნუცუბიძის შეკითხვაზე, განიხილავს თუ არა ევროკავშირი მოსამართლეების დასანქცირებას, EEAS-ის წარმომადგენელმა განაცხადა, რომ პოტენციურად სანქცირებულთა სიაში სწორედ მოსამართლეთა ნაწილია.

„მომდევნო კვირაში ევროკავშირის უმაღლესი წარმომადგენელი განაცხადებს, რომ სიებთან დაკავშირებით სულ მცირე 15 პირზე არსებობს მყარი, იურიდიულად დასაბუთებული წინადადება და შემიძლია დავადასტურო, რომ ამ სიების ნაწილი მოსამართლეები არიან. რა თქმა უნდა, სახელებს ვერ დავასახელებ, რადგან ეს ასევე ეწინააღმდეგება შეთანხმების ძიების მთელ მიზანს. მაგრამ სწორედ ეს იქნება ძალიან რთული, რადგან ამ წინადადებებზე 27-მა ქვეყანამ ერთხმად უნდა მიიღოს გადაწყვეტილება“, – განაცხადა მან.

ცნობისთვის, 15 ივლისს, ევროპული საბჭოს ევროკავშირის საგარეო საქმეთა მინისტრების შეხვედრაზე ბრიუსელში, სხვა თემებთან ერთად საქართველოს საკითხს განიხილავენ.

მდიდარი „ენჯეოებისთვის“ პრობლემას არ წარმოადგენს, რაღაც საიტზე იყვნენ დარეგისტრირებულები, თუ ეს უცხოურია, მაგრამ ქართული საიტის შემთხვევაში პრობლემა აქვთ, –  ამის შესახებ საპარლამენტო უმრავლესობის წევრმა, არჩილ გორდულაძემ განაცხადა.

მისივე თქმით, გამჭვირვალობა მნიშვნელოვანია, ხალხმა უნდა იცოდეს, რაში იხარჯება ევროკავშირიდან შემოსული თანხები.

„დაფინანსებაზე გავიგეთ ევროკავშირის ფარგლებში არსებული საიტიდან, სადაც არასამთავრობო ორგანიზაციების მიერ მიღებული თანხების შესახებ არის ინფორმაცია. რეალურად, არ ვიცით, სად დაიხარჯა ეს თანხები. არასამთავრობო ორგანიზაციები, რომლებიც მდიდარი „ენჯეოები“ არიან, ჩვენი ქვეყნის და კანონმდებლობის უპატივცემულობას უსვამენ ხაზს. მათთვის პრობლემას არ წარმოადგენს, რაღაც საიტზე იყვნენ დარეგისტრირებულები, თუ ეს უცხოურია, მაგრამ ქართული საიტის შემთხვევაში პრობლემა აქვთ. სწორედ ამის გამო ვამბობთ ამ ადამიანებთან დაკავშირებით, რომ მათთვის სამშობლო არ არსებობს.

მნიშვნელოვანია გამჭვირვალობა, როგორ ჩვენი საერთაშორისო პარტნიორებისთვის, ასევე ევროკავშირისთვის, ანალოგიურად მნიშვნელოვანია ჩვენი ქვეყნისთვისაც და ხალხისთვისაც, რათა მათ იცოდნენ, რაში იხარჯება ევროკავშირიდან შემოსული თანხები. სამწუხაროდ, ჩვენ ვხედავთ, რომ ევროკავშირიდან დაფინანსებული ადამიანები, „ენჯეოები“ ჩვენს ქვეყანაში სიძულვილის კამპანიას აწარმოებენ“, – აღნიშნა გორდულაძემ.

ვხედავთ, როგორი რებრენდინგი მიდის კოლექტიურ „ნაცმოძრაობაში“ გარე აქტორების მხრიდან, ცდილობენ, „ლელო“ და გახარიას პარტია გამიჯნონ „ნაციონალური მოძრაობისგან“, კარგად ხვდებიან, რომ წინა არჩევნებზე ხალხმა არ მიიღო, ვითომდა პარტია „ახალი“ რომ შეასაღეს, – ამის შესახებ საპარლამენტო უმრავლესობის წევრმა, ლევან მაჭავარიანმა განაცხადა.

მაჭავარიანის შეფასებით, ეს არის ერთი დიდი სპექტაკლი.

„თვალყურს ვადევნებთ, როგორი დასუსტებულია ოპოზიცია, ფაქტობრივად, განადგურებული არიან, იქაც აზრები იყოფა, ვიღაცამ არჩევნებში მონაწილეობა გადაწყვიტა, ვიღაცამ – არა. ეს არის ერთი ძალიან დიდი სპექტაკლის ნაწილი, ვინაიდან ეს გადაწყვეტილებები მათი მიღებული არ არის, როგორი ინსტრუქციაც მოდის იმ ვერტიკალიდან, საიდანაც ეს ოთხივე რადიკალური პარტია იმართება, ზუსტად ამ ინსტრუქციას უნდა მიჰყვნენ. შიდა პაექრობაა, კონკურენცია არსებობს, ოთხივე რადიკალურ პარტიას სურს, იყოს ფავორიტი არაფორმალური ოლიგარქიული მმართველობისთვის, იგივე გლობალური ომის პარტიისთვის და აქედან გამომდინარე მიმდინარეობს ერთმანეთის დაჭმა. საბოლოო კონფიგურაცია ჯერ მაინც ჩამოყალიბებული არ არის, ჯერ არჩევნებამდე დროა.

ჩვენთვის ამას მნიშვნელობა არ აქვს, მზად ვართ ნებისმიერი კონფიგურაციისთვის, კიდევ უფრო დაშლიან, დაანაწევრებენ, თუ კიდევ უფრო გააერთიანებენ. ჩვენ საშტაბო მუშაობა დაწყებული გვაქვს, თუმცა ვხედავთ, როგორი რებრენდინგის პროცესი მიდის კოლექტიურ „ნაცმოძრაობაში“ ამ გარე აქტორების მხრიდან. ისინი ცდილობენ, „ლელო“ და გახარიას პარტია უფრო გამიჯნონ „ნაციონალური მოძრაობისგან“, კარგად ხვდებიან იმას, რომ წინა არჩევნებზე ხალხს რომ შეასაღეს ვითომდა პარტია „ახალი“, ხალხმა არ მიიღო. რა თქმა უნდა, ყველა ხვდება, რომ ერთსა და იმავე ძალაზეა საუბარი. „ნაციონალურ მოძრაობაზე“ ვერ აკეთებენ ფსონს, რადგან ვერ წაუშალეს და ვერც ვერასდროს წაუშლიან ის წარსული, რაც მათ მოჰყვებათ. აქედან გამომდინარე, ამ ორ პარტიაზე გააკეთეს ფსონი და ცდილობენ, რაღაცნაირად გამიჯნონ. გამიჯვნის სპექტაკლი მიმდინარეობს. სამწუხაროდ, ჩვენს ქვეყანაში არსებობენ მოქალაქეები, რომლებიც დღეს ვერ აღიქვამენ ბოლომდე, რომ ეს ოთხივე რადიკალური პარტია ერთი ვერტიკალიდან იმართება“, – აღნიშნა მაჭავარიანმა.

ევროპარლამენტის რეზოლუციამაც დაადასტურა, რომ უწყვეტ წინააღმდეგობას და ერთიანობას ალტერნატივა არ აქვს, თუმცა სამწუხაროა, რომ თვითმმართველობის არჩევნებად წოდებულ ფარსში არმონაწილეობაზე ვერ შევთანხმდით, – ამის შესახებ „სტრატეგია აღმაშენებლის“ ლიდერი გიორგი ვაშაძე აცხადებს.

როგორც ვაშაძე აღნიშნავს, გამარჯვების გზა მარტივია, უკომპრომისობა „ქოცებთან“, კომპრომისი ერთმანეთთან.

„ჩვენი მიზანი მოძალადე რეჟიმის ცვლილებაა და არა ერთმანეთის განადგურება. ჩვენი მთავარი ბრძოლა საერთო მტერთან უნდა იყოს. საზოგადოება ამ დაპირისპირებას ხედავს და კარგავს იმედს, რომ ოპოზიცია რეალურად წარმოადგენს ძლიერ ალტერნატივას.

ნუ მივანიჭებთ ე.წ. თვითმმართველობის არჩევნებს იმაზე დიდ მნიშვნელობას, ვიდრე სინამდვილეში აქვს. ეს არ არის ბრძოლა, რომელიც განსაზღვრავს ქვეყნის ბედს. ქართველი ხალხისთვის და საერთაშორისო პარტნიორებისთვის ეს არის ფარსი და არა არჩევნები. მთავარი ბრძოლა წინაა – ის, რაც მართლაც ცვლის ძალაუფლებას.

გამარჯვების გზა მარტივია, უკომპრომისობა „ქოცებთან“, კომპრომისი ერთმანეთთან. ერთიანობის გარეშე რეჟიმის დამარცხება შეუძლებელია და რაც უფრო დაპირისპირებულები და დაქსაქსულები გამოვჩნდებით, ეს არის რეჟიმის ინტერესიც, ამიტომ კომპრომისი ერთმანეთთან არის გადამწყვეტი.

რეალობა ასეთია, „ქოცურ“ რეჟიმს ე.წ. თვითმმართველობის არჩევნებით ლეგიტიმაციის აღდგენა აღარ გამოუვა, იმიტომ, რომ: ოპოზიციური პარტიების აბსოლუტური უმრავლესობა ამ პროცესს არ აღიარებს და არ იღებს მონაწილეობას; საარჩევნო გარემო ისეა დეგრადირებული, რომ აღარ არსებობს კონკურენციის, სამართლიანობის ან ნდობის ელემენტები; საერთაშორისო სადამკვირვებლო მისიები, მათ შორის ეუთო-ს სახით, სრულად გამოთიშულია პროცესიდან; ევროპარლამენტის, ევროსაბჭოს და ეუთო-ს რეზოლუციები ერთმნიშვნელოვნად მიუთითებს, ქვეყანაში კრიზისიდან გამოსავალი მხოლოდ ახალი საპარლამენტო არჩევნებია; საქართველოში გვყავს პოლიტიკური პატიმრები – მათ შორის პარტიების ლიდერები; ბოლო ვიზიტზე ბრიუსელში, სადაც პრაქტიკულად ყველა პარტია იყო წარმოდგენილი, აშკარად გამოჩნდა, საერთაშორისო პარტნიორებისთვის თვითმმართველობის არჩევნებად წოდებულ ფარსს არსებითი მნიშვნელობა არ აქვს“, – აღნიშნავს ვაშაძე.

მისივე თქმით, დროა, ოპოზიციამ შექმნას გადაწყვეტილების მიღების საერთო მექანიზმი.

„ამიტომ, დროა, ეს ფაზა დავხუროთ, გაკვეთილად მივიღოთ, რომ მომავალში კვლავ არ დავდგეთ მსგავსი ფაქტის წინაშე და შევქმნათ გადაწყვეტილების მიღების საერთო მექანიზმი, რომელიც გადაწყვეტს: როგორ ვაგრძელებთ ბრძოლას ამ მოცემულობიდან გამომდინარე? როგორ მივდივართ რეალურ ერთიანობამდე – არა მხოლოდ სიტყვით, არამედ საქმით? როგორ შევქმნათ მძლავრი ალტერნატივა, რომელიც კიდევ უფრო ორგანიზებულს გახდის წინააღმდეგობას და დააჩქარებს ჩვენს გამარჯვებას?

ამ არჩევნებად წოდებული ფარსით არაფერი სრულდება. ჩვენ წინ დიდი და გადამწყვეტი ბრძოლა გველის. გზა გამარჯვებამდე გადის ერთიანობაზე, საერთო სამოქმედო გეგმასა და ურთიერთპატივისცემაზე. კრიზისიდან გამოსავალი მხოლოდ ახალი, სამართლიანი საპარლამენტო არჩევნებია. ეს ქვეყანა ჩვენია და არა ივანიშვილის მოძალადე რეჟიმის“, – აღნიშნულია გიორგი ვაშაძის განცხადებაში, რომელსაც პარტიის პრესსამსახური ავრცელებს.

აზერბაიჯანში ოფიციალური ვიზიტის ფარგლებში ეკონომიკისა და მდგრადი განვითარების მინისტრმა, მარიამ ქვრივიშვილმა აზერბაიჯანის რესპუბლიკის პრეზიდენტთან, ილჰამ ალიევთან შეხვედრა გამართა. ინფორმაციას ეკონომიკისა და მდგრადი განვითარების სამინისტრო ავრცელებს.

უწყების ცნობით, შეხვედრაზე მხარეებმა კიდევ ერთხელ დაადასტურეს ორ ქვეყანას შორის კეთილმეზობლური და სტრატეგიული პარტნიორული ურთიერთობები.

„მარიამ ქვრივიშვილმა მადლობა გადაუხადა აზერბაიჯანის მხარეს საქართველოს სუვერენიტეტისა და საერთაშორისოდ აღიარებულ საზღვრებში ტერიტორიული მთლიანობის მხარდაჭერისთვის.

მხარეებმა განიხილეს სამხრეთ კავკასიის რეგიონში სტაბილურობისა და განვითარების უზრუნველსაყოფად საქართველოსა და აზერბაიჯანის თანამშრომლობის მნიშვნელობა სხვადასხვა მიმართულებით, განსაკუთრებული ყურადღება გამახვილდა ორმხრივ და რეგიონულ ეკონომიკურ პროექტებზე.

განსაკუთრებულად გაესვა ხაზი ქვეყნებს შორის სავაჭრო-ეკონომიკური ურთიერთობების გაძლიერებას.

როგორც შეხვედრაზე აღინიშნა, საქართველოსა და აზერბაიჯანს შორის სტრატეგიულ პროექტებში თანამშრომლობა დადებითად აისახება ეკონომიკურ მაჩვენებლებზე, მათ შორის, მოიზიდავს დამატებით ინვესტიციებს ისეთ სექტორებში, როგორებიცაა მწვანე ენერგეტიკა, ტრანსპორტი და ლოგისტიკა, საინფორმაციო ტექნოლოგიები, კავშირგამბულობა და სხვ.

განსაკუთრებული აქცენტი გაკეთდა ისეთ სტრატეგიულ პროექტებზე, როგორიცაა ენერგეტიკული კაბელი, რომელიც ხელს შეუწყობს ენერგეტიკული მიმართულებით თანამშრომლობის გაღრმავებას. ყურადღება გამახვილდა ბაქო-თბილისი-ყარსის რკინიგზის პროექტის მნიშვნელობაზე. აღინიშნა, რომ პროექტი, რომელიც დასკვნით ფაზაშია, მნიშვნელოვნად გაზრდის საქართველოსა და აზერბაიჯანის სატრანზიტო პოტენციალს.

შეხვედრაზე მხარეები შეთანხმდნენ, რომ გაგრძელდება მუშაობა და გადაიდგმება ქმედითი ნაბიჯები ახალი სტრატეგიული პროექტების განხორციელების მიმართულებით, რომლებიც ხელს შეუწყობს საქართველოსა და აზერბაიჯანის სტრატეგიული ინფრასტრუქტურის განვითარებას და ორ ქვეყანას შორის დაკავშირებადობის გაზრდას.

შეხვედრაზე ხაზი გაესვა თანამშრომლობას ტურიზმის სფეროში. აღინიშნა, რომ აზერბაიჯანი საქართველოს სტრატეგიული ტურისტული ბაზარია.

შეხვედრაზე ასევე განხილულ იქნა მსოფლიოსა და რეგიონში უსაფრთხოების კუთხით არსებული გამოწვევები, რომელთა დასაძლევად ხაზი გაესვა მშვიდობისა და სტაბილურობის მნიშვნელობას.

შეხვედრას ასევე დაესწრო საქართველოს ელჩი აზერბაიჯანში ზურაბ პატარაძე“, – აღნიშნულია ინფორმაციაში.

საქართველოს ეკონომიკისა და მდგრადი განვითარების მინისტრის, მარიამ ქვრივიშვილის აზერბაიჯანში ვიზიტის შესახებ ინფორმაცია გაავრცელა აზერბაიჯანულმა მედიამაც.