ჩვენი ხელისუფლებაში ყოფნის პერიოდში – „ქართული ოცნების” პირობებში – რუსეთის ექსპანსიის მაჩვენებელი ნულია! საუბარია ეკონომიკურ, ტერიტორიულ ან/და პოლიტიკურ ექსპანსიაზე. ეს გახლავთ ფაქტები. თუ ფაქტებს შევადარებთ, რუსული საქმის გამკეთებელი იყო წინა ხელისუფლება, – ამის შესახებ საქართველოს პრემიერ-მინისტრმა ირაკლი კობახიძემ უნგრულ პოლიტიკურ იუთუბ-არხთან ინტერვიუში განაცხადა.

პრემიერის თქმით, ამჟამინდელი ოპოზიციის მმართველობის პერიოდში რუსეთმა შეძლო ეკონომიკური, პოლიტიკური და ტერიტორიული ექსპანსია საქართველოში.

„ეს არის  ე.წ. ლიბერალების ჩვეული ფრაზეოლოგია. თუ პრო-ქართული ხარ, დაგაბრალებენ რომ პრო-რუსი ხარ; თუ პრო-ამერიკული ხარ, დაგაბრალებენ, რომ პრო-რუსი ხარ;  თუ პრო-უნგრული ხარ, დაგაბრალებენ, რომ პრო-რუსი ხარ. ეს არის ძალიან ჩვეული ამბავია დასავლეთში და ასეთი ფრაზეოლოგია გამოიყენება ყველა იმ პირის მისამართით, ვინც ცდილობს ქვეყნის დამოუკიდებლობის და სუვერენიტეტის დაცვას. ჩვენ პრო-ქართული ვართ! ამავდროულად – რა თქმა უნდა – ვართ პრო-ევროპული, რადგან მთავარი მიზანია არის ევროკავშირის წევრობა. სასაცილოა, როდესაც 2012 წლამდე ხელისუფლებაში მყოფი ახლანდელი ოპოზიცია ამბობს, რომ ჩვენ ვართ პრო-რუსები; არადა სწორედ მათი მმართველობის  პერიოდში მოახერხა საქართველოში თავისი ინტერესების არსებითი გაფართოება რუსეთმა. საუბარი მაქვს ეკონომიკურ ინტერესებზე, რადგან მათ რუსებს – რუსულ კომპანიებს – მიჰყიდეს მრავალი ობიექტი, რაც ქვეყნის სტრატეგიულ ეკონომიკურ აქტივს წარმოადგენდა. ახლა ჩვენ გვაბრალებენ პრო-რუსობას. მათივე მმართველობის პერიოდში შეძლო რუსეთმა ტერიტორიული, პოლიტიკური გაფართოება საქართველოში.  მათ შეძლეს ჩვენი ტერიტორიების 20 პროცენტის ოკუპაცია და ეს სწორედ მაშინ მოხდა, როდესაც ხელისუფლებაში იყვნენ და როდესაც სააკაშვილმა ომი დაიწყო 2008 წელს; მაშინ მოხდა ასევე ამ ორი ისტორიული რეგიონის ე.წ. დამოუკიდებლობის აღიარება რუსეთის მიერ. ამდენად, მათი ხელისუფლებაში ყოფნის დროს – ანუ ამჟამინდელი ოპოზიციის მმართველობის პერიოდში – რუსეთმა შეძლო ეკონომიკური, პოლიტიკური და ტერიტორიული ექსპანსია საქართველოში. ფაქტი ფაქტად რჩება; ეს არის მათი მმართველობის შედეგი. ჩვენი ხელისუფლებაში ყოფნის პერიოდში – „ქართული ოცნების” პირობებში – რუსეთის ექსპანსიის მაჩვენებელი ნულია! საუბარია ეკონომიკურ, ტერიტორიულ ან/და პოლიტიკურ ექსპანსიაზე. ეს გახლავთ ფაქტები. თუ ფაქტებს შევადარებთ, რუსული საქმის გამკეთებელი იყო წინა ხელისუფლება. ჩვენ ქართულ საქმეს ვაკეთებთ! ხელისუფლებაში ყოფნისას ქართულ საქმეს ვაკეთებთ და ასეთია ჩვენი ხედვა. უპირველეს ყოვლისა, პრო-ქართული უნდა ვიყოთ და ჩვენივე ეროვნული ინტერესები დავიცვათ!”, – განაცხადა პრემიერმა.

სალომე ზურაბიშვილის საპრეზიდენტო ვადა 29 დეკემბერს იწურება, მცდელობა, რომ ის აქციონ რადიკალური ოპოზიციის ლიდერად, აბსოლუტურად ჩავარდება, – ამის შესახებ საქართველოს პრემიერ-მინისტრმა ირაკლი კობახიძემ უნგრულ პოლიტიკურ იუთუბ-არხთან ინტერვიუში განაცხადა.

როგორც მთავრობის მეთაურმა აღნიშნა, სალომე ზურაშვილის არ გააჩნია სახელმწიფო ინტერესების წინააღმდეგ მოქმედების შესაძლებლობა. 

„სალომე ზურაბიშვილი ამჟამად არ არის საფრანგეთის მოქალაქე, თუმცა ადრე იყო და ის ასევე იყო საქართველოში საფრანგეთის ელჩი 2004 წლამდე. შემდეგ ის  საქართველოს საგარეო საქმეთა მინისტრად დაინიშნა. ასეთი პრეისტორია აქვს. საფრანგეთში, ემიგრანტთა ოჯახში, დაიბადა. ზოგიერთს უნდა მისი წარმოჩენა რადიკალური ოპოზიციის ლიდერად. მაგრამ მინდა ყველას შევახსენო, რომ მისი საპრეზიდენტო ვადა 29 დეკემბერს იწურება. რა თქმა უნდა, ამგვარი მცდელობა, აქციონ ის რადიკალური ოპოზიციის ლიდერად, აბსოლუტურად ჩავარდება. ამდენად, მას არ გააჩნია სახელმწიფო ინტერესების წინააღმდეგ მოქმედების შესაძლებლობა”, – განაცხადა ირაკლი კობახიძემ.

სამწუხაროდ, ის მოწოდებები, რომელიც როგორც გუშინ, ასევე დღეს სოციალურ მედიაში და სხვადასხვა პლატფორმიდან ქალბატონმა პრეზიდენტმა განახორციელა, მართლა ძალიან, ძალიან დამაზიანებელი იყო. იმედი მაქვს, იგი თავადაც გააცნობიერებს იმას, თუ რას უწყობს ხელს, – განაცხადა „დღის ქრონიკაში“ მინისტრმა, ალექსანდრე წულაძემ.

კითხვაზე, რამდენად შემაშფოთებელი ფაქტია, როდესაც ქვეყნის პირველი პირი ცდილობს, ბავშვების პოლიტიკურ პროცესში ჩართვას, მინისტრმა განაცხადა, რომ ეს ფაქტი მისთვის გამაოგნებელი იყო.

„ეს მართლაც გამაოგნებელი იყო, ვინაიდან საქართველოს პრეზიდენტს კარგად უნდა მოეხსენებოდეს როგორც ბავშვთა უფლებები, ასევე სასკოლო საზოგადოების აპოლიტიკურობის და ზოგადად, ნეიტრალურობის მნიშვნელობა. სამწუხაროდ, ის მოწოდებები, რომელიც როგორც გუშინ, ასევე დღეს სოციალურ მედიაში და სხვადასხვა პლატფორმიდან ქალბატონმა პრეზიდენტმა განახორციელა, მართლა ძალიან, ძალიან დამაზიანებელი იყო. იმედი მაქვს, იგი თავადაც გააცნობიერებს იმას, თუ რას უწყობს ხელს. ეს იქნება ისტორიულად დამაზიანებელი, გამოუსწორებელი, რომ ჩვენ ქართულმა საზოგადოებამ ვერ მოვახერხოთ, თავიდან ავირიდოთ ბავშვების პოლიტიზება. ბავშვების ჩართვა იმ პროცესებში, რომელიც მათ საუკეთესო ინტერესებში არ არის.

ყველა მშობლის, ყველა მასწავლებლისა და სასკოლო საზოგადოების ვალდებულებაა, დაიცვას ბავშვის საუკეთესო ინტერესები. ერთ-ერთი აქედან სწორედ არის განათლებისა და საგანმანათლებლო პროცესში მონაწილეობის უფლება, რაც ჩვენი კონსტიტუციური ვალდებულებაა. კიდევ ერთხელ, ვთხოვ ყველა ქართველ პოლიტიკოს, მშობელს, როგორც არ უნდა აფასებდეს ადამიანი დღევანდელ მოვლენებს, არაფრით არ უნდა იქნება დაშვებული ბავშვების პოლიტიზება, მათი წახალისება“, – აღნიშნა განათლების მინისტრმა.

სახელმწიფო უწყებებს ჰქონდათ წინასწარი ინფორმაცია, რომ ასეთი ტიპის სისტემური ძალადობა იყო დაგეგმილი და სავარაუდოდ ეს იყო დაგეგმილი ჩვენი გათვლებით დეკემბრისთვის, – ამის შესახებ საქართველოს პრემიერ-მინისტრმა ირაკლი კობახიძემ დღევანდელ ბრიფინგზე განაცხადა.

როგორც მთავრობის მეთაურმა აღნიშნა, სისტემური, უხეში ძალადობა, რაც ხორციელდება შესაბამისი პოლიტიკური ძალების მიერ, იყო წინასწარ დაგეგმილი.

„სახელმწიფო უსაფრთხოების სამსახურში მიმდინარე გამოძიებაც არსებობდა ასეთ პროცესებთან დაკავშირებით. ერთი საინტერესო დეტალი შემიძლია, გითხრათ, რაც პირდაპირ ადასტურებს იმას, რომ ეს ყველაფერი წინასწარ იყო დეკემბრისთვის დაგეგმილი. პიროტექნიკის გაყიდვის სტატისტიკა ამოვიღეთ და ერთმანეთს შევადარეთ პირველი ნოემბრიდან 27 ნოემბრის ჩათვლით წლევანდელი წლის სტატისტიკა და შევადარეთ შარშანდელი წლის 1- 27 ნოემბერს, რამდენი პროცენტით შეიძლება, იყოს გაზრდილი გაყიდვების მაჩვენებელი? 90 პროცენტით. პრაქტიკულად გაორმაგებულია პიროტექნიკის გაყიდვები საქართველოში, რაც ნიშნავს იმას, რომ ყველაფერი იყო დაგეგმილი. სისტემური, უხეში ძალადობა, რაც ხორციელდება შესაბამისი პოლიტიკური ძალების მიერ, იყო წინასწარ დაგეგმილი. ასევე დღეს ვნახეთ, როდესაც შინაგან საქმეთა სამინისტროს შესაბამისი უწყებები როცა შევიდნენ შესაბამის ოფისებში, პარტიულ ოფისებში, იქიდან ხდება შესაბამისი მასალების ამოღება. უფრო მეტიც, როცა დაიწყო შესაბამისი ოპერაცია, პირდაპირ გამოვიდა ერთ-ერთი ოპოზიციონერი პოლიტიკური ლიდერი, მაგალითად ელენე ხოშტარია და წინასწარ თქვა, რომ ისინი ყიდულობდნენ პიროტექნიკას და კვლავაც განაგრძობდნენ პიროტექნიკის შეძენას. ამით რეალურად ამ პოლიტიკურმა პარტიებმა აღიარეს პირდაპირ, რომ ამ სისტემური უხეში ძალადობის უკან დგას მთლიანად პარტიული რესურსი. ცნობილი ჯგუფი არსებობს – „დაიტოვე”, ვითომ გულწრფელი ახალგაზრდების მიერ შექმნილი ჯგუფი, ამ ჯგუფის ე.წ. ადმინი აღმოჩნდა სტაჟიანი „ნაციონალი”, რომელიც სააკაშვილს სტუმრობდა თავის დროზე უკრაინაში და ა.შ. არაფერი გულწრფელობა არ არის აქ, არის პარტიული ინტერესები, ძალადობის გზით ხელისუფლების შეცვლის ინტერესი და ეს ყველაფერი დევს დღეს უკვე ხელის გულზე”, – განაცხადა პრემიერ-მინისტრმა.

მე ამას ვერ დავარქმევდი რეპრესიებს, ეს არის უფრო პრევენციები, ვიდრე რეპრესიები, – ამის შესახებ პრემიერ-მინისტრმა ჟურნალისტის კითხვის პასუხად განაცხადა, რომელიც ოპოზიციის მხრიდან რეპრესიებზე საუბარს შეეხებოდა. 

კითხვაზე, არიან თუ არა პიროტექნიკით მომარაგებული ახალგაზრდები დაკავშირებული სხვადასხვა ოპოზიციურ პარტიებთან, პრემიერმა უპასუხა, რომ პიროტექნიკით ადამიანების სისტემურად მომარაგება ხდებოდა, სწორედ, შესაბამისი პოლიტიკური ძალების მიერ. 

„რაც შეეხება კავშირს, ფაქტია, დასტურდება ერთი რამ, სისტემურად ადამიანების მომარაგება პიროტექნიკითა და სხვა საშუალებებით ხდებოდა სწორედ შესაბამისი პოლიტიკური ძალების მიერ, ეს არის აბსოლუტურად ცხადი და ეს დევს ხელის გულზე,”- განაცხადა პრემიერმა.

საჯარო დისკუსია მთლიანად დაამსხვრევდა იმ სიცრუეს, რაზეც დგას კოლექტიური „ნაცმოძრაობის”, რადიკალური ოპოზიციის პროპაგანდა, – ამის შესახებ საქართველოს პრემიერ-მინისტრმა ირაკლი კობახიძემ დრეს გამართულ პრესკონფერენციაზე განაცხადა. 

როგორც მთავრობის მეთაურმა აღნიშნა, საჯარო დისკუსიის შემდეგ მთლიანად გამოეცლებოდა მათ პროპაგანდას საფუძველი, შესაბამისად, ეს არის მათი უარის მიზეზი. 

„გახსოვთ, რომ ასეთივე შეთავაზება გავუკეთეთ ჩვენ ამ ადამიანებს „გამჭვირვალობის კანონთან” დაკავშირებით, მაშინაც შევთავაზეთ ნებისმიერ ჯგუფს, მათ შორის ახალგაზრდებს, პოლიტიკოსებსა და ნებისმიერ სხვას, მოსულიყვნენ ჩვენთან და გაემართათ საჯარო დისკუსია, თუმცა მაშინაც ამ შეთავაზებაზე მივიღეთ უარი. აქაც გამომდინარე იქიდან, რომ ზუსტად იციან, სად არის სიმართლე, კიდევ ერთხელ ითქვა, მათი მხრიდან უარი. ეს მეტყველებს ყველაფერზე. ამ საჯარო დისკუსიის შემდეგ მთლიანად გამოეცლებოდა მათ პროპაგანდას საფუძველი, შესაბამისად, ეს არის მათი უარის მიზეზი”, – განაცხადა ირაკლი კობახიძემ.

ევროპის საბჭოს გენერალური მდივანი, ალენ ბერსეტი საქართველოს პრეზიდენტს, სალომე ზურაბიშვილსა და პრემიერ-მინისტრ ირაკლი კობახიძეს ტელეფონით ესაუბრა, – ამის შესახებ ევროპის საბჭოს განცხადებაშია აღნიშნული.

„გენერალური მდივანი ალენ ბერსეტი ყურადღებით აკვირდება საქართველოში მიმდინარე მოვლენებს. გასული 24 საათის განმავლობაში ის ტელეფონით ესაუბრა პრეზიდენტ სალომე ზურაბიშვილს და პრემიერ-მინისტრ ირაკლი კობახიძეს. დაძაბული სიტუაციისა და მიმდინარე დაპირისპირებების ფონზე, გენერალურმა მდივანმა გამოხატა ევროპის საბჭოს შეშფოთება გაზრდილი პოლარიზაციისა და პოლიტიკური ჩიხის შესახებ“, – აღნიშნულია განცხადებაში.

ალენ ბერსეტმა მხარეებს მოუწოდა, თავი შეიკავონ შემდგომი ესკალაციისგან და ხაზი გაუსვა დემონსტრაციების დროს სამართალდამცავების მიერ ძალის გადამეტებული გამოყენების შემთხვევების გამოძიების მნიშვნელობას.

„ვინაიდან, საქართველო არის ევროპის საბჭოს წევრი, გენერალურმა მდივანმა გაიმეორა ორგანიზაციის როლი ყველა დაინტერესებულ მხარესთან აზრების გაცვლის საქმეში და გაიხსენა ევროპის საბჭოს ღირებულებებისა და სტანდარტების პატივისცემის ვალდებულება, გამოხატვის თავისუფლებისა და მშვიდობიანი შეკრების უფლების ჩათვლით. ეს არის ქართველი ხალხის, მთლიანად ქვეყნის და მისი სტაბილურობის ინტერესებში“, – აღნიშნულია განცხადებაში.

ევროპის საბჭოს ცნობით, გენერალურმა მდივანმა ხაზი გაუსვა მის გადაწყვეტილებას გააგრძელოს საქართველოს მხარდაჭერა ევროპულ მისწრაფებებში და უზრუნველყოს მისი დემოკრატიული უსაფრთხოება. მან ასევე გამოხატა მზადყოფნა, განაგრძოს კონსტრუქციული დიალოგი ყველა შესაბამის პარტნიორთან, მათ შორის სამოქალაქო საზოგადოებასთან, არსებული კრიზისის დაძლევის მიზნით.

„ევროპის საბჭო მზადაა გააგრძელოს საქართველოს მხარდაჭერა, მათ შორის არსებული სამოქმედო გეგმის ფარგლებში, რომელიც ევროპულ გზაზე ქვეყნის თანმხლები იქნება. ამ კონტექსტში, გენერალური მდივანი უახლოეს დღეებში საქართველოში ვიზიტს გეგმავს“, – აღნიშნულია განცხადებაში.

პარტია „გახარია საქართველოსთვის“ ქვეყანაში მიმდინარე პროცესებს რეპრესიებს უწოდებს დ მოუწოდებს საერთაშორისო პარტნიორებს, დროულად იმოქმედონ.

აღნიშნულის შესახებ განცხადებას პარტიის პრესსამსახური ავრცელებს.

„ის, რასაც ახლა ხელისუფლება აკეთებს, არის ჩვეულებრივი რეპრესიები უბრალოდ განსხვავებული აზრის წინააღმდეგ!

კიდევ ერთხელ, მოვუწოდებთ საქართველოს საერთაშორისო პარტნიორებს – იმოქმედეთ დროულად საქართველოს მოქალაქეების დასაცავად!“,- ნათქვამია განცხადებაში.

ცნობისთვის, დღეს აქტივისტების ბინებსა და პოლიტიკური პარტიების ოფისებში პოლიციამ ჩხრეკა ჩაატარა. უფრო კონკრეტულად, საგამოძიებო მოქმედებები ჩატარდა „ერთიანობა ნაციონალური მოძრაობის“, „კოალიცია ცვლილებისთვის“ და „დროას“ ოფისებში. ასევე გაჩხრიკეს „დაიტოვეს“ ერთ-ერთი დამფუძნებლის ილია ღლონტის ბინა. გარდა ამისა, „დროას“ ოფისთან, ჩხრეკის პარალელურად, დააკავეს „კოალიცია ცვკლილებისთვის“ ლიდერი ნიკა გვარამია და კოალიციის წევრი გელა ხასაია. დაკავებულია მოძრაობა „დაფიონის“ წევრი, ზვიად ცეცხლაძეც.

ძალიან მოსალოდნელი მოქმედებაა. აქ ნამდვილად გვაქვს აქციისთვის ძალიან ბევრი პარალონი, პლედი, ფოერვერკი, სნიკერსები, კვერცხები, პოლიციას, რომ ვესროლოთ, ყველაფერი, რაც საჭიროა იმისთვის, რომ იყოს პროტესტი, – ამის შესახებ კოალიცია „ცვლილებებისთვის“ წევრმა, ელენე ხოშტარიამ „დროას“ ოფისში ჩატარებული ჩხრეკის შემდეგ განაცხადა

ხოშტარიას თქმით, პოლიცია ოფისში ლაზერებს, საღებავებს აღრიცხავს.

„მოსალოდნელი მოქმედებაა. აქციისთვის ნამდვილად გვაქვს ძალიან ბევრი პარალონი, პლედი, „ფოერვერკი“, „სნიკერსები“, კვერცხები, პოლიციას რომ ვესროლოთ. ყველაფერი, რაც საჭიროა, რომ იყოს პროტესტი. ბუნებრივია, მოვიდნენ. სასაცილოა, ლაზერებს, რაღაც საღებავებს აღრიცხავენ. მე მათ განვუმარტე, რომ ეს პოლიცია არის რუსული, ანტიკონსტიტუციური, ემსახურება ივანიშვილს და მიდის ევროპის წინააღმდეგ. საერთოდ არანაირი მნიშვნელობა არ აქვს ჩემთვის რას გადაჩხრეკენ, რას იზამენ, ვის რას დააბრალებენ და წაუყენებენ. მე თვითონ ვუთხარი, დიახ, მე ვარ ორგანიზატორი და პასუხისმგებლობას ვიღებ ამ აქციებზე. ეს არის ხალხის გადაწყვეტილება და აქცია, დიახ, ყველაფერ ამას ვიყენებთ ჩვენ აქციაზე“, – განაცხადა ხოშტარიამ.