“ოპოზიციას რესურსი არ აქვს, რომ გაიმარჯვოს არჩევნებში. ამიტომ არიან მახვეწრებად გადაქცეული, რომ რამენაირად გარედან ამ ქვეყანას დამართეთ ისეთი რამ, რაც ხალხისთვის იქნება მტკივნეული და იქნება დავბრუნდეთ ხელისუფლებაშიო”, – ამის შესახებ „დღის ქრონიკას“ რეგიონული პოლიტიკისა და თვითმმართველობის კომიტეტის თავმჯდომარემ, ირაკლი ქადაგიშვილმა განუცხადა.

„მოვითხოვ ვიზალიბერალიზაციისთვის ახალ არჩევნებს“ – საერთოდ სად წერია ან რასთან კავშირშია. დაკავშირებაც კი არ არსებობს ამ საკითხების. გაათავისუფლეთ დაპატიმრებული ადამიანები, ჯერ ხომ უნდა მოხდეს იმის შეფასება, რომ ეს ადამიანები, რომ არიან დაპატიმრებული, სასამართლო პროცესი შედგა ამასთან დაკავშირებით და ვინ არის მსაჯული, რომ ვინ უნდა განთავისუფლდეს და ვინ არ უნდა განთავისუფლდეს. ზოგადად, კეთილი ნება სახელმწიფოსი, რომ გამოიჩინოს და ვიღაცა გაათავისუფლოს არ არის ულტიმატუმის წესით. ეს არის ასე ვთქვათ, კეთილი ნების გამოხატვა სახელმწიფოს მიერ და არა გარედან ულტიმატუმის წესით.

ჩვენი ოპოზიცია რა მდგომარეობაშია?! მათ არანაირი რესურსი ქვეყნის შიგნით სანდოობისა არ აქვთ, რომ გაიმარჯვონ არჩევნებში. ამიტომ არიან მთლიანად დამოკიდებული და მახვეწრებად გადაქცეული, რომ რამენაირად გარედან ამ ქვეყანას დამართეთ ისეთი რამ, რაც ხალხისთვის იქნება მტკივნეული და იქნება ამ სიტუაციაში დავბრუნდეთ ხელისუფლებაში. არიან გარე ძალები, რომლებიც აი, ამ მახინჯ ფორმულის ასე ვთქვათ კულტივაციას ეწევიან. თუ მყარად არ დადგა ქვეყანა, საზოგადოება ასეთი მახინჯი მიდგომების კულტივაცია არასდროს არ დამთავრდება. ერთხელ და სამუდამოდ უნდა იყოს ჩამოყალიბებული საქართველოსთან დამოკიდებულება, რომ თქვენი ინტერესების გათვალისწინება უნდა მოხდეს, ჩვენი ინტერესების გათვალისწინებასთან ერთად და მხოლოდ ამ შემთხვევაში არის ევროპა ის ევროპა, ვისკენაც საქართველო ყოველთვის გულწრფელად მიილტვოდა“, – განაცხადა ირაკლი ქადაგიშვილმა.

ევროკომისია საქართველოს საგარეო საქმეთა მინისტრს, მაკა ბოჭორიშვილს წერილს უგზავნის, სადაც იმ რვა რეკომენდაციის ჩამონათვალია, რომელიც ქვეყანამ უნდა შეასრულოს, რათა უვიზო რეჟიმს საფრთხე არ დაემუქროს.

ერთ-ერთი მთავარი რეკომენდაციაა გაუქმდეს კანონები „უცხოური გავლენის გამჭვირვალობის შესახებ“ და „ოჯახური ღირებულებებისა და არასრულწლოვანთა დაცვის შესახებ“.

გარდა ამისა ევროკომისია მოუწოდებს საქართველოსб უზრუნველყოს და მხარი დაუჭიროს საქართველოს ყველა მოქალაქის ძირითად უფლებებს, შეკრების თავისუფლების, აზრის გამოხატვის, პირადი ცხოვრების ხელშეუხებლობის, საჯარო სამსახურში მუშაობისა და დისკრიმინაციის აკრძალვის ჩათვლით.

ბრიუსელი თბილისს აგრეთვე მოუწოდებს შეიტანოს შესწორება ადამიანის უფლებათა ეროვნულ სტრატეგიასა და სამოქმედო გეგმაში, რათა LGBTIQ თემის უფლებების სრული დაცვა უზრუნველყოს.

ევროკომისიის განცხადებით, საქართველომ საკუთარი სავიზო პოლიტიკა ევროკავშირისთვის მესამე ქვეყნების სიის შესაბამისობაში უნდა მოიყვანოს. განსაკუთრებით ეს ეხება იმ ქვეყნების მოქალაქეებს, რომლებიც ევროკავშირის უსაფრთხოებას უქმნიან საფრთხეს და არალეგალურ მიგრაციას უწყობენ ხელს.

საქართველოს აგრეთვე ევალება გაააქტიუროს ღონისძიებები თავშესაფრის უსაფუძვლო მოთხოვნის პრობლემის აღმოსაფხვრელად, უვიზო რეჟიმის შესახებ საინფორმაციო კამპანიის წარმოება, უფრო მკაცრი სასაზღვრო კონტროლის დაწესება.

ევროკავშირი მოუწოდებს საქართველოს, შექმნას აქტივების დაბრუნებისა და მათი მართვის ოფისები, გააგრძელოს მუშაობა აქტივების მონიტორინგის, გაყინვის, მართვის, კონფისკაციისა და უტილიზაციის კუთხით.

დაამტკიცოს კორუფციასთან ბრძოლის ახალი სტრატეგია და სამოქმედო გეგმა, უზრუნველყოს საკმარისი რესურსები მათი რეალიზაციისთვის და განსაკუთრებული ყურადღება დაუთმოს ხელისუფლების უმაღლეს დონეზე კორუფციული საქმეების გამოძიებას, სამართლებრივ დევნასა და განხილვებს.

თბილისმა ბრიუსელის მოთხოვნით აგრეთვე შესწორებები უნდა შეიტანოს ანტიკორუფციული ბიუროს შესახებ კანონში და ვენეციის კომისიის საკვანძო რეკომენდაციები გაითვალისწინოს, რომელიც ბიუროს პოლიტიკურ ნეიტრალიტეტსა და ეფექტურ საქმიანობას უზრუნველყოფს.

ბოლო რეკომენდაცია, რომელიც საქართველომ უნდა შეასრულოს, პერსონალური მონაცემების შესახებ კანონის ევროპულ კანონმდებლობასთან შესაბამისობაში მოყვანას ეხება.

„დონალდ ტრამპი, ვლადიმერ პუტინზე ზეწოლისას, თვლის, რომ ომის ესკალაციით მის დეესკალაციას მოახდენს“ – ასეთი სათაური აქვს აშშ-ის გაზეთ „ვაშინგტონ პოსტში“ (The Washington Post) გამოქვეყნებულ სტატიას, რომლის ავტორია დევიდ იგნატიუსი, ცნობილი ამერიკელი პოლიტიკური მიმომხილველი. „აშშ-ის პრეზიდენტი მიხვდა, რომ რუსეთი მანამ არ დათანხმდება სამშვიდობო ხელშეკრულების დადებაზე, სანამ კრემლის სამხედრო ხარჯები საბრძოლო მოქმედებების გასაგრძელებლად კატასტროფულად არ გაიზრდება“, – ნათქვამია პუბლიკაციაში.

გთავაზობთ სტატიას მცირე შემოკლებით:

როცა ორშაბათს დონალდ ტრამპის განცხადებას ვუსმენდი რუსეთის მიმართ მიდგომების გამკაცრების თაობაზე, ვიჯექი და ვფიქრობდი – აქვს თუ არა მას რაღაც იდუმალი კავშირი ალფრედ ნობელთან – მშვიდობის პრემიის დამაარსებელთან – რომლის მინიჭებასაც პრეზიდენტი ესოდენ დაბეჯითებით ცდილობს. საქმე იმაშია, რომ ორივეს – დონალდ ტრამპსაც და ალფრედ ნობელსაც – აფეთქებებისაკენ სწრაფვა აქვთ.

ტრამპი ამას ხატოვნად აკეთებს – იგი სარგებლობს დამანგრეველი ბიზნეს-ტაქტიკით, რომელიც მან თეთრ სახლში მიიტანა და ამგვარი მოქმედებით ცდილობს უკრაინის კონფლიქტი ჩიხიდან გამოიყვანოს. ალფრედ ნობელს რაც შეეხება, ყველაფერი დიდი ხანია ცნობილია – მისი  ქველმოქმედება და მეცენატობა, პირდაპირი გაგებით, ასაფეთქებელ ნივთიერებაზე იყო დაფუძნებული: ფული დინამიტის გამოგონებითა და გაყიდვით დააგროვა.

თავდაპირველად დონალდ ტრამპი ფიქრობდა, რომ თავისი მეგობრის ვლადიმერ პუტინის დარწმუნებას საომარი მოქმედებების შეწყვეტაზე მაინცდამაინც დიდი ძალისხმევა არ დაჭირდებოდა. როგორც მან თვითონ თქვა ორშაბათს, „მე ოთხჯერ მაინც მომეჩვენა, რომ ჩვენ თითქმის მოვილაპარაკეთ“, მაგრამ საბოლოო ჯამში პრეზიდენტი მიხვდა, რომ ერთადერთი მეთოდი რუსეთის პრეზიდენტის თანხმობის მისაღწევად არის ის, რომ ომის გასაგრძელებლად მას მეტი თანხების დახარჯვა დაჭირდეს. ამ გადაწყვეტილებით დონალდ ტრამპმა ახალი თავი გახსნა უკრაინის ისტორიაში, რომელიც ერთდროულად იმედის მომცემიც არის და საფრთხის მომტანიც.

ორშაბათს დონალდ ტრამპი დაიმუქრა, რომ რუსეთის წინააღმდეგ „მკაცრ სავაჭრო ტარიფებს“ შემოიღებს, თუ 50 დღის განმავლობაში კრემლი ზავის დადებაზე არ დათანხმდება. მან ასევე აღუთქვა უკრაინას, რომ მისცემს „პეტრიოტის“ რაკეტებს, ჰაერსაწინააღმდეგო დაცვის საშუალებებს, მაგრამ არაპირდაპირი გზით: ჯერ ნატოს ევროპელ წევრებს მიაწოდებს, ისინი ფულს გადაუხდიან ამერიკას და შემდეგ იარაღს უკრაინას გაუგზავნიან. „სამხედრო დახმარების პაკეტი 10 მილიარდი დოლარისაა“, – შემატყობინა ერთ-ერთმა წყარომ თეთრი სახლიდან. ეს სულის მოთქმის საშუალებას მისცემს უკრაინას რუსეთის დაბომბვებისაგან – ბოლო დღეებში უკრაინის ქალაქებზე თითქმის განუწყვეტლივ ხდება თავდასხმები რეკორდული რაოდენობის რუსული დრონებისა და რაკეტების მიერ.

დონალდ ტრამპს არაფერი უტქვამს იმის თაობაზე, რომ უკრაინას შეუძლია ნებართვა მიიღო ბევრად ძლიერი იარაღის გამოყენების თაობაზეც. წყარომ, რომელიც გადაწყვეტილების მიღებაში მონაწილეობდა, მითხრა, რომ კიევს ნებართვა მიეცემა ისარგებლოს ATACMS-ის ტიპის შედარებით შორ მანძილზე (300 კმ.)  მოქმედი 18 რაკეტით, რომლებიც უკრაინის არმიას აქვს. რა თქმა უნდა, მოსკოვამდე და სანქტ-პეტერბურგამდე ისინი ვერ მიფრინდებიან, მაგრამ შეუძლიათ ფრონტის ხაზიდან დაშორებით მდებარე სამხედრო ბაზებს, აეროდრომებს, საწყობებს დაარტყან და ხელი შეუშალონ რუსეთის არმიის მომარაგებას. არ არის გამორიცხული, რომ პაკეტში ATACMS-ის უფრო მეტი რაოდენობის რაკეტები შევიდეს.

პენტაგონელი ჩინოვნიკები თვეობით მოუწოდებდნენ თეთრ სახლს, რომ ნება მიეცა უკრაინის არმიისათვის რუსეთის ზურგის ობიექტებზე ATACMS-ის რაკეტებით დაერტყა. ყოველთვის, როცა მათი მოქმედების რადიუსი იზრდებოდა, რუსეთის არმია იძულებული ხდებოდა ფრონტის ხაზიდან სულ უფრო შორს გადაეტანა თავისი თვითმფრინავები და სხვა სამხედრო ტექნიკა, რომ ისინი უკრაინელების მსხვერპლი არ გამხდარიყვნენ. ახლა ამის გაკეთება უფრო რთული იქნება.

დონალდ ტრამპი, ალბათ, ასევე დაფიქრდა უკრაინისათვის ფრთოსანი რაკეტების – „ტომაჰავკების“ მიწოდების თაობაზეც, რომლებიც აშშ-მა გასულ თვეში ირანის წინააღმდეგ გამოიყენა. უკრაინის ტერიტორიიდან მათ მოსკოვამდე და სანქტ-პტერბურგამდე მიღწევა შეუძლიათ. როგორც მითხრეს, ეს საკითხი გასულ პარასკევს იხილებოდა, მაგრამ „ტომაჰავკები“ პაკეტში არ შეუტანიათ. თუმცა შეიძლება უფრო მოგვიანებით შეიტანონ, როცა დონალდ ტრამპს ზეწოლის ახალი ბერკეტები დაჭირდება.

ერთ-ერთმა წყარომ მაცნობა, რომ დონალდ ტრამპმა მკაცრი გადაწყვეტილება საბოლოოდ უკრაინის პრეზიდენტთან ტელეფონით საუბრის დროს მიიღო: ტრამპმა მას ჰკითხა, თუ რატომ არ ბომბავს მოსკოვს. „ჩვენ არ გვეშინია, იარაღს თუ მოგვცემთ, მოსკოვსაც დავარტყამთ და სანქტ-პეტერბურგსაც“, – უთქვამს ზელენსკის. ტრამპი დათანხმებულა.

ტრამპი პუტინს ხისტად ეთამაშება. იგი ძალიან არის გაბრაზებული. რუსეთის პრეზიდენტი კერკეტი კაკალი გამოდგა. ვლადიმერ პუტინი არც ისეთი კეთილია, როგორც უყვარს ხოლმე თქმა აშშ-ის პრეზიდენტს. „მკვლელს ვერ ვუწოდებ, მაგრამ აშკარაა, რომ იგი ძალიან სასტიკი ადამიანია“, – ხაზგასმულად თქვა დონალდ ტრამპმა ნატოს გენმდივან მარკ რიუტესთან საუბრის დროს.

საქმეში ჩახედული წყაროს თქმით, დონალდ ტრამპმა სიტუაციის ესკალაცია სამი მიზეზის გამო გადაწყვიტა: პირველი – მან დაინახა, რომ პუტინმა მის მიმართ უპატივცემლობა გამოიჩინა, როცა  თითქოსდა სიტყვით მზადყოფნა გამოავლინა მშვიდობის დამყარებაზე, საქმით კი უარყო მოწოდებები ცეცხლის შეწყვეტაზე. მეორე – დონალდ ტრამპმა თავისი თვალით დაინახა აშშ-ის არმიის ძლიერება, რაც ირანის ბირთვული ობიექტების დაბომბვაში გამოიხატა და მესამე – ტრამპმა ჩათვალა, რომ პუტინი მოლაპარაკებაზე მხოლოდ მაშინ დათანხმდება, როცა იგი თავისზე ძლიერი ძალის წინაშე აღმოჩნდება. როგორც რუსები ამბობენ ხოლმე, „სოლს სოლითვე ამოაგდებ“, ანუ „ესკალაცია დეესკალაციისათვის“.

კაცმა რომ თქვას, დონალდ ტრამპმა გონივრული არჩევანი გააკეთა, როცა აღიარა, რომ ზეწოლის გაძლიერების გარეშე ვლადიმერ პუტინი დათმობაზე არ წავა, თუმცა ისიც აშკარაა, რომ პრეზიდენტი ისეთი ესკალაციის გზაზე დადგა, რომელიც გაურკვეველ რისკებს შეიცავს. საინტერესოა, რომ ერთადერთი კითხვა, რომელზეც ტრამპმა პასუხის გაცემა არ ისურვა ორშაბათს ოვალური კაბინეტში გამართული შეხვედრის დროს, ასეთი იყო: „თუ ვლადიმერ პუტინი უკან არ დაიხევს და ისიც სიტუაციის გამწვავებაზე წავა, თქვენ რამდენად ღრმა პასუხს გასცემთ?“.

„ნუ მეკითხებით, რამდენად ღრმა იქნება ჩემი პასუხი… – მოჭრა ტრამპმა, – მე უბრალოდ მინდა, რომ კონფლიქტი დასრულდეს“.

თუ დონალდ ტრამპის ახალი ზეწოლა იმუშავებს, მან შეიძლება მართლაც მიიღოს ნობელის პრემია… მაგრამ ეს გზა დინამიტით იქნება მოფენილი.

წყარო

მოამზადა სიმონ კილაძემ

მივესალმები „ლელო-ძლიერი საქართველოსა“ და გახარიას გუნდებს შორის ერთობლივი მემორანდუმის გაფორმებას – მნიშვნელოვანია, არ დავტოვოთ ოპოზიციური ამომრჩეველი არჩევნების გარეშე და ხელი არ შევუწყოთ იმას, რომ „ქართულმა ოცნებამ“ უპრობლემოდ დაისაკუთროს ყველა ქალაქისა თუ რეგიონის ადგილობრივი წარმომადგენლობა,- ამის შესახებ პატიმრობაში მყოფი „ლელო – ძლიერი საქართველოს“ ლიდერის მამუკა ხაზარაძის წერილი მის სოციალურ ქსელში ვრცელდება.

როგორც ხაზარაზე აღნიშნავს, ბოიკოტი „ქართული ოცნების“ ჩაბეტონებას შეუწყობს ხელს ადგილობრივ დონეზე.

„მივესალმები „ლელო-ძლიერი საქართველოსა“ და გახარიას გუნდებს შორის ერთობლივი მემორანდუმის გაფორმებას.

3 თვეში გარდამტეხი ბრძოლა გველოდება, ამიტომ მნიშვნელოვანია, რომ არ დავტოვოთ ოპოზიციური ამომრჩეველი არჩევნების გარეშე და ხელი არ შევუწყოთ იმას, რომ „ქართულმა ოცნებამ“ უპრობლემოდ დაისაკუთროს ყველა ქალაქისა თუ რეგიონის ადგილობრივი წარმომადგენლობა, რადგან სწორედ ეს იქნება ჩვენთვის მნიშვნელოვანი საყრდენი და პლაცდარმი საბოლოო გამარჯვებისთვის.

არ უნდა გამოვაცალოთ ქართველ ხალხს ხელიდან ბერკეტი. ბოიკოტი კი სწორედ „ქართული ოცნების” ანუ რუსული ძალის ჩაბეტონებას შეუწყობს ხელს ადგილობრივ დონეზე. არ შეიძლება ამის გაკეთება. ხალხს და განსაკუთრებით ოპოზიციურ ამომრჩეველს სჭირდება დაცვა ყველა დონეზე – ეს დამატებითი ბრძოლის ველია მიუხედავად უთანასწორო მდგომარეობისა.

ჩვენი მიზანი უცვლელია – ახალი საპარლამენტო არჩევნების მიღწევა და სინდისის პატიმრების გათავისუფლება! ამ სულისკვეთებით გაფორმდა ეს მემორანდუმი, რომლის მიზანიც ერთია – ბრძოლას ყოველთვის აქვს აზრი და არცერთ ადგილას რუსული ძალა ბრძოლის გარეშე არ უნდა დავტოვოთ.

ჩვენ, „ლელო-ძლიერი საქართველო”, ყოველთვის ვიყავით ერთობის ინიციატორები. დღეს, როდესაც ქვეყანას რუსული პოლიტიკა სრულიად იპყრობს, ყველაფერი პირადი უკან უნდა გადავწიოთ და ვიფიქროთ ერთობლივ ბრძოლაზე. ეს მემორანდუმი სწორედ ამის დასტურია.

მოვუწოდებ ყველას, შემოგვიერთდნენ ამ ბრძოლაში! ჩვენ გვჯერა ქართველი ხალხის გამარჯვების – ერთად ბრძოლით ეს გარდაუვალია!- წერს ხაზარაძე.

ცნობისთვის, პარტია „გახარია საქართველოსთვის“ და „ლელო-ძლიერი საქართველო“ თვითმმართველობის არჩევნებთან დაკავშირებით თანამშრომლობაზე შეთანხმდნენ. პარტიებს შორის თანამშრომლობის შესახებ მემორანდუმს ხელი „გახარია საქართველოსთვის“ აღმასრულებელმა მდივანმა ბერდია სიჭინავამ და „ლელო-ძლიერი საქართველოს“ გენერალურმა მდივანმა, ირაკლი კუპრაძემ მოაწერეს. როგორც ბერდია სიჭინავამ აღნიშნა, პარტიები „თვითმმართველობის არჩევნებში საერთო ბრძოლასა და საერთო პრინციპებზე თანხმდებიან“.