2.5 მლრდ დოლარის დანაზოგი მიიღო ამერიკულმა მხარემ ჩვენი მონაწილეობით მხოლოდ ავღანეთისა და ერაყის მისიებში,- ამის შესახებ საქართველოს პრემიერ-მინისტრმა ირაკლი კობახიძემ გადაცემა “იმედის კვირასთან” ინტერვიუში განაცხადა.

პრემიერის თქმით, 32 მამაცი ქართველი ჯარისკაცი დაიღუპა ამ მისიებში და ამის დაფასებაც არის მნიშვნელოვანი ამერიკის შეერთებული შტატების მხრიდან.

“უნდა გავიხსენოთ საერთაშორისო მისიებში ჩვენი ქვეყნის წვლილი, რაც მათემატიკურადაც დათვლადია. კერძოდ, ჩემს წერილში საუბარი იყო იმაზე, რომ 2.5 მლრდ დოლარის დანაზოგი მიიღო ამერიკულმა მხარემ ჩვენი მონაწილეობით მხოლოდ ავღანეთისა და ერაყის მისიებში. მაშინ, როდესაც ამერიკული რეალური დახმარება, რაც გაუწიეს ჩვენს ქვეყანას ამერიკული ბიუჯეტიდან, არის ბევრად ნაკლები ამ 2.5 მლრდ დოლარზე. კიდევ ერთხელ ხაზგასმით უნდა აღინიშნოს ის, თუ რას ვერ ჩავთვლით ჩვენ რეალურ დახმარებაში, ეს არის, პირველ რიგში, ის თანხები, რომლებიც ქვეყნის არევისთვის იხარჯებოდა ჩვენს ქვეყანაში USAID-ის, NED-ის და სხვა ფონდების მეშვეობით. რა თქმა უნდა, ეს არ იყო არავითარი დახმარება. ასევე, ერთადერთი შემთხვევა იყო, როდესაც ეკონომიკას წაეხმარა ამერიკული დახმარება, ეს იყო 2008-2011 წლები, როდესაც გადასარჩენი იყო სააკაშვილის რეჟიმი, ის რეჟიმი, რომელმაც სწორედ Deep State-ის მეშვეობით დაიწყო 2008 წელს ომი საქართველოში. ეს ვერ ჩაითვლება დახმარებად, ვერც სააკაშვილის რეჟიმის გადარჩენა ვერ ჩაითვლება საქართველოს დახმარებად და ვერც არეულობის დაფინანსება NGO-ების, USAID-ის, NED-ის გავლით.

ყველაფერი დანარჩენი რომ ავიღოთ, რომ გამოვაკლოთ ეს და დავტოვოთ ყველაფერი დანარჩენი, რეალური დახმარება ბევრად, მრავალჯერ  ჩამორჩება იმ 2.5 მილიარდს, რაც ჩვენ დავუზოგეთ ამერიკულ მხარეს მხოლოდ ავღანეთში და ერაყში ჩვენი მისიების მონაწილეობით. რაც შეეხება ჩვენს ჯარისკაცებს, ეს საერთოდ არ ექვემდებარება არავითარ მათემატიკურ დათვლას, ჩვენ მსხვერპლი გავიღეთ, ჩვენმა ჯარისკაცებმა  გაიღეს მსხვერპლი, ყველაზე ძვირფასი, სიცოცხლე შესწირეს ამ მისიებში მონაწილეობას. 32 მამაცი ქართველი ჯარისკაცი დაიღუპა ამ მისიებში. ამის დაფასებაც არის მნიშვნელოვანი ამერიკის შეერთებული შტატების მხრიდან. ამიტომ ვსაუბრობთ ჩვენ ამ ფაქტებზე. სამართლიანობა, ეს არის ერთადერთი მოთხოვნა, რასაც ჩვენ ვაყენებთ პრეზიდენტ ტრამპის ადმინისტრაციის წინაშე”, – განაცხადა ირაკლი კობახიძემ.

4 წელი გვიწევდა ბრძოლა სუვერენიტეტისთვის, ჩვენი ეროვნული ინტერესებისთვის, ასეთ დროს, ქართველი ხალხის, ისევე როგორც ხელისუფლების მოლოდინი იყო ის, რომ მეტ ყურადღებას გამოავლენდნენ ჩვენს მიმართ, თუმცა არის დუმილი და გადავწყვიტეთ, ღია წერილით გვეცადა გარკვეული ძვრების შეტანა ამ მოცემულობაში, –  ამის შესახებ პრემიერ-მინისტრმა ირაკლი კობახიძემ ტელეკომპანია „იმედის” ეთერში განაცხადა.

როგორც მთავრობის მეთაურმა აღნიშნა, წერილის მთავარი გზავნილია, გადაიტვირთოს და ჩამოყალიბდეს სამართლიანი ურთიერთობები საქართველოსა და აშშ-ს შორის.

„მთავარი გზავნილი არის ის, რომ გვაქვს ინტერესი, გადაიტვირთოს ურთიერთობები. ეს არის მთავარი, რაც იყო მოცემული ჩვენს წერილში. გვაქვს ინტერესი, რომ ჩამოყალიბდეს სამართლიანი ურთიერთობები საქართველოსა და აშშ-ს შორის. თვისებრივად შეიცვალოს ის დამოკიდებულება, რომელიც ჩამოყალიბებული იყო წინა ადმინისტრაციის პირობებში. ჩვენი მოლოდინი და დადებითი მოლოდინი ეფუძნებოდა და ჯერ კიდევ ეფუძნება იმ თანხვედრას, რომელიც ღირებულებითი თვალდსაზრისით არსებობს პრეზიდენტ ტრამპის ადმინისტრაციასა და საქართველოს ხელისუფლებას შორის. იცით, როგორია ახალი პრეზიდენტის დამოკიდებულება ისეთი საკითხების მიმართ, როგორიცაა იგივე USAID, NED, ლგბტ პროპაგანდა, გენდერული პროპაგანდა და ა.შ. აქ გვაქვს აბსოლუტური თანხვედრა. ასევე თქვენ იცით, როგორია პრეზიდენტ ტრამპის ადმინისტრაციის დამოკიდებულება ისეთი მოვლენების მიმართ, რაც დაკავშირებულია ევროპული ბიუროკრატიის ჩარევასთან სხვადასხვა ქვეყნის შიდა სუვერენულ საქმეებში. ერთ-ერთი იყო რუმინეთის მაგალითი, სადაც, სწორედ, ევროპული ბიუროკრატიის ჩარევით, საერთოდ გაუქმდა უკვე ჩატარებული არჩევნები ყოველგვარი რეალური საფუძვლის გარეშე. ამასთან დაკავშირებით ხმა აიმაღლა პრეზიდენტ ტრამპის ადმინისტრაციამ, თუმცა ანალოგიური განცხადებები არ გაკეთებულა საქართველოს მიმართ, მაშინ, როდესაც ყველაზე მძიმე წნეხის ქვეშ, წინა ადმინისტრაციის მხრიდან, მოექცა, სწორედ, საქართველოს ხელისუფლება. 4 წლის განმავლობაში, ჩვენ გვიწევდა ბრძოლა სუვერენიტეტისთვის, ჩვენი ეროვნული ინტერესებისთვის და ეს ბრძოლა წარმატებით გამოვიარეთ. ასეთ დროს, რა თქმა უნდა, ქართველი ხალხის მოლოდინიც იყო და ხელისუფლების მოლოდინიც იყო ის, რომ მეტი ყურადღება იქნებოდა გამოვლენილი ჩვენი ქვეყნის მიმართ, ქართველი ხალხის მიმართ, თუმცა არის დუმილი და ჩვენ გადავწყვიტეთ, რომ ჩვენი ღია წერილით გვეცადა გარკვეული ძვრების შეტანა ამ მოცემულობაში,”- განაცხადა პრემიერმა.

მიხეილ ყაველაშვილი ვატიკანში, წმინდა პეტრეს მოედანზე, მსოფლიო ლიდერებთან ერთად, რომის ახალი პაპის, ლეო XIV-ის ინაუგურაციის ცერემონიას დაესწრო. ამის შესახებ მიხეილ ყაველაშვილის „ფეისბუქზე“ გავრცელებულ ინფორმაციაშია აღნიშნული.

„კიდევ ერთხელ, გულითადად ვულოცავ მის უწმინდესობა ლეო XIV-ს რომის პაპად არჩევას;

დარწმუნებული ვარ, ის ღირსეულად განახორციელებს ამ უაღრესად საპატიო და, ამავდროულად, საპასუხისმგებლო მისიას.

საქართველო ნამდვილად ამაყობს და აფასებს წმინდა საყდართან არსებულ ისტორიულ კავშირებს და მზად არის, განაგრძოს მშვიდობაზე, ურთიერთპატივისცემასა და საერთო ღირებულებებზე დაფუძნებული ურთიერთობები!“, – წერს ყაველაშვილი.