8 ოპოზიციური პარტია, რომელიც თვითმმართველობის არჩევნებს ბოიკოტს უცხადებს, რეგიონებში წინააღმდეგობის წევრების ორგანიზებას იწყებს. პარტიების ერთობლივი განცხადება საზოგადოებას პარლამენტთან მიმდინარე აქციაზე „თავისუფლების მოედნის“ ლიდერმა, ლევან ცუცქირიძემ გააცნო.

“ივანიშვილის რეჟიმი 4 ოქტომბერს საქართველოში მორიგ რუსულ სპეცოპერაციას გეგმავს. ჩვენ, 8 პროდასავლური ძალა არ გავხდებით რეჟიმის თანამზრახველი საქართველოს მოქალაქეების მოტყუებაში. ჩვენ არ მივიღებთ მონაწილეობას 4 ოქტომბრის რუსულ სპეცოპერაციაში და არ გავწირავთ საქართველოს მოქალაქეებს ეგზისტენციალური საფრთხისთვის. ივანიშვილის კრიმინალური რეჟიმის მიერ შექმნილი განუკითხაობის და უსამართლობის დაკანონებაში მონაწილეობას არ მივიღებთ. ვაღიარებთ მხოლოდ თავისუფალ საპარლამენტო არჩევნებს, რომელსაც აუცილებლად მივაღწევთ რეჟიმის პრინციპული და თანმიმდევრული იზოლაციით.

იმისთვის, რომ ცვლილება დადგეს და ის შედეგი მოიტანოს, რაც ისტორიულ გზაზე დაგვაბრუნებს, სასიცოცხლოდ აუცილებელია ქართული პოლიტიკის სისტემური გადატვირთვა. სწორედ ამ მიზნით, საქართველოს ყველა ქალაქსა და მუნიციპალიტეტში ვიწყებთ წინააღმდეგობის წევრების ორგანიზებას იმისთვის, რომ პოლიტიკური ბრძოლა თითოეულ ქალაქსა და სოფელში გაიშალოს და ხალხიდან წამოსულ იმპულსს, მათ ინტერესებსა და ენერგიას დაეფუძნოს“,- აცხადებენ პარტიები.

სამწუხაროდ, ზოგმა დემოკრატიულმა პოლიტიკურმა პარტიამ ვერ გაუძლო ცდუნებას, მაგრამ „ნაციონალური მოძრაობა“, ისევე როგორც 13 წლის განმავლობაში, დღესაც, ხვალაც, 4 ოქტომბერსაც იქნება ბრძოლის წინა ხაზზე და აუცილებლად აწევს გამარჯვების დროშას ივანიშვილის რეჟიმის წინააღმდეგ, – ამის შესახებ „ნაციონალური მოძრაობის“ თავმჯდომარემ, თინა ბოკუჩავამ თანაპარტიელ საკრებულოს წევრებთან ერთად „მზიურში“ გამართულ ბრიფინგზე განაცხადა.

ბოკუჩავას თქმით, დღეს „ნაციონალური მოძრაობის“ წევრები შეიკრიბნენ კიდევ ერთხელ ერთად, რათა დააფიქსირონ, რომ 4 ოქტომბრის არჩევნებში მონაწილეობას არ მიიღებენ.

„დღეს ჩვენ შევიკრიბეთ იმისთვის, რომ კიდევ ერთხელ, „ერთიანი ნაციონალური მოძრაობის“ სახელით, საკრებულოს 378 წევრის სახელით, ჩვენ ვთქვათ – „არა“ 4 ოქტომბრის რუსულ სპეცოპერაციას და ვიბრძოლოთ მხოლოდ და მხოლოდ თავისუფალი და სამართლიანი ახალი საპარლამენტო არჩევნებისთვის.

სამწუხაროდ, ზოგმა ვერ გაუძლო ცდუნებას, მათ შორის, ზოგმა დემოკრატიულმა პოლიტიკურმა პარტიამ, მაგრამ „ერთიანი ნაციონალური მოძრაობა“, ისევე როგორც 13 წლის განმავლობაში, დღესაც, ხვალაც, 4 ოქტომბერსაც იქნება ბრძოლის წინა ხაზზე და აუცილებლად აწევს გამარჯვების დროშას ივანიშვილის რეჟიმის წინააღმდეგ.

ჩვენ ვხედავთ, რომ პრაქტიკულად ყოველდღიურ რეჟიმში არის განცხადებები საერთაშორისო ასპარეზზე. მათ შორის, დღეს ევროპარლამენტმა განაცხადა, რომ ის არ აღიარებს ივანიშვილის არალეგიტიმურ ხელისუფლებას, არ ითანამშრომლებს ივანიშვილის რუსულ რეჟიმთან და ის ითანამშრომლებს მხოლოდ იმ ხელისუფლებასთან, რომელიც ჩვენს ქვეყანას წაიყვანს ევროპისკენ ახალი თავისუფალი საპარლამენტო არჩევნების შედეგად.

ძალიან მნიშვნელოვანია ის, რომ დღეს ჩემთან ერთად არიან „ნაციონალური მოძრაობის“ საკრებულოს წევრები. ესენი ის ადამიანები არიან, ვისაც ძალიან კარგად ესმით ბრძოლის ფასი სოფლებში, დაბებში, ქალაქებში, საქართველოს ყველა წერტილში და ყველა რეგიონში. დიახ, ესენი არიან სწორედ ის გაუტეხელი ადამიანები, რომლებმაც საქართველოს თავისუფლება და სახელმწიფოებრიობა, ივანიშვილის მოღალატეობრივი რეჟიმის ძალისხმევის მიუხედავად, დღევანდელ დღემდე მოიტანა. ხვალ სწორედ ეს გუნდი, სწორედ „ნაციონალური მოძრაობა“ კვლავ აწევს გამარჯვების დროშას და ეს გამარჯვება გადის პრინციპულობაზე, უკომპრომისობაზე, ბრძოლაზე. სწორედ ასე – ერთიანობით, პრინციპულობით, უკომპრომისობით ჩვენ აუცილებლად ავწევთ გამარჯვების დროშას“, – განაცხადა თინა ბოკუჩავამ.

შარშან გვეუბნებოდნენ, ევროკავშირში გაწევრიანების პროცესზე უარი თქვენ თქვითო და პროტესტს ამით კვებავდნენ. „ირკვევა“, თურმე „ავტორიტარული მმართველობის“ ბრალი ყოფილა და სასწრაფოდ კურსი უნდა შევცვალოთ, – ამის შესახებ საპარლამენტო უმრავლესობის ლიდერი, ფრაქცია „ქართული ოცნების“ თავმჯდომარე მამუკა მდინარაძე სოციალურ ქსელში წერს.

მისი თქმით, ამბობენ, რომ თურმე დღევანდელი მმართველობის ფორმა უნდა შეიცვალოს და იყოს ისეთი, როგორიც მიხეილ სააკაშვილს ჰქონდა.

„შარშან გვეუბნებოდნენ, ევროკავშირში გაწევრიანების პროცესზე უარი თქვენ თქვითო და პროტესტს ამით კვებავდნენ. „ირკვევა“, თურმე „ავტორიტარული მმართველობის“ ბრალი ყოფილა და სასწრაფოდ კურსი უნდა შევცვალოთ. ახლა ყველაფერი გასაგებია. რა არის ამისთვის საჭირო?

1. დღევანდელი მმართველობის ფორმა უნდა შევცვალოთ და ისეთი უზრუნველვყოთ, როგორც ეს სააკაშვილს ჰქონდა. „დემოკრატიის შუქურა“ ასე უხეშად არ უნდა ჩაგვექრო და უნდა გამოვასწოროთ. პრინციპში, ჩვენ გაგვიჭირდება, აგენტებმა უკეთესად იციან, ეს როგორ დაალაგონ და „სამართლიანი არჩევნებიც“ მათ მმართველობაში მოყვანას გულისხმობს;

2. უნდა შევიდეთ დსთ-ში და ეკონომიკის განვითარებაც მოლდოვისნაირი უნდა გვქონდეს;

3. უნდა ვიყოთ ისეთივე ურთიერთობაში რუსეთთან, როგოც უკრაინა – ღია ომში;

4. ოჯახურ ღირებულებებზე და მსგავს „ქართულ-ეროვნულ ახირებებზე“ უარი რომ უნდა ვთქვათ, ეს, პრინციპში, პირდაპირ მოგვწერეს რამდენიმე დღის წინ.

აი, ამ შემთხვევაში ევროპარლამენტის განცხადება იქნება აბსოლუტურად განსხვავებული, მეტიც, პოზიტიური და მხარდამჭერი. მხოლოდ ვიზალიბერალიზაციით შანტაჟი, როგორც ჩანს, არ ჭრის, დამატებითი ზომებია საჭირო ქართველი ხალხის წინააღმდეგ, რომელსაც საკუთარ თავზე უარი არასდროს უთქვამს – ყველას მოუწევს ამასთან შეგუება.

პ. ს. დღეს რადიკალებს აქცია აქვთ დაანონსებული, რომელიც, ორკვირიანი მზადების მიუხედავად, ფაქტობრივად ჩავარდნილი იყო და მის „დასაბუსტად“ რაღაც იყო საჭირო. რა საოცარი დამთხვევაა ეს განცხადება“, – დაწერა მამუკა მდინარაძემ.

ვიზალიბერალიზაციაზე საუბრის დაწყება არ არის დაკავშირებული კონკრეტულად ამ ფაქტთან. ჩვენ, ყველას ძალიან კარგად გვესმის, რომ ეს არის იარაღი „დიფ სთეითის“ ხელში, შეიძლება, ითქვას ბოლო ტყვია, რომ არეულობა შეიტანოს საქართველოში, ძალადობრივად მოახდინონ ხელისუფლების ცვლილება, – ამის შესახებ თავდაცვისა და უშიშროების საპარლამენტო კომიტეტის თავმჯდომარის პირველმა მოადგილემ, თენგიზ შარმანაშვილმა განაცხადა.

შარმანაშვილის თქმით, ვიზალიბერალიზაცია არის შანტაჟის იარაღი ევრობიუროკრატთა ხელში.

„ეს იმდენად ნათელია, ამის მტკიცება აღარც არის საჭირო, უბრალოდ პრემიერ-მინისტრმა ეს ყველაფერი შეახსენა ხალხს. ეს რომ ასე იყო, იქიდანაც დასტურდება, რომ ოთხი მცდელობა იყო სერიოზული რევოლუციის და დესტაბილიზაციისა საქართველოში, ეს ხომ არ არის პირველი შემთხვევა. ეს პირობები როდესაც დგება, არ იფიქროთ, რომ ეს არის დაკავშირებული რაღაცა პირობებთან, რომლის შემდეგაც საქართველოს ვიზალიბერალიზაცია იქნება ან არ ექნება. უბრალოდ, ეს არის მათთვის იარაღი. ეს არის შანტაჟის იარაღი“, – განაცხადა შარმანაშვილმა.

თენგიზ შარმანაშვილის განცხადებით, „ქართული ოცნების“ ხელისუფლების ცვლილება უნდათ, რადგან ისინი იცავენ ქართულ სუვერენიტეტს და გადაწყვეტილებების მიღება ხდება თბილისში და ისინი არანაირ შანტაჟს არ ექვემდებარებიან.

„ხელისუფლების ცვლილება უნდათ იმიტომ, რომ საქართველოს ხელისუფლება იცავს ქართულ სუვერენიტეტს და გადაწყვეტილებებს იღებს თბილისში, არ ექვემდებარება არანაირ შანტაჟს და, პირველ რიგში, ყურადღებას აქცევს საქართველოს ეროვნულ ინტერესებს. ეს არის ყოვლად მიუღებელი ამ წრეებისთვის. ჩვენდა სამწუხაროდ, ისინი მიიჩნევენ, რომ საქართველოში უნდა იყოს ხელისუფლება, თვითონ მათი ტერმინია ჩვენი რადიკალური ოპოზიციის მიმდევრებისა, რომ „ცალ ფეხზე იდგეს“ და რასაც ეტყვიან, ყოველგვარი კრიტიკის და დაფიქრების გარეშე, ცხოვრებაში გაატარონ. ეს არის იგივე შანტაჟი, მათ იციან, რომ ამას ჩვენთვის ეგზისტენციალური მნიშვნელობა აქვს. ქართველი ხალხი თვლის, რომ საქართველოს მომავალს დიდი საფრთხე მიადგება, შეიძლება დამღუპველი ზემოქმედება მოახდინოს, თუ ამ კანონმდებლობას გვერდზე გადავდებთ და არ მივაქცევთ ყურადღებას, რა ხდება ჩვენთან, საქართველოში. ევროკავშირის ელჩი, რომელიც აქ არის პირდაპირ მოუწოდებს ქართველ ხალხს, ჩვენ მოგვისმინეთ და ის გააკეთეთ, თორემ საფრთხე გელოდებათო, მეტი ჩარევა რა გინდათ?!“ – განაცხადა თენგიზ შარმანაშვილმა.

პაველ ჰერჩინსკი „მოლოტოვის კოქტეილის“ მსროლელზე, პიროტექნიკის დამმიზნებელზე, პოლიციელზე წიხლებით შემდგომზე როცა ამბობს, რომ უსამართლოდაა დაკავებული, დაკავებას უსამართლოს იმიტომ უწოდებს, რომ ის ამ ძალადობას ამართლებს, – ამის შესახებ საქართველოს პარლამენტის თავმჯდომარე შალვა პაპუაშვილი სოციალურ ქსელში წერს.

პაპუაშვილის თქმით, არ არსებობს ევროკავშირის ელჩის არცერთი განცხადება, რომლითაც ჰერჩინსკიმ ქუჩის ძალადობა დაგმო.

„გუშინ ევროკავშირის ელჩმა პაველ ჰერჩინსკიმ „უსამართლოდ დაკავებულების გათავისუფლება“ მოითხოვა. ერთი რამე უნდა გვესმოდეს. როდესაც პაველ ჰერჩინსკი „მოლოტოვის კოქტეილის“ მსროლელზე, პიროტექნიკის დამმიზნებელზე, პოლიციელზე წიხლებით შემდგომზე ამბობს, რომ უსამართლოდაა დაკავებული, ის იმას კი არ ამბობს, რომ „მოლოტოვი“ არ უსვრია ერთს ან წიხლით პოლიციელზე არ შემდგარა მეორე. ის დაკავებას უსამართლოს იმიტომ უწოდებს, რომ ის ამ ძალადობას ამართლებს – კი, „მოლოტოვის კოქტეილი“ სასროლი იყო და იმიტომ ესროლა; კი, წიხლებით შესადგომი იყო და შედგა კიდეც; კი, პიროტექნიკაც უნდა ესროლა და ჯობდა უკეთ დაემიზნებინა – ესაა, როგორც ჩანს, მისი სათქმელი.

ამიტომაც არის, რომ ვერ ნახავთ მის ვერცერთ, ხაზს ვუსვამ, ვერცერთ განცხადებას, სადაც მან ეს ქუჩის ძალადობა დაგმო. არადა, თითქოს რა უდგას წინ იმის თქმას, რომ ადამიანის ცოცხლად დაწვის მცდელობა, ელჩის ლექსიკითვე რომ ვთქვათ, ამაზრზენია. მაგრამ არა, არცერთი გადაბრუნებული სიტყვაც კი. ამ პოსტის შემდეგაც, არა“, – წერს პაპუაშვილი.

საქართველოს პარლამენტის თავმჯდომარის თქმით, ადამიანის უფლებების უპატივცემულობა და ღირებულებების თავდაყირა დაყენება უცხოელ პოლიტიკოსთა თუ დიპლომატთა რიტორიკაში სამწუხარო ყოველდღიურობად იქცა.

„ადამიანის უფლებების უპატივცემულობითაა გამოწვეული, რომ დარღვევის საზომად იქცა თავდამსხმელი და არა მსხვერპლი. თქვი, რომ ხარ „პროევროპელი“ და მაშინ „მოლოტოვის კოქტეილიც“ და წიხლიც ლეგიტიმური ბრძოლის იარაღია. თქვი, რომ შენი მიზანი „დიადია“ და მაშინ შენი ყველა საშუალება გამართლებულია (როგორ გინდა, აქაც საბჭოთა კავშირი არ გაიხსენო). ეს არის, სინამდვილეში რასთანაც გვაქვს საქმე. ევროკავშირის სახელით თუ ძალადობ, მაშინ შენი ძალადობა პროევროპული ანუ სამართლიანია, ხოლო შენი დასჯა – უსამართლო. ეს ჯერ კიდევ მაშინ თქვეს, როდესაც ბრიუსელმა „მე ვისროლე“ კამპანია დააფინანსა და დღისით, მზისით, ევროპარლამენტარებით და დიპლომატებით, ლამის ეროვნულ გმირად გამოგვიცხადეს მოძალადე, რომელიც „მოლოტოვის კოქტეილით“ ადამიანის ცოცხლად დაწვას ცდილობდა. გინახავთ სადმე ევროკავშირის ელჩის სინანული ამაზე? არა. ამასობაში კი ხალხში უკვე გაჩნდა ტერმინი – „პროევროპული ძალადობა“ და ამ ვითარების ყურება, მართლაც გულსატკენია.

P.S. და აქვე სტანდარტული წინადადება მოსალოდნელი ვიქტიმიზაციის თავიდან ასაცილებლად. არა, ეს არ არის ელჩზე თავდასხმა, ეს არის ლეგიტიმური კრიტიკა, რომელსაც თვითრეფლექსია და პასუხი სჭირდება“, – წერს პაპუაშვილი.