Home Blog

“ოპოზიციის ლიდერებს და მათ რუპორ აქტივისტებს მივმართავ! საკუთარი ხალხის მიმართ ამხელა ზიზღს როგორ იტევთ?!”

ოპოზიციის ლიდერებს და მათ რუპორ აქტივისტებს მივმართავ! საკუთარი ხალხის მიმართ ამხელა ზიზღს როგორ იტევთ?! , – ამის შესახებ პარლამენტის ვიცე-სპიკერი ნინო წილოსანი სოციალურ ქსელში წერს.

წილოსანის თქმით, უკვე ერთი კვირაა ოპოზიცია და მათი აქტივისტები ზიზღს ავლენენ ქვეყნის უმრავლესობის მიმართ, მათი სამოქალაქო პოზიციის, ასაკის, გარეგნობის, სოციალური მდგომარეობის და პოლიტიკური პრეფერენციების გამო.

„ოპოზიციის ლიდერებს და მათ რუპორ აქტივისტებს მივმართავ!
საკუთარი ხალხის მიმართ ამხელა ზიზღს როგორ იტევთ?!
უკვე ერთი კვირაა თვალს ვადევნებთ რამხელა აგრესიას და ზიზღს ავლენთ ქვეყნის უმრავლესობის მიმართ, მათი სამოქალაქო პოზიციის, ასაკის, გარეგნობის, სოციალური მდგომარეობის და პოლიტიკური პრეფერენციების გამო. რამ შეგაძულათ ასე საკუთარი მოსახლეობა? რამ შეგაშინათ ასე საკუთარი ხალხის?
დღეს, თქვენგან განსხვავებით, მშვიდობიანი მიზნით შეიკრიბება უამრავი ადამიანი! მიუხედავად იმისა, რომ ქართველი ერის წინაშე უდიდესი დანაშაული მიგიძღვით და ამ ადამიანების დიდი ნაწილი სრულ ტერორში გყავდათ თქვენი მმართველობის დროს, ჩვენ მაინც ცივილიზებულად მოგექცევით და თქვენსავით კაციჭამიები არასდროს გავხდებით!“ – წერს წილოსანი.

ევროკავშირის საგარეო საქმეთა მინისტრებმა არაფორმალურ შეხვედრაზე უკრაინის საკითხი განიხილეს და რუსეთისთვის დამატებითი სანქციების დაწესებაზე იმსჯელეს

ევროკავშირის საგარეო საქმეთა მინისტრებმა არაფორმალურ შეხვედრაზე უკრაინის საკითხი განიხილეს და რუსეთისთვის დამატებითი სანქციების დაწესებაზე იმსჯელეს. ამის თაობაზე ევროკავშირის უმაღლესმა წარმომადგენელმა კაია კალასმა განაცხადა. მან სანქციების სამომავლო პაკეტის შესაძლო ელემენტებიც დაასახელა: მეორადი სანქციები „ ომის მხარდამჭერთა წინააღმდეგ,“ რუსული პროდუქციის იმპორტის აკრძალვა, ტარიფები და „ჩრდილოვანი ფლოტის“ გემებთან ბრძოლის გაძლიერება.

შეხვედრაზე ასევე განიხილეს გაყინული რუსული აქტივების გამოყენების საკითხი უკრაინის თავდაცვისა და რეკონსტრუქციისთვის.

„აშკარაა, რომ რუსეთი მშვიდობისთვის არ ემზადება, პირიქით, ისინი უფრო მეტი ომისთვის ემზადებიან. მიმდინარე კვირაში რუსეთმა კიევზე ომის დაწყების შემდეგ მეორე უდიდესი საჰაერო თავდასხმა განახორციელა. დარტყმებს მშვიდობიანი მოსახლეობა ემსხვერპლა. ჩვენ განვხილეთ გზები რუსეთზე ზეწოლის კიდევ უფრო გასაძლიერებლად, რათა რეალური მოლაპარაკებები დაიწყოს.

ასევე განვიხილეთ გაყინული რუსული აქტივების გამოყენება უკრაინის თავდაცვისა და რეკონსტრუქციისთვის. რუსეთის მიერ უკრაინაში გამოწვეული დანაკარგების გათვალისწინებით, წარმოუდგენელია, რომ რუსეთმა ოდესმე კვლავ დაინახოს ეს ფული, თუ სრულად არ ანაზღაურებს უკრაინისთვის მიყენებულ ზიანს“, – აღნიშნავს კალასი.

პოლიციამ გაუპატიურების ბრალდებით ერთი პირი დააკავა

შინაგან საქმეთა სამინისტროს გურიისა და იმერეთის პოლიციის დეპარტამენტის თანამშრომლებმა ერთობლივად ჩატარებული ოპერატიულ-სამძებრო ღონისძიებებისა და საგამოძიებო მოქმედებების შედეგად პირობითი მსჯავრის ქვეშ მყოფი, 1998 წელს დაბადებული ფ.ც. გაუპატიურების ბრალდებით დააკავეს.

ინფორმაციას შინაგან საქმეთა სამინისტრო ავრცელებს.

„გამოძიებით დადგინდა, რომ ბრალდებულმა გურიაში 2011 წელს დაბადებული მ.კ. ძალის გამოყენებით გააუპატიურა და შემთხვევის ადგილიდან მიიმალა. ჩატარებული ოპერატიულ-სამძებრო ღონისძიებებისა და საგამოძიებო მოქმედებების შედეგად სამართალდამცველებმა ფ.ც. ბრალდებულის სახით დააკავეს.

მომხდარზე გამოძიება სისხლის სამართლის კოდექსის 137-ე მუხლის მე-4 ნაწილით მიმდინარეობს“, – ნათქვამია შსს-ს მიერ გავრცელებულ ინფორმაციაში.

დანაშაული 20 წლამდე ან უვადო თავისუფლების აღკვეთას ითვალისწინებს.

31 აგვისტოს ვალუტის კურსი

საქართველოს ეროვნული ბანკის მიერ გამოქვეყნებული მონაცემების თანახმად, 28 აგვისტოსთვის ერთი აშშ დოლარი – 2.6946, ევრო – 3.1438 რუბლი – 0.0334

0.0334 ბრიტანული გირვანქა სტერლინგი 3.6226 ლარი ეღირება.

31 აგვისტოს ამინდის პროგნოზი

გარემოს ეროვნული სააგენტოს ინფორმაციით, პირველ სექტემბრამდე საქართველოში ძირითადად უნალექო ამინდია მოსალოდნელი. დღეს დასავლეთ საქართველოში ჰაერის ტემპერატურა 32–37, აღმოსავლეთ საქართველოში 34 გრადუსი იქნება, დედაქალაქში კი, 33 გრადუსი.

ზღვისპირა ქალაქებში მოსალოდნელია ხანმოკლე წვიმა, თუმცა ქვეყნის მასშტაბით მომავალი კვირის განმავლობაში უნალექო და მზიანი ამინდი შენარჩუნდება.

31 აგვისტოს ასტროლოგიური პროგნოზი

ვერძი

რთული დღეა. მოსალოდნელია გაუგებრობა და კონფლიქტები. ამიტომ მოერიდეთ დისკუსიაში ჩართვას და ეცადეთ უბრალოდ დინებას მიჰყვეთ. მოსალოდნელია უსიამოვნო შეხვედრა სამართალდამცველებთან, თუმცა ამის თავიდან აცილება შესაძლებელია — არ განახორციელოთ კანონსაწინააღმდეგო ქმედებები და საბუთები მოაწესრიგეთ.

კურო

შესანიშნავი დროა შემოქმედებითი უნარების გამოსავლენად. სირთულეების მიუხედავად, შეეცადეთ დაწყებული საქმე დროულად დაასრულოთ. გირჩევთ საყვარელი ადამიანის უსამართლო კრიტიკა გულთან ახლოს არ მიიტანოთ — მალე თავად მიხვდება, რომ შეცდა. ფინანსური გეგმის შედგენისას ეცადეთ, ოჯახის ყველა წევრის ინტერესი გაითვალისწინოთ.

ტყუპები

ტყუპებისთვის საკმაოდ კარგი დღეა სამუშაოს შეცვლისა და ახალი ურთიერთობის დასაწყებად. საქმიანი მოლაპარაკებები და ინვესტიციები ფინანსურად მოგებიანი იქნება. თქვენი გონივრული პოლიტიკის დამსახურებით კოლეგებთან ურთიერთობა გაუმჯობესდება. არსებობს წინასწარმეტყველური სიზმრის ალბათობა. შესანიშნავი დღეა მარტოხელა ტყუპებისთვის — შესაძლებელია თქვენს მეორე ნახევარს ყველაზე მოულოდნელ ადგილას შეხვდეთ. თქვენი კავშირი მტკიცე და საიმედო იქნება.

კირჩხიბი

ვარსკვლავები გირჩევენ, რომ ეს დღე სახლის მოწესრიგებას და ინტერიერის განახლებას მიუძღვნათ. ოჯახურ ურთიერთობებში ყველაფერი კარგადაა — ახლობლები გისმენენ და გენდობიან. დღე ხელსაყრელია მეგობრებთან შეხვედრებისა და ახალი ნაცნობობისთვის. შესაძლებელია ახალი მეგობრის გამოჩენა. სამსახური მოგებიან შეკვეთებს და საინტერესო წინადადებებს გპირდებათ. კარგად მიმოიხედეთ და დაინახავთ ერთგულ ადამიანს, რომელიც ბედმა გამოგიგზავნათ. ფინანსური სირთულეები მალე დასრულდება და სტაბილური შემოსავლის წყარო გაჩნდება.

ლომი

ყოველმხრივ ხელსაყრელი დღეა, რომელიც საშუალებას მოგცემთ, თქვენი საქმიანობის პერსპექტივას ახალი თვალით შეხედოთ და დაგროვილი გამოცდილება გამოიყენოთ. დროა, დაიწყოთ მუშაობა ძველ პროექტზე, რომელსაც მუდმივად სამომავლოდ ინახავთ. ახლა თქვენი წარმატების გასაღები გარშემო მყოფ ადამიანებშია. ფინანსებთან დაკავშირებით პრობლემები მოსალოდნელი არ არის — შემოსავალი სტაბილური იქნება, მაგრამ გართობისთვის გამოყოფილი ხარჯები მაინც უნდა შეამციროთ.

ქალწული

ამ დღეს ოჯახი და ახლობელი ადამიანები თქვენს განსაკუთრებულ ყურადღებას მოითხოვს. სასურველია, რომ ცოტა ხნით განმარტოვდეთ და ბოლოდროინდელი მოვლენები გაიაზროთ – იქნებ საყვარელ ადამიანს გული დაუმსახურებლად ატკინეთ? თუ ასეა, ბოდიშის მოხდაც უნდა შეძლოთ. ვარსკვლავები გირჩევენ, რომ თავი შეიკავოთ ვალების აღებისა და უსარგებლო ნივთების შეძენისგან. პროფესიულ სფეროში სასურველი შედეგის მიღებას ვერ შეძლებთ, მაგრამ პირად ცხოვრებაში სასიხარულო სიახლე გელით.

სასწორი

ამ დღეს პრიორიტეტები საკუთარი სურვილების მიხედვით უნდა დაალაგოთ. წარმატება აუცილებლად მოვა, მაგრამ ამისთვის ბრძოლა მოგიწევთ. გირჩევთ, დღის გეგმაში შვებულების დაგეგმვა შეიტანოთ. ეცადეთ სამსახურში კოლეგებთან და ხელმძღვანელობასთან კამათი და დაპირისპირება თავიდან აიცილოთ. არსებობს რისკი, რომ პატარა უთანხმოება დიდ ჩხუბში გადაიზარდოს და მტრებიც შეიძინოთ, რაც არაფერში გჭირდებათ.

მორიელი

ამ დღემ შეიძლება კუჭ-ნაწლავის პრობლემები მოგიტანოთ, რაც ემოციურ განცდებს უკავშირდება. სტრესის მოხსნის და ფიქრებში ჩაღრმავების დროა. შეწყვიტეთ გარშემომყოფებში ნაკლის ძებნა და ეცადეთ, ირგვლივ მხოლოდ კარგი დაინახოთ. სასურველია, რომ ეს დღე სახლის გარეთ, მაგრამ ოჯახის წევრებთან ერთად გაატაროთ. ყურადღება მიაქციეთ კვებას და ეცადეთ, ხორცისა და ალკოჰოლის მიღებისგან თავი შეიკავოთ. მოსალოდნელია ახალი ნაცნობობა და მოულოდნელი შეხვედრა ადამიანთან, რომელიც დიდი ხანია არ გინახავთ.

მშვილდოსანი

უჩვეულო დღეა. ისეთი შეგრძნება გაქვთ, თითქოს „მესამე თვალი“ გაგეხსნათ და ყველა საიდუმლოს ამოხსნით. საყვარელ ადამიანთან ურთიერთობაში მნიშვნელოვანია, ყურადღება არ მოადუნოთ და ვითარება სრულად აკონტროლოთ. ეს დაგეხმარებათ, მას უკეთ გაუგოთ და უხერხული სიტუაციები აიცილოთ. გირჩევთ, საღამოს ბუნებაში მცენარეების ენერგიით დაიმუხტოთ და დაისვენოთ. არსად იჩქაროთ! დაე, მთელმა სამყარომ დაიცადოს!

თხის რქა

ეს დღე საკუთარ თავს უნდა მიუძღვნათ. ახლა განტვირთვის დღე ყველაზე მეტად გჭირდებათ, თუმცა ყველაფერში გონივრული ბალანსი უნდა დაიცვათ. გაითვალისწინეთ, რომ განტვირთვის დღე შიმშილს არ გულისხმობს. ეს დღე ხელსაყრელია საყრდენ-მამოძრავებელი სისტემის ქრონიკული და მწვავე დაავადებების მკურნალობისთვის. შეისწავლეთ ზურგის, კისრისა და წელის ტკივილის დროს ძირითადი სავარჯიშოები, რეგულარულად შეასრულეთ და ტკივილი დაგავიწყდებათ.

მერწყული

მშვიდი და სასიამოვნო დღეა. წარმატება ელით მათ, ვისი საქმიანობაც რეკლამას უკავშირდება. საჭიროა ზომიერების დაცვა როგორც პროფესიულ, ისე პირად ცხოვრებაში. იდეალური იქნება, თუ ამ დღეს მარტო გაატარებთ. ნებისმიერი ფიზიკური დატვირთვა დისკომფორტს მოგიტანთ, ამიტომ გირჩევთ მძიმე საგნები არ აწიოთ და არ გადაიღალოთ. უარი თქვით ხალხმრავალ წვეულებაზე წასვლაზე და ეცადეთ, დასაძინებლად ადრე დაწვეთ.

თევზები

თევზებისთვის ხელსაყრელი დღეა ფინანსური საკითხების მოსაგვარებლად. სავარაუდოდ, მაღალანაზღაურებად სამუშაოზე გადასვლის შანსი გაჩნდება, რომელიც ხელიდან არ უნდა გაუშვათ. საყვარელ ადამიანთან ურთიერთობაში ბზარი გაჩნდება და ურთიერთობა შეიძლება ჩიხში შევიდეს. უსმინეთ საკუთარ ინტუიციას — ის პრობლემის გადაჭრაში დაგეხმარებათ.

,,ვაგრძელებთ ბრძოლას და მხარდამჭერების მობილიზაციას 13 და 27 სექტემბრის, 4 ოქტომბრის აქციებისთვის”- „ნაციონალური მოძრაობა“ 

ვაგრძელებთ ბრძოლას და მხარდამჭერების მობილიზაციას 13 და 27 სექტემბრის, 4 ოქტომბრის აქციებისთვის, – ამის შესახებ „ნაციონალური მოძრაობის“ განცხადებაშია აღნიშნული.

როგორც განცხადებაშია აღნიშნული, ყველა საპროტესტო თარიღი არის ბრძოლის ხაზი, რომელზეც გადის საქართველოს გამარჯვება.

„ადგილობრივ არჩევნებად წოდებული 4 ოქტომბრის რუსული სპეცოპერაციის დელეგიტიმაცია მასში არმონაწილეობით მნიშვნელოვანი პოლიტიკური ამოცანა იყო, რომელიც ართანამშრომლობის მომხრე რვა პოლიტიკურმა პარტიამ ერთიანი პოზიციითა და მოქმედებებით მკაფიოდ გამოხატა. ჩვენი ეს საერთო მიზანი მიღწეულია და ამაში ლომის წილი „ერთიან ნაციონალურ მოძრაობას” მიუძღვის.

რაც შეეხება სამომავლო თანამშრომლობას, „ერთიანი ნაციონალური მოძრაობა” იყო, არის და იქნება ივანიშვილის რეჟიმის წინააღმდეგ დემოკრატიული პოლიტიკური ძალების კონსოლიდაციის მომხრე და გააგრძელებს ურთიერთობას ყველა დემოკრატიულ ძალასთან, გარდა ცალკეული ინდივიდებისა, რომელთა ქმედებები სცდება ყოველგვარ ეთიკურ ნორმებს.

დღეს ქვეყნის ბედს, რეჟიმის საერთაშორისო იზოლაციასთან ერთად, ქუჩის პროტესტი გადაწყვეტს. ამიტომ, „ერთიანი ნაციონალური მოძრაობა” აგრძელებს ბრძოლას და მხარდამჭერების მობილიზაციას 13 სექტემბრის, 27 სექტემბრის, 4 ოქტომბრის აქციებისთვის. ყველა საპროტესტო თარიღი არის ბრძოლის ხაზი, რომელზეც გადის საქართველოს გამარჯვება.

გამარჯვებისთვის აუცილებელია საზოგადოებრივ-პოლიტიკური ერთიანობა, საზოგადოების დაყოფისა და დაპირისპირების ნებისმიერი მცდელობა ივანიშვილის წისქვილზე ასხამს წყალს.

„ერთიანი ნაციონალური მოძრაობა” აგრძელებს ბრძოლას ქართველ ხალხთან ერთად და ეს ერთიანი ძალისხმევა აუცილებლად საერთო ეროვნულ გამარჯვებას მოიტანს!”, – აღნიშნულია განცხადებაში.

პოლონეთში მკვლელობის მცდელობის ბრალდებით საქართველოს მოქალაქე დააკავეს

პოლონეთში საქართველოს მოქალაქე დააკავეს, რომელიც მამაკაცის მკვლელობაშია ბრალდებული.

მედიაში გავრცელებული ინფორმაციით, დაკავებულმა დაზარალებულს დაზიანებები ცივი იარაღით მიაყენა.

დაკავებულ მამაკაცს რამდენიმე წლიანი პატიმრობა ემუქრება.

კაია კალასი რუსეთის წინააღმდეგ სანქციების სამომავლო პაკეტის შესაძლო ელემენტებს ასახელებს

ევროკავშირის საგარეო საქმეთა მინისტრებმა არაფორმალურ შეხვედრაზე უკრაინის საკითხი განიხილეს და სანქციების დაწესების შესახებ იმსჯელეს. ამის შესახებ შეხვედრის დასრულების შემდეგ ევროკავშირის უმაღლესმა წარმომადგენელმა, კაია კალასმა განაცხადა.

როგორც კაია კალასმა განმარტა, ევროკავშირის ყველა წევრი ქვეყანა მხარს უჭერს დიპლომატიურ ძალისხმევას მშვიდობის მისაღწევად და ომის დასასრულებლად.

„აშკარაა, რომ რუსეთი მშვიდობისთვის არ ემზადება, პირიქით, ისინი უფრო მეტი ომისთვის ემზადებიან. მიმდინარე კვირაში რუსეთმა კიევზე ომის დაწყების შემდეგ მეორე უდიდესი საჰაერო თავდასხმა განახორციელა. დარტყმებს მშვიდობიანი მოსახლეობა ემსხვერპლა“, – აღნიშნავს კალასი.

ევროკავშირის უმაღლესი წარმომადგენლის განცხადებით, მინისტრებმა „განიხილეს გზები რუსეთზე ზეწოლის კიდევ უფრო გასაძლიერებლად, რათა რეალური მოლაპარაკებები დაიწყოს“.

ამასთან, კაია კალასმა სანქციების სამომავლო პაკეტის შესაძლო ელემენტებიც დაასახელა: მეორადი სანქციები „რუსეთის ომს მხარდამჭერთა წინააღმდეგ“; რუსული პროდუქციის იმპორტის აკრძალვა; ტარიფები; „ჩრდილოვანი ფლოტის“ გემებთან ბრძოლის ღონისძიებების გაძლიერება.

კალასის განმარტებით, „მინისტრებმა ასევე განიხილეს გაყინული რუსული აქტივების გამოყენება უკრაინის თავდაცვისა და რეკონსტრუქციისთვის.

„რუსეთის მიერ უკრაინაში გამოწვეული დანაკარგების გათვალისწინებით, წარმოუდგენელია, რომ რუსეთმა ოდესმე კვლავ დაინახოს ეს ფული, თუ სრულად არ ანაზღაურებს უკრაინისთვის მიყენებულ ზიანს“, – აღნიშნა ევროკავშირის უმაღლესმა წარმომადგენელმა.

,,ტრამპი სერიოზულად განიხილავს დიპლომატიური ძალისხმევიდან უკან დახევას მანამ, სანამ ერთი ან ორივე მხარე მეტ მოქნილობას არ გამოავლენს”- AXIOS

ზოგი ევროპელი კვლავ ცხოვრობს ზღაპრულ სამყაროში, რომელიც არ ითვალისწინებს იმ ფაქტს, რომ ტანგოსთვის ორი ადამიანია საჭირო, – განუცხადა გამოცემა AXIOS-ს თეთრი სახლის ოფიციალურმა პირმა.

გამოცემის ცნობით, თეთრი სახლის მაღალჩინოსნები მიიჩნევენ, რომ ზოგიერთი ევროპელი ლიდერი საჯაროდ უჭერს მხარს პრეზიდენტ ტრამპის ძალისხმევას უკრაინაში ომის დასრულებისთვის, თუმცა კულისებს მიღმა ჩუმად ცდილობს, ჩაშალოს ალასკის სამიტის შემდეგ მიღწეული პროგრესი.

ორი კვირის შემდეგ, რაც პრეზიდენტ ტრამპსა და რუსეთის პრეზიდენტ ვლადიმერ პუტინს შორის სამიტი გაიმართა, ომის დასრულებისკენ მიმართული მკაფიო პროგრესი თითქმის არ შეინიშნება.

ტრამპის უკმაყოფილო თანაშემწეები ამტკიცებენ, რომ ამაში დამნაშავე ევროპელი მოკავშირეები არიან და არა ტრამპი ან თუნდაც რუსეთის პრეზიდენტი ვლადიმერ პუტინი.

„თეთრი სახლის ოფიციალურ პირებს ეწურებათ მოთმინება ევროპელ ლიდერებთან დაკავშირებით, რადგან მათი მტკიცებით, ისინი უკრაინას უბიძგებენ, რუსეთისგან არარეალისტური ტერიტორიული დათმობები მოითხოვოს“, – წერს გამოცემა AXIOS-ი.

„ევროპელებს არ აქვთ უფლება, გაახანგრძლივონ ეს ომი და ფარულად წამოაყენონ გაუმართლებელი მოლოდინები, თანაც ისე, რომ ამერიკამ გასწიოს ხარჯი. თუ ევროპა ომის ესკალაციას მოისურვებს, ეს მათი არჩევანი იქნება“, – განუცხადა AXIOS-ს თეთრი სახლის ოფიციალურმა პირმა.

„შეთანხმებამდე მისვლა არის შესაძლებლის ხელოვნება. მაგრამ ზოგი ევროპელი კვლავ ცხოვრობს ზღაპრულ სამყაროში, რომელიც არ ითვალისწინებს იმ ფაქტს, რომ ტანგოსათვის ორი ადამიანია საჭირო“, – აღნიშნა თეთრი სახლის ოფიციალურმა პირმა.

თეთრი სახლის მაღალი თანამდებობის პირმა AXIOS-ს უთხრა, რომ ტრამპი სერიოზულად განიხილავს დიპლომატიური ძალისხმევიდან უკან დახევას მანამ, სანამ ერთი ან ორივე მხარე მეტ მოქნილობას არ გამოავლენს.

ეს იმ ეპოქის დასასრულია – როდესაც გლობალიზმი ჰუმანიტარული მისიებითა და ლიბერალური ღირებულებებით იყო შენიღბული -დავით ქართველიშვილი USAUD-ის დახურვაზე

პარტია „ხალხის ძალის“ წევრი დავით ქართველიშვილი USAID-ის დახურვის ფაქტს სოციალურ ქსელში ეხმიანება.

„USAID ათწლეულების განმავლობაში უბრალოდ „დახმარების სააგენტოს“ კი არა, აშშ-ის გავლენის გლობალური არქიტექტურის ძირითად ელემენტს წარმოადგენდა“, – წერს ანალიტიკოსი და აღნიშნავს, რომ USAID-ის დახურვა არა „რბილის ძალის“ დემონტაჟი, არამედ მისი ტრანსფორმაციაა და ახლა ტრადიციული დიპლომატია მონაცემთა მანიპულირებითა და ციფრულ კონტროლით ჩანაცვლდა, თუმცა შინაარსი იგივე დარჩა.

„აშშ-ის სახელმწიფო მდივანმა, მარკო რუბიომ განაცხადა, რომ აშშ-ის საერთაშორისო განვითარების სააგენტო (USAID) ოფიციალურად იხურება. სტრუქტურა, რომელიც ათწლეულების განმავლობაში „რბილი ძალის“ ინსტრუმენტს წარმოადგენდა, ტრამპის ხელისუფლებაში მოსვლის შემდეგ ლიკვიდაციის პროცესში იყო. აშშ-ის პრეზიდენტმა თავიდანვე დაიწყო საგარეო დახმარების ხარჯების, თითქმის 5 მილიარდი დოლარით შემცირება, მათ შორის, სახელმწიფო დეპარტამენტის, USAID-ისა და რიგი სამშვიდობო მისიების პროგრამების.

USAID ათწლეულების განმავლობაში უბრალოდ „დახმარების სააგენტოს“ კი არა, აშშ-ის გავლენის გლობალური არქიტექტურის ძირითად ელემენტს წარმოადგენდა: არასამთავრობო ორგანიზაციებისთვის გრანტებიდან და მულტიკულტურალიზმის ხელშეწყობიდან დაწყებული, მართული კრიზისების შექმნითა და ტრანსნაციონალური კორპორაციების ინტერესებიდან გამომდინარე, ეკონომიკის „გადატვირთვით“ დამთავრებული.

მაგრამ ინსტრუმენტი გაიცვითა და მოძველდა: მიგრაციული კრიზისისა და რიგ რეგიონში მასშტაბური დესტაბილიზაციის შემდეგ, მისი ეფექტურობა მკვეთრად შემცირდა. თუმცა, ამჟამად საქმე არ ეხება „რბილი ძალის“ იდეის დემონტაჟს, არამედ მისი ფორმის შეცვლას. USAID-ის ზოგიერთი თანამშრომელი უკვე გადავიდა Palantir-ის სახელწოდების მქონე ახალ სტრუქტურებში, ილონ მასკის პროექტებსა და BigTech სექტორის სხვა ორგანიზაციებში.

გლობალური პროცესების მართვა ტრადიციული დიპლომატიიდან მონაცემთა მანიპულირებაზე, ციფრულ კონტროლსა და ხელოვნური ინტელექტის განუსაზღვრელ შესაძლებლობაზე გადადის. USAID-ის დახურვა სოროსის იმპერიის კრიზისთან და ძველი არასამთავრობო ორგანიზაციების ტრანსფორმაციასთან ერთ ჭრილში უნდა განვიხილოთ.

ეს იმ ეპოქის დასასრულია, როდესაც გლობალიზმი ჰუმანიტარული მისიებითა და ლიბერალური ღირებულებებით იყო შენიღბული. ეს ერა მოკვდა და მას ახალი ერა ანაცვლებს: ტექნიკური საინფორმაციო მონაცემების ბანკი, ციფრული კორპორაციები და კერძო პლატფორმები, რომლებიც ახლა პირდაპირ მართავენ საზოგადოებებს. ფორმაა ტრანსფორმირებული, თორემ შინაარსი იგივე რჩება“, – წერს დავით ქართველიშვილი.

არ მიკვირს რომ ის გაექცა ჯერ თავის თანაგუნდელებს, შემდეგ კი თავის ამომრჩეველს – ეს არის პასუხისმგებლობისგან გაქცეული ადამიანის ერთგვარი ქმედება – გიორგი სოსიაშვილი გახარიაზე

ის ჯერ გაექცა თავის თანაგუნდელებს, შემდეგ – თავის ამომრჩეველს. ეს პასუხისმგებლობისგან გაქცეული ადამიანის ქმედება და ნაბიჯებია, რასაც ჩვენ ვხედავთ, – განაცხადა განათლების, მეცნიერებისა და ახალგაზრდულ საქმეთა საპარლამენტო კომიტეტის თავმჯდომარის მოადგილემ, გიორგი სოსიაშვილმა გიორგი გახარიაზე საუბრისას.

მისივე თქმით, გახარიას მიერ გერმანიის ბანკში ანგარიშის გახსნა, გერმანიასთან გარკვეული ურთიერთობის დაჭერა, სამომავლოდ რაღაც გეგმების დალაგებას ნიშნავს.

„ნიშნავს იმას, რომ მას და მის თანაგუნდელებს ამოძრავებთ ერთადერთი წყურვილი, რომ მომავალში მათ ითამაშონ გარკვეული როლი გარე პატრონების ხელში და ჩაერთონ გადატრიალების მცდელობაში. თუმცა, მათი ეს მცდელობა მარცხით დასრულდება, როგორც არა ერთხელ გვიხილავს“, – აღნიშნა სოსიაშვილმა.

არსებული ინფორმაციით, გიორგი გახარიამ გერმანიაში ბინადრობის ნებართვა მიიღო და ბანკში ანგარიშის გახსნასაც ელოდება. გახარიას პარტიაში „ქრონიკის“ შეტყობინებებს არ პასუხობენ, სხვა მედიასაშუალებებთან კი აცხადებენ, რომ მათი ლიდერი სამუშაო ვიზიტითაა წასული.

კარგი იქნებოდა, ჩერგო “ქოცებში” შესულიყო, ეს იქნებოდა „ქართული ოცნების“ დაშლის უმოკლესი გზა, ჩერგო პროფესიონალია ამ საქმის, მიდის და შლის -იაგო ხვიჩია

კარგი  იქნებოდა, ჩერგო „ქოცებში“ შესულიყო, ეს იქნებოდა „ქართული ოცნების“ დაშლის უმოკლესი გზა. ჩერგო პროფესიონალია ამ საქმის, მიდის და შლის, – ამის შესახებ პარტია „გირჩის“ ერთ-ერთმა ლიდერმა, იაგო ხვიჩიამ განაცხადა.

მისივე თქმით, „რვიანი“ არასდროს არსებობდა და ეს პარტიები „ნაციონალური მოძრაობას“ წარმოადგენდა.

„ჩემი აზრით, არანაირი „რვიანი“ არ არსებობს, არც არასდროს არ არსებობდა, ეს ხალხი იყო „ნაცმოძრაობა“. მერე „ნაცმორაობის“ რვა განაყოფი ერთად შეერთდა, ყოფილი „ნაცები“, და ისევ „ნაცურ“ ბოიკოტს აწვებიან, და ამით ისინი ისევ რვა პარტია ხომ არ გახდებიან? ზოგადად, არანაირი რვა პარტია საქართველოში არ არსებობს, ბევრად უფრო მოკრძალებული არჩევანი გვაქვს ამ თვალსაზრისით.

ჩერგოლეიშვილს ახლა ყველა ებრძვის, ფეხი დაუცურდა. მე არ მინდა, მასთან მებრძოლების რიგში აღმოვჩნდე ამ მძიმე ჟამს. ზოგადად, მე ვგულშემატკივრობ, რომ ჩერგო დარჩეს. საერთოდ, კარგი იქნებოდა, რომ ჩერგო „ქოცებში“ შესულიყო, ეს იქნებოდა ალბათ „ქართული ოცნების“ დაშლის უმოკლესი გზა. იგი პროფესიონალია ამ საქმის, მიდის და შლის. თუმცა ასე არ არის მოწყობილი. მხოლოდ „რვიანით“ ვკმაყოფილდებით ამჯერად“, – განაცხადა იაგო ხვიჩიამ.

123...2,942Page 1 of 2,942
ჩვენი არქივი

კონტაქტი

მის: ქ.თბილისი, მ.კოსტავას 59

ტელ: +995 32 93 44 05

ელ.ფოსტა: editor@geotimes.ge

ნავიგაცია

ონლაინ გაზეთი Geotimes.ge

დამატებითი რესურსი