, სალომე ზურაბიშვილი აქციაზე დაკავებულების ჯარიმების დასაფარად ფონდის შექმნის ინიციატივით გამოდის.

როგორც ორბელიანების სასახლეში გამართულ ბრიფინგზე ზურაბიშვილმა აღნიშნა, აქციაზე იმყოფებიან სუს-ის წარმომადგენლებიც და საჭიროა, პროვოკაციებისგან თავის დაცვა.

„მათი დაცვა, ასევე, იმაში მდგომარეობს, რომ შეიძლება ძალიან მალე საჭირო იყოს რამე ფონდის შექმნა. დღეს, ჯერ კიდევ არის იმის საშუალებები, რესურსები სხვადასხვა არასამთავრობოებიდან იმისთვის, რომ ჯარიმები დაფარული იყოს, მაგრამ შეიძლება დადგეს მომენტი, როცა დიდი საზოგადოებრივი ძალისხმევა იყოს იმისთვის საჭირო, რომ ფონდი შეიქმნას და ამ ადამიანებს დავეხმაროთ. დახმარება კიდევ სხვა რამეში გამოიხატება, ჩვენ დავიცვათ ისინი პროვოკაციებისგან. მინდა პირდაპირ ვთქვა, ჯერ ერთი, თქვენს შორის, ვინც ქუჩაში გამოდიხართ, შეიძლება სუს-ის წარმომადგენლები იყვნენ, რომლებიც პროვოკაციებს ეწევიან, მათ მიმართ სიფრთხილეა საჭირო, მაგრამ მე ამას ვერ გასწავლით, მაგრამ მე შემიძლია იმაზე გაგაფრთხილოთ, რომ მე რამდენიმე გზავნილი მომივიდა სხვადასხვა ფორმით, რომელიც იმას ეხება, ვითომც, უკრაინიდან ქართველი სამხედროები ემზადებიან, ან ჩამოსულები არიან იმისთვის, რომ ჩაერთონ, როგორც სამხედროები ამ პროტესტში, ეს პირდაპირი პროვოკაციაა, ასეთი რამ არ ხდება, არავინ დაიჯეროთ ამას, რადგან ეს პირდაპირ მიმართულია პროტესტის წინააღმდეგ, ეს არის ის, რაც ყველაზე უფრო აწუხებს მმართველ პარტიას“, – განაცხადა ზურაბიშვილმა.

“მინდა ხაზი გავუსვა, რომ აქცია დაწყებულია სულ რაღაც 40 წუთი და უკვე გარკვეულმა პირებმა დაიწყეს ძალადობრივი ქმედებები,” – ამის შესახებ საპატრულო პოლიციის ხელმძღვანელმა, ვაჟა სირაძემ განაცხადა.

ვაჟა სირაძე საპროტესტო აქციის მონაწილეებს მოუწოდებს პროტესტო კანონით გათვალისწინებულ ჩარჩოებში გამოხატონ, წინააღმდეგ შემთხვევაში გამოყენებული იქნება უმკაცრესი ზომები:

“მე მოვუწოდებ აქციის მონაწილეებს, განსაკუთრებით იმ პირებს, ვინც მოწოდებულია აგრესიისკენ, არ გასცდნენ კანონის ჩარჩოებს და თავიანთი პროტესტი გამოხატონ კანონით გათვალისწინებულ ჩარჩოებში, ვინაიდან შინაგან საქმეთა სამინისტროს განაკვეთები ადგილზე მობილიზებულია იმისთვის, რომ დაიცვან კანონი.

გამომდინარე იქიდან რომ ბოლო დღეებში ყველანი ვხედავთ რომ გარკვეული პირები ახდნენ სხვადასხვა ძალადობრივ ქმედებებს, პიროტექნიკას ესვრიან პოლიციის დანაყოფებს, რიგ შემთხვევაში ცეცხლს უკიდებენ, შუშებს ამტვრევენ პარლამენტის შენობაში, მთელს ქალაქში გადაწვეს, დაამტვრიეს სხვადასხვა სახის ინვენტარი, ქალაქის ინფრასტრუქტურა, შესაბამისად, პოლიცია მზად არის იმისთვის რომ აღკვეთოს ძალადობრივი ქმედებები. ვაფრთხილებთ ყველა პირს, რომ არ გასცდნენ კანონის ჩარჩოებს, წინააღმდეგ შემთხვევაში შინაგანს საქმეთა სამინისტრო მიიღებს უმკაცრეს ზომებს,”- აცხადებს ვაჟა სირაძე.

“ქალბატონი სალომე, თავის წინა პერიოდს იხსენებს ალბათ. ვიცით, როგორი იყო მისი დამოკიდებულება ზვიად გამსახურდიასთან და ვიცით, რას ნიშნავს სიტყვა “ხუნტა” და რა იყო მაშინ გადატრიალების და სხვადასხვა ასეთი პროცესები, ვიცით და გვახსოვს, რომელ მხარეს იდგა მაშინ სალომე ზურაბიშვილი”, – ამის შესახებ საქართველოს პარლამენტის თავმჯდომარე შალვა პაპუაშვილმა, სალომე ზურაბიშვილის “საზოგადოებრივი საბჭოს” შეფასებისას განაცხადა.

პაპუაშვილის თქმით, ზურაბიშვილს იმდენად აქვს ქვეცნობიერში ჩაბეჭდილი კონსტიტუციის და დემოკრატიულად არჩეული ხელისუფლების წინააღმდეგ წასვლა, რომ ის ახლაც ამ ინსტინქტებით მოქმედებს. პრეზიდენტის ეს ნაბიჯი კი, პარლამენტის თავმჯდომარის შეფასებით, არა მხოლოდ კონსტიტუციის დარღვევა, არამედ, სახელმწიფოს ღალატია.

“როგორც ჩანს, სახელმწიფოს, კონსტიტუციის და დემოკრატიულად არჩეული ხელისუფლების წინააღმდეგ წასვლა იმდენად ღრმად არის მის ქვეცნობიერში ჩაბეჭდილი, რომ ეს ინსტინქტები მასში ახლაც იღვიძებს. ეს სხვა არაფერია, თუ არა კონსტიტუციური წყობის წინააღმდეგ წასვლა, რაც არის არა მხოლოდ კონსტიტუციის დარღვევა, არამედ, უპირველეს ყოვლისა, გახლავთ სახელმწიფოს ღალატი და სახელმწიფოს წინააღმდეგ წასვლა”, – აღნიშნა შალვა პაპუაშვილმა

“სხვადასხვა საჯარო და კერძო სკოლიდან მომდის ინფორმაცია, რომ მიმდინარეობს აგრესიული და ძალადობრივი კამპანია სკოლის მოსწავლეების მიმართ, რომლის მიზანია მოსწავლეთა დაშინება, შანტაჟი, პოლიტიკური მიზნებისთვის მათი ინსტრუმენტალიზების მცდელობა” – ამის შესახებ პარლამენტის ადამიანის უფლებათა დაცვის კომიტეტის თავმჯდომარემ, რატი იონათამიშვილმა განაცხადა. 

“სხვადასხვა საჯარო და კერძო სკოლიდან მომდის ინფორმაცია, რომ მიმდინარეობს აგრესიული და ძალადობრივი კამპანია სკოლის მოსწავლეების მიმართ, რომლის მიზანია მოსწავლეთა დაშინება, შანტაჟი, პოლიტიკური მიზნებისთვის მათი ინსტრუმენტალიზების მცდელობა, ბავშვების თავისუფალ ნებაზე გავლენის მოხდენა, სასწავლო პროცესიდან ჩამოშორება და საზოგადოდ, სასწავლო პროცესის ჩაშლა.

კამპანიის შინაარსი სახიფათოა იმდენად, რამდენადაც იგი არამხოლოდ განათლების უფლების რეალიზებას უშლის ხელს, სახეზეა ბავშვის საუკეთესო ინტერესების ხელყოფის საფრთხე, სასკოლო სივრცეში პოლარიზაციის შექმნის და დაყოფის მცდელობა. ყოველივე აღნიშნული კი ქმნის ნიადაგს განსხვავებული აზრის საფუძვლით ადგილი ჰქონდეს დისკრიმინაციულ მოპყრობასა და ჩაგვრას.

საქართველოში ზოგადი განათლების სფეროში სახელმწიფო პოლიტიკის ძირითადი მიზანია მოსწავლის ეროვნული და ზოგადსაკაცობრიო ღირებულებების მქონე, თავისუფალ პიროვნებად ჩამოყალიბებისათვის საჭირო პირობების შექმნა. ამ მიზნის მისაღწევად, სახელმწიფო უზრუნველყოფს საჯარო და კერძო სკოლის დამოუკიდებლობას პოლიტიკური გაერთიანებებისაგან.

საქართველოს კონსტიტუციის თანახმად, ბავშვთა უფლებების დაცვა და მათი საუკეთესო ინტერესების უპირატესად გათვალისწინება სახელმწიფოს პოზიტიური ვალდებულებაა.

ბავშვის საუკეთესო ინტერესი, სხვებს შორის, გულისხმობს განათლების მიღების ინტერესს და მის შეუფერხებლად განხორციელებას.

წარმოებული კამპანია, წარმოადგენს რა კონფლიქტის მაპროვოცირებელ და წამაქეზებელ ფაქტორს, ეწინააღმდეგება განათლების სისტემაში ბავშვთა მიმართ ძალადობის დაუშვებლობის პრინციპს (ბავშვის უფლებათა კოდექსის 38-ე მუხლი), მათ შორის, ბავშვთა მიმართ და ბავშვთა შორის ჩაგვრის პრევენცია და დაუშვებლობა. კამპანია, ასევე, წინააღმდეგობაშია ბავშვის უფლებათა კოდექსის სხვა დებულებებთან (53-ე და 60-ე მუხლები) და ზოგადი განათლების შესახებ კანონის მე-20 მუხლთან.

გამომდინარე იქიდან, რომ ბავშვი, ასაკის გათვალისწინებიყ ნაკლებად რეზისტენტულია ზეწოლის, მუქარის და შანტაჟის მიმართ, არსებობს საფრთხე, მათ თავისუფალ ნებაზე მოახდინონ გავლენა, იქცნენ მანიპულაციის სამიზნედ და პოლიტიკური ანგარიშსწორების “ცოცხალ იარაღად”.

იმ პირებს, ვინც დაკავებულია ამ ბინძური კამპანიით, შევახსენებთ, რომ:

– დაუშვებელია ზოგადსაგანმანათლებლო დაწესებულებაში სასწავლო პროცესის პოლიტიზება;

– სკოლა ვალდებულია დაიცვას და ხელი შეუწყოს მოსწავლეებს, მშობლებს და მასწავლებლებს შორის შემწყნარებლობისა და ურთიერთპატივისცემის დამკვიდრებას;

– ბავშვს უფლება აქვს დაცული იყოს ფსიქოლოგიური ძალადობისგან, იძულებისგან და ძალადობის ნებისმიერი ფორმისგან ოჯახში, სკოლაში ან ნებისმიერ სხვა ადგილას;

ამდენად, მოვუწოდებთ ყველა აქტორს:

– ვიწრო პოლიტიკური მიზნების მისაღწევად არ მოახდინონ ბავშვების ინსტრუმენტალიზება;

– ხელი აიღონ ბავშვებს შორის მტრული განწყობების პროვოცირებისა და პოლარიზების შექმნისგან;

– შეწყვიტონ ბავშვების ფსიქოლოგიური იძულება და მათი საუკეთესო ინტერესების ხელყოფის ხარჯზე პოლიტიკური დივიდენდების მოპოვების მცდელობა,”- წერს რატი იონათამიშვილი სოციალურ ქსელში.

ჰა, ბურთი და მოედანი ევროკავშირისთვის, უნდათ ახლა გახსნან მოლაპარაკებები, უნდათ მოგვიანებით გახსნან. ჩვენ ჩვენს საქმეს მაინც გავაკეთებთ, რაც არ უნდა ხდებოდეს, – ამის შესახებ საქართველოს პარლამენტის თავმჯდომარემ, შალვა პაპუაშვილმა დღეს გამართულ ბრიფინგზე განაცხადა.

მისივე თქმით, ჩვენ კანონებს, რეგულაციებს, სტანდარტებს იმისთვის კი არ ვაკეთებთ ევროკავშირს რომ მოვაწონოთ თავი, პირველ რიგში, ამას ვაკეთებთ ჩვენი ხალხისთვის.

„ჩვენ დავდეთ პირობა ქართველი ხალხის წინაშე, მათ შორის ევროკავშირის წინაშე, რომ ევროკავშირში წევრობისთვის, 2030 წელს, საქართველო იქნება ყველაზე მომზადებული ქვეყანა სხვა კანდიდატ ქვეყნებთან შედარებით. ჰა, ბურთი და მოედანი ევროკავშირისთვის, უნდათ ახლა ახსნან მოლაპარაკებები, უნდათ მოგვიანებით გახსნან. ჩვენ ჩვენს საქმეს მაინც გავაკეთებთ, რაც არ უნდა ხდებოდეს. ერთი რამეა მნიშვნელოვანი. ჩვენ ამ ასოცირების შეთანხმებას, კანონებს, რეგულაციებს, სტანდარტებს იმისთვის კი არ ვაკეთებთ, რომ ევროკავშირს მოვაწონოთ თავი, პირველ რიგში, ამას ვაკეთებთ ჩვენი ხალხისთვის. ეს სტანდარტები ჩვენს ხალხს სჭირდება. პროდუქტის სტანდარტები, მშენებლობასთან, სოფლის მეურნეობასთან დაკავშირებული სტანდარტები. ეს სჭირდება ჩვენს ხალხს, უბრალოდ ამ სტანდარტებსაც სჭირდება თავისი დრო“,- განაცხადა პაპუაშვილმა.

წინააღმდეგობა. საქართველო – ამაყი და ღირსეული ერი, რომელიც ნამდვილად ასეთია – უარს ამბობს რუსეთის წინაშე დაჩოქებაზე. ის უარს ამბობს გახდეს კიდევ ერთი გაღატაკებული, ბანაკის მსგავსი ტერიტორია, რომელსაც მართავენ გაბოროტებული რუსები , – ამის შესახებ უკრაინის პრეზიდენტის ადმინისტრაციის ხელმძღვანელის მრჩეველი, მიხაილო პოდოლიაკი სოციალურ პლატფორმა X-ზე წერს.

„საქართველო სისხლიანმა ალმა მოიცვა. არსებითად, ჩვენ ვხედავთ რუსეთის კლასიკურ მცდელობას, შთანთქოს სხვა ერის სუვერენიტეტი, რასაც უპირისპირდება ქართული სამოქალაქო საზოგადოების სასტიკი წინააღმდეგობა. საქართველო – ამაყი და ღირსეული ერი, რომელიც ნამდვილად ასეთია – უარს ამბობს რუსეთის წინაშე დაჩოქებაზე. ის უარს ამბობს გახდეს კიდევ ერთი გაღატაკებული, ბანაკის მსგავსი ტერიტორია, რომელსაც მართავენ გაბოროტებული რუსები. ის უარს ამბობს საკუთარი თავისუფლების გაყიდვაზე ან შვილების მომავლის გაცვლაზე გარკვეული პრორუსული ოლიგარქების კორუფციასა და სარგებელზე“, – აცხადებს პოდოლიაკი.

მისი თქმით, რუსეთი ყოველთვის ბოროტების, სისხლისღვრის, ძალადობისა და დამცირების სინონიმია.

„რუსეთი ყოველთვის ბოროტების, სისხლისღვრის, ძალადობისა და დამცირების სინონიმია. რუსეთი ყოველთვის ეყრდნობა კოლაბორატორებს, რომლებიც სწრაფად იყიდებიან და ემორჩილებიან წამიერ ცდუნებებს. შეიძლება ამისთვის წინააღმდეგობის გაწევა? აბსოლუტურად. შეიძლება მისი დამარცხება? უეჭველად. ეჭვი არ მეპარება, რომ ქართველი ხალხი, რომელიც ახლა უიმედოდ იბრძვის თბილისის, რუსთავის და ქუთაისის ცეცხლმოკიდებულ ქუჩებში, საბოლოოდ გაიმარჯვებს. ძალა და მხნეობა შენ, საქართველო“, – აცხადებს პოდოლიაკი.

ევროკავშირის მკაფიო და მტკიცე პოზიცია არამარტო ძალას მისცემს ამ ახალგაზრდებს, არამედ დაამტკიცებს, რომ ევროპა დგას მათ გვერდით, ვინც იბრძვის ევროკავშირის ღირებულებებისთვის, თუნდაც დიდი პირადი რისკის ქვეშ- მოგმართავთ, აჩვენეთ ამ მამაც ხალხს, რომ ევროკავშირს ესმის მათი ხმა და მტკიცედ უჭერს მხარს მათ ბრძოლას! – ამის შესახებ „გახარია საქართველოსთვის” ლიდერი გიორგი გახარია სოციალურ ქსელში წერს, სადაც ევროკავშირს მიმართა.

როგორც გახარია განმარტავს, მამაცი ქართველი ახალგაზრდები საქართველოს ქუჩებში იბრძვიან ევროპული მომავლისთვის, რომლისაც სჯერათ და უძლებენ რეჟიმის ძალადობრივ დარბევას.

„ეს ახალგაზრდები ყველაფერს რისკავენ ევროპული ღირებულებებისთვის – თავისუფლებისთვის, დემოკრატიისთვის და ღირსებისთვის. თუმცა გრძნობენ, რომ მათ ბრძოლას დუმილით ხვდებიან.

ამ ახალგაზრდებისთვის ევროკავშირი მხოლოდ იდეა არ არის. ეს მათი ხსნაა – უკეთესი, თავისუფალი და დემოკრატიული მომავლის იმედი.

თქვენი ხმა ახლა უფრო მნიშვნელოვანია, ვიდრე ოდესმე. ევროკავშირის მკაფიო და მტკიცე პოზიცია არამარტო ძალას მისცემს ამ ახალგაზრდებს, არამედ დაამტკიცებს, რომ ევროპა დგას მათ გვერდით, ვინც იბრძვის ევროკავშირის ღირებულებებისთვის, თუნდაც დიდი პირადი რისკის ქვეშ.

მოგმართავთ, აჩვენეთ ამ მამაც ხალხს, რომ ევროკავშირს ესმის მათი ხმა და მტკიცედ უჭერს მხარს მათ ბრძოლას! – წერს გახარია „ფეისბუქზე“.