ოპოზიციის ლიდერებს და მათ რუპორ აქტივისტებს მივმართავ! საკუთარი ხალხის მიმართ ამხელა ზიზღს როგორ იტევთ?! , – ამის შესახებ პარლამენტის ვიცე-სპიკერი ნინო წილოსანი სოციალურ ქსელში წერს.
წილოსანის თქმით, უკვე ერთი კვირაა ოპოზიცია და მათი აქტივისტები ზიზღს ავლენენ ქვეყნის უმრავლესობის მიმართ, მათი სამოქალაქო პოზიციის, ასაკის, გარეგნობის, სოციალური მდგომარეობის და პოლიტიკური პრეფერენციების გამო.
„ოპოზიციის ლიდერებს და მათ რუპორ აქტივისტებს მივმართავ! საკუთარი ხალხის მიმართ ამხელა ზიზღს როგორ იტევთ?! უკვე ერთი კვირაა თვალს ვადევნებთ რამხელა აგრესიას და ზიზღს ავლენთ ქვეყნის უმრავლესობის მიმართ, მათი სამოქალაქო პოზიციის, ასაკის, გარეგნობის, სოციალური მდგომარეობის და პოლიტიკური პრეფერენციების გამო. რამ შეგაძულათ ასე საკუთარი მოსახლეობა? რამ შეგაშინათ ასე საკუთარი ხალხის? დღეს, თქვენგან განსხვავებით, მშვიდობიანი მიზნით შეიკრიბება უამრავი ადამიანი! მიუხედავად იმისა, რომ ქართველი ერის წინაშე უდიდესი დანაშაული მიგიძღვით და ამ ადამიანების დიდი ნაწილი სრულ ტერორში გყავდათ თქვენი მმართველობის დროს, ჩვენ მაინც ცივილიზებულად მოგექცევით და თქვენსავით კაციჭამიები არასდროს გავხდებით!“ – წერს წილოსანი.
კალაძემ ფაქტობრივად გასცა მდინარაძე-ოხანაშვილი, რაც კიდევ ერთი დასტურია იმის, რომ შიგნით დანა-სისხლად არიან გადაკიდებულები , – ასე აფასებს “ნაციონალური მოძრაობის” პოლიტსაბჭოს თავმჯდომარე, ლევან ხაბეიშვილი თბილისის მერის, კახა კალაძის მიერ „თანაინვესტირების ფონდის“ ყოფილი გენერალური დირექტორის, გიორგი ბაჩიაშვილის საქმეზე გაკეთებულ განცხადებას.
ხაბეიშვილის განცხადებით, საგამოძიებო უწყებები უნდა დაინტერესდნენ კალაძის განცხადებით, რადგან მისივე თქმით, თბილისის მერმა პირდაპირ ხელი დაადო ოხანაშვილ-მდინარაძეს, რომ „ამ ხალხმა ჩაატარა ეს სპეცოპერაცია რუსებთან ერთად”.
“მდინარაძის და კალაძის „კლანი“, ანუ ოხანაშვილი და მდინარაძე დაპირისპირებულია კალაძესთან და კალაძეს ვითომ წამოსცდა – ჩამოვიყვანეთო, არადა სუს-ის ვერსია სრულიად სხვაა, ეს კიდევ ადასტურებს იმას, რომ შიგნით დანა-სისხლად არიან გადაკიდებულები. ეს არ იყო წამოყვირება, მან ფაქტობრივად გასცა მდინარაძე-ოხანაშვილის ვერსია. სპეცოპერაცია ჩაატარა “გრუმ”, რუსეთის სპეცსამსახურებმა, რომელმაც საჩუქარი გაუკეთეს ივანიშვილს და მისი პირადი ტყვე გადმოსცეს დუბაიდან. აქ ამ ოპერაციის ჩამტარებელი, მდინარაძე და ეს უწყება, რომ რაღაცას ატარებენ, ცხადია ეს ანეკდოტია. რუსეთის სპეცსამსახურებმა გადმოსცეს ბაჩიაშვილი და დღეს კალაძემ ფაქტობრივად ეს გასცა. შესაბამისად, სასამართლო, საგამოძიებო უწყებები ამით უნდა დაინტერესდნენ, რადგან თბილისის მერმა პირდაპირ ხელი დაადო ოხანაშვილ-მდინარაძეს, რომ ამ ხალხმა ჩაატარა ეს სპეცოპერაცია რუსებთან ერთად”, – განაცხადა ლევან ხაბეიშვილმა.
ინფორმაციისათვის, თბილისის მერის, კახა კალაძის განცხადებით, გიორგი ბაჩიაშვილის არანაირ მოტაცებას და გატაცებას არ ჰქონია ადგილი და მისი ჩამოყვანა უცხო ქვეყნიდან განხორციელდა. როგორც კახა კალაძემ განმარტა, აღნიშნული მიმართულებით გამოძიების საჭიროებას ვერ ხედავს.
„რაც შეეხება მის ჩამოყვანას, ის ჩამოყვანილი იყო უცხო ქვეყნიდან. არანაირ მოტაცებას და გატაცებას არ ჰქონია ადგილი. რისი გამოძიება უნდა დაიწყოს? ფაქტი არ ყოფილა. მისი ჩამოყვანა მოხდა უცხო ქვეყნიდან. ჩვეულებრივი სისულელეა [მოტაცება]“,-აღნიშნა კალაძემ.
აშშ დოლარის ოფიციალური ღირებულება 2.6942 ლარი გახდა.
ეროვნული ბანკის მიერ გამოქვეყნებული მონაცემების თანახმად, დღევანდელი ვაჭრობის შედეგად 1 აშშ დოლარის ღირებულება 2.6942 ლარი გახდა. კურსი, რომელიც დღეს მოქმედებდა, 2.6948 ლარი იყო. შესაბამისად, დოლარის ცვლილებამ ეროვნულ ვალუტასთან მიმართებაში 0.0006 ლარი შეადგინა.
რაც შეეხება ევროს, მისი კურსი 3.1282 ლარია. მაშინ, როცა დღეს მოქმედი კურსი 3.1381 ლარს შეადგენდა. შესაბამისად, ევროს ცვლილებამ 0.0099 ლარი შეადგინა.
საქართველოს პროკურატურამ განსაკუთრებით დიდი ოდენობით ნარკოტიკული საშუალების შემცველი მცენარის უკანონო დათესვის, მოყვანის და დიდი ოდენობით ნარკოტიკული საშუალების უკანონო შეძენა-შენახვის ფაქტებზე ორ პირს ბრალდება წარუდგინა, – ინფორმაციას საქართველოს პროკურატურა ავრცელებს.
„შინაგან საქმეთა სამინისტროს მიერ ჩატარებული გამოძიებით დადგინდა, რომ ერთ-ერთმა დაკავებულმა, ზესტაფონის მუნიციპალიტეტში, უკანონოდ დათესა და მოიყვანა განსაკუთრებით დიდი ოდენობით – 24 335 გრამი (140 ძირი) ნარკოტიკული საშუალების შემცველი მცენარე კანაფი; მანვე უკანონოდ შეიძინა და ინახავდა დიდი ოდენობით – 230,5 გრამ ნარკოტიკულ საშუალება დამაძინებელ ყაყაჩოს და 41,3 გრამ ნარკოტიკულ საშუალება გამომშრალ მარიხუანას. მეორე დაკავებულმა კი სამტრედიის მუნიციპალიტეტში, უკანონოდ დათესა და მოიყვანა განსაკუთრებით დიდი ოდენობით – 24 370 გრამი (67 ძირი) ნარკოტიკული საშუალების შემცველი მცენარე კანაფი. მან ასევე უკანონოდ შეიძინა და ინახავდა – 12,58 გრამ ნარკოტიკულ საშუალება გამომშრალ მარიხუანას.
ბრალდებულებს ბრალდება საქართველოს სისხლის სამართლის კოდექსის 260-ე მუხლის 1-ლი ნაწილით (ნარკოტიკული საშუალების უკანონო შეძენა და შენახვა), 260-ე მუხლის პირველი ნაწილით და მე-2 ნაწილის „ა“ ქვეპუნქტით (დიდი ოდენობით ნარკოტიკული საშუალების უკანონო შეძენა და შენახვა) და 265-ე პრიმა მუხლის მე-3 ნაწილის „ა“ ქვეპუნქტით (განსაკუთრებით დიდი ოდენობით ნარკოტიკული საშუალების შემცველი მცენარის უკანონო დათესვა და მოყვანა) წარედგინათ, რაც სასჯელის სახედ და ზომად 12 წლამდე თავისუფლების აღკვეთას ითვალისწინებს.
პროკურატურის შუამდგომლობის საფუძველზე სასამართლომ ბრალდებულებს აღკვეთის ღონისძიების სახით პატიმრობა უკვე შეუფარდა“, – აღნიშნულია გავრცელებულ ინფორმაციაში.
„ვლადიმერ პუტინთან გარიგების პირობები უშუალოდ ალასკაზე შეხვედრის დროს იქნება განსაზღვრული“, – განაცხადა 11 აგვისტოს თეთრ სახლში გამართულ პრეს-კონფერენციაზე აშშ-ის პრეზიდენტმა დონალდ ტრამპმა. მან ჟურნალისტებს ასევე შეახსენა თავისი კარგი ურთიერთობები რუს კოლეგასთან და იმედი გამოხატა, რომ სამიტი ნაყოფიერი იქნება. პრესკონფერენციის ვიდეოჩანაწერი გამოქვეყნებულია თეთრი სახლის (The White House) ვებ-გვერდზე სათაურით „მალე დავიწყებთ“.
– თქვენ ახსენეთ პრეზიდენტ ვლადიმერ პუტინთან შეხვედრა, რომელიც ალასკაზეა დაგეგმილი. გთხოვთ გვითხრათ, რას ელოდებით სამიტისაგან და მიიწვევთ თუ არა შეხვედრაზე პრეზიდენტ ზელენსკის?
– თქვენ, რასაკვირველია, უნდა გესმოდეთ, რომ ეს კონფლიქტი არ დაიწყებოდა და საერთოდ არ მოხდებოდა, მე რომ იმ დროს პრეზიდენტი ვყოფილიყავი. [პუტინი თვალისჩინივით უფრთხილდებოდა ჩვენთან ურთიერთობებს], ჩვენ ერთმანეთთან კარგად ვიყავით. ჯორჯ ბუშის პრეზიდენტობის დროს [რუსებს მიეცათ] ტერიტორიების გაკონტროლების შესაძლებლობა. ბარაკ ობამას დროს მათ დაიწყეს ამ შესაძლებლობის გამოყენება [უკრაინაში] და დიდი ტერიტორიები დაიკავეს, ხოლო ჯო ბაიდენის დროს მათ პრაქტიკულად ყველაფერი დაიპყრეს. ახლა ეს დროის საკითხს წარმოადგენს.
და იცით, რა დაიპყრეს [რუსებმა] ტრამპის დროს? არაფერი. მე ვიყავი ის კაცი, რომელმაც ვთქვი, რომ არ შეიძლებოდა მილსადენის მშენებლობის დასრულება, რომელიც იმ დროს სანახევროდ იყო აშენებული. ჰოდა, მე რომ პრეზიდენტი გავხდი [პირველი ვადით], მისი მშენებლობა შევაჩერე. მილსადენს „ჩრდილოეთის ნაკადი-2“ ერქვა. თქვენ, ალბათ, გეცოდინებათ ამის შესახებ. ანუ მე გავაჩერე მსოფლიოში უდიდესი გაზსადენის მშენებლობა.
მე რუსეთის მეგობარი არ ვიყავი, მაგრამ პუტინთან ყოველთვის კარგი ურთიერთობა მქონდა. და არამარტო რუსეთთან, არამედ სხვა ქვეყნებთანაც. მაგრამ ეს არ ნიშნავს წელში მოხრას და დამორჩილებას. შემდეგ მოვიდა ჯო ბაიდენი და მისმა ადმინისტრაციამ გაზსადენის მშენებლობა მოიწონა. მე ამის დაჯერება არ მინდოდა. შემდეგ მათ [ბაიდენის გუნდის წევრებმა] ისიც თქვეს, „ტრამპი რუსეთის მიმართ მკაცრი არ იყოო“. მე ყოველთვის მკაცრი ვიყავი. ვიმეორებ: მე გავაჩერე უდიდესი ეკონომიკური და ათასობით სამუშაო ადგილის მქონე პროექტი. და ეს დაბალი IQ-ს მქონე პრეზიდენტი [ბაიდენი] მოვიდა და მათ მილსადენის მშენებლობის დასრულების ნება მისცა ევროპისათვის რუსული გაზისა და ნავთობის მისაწოდებლად….
ალასკაზე დაგეგმილი შეხვედრა სინამდვილეში სასინჯ შეხვედრას წარმოადგენს. პრეზიდენტმა პუტინმა შეხვედრა შემომთავაზა. მას სურს, რომ შემხვდეს და ახლა მე მისი მჯერა. ამის შესახებ ადრე რამდენჯერმე უკვე ვთქვი, თუმცა იმ დროს იმედგაცრუებული დავრჩი. ჩვენ კარგად ვსაუბრობდით ერთმანეთთან, მაგრამ როცა საუბარს ვამთავრებდით, რაკეტები კიევსა და სხვა ქალაქებს ეცემოდა და ათობით ადამიანი იღუპებოდა.. მე მაშინ პუტინს ვუთხარი, რომ ეს ულმობელი მოქმედებაა და რომ რუსები დაუნდობლად მოქმედებენ. ახლაც ყოველდღიურად იღუპება 5-6 ათასი ადამიანი. დიახ, ეს ჩვენიანები – ამერიკელები არ არიან, ისინი რუსები და უკრაინელები არიან, მაგრამ რაკეტებით არავინ არ უნდა დაიღუპოს. ისინი ხომ ახალგაზრდა ჯარისკაცები არიან. უკრაინელი ჯარისკაცების ასაკი მატულობს, ახლა ჯარში უკვე 60-წლიანებს იწვევენ. ეს საშინელებაა.
მე ვთვლი, რომ ვალდებული ვარ გავაკეთო ის, რასაც ვაკეთებ. გაიგეთ, ხალხო, რომ ეს ომი ჯო ბაიდენმა დაიწყო. ეს ჩემი ომი არ არის. ერთი თვის წინათ ნატოსთან ხელშეკრულება დავდე, იცით თქვენ ამის შესახებ [უკრაინისთვის იარაღის მიწოდებაზე]. ჩვენ ახლა არაფერს არ ვიხდით. ისინი ჩვენგან ყიდულობენ და ამის ფულს ნატოს ევროპელი წევრები იხდიან. მე ასევე მოვამატე სამხედრო ხარჯები ნატოს წევრი ქვეყნებისათვის მთლიანი შიდა პროდუქტის (მშპ) 2-დან 5%-მდე.
ჯო ბაიდენმა უკრაინის დასახმარებლად 350 მილიარდი დოლარი გამოყო, ევროპამ – 100 მილიარდი. დახარჯულმა ფულმა უამრავი ადამიანი შეიწირა – ეს ყველაზე დიდი საშინელებაა, რაც მეორე მსოფლიო ომის შემდეგ მოხდა.
ამიტომაც მე ვაპირებ პირადად შეხვხვდე ვლადიმერ პუტინს და ვესაუბრო. მინდა მას ვუთხრა, რომ დროა დაამთავროს ეს ომი. მე ვიცი, რომ მას სიტუაციის არევა არ სურდა და ამ ომს იგი არასდროს არ დაიწყებდა, რომ არა… როცა არჩევნები გაყალბდა და ჯო ბაიდენმა პრეზიდენტის პოსტი დაიკავა , ხელისუფლებაში „ავტოკალამი“ მოვიდა. დაიწყო ცუდი ამბები, გაუგებრობები, ათასგვარი სისულელე და ბოლოს საქმე ომამდე მივიდა, რომელიც შეიძლება მესამე მსოფლიო ომად გადაქცეულიყო.
მე არ მინდა მჯეროდეს, რომ ეს ისევ განმეორდება, ამიტომ ყველაფერი კარგად ავწონ-დავწონე და მოვიფიქრე. მე ამერიკის დიდ პატივისცემად ვთვლი, რომ რუსეთის პრეზიდენტი ჩვენს ქვეყანაში მოდის და მე მის ქვეყანაში არ მივდივარ, ან სადმე მესამე სახელმწიფოში.
ვფიქრობ, რომ კონსტრუქციული მოლაპარაკება გვექნება. შეხვედრის დასრულების შემდეგ, ალასკიდან გამოფრენის წინ, დავურეკავ ევროპის ლიდერებს, რომლებთანაც ძალიან კარგი დამოკიდებულება მაქვს [და ყველაფერს გავაცნობ]. სხვათა შორის, მე ასევე კარგი ურთიერთობა მაქვს ზელენსკისთანაც, მაგრამ არ ვეთანხმები იმას, რაც მან გააკეთა.
ეს ომი არ უნდა მომხდარიყო [და არ უნდა გაგრძელდეს]. ამიტომაც მე დაველაპარაკები ზელენსკისაც. შემდეგი შეხვედრა ან ზელენსკისა და პუტინს შორის იქნება, ან ზელენსკის, პუტინს და ჩემს შორის, თუ ჩემი მონაწილეობა საჭირო გახდება. მაგრამ მე მინდა, რომ მათი შეხვედრა იქნას ორგანიზებული. მე ძალიან შემაშფოთა იმან, რაც ზელენსკიმ თქვა: „მე საკონსტიტუციო ორგანოდან თანხმობა და მხარდაჭერა დამჭირდებაო“. ესე იგი, რა გამოდის? მას აქვს უფლება საომარი მოქმედებები აწარმოოს, მაგრამ ტერიტორიების გასაცვლელად თურმე ნებართვა და თანხმობა ჭირდება. ტერიტორიების გაცვლა უკრაინის ინტერესებს შეესაბამება. დიახ, იქნება არასასიამოვნო მომენტებიც ორივე მხარისათვის. რას ვიზამთ, არის კარგიც და არის ცუდიც.
რა თქმა უნდა, საკითხი ძალიან რთულია. საზღვრები ყველგან ერთნაირი და ერთგვაროვანი არ არის. იქნება რაღაც ცვლილება ტერიტორიებში. სხვათა შორის, ყველა ამბობს სიტყვას „ცვლილება“. ჩვენ ვაპირებთ ფრონტის ხაზის ცვლილებას. რუსებმა უკრაინის დიდი ნაწილი დაიკავეს. შევეცდებით ამ ტერიტორიების [რაღაც] ნაწილი დავუბრუნოთ უკრაინას, მაგრამ რუსებს ბევრი აქვთ დაკავებული, განსაკუთრებით სანაპირო ზოლში, რომელიც ყველაზე ღირებულია. თუ თქვენს გვერდით ტბაა, მდინარე ან ზღვა და ოკეანე, ეს ყველაზე საუკეთესო საკუთრებას წარმოადგენს. ბევრმა არ იცის, რომ უკრაინა ადრე ოკეანის [შავი ზღვის] ნაპირზე ათასობით კილომეტრზე იყო გადაშლილი, დღეს კი მისი სანაპირო ტერიტორია მხოლოდ ოდესის ოლქით შემოიფარგლება.
ამიტომაც მე მივდივარ სამიტზე, რომ ეს პირობები განვიხილოთ. შესაძლოა მე იქიდან [ხელცარიელი] დავბრუნდე, მაგრამ შემდგომი წარმატების იმედით. შეიძლება ვთქვა კიდეც, რომ ამ საკითხისა გადაწყვეტა შეუძლებელია. არიან ისეთებიც, რომლებიც თვლიან, რომ პუტინს მთელი უკრაინის ხელში ჩაგდება სურდა. სხვათა შორის, მეც ერთ-ერთი მათგანი ვარ.
ვფიქრობ, მე რომ არ ვიყო, პუტინი არავის არ დაელაპარაკებოდა. მე კი მას შევხვდები, დაველაპარაკები, საკითხებს განვიხილავთ და შემდეგ, როგორც გითხარით, ყველაფერს ვეტყვი ზელენსკის და ევროპელ ლიდერებს – რა და როგორ უნდა გაკეთდეს. მე მათ ნაცვლად გადაწყვეტილებას ვერ მივიღებ. საერთოდ კი ვფიქრობ, რომ შეთანხმება ორივე მხარისთვის სასარგებლო უნდა იყოს.
ვფიქრობ, რუსეთმა საკუთარი თავის მოწყობას მეტი დრო უნდა დაუთმოს. რუსეთი უზარმაზარი სახელმწიფოა, მისი ტერიტორია 11 სასაათო სარტყელშია მოქცეული. რუსეთი პლანეტის ყველაზე დიდი ქვეყანაა. მას აქვს უდიდესი წარმატების პოტენციალი, მაგრამ მისი ეკონომიკა არცთუ კარგ მდგომარეობაშია, ომმა ძალიან დააზარალა.
რა თქმა უნდა, არაფერი კარგი არაა იმაში, როცა შეერთებული შტატების პრეზიდენტი რუსული ნავთობის მყიდველ დიდ ქვეყანას ეუბნება, რომ 50%-იან ბაჟს დაუწესებს, თუ მოსკოვისაგან ნავთობის ყიდვას გააგრძელებს. ეს ძალიან დიდი დარტყმა იქნება. თქვეს კიდეც, რომ მათ სხვა ასე არ მოექცეოდა.
მე მზად ვიყავი [რუსეთის მიმართ] უფრო სერიოზული ზომები მიმეღო, მაგრამ შემატყობინეს, რომ გარიგების დასადებად მზად არიან. ვნახოთ, რა და როგორ იქნება. მე მინდა, რომ რეალურად დავინახო ცეცხლის შეწყვეტა. მინდა, რომ დაიდოს ისეთი შეთანხმება, რომელიც ორივე მხარისათვის კარგი და სასარგებლო იქნება. ტანგოს ხომ ორი ცეკვავს? ჰოდა, იმედი მაქვს, კარგი მოლაპარაკება გვექნება, თუმცა კარგად იცით ისიც, რომ მათ [რუსების] მიმართ ყოველთვის კეთილი არ ვიყავი: გავაჩერე მათი მილსადენის მშენებლობა, უკრაინელებს „ჯაველინები“ მივეცი… იცით, რა შეუძლიათ „ჯაველინებს“? მათ „ტანკების მკვლელებს“ უწოდებენ. ობამამ უკრაინელებს ზეწრები მისცა, მე კი „ჯაველინები“ მივეცი. უჩემოდ უკრაინელები რუსების ტანკებს ვერ გაანადგურებდნენ და ისინი ოთხ საათში კიევს დაიკავებდნენ, გზატკეცილით რომ წასულიყვნენ. მაგრამ რუსმა გენერალმა გენიალური გადაწყვეტილება მიიღო – ტანკები სოფლის გზებით და სახნავ-სათეს მიწებზე გაუშვა… თავსხმა წვიმების გამო რუსული ტანკები ტალახში ჩაიფლენ. მე იმ გენერალს არ ვიცნობ, მაგრამ რადგანაც ვლადიმერის ხასიათი კარგად ვიცი, ის გენერალი თავის პოსტზე უკვე აღარ იქნება.
ალასკაზე პუტინთან საუბრის შემდეგ, როცა პირადად გავიგებ, რას მთავაზობს, ჯერ, რასაკვირველია, ზელენსკის დავურეკავ, შემდეგ ევროპელებს და, ალბათ, ვეტყვი – „აბა, წარმატებები. გააგრძელეთ ბრძოლა“, ან ვეტყვი ასე: „ჩვენ მოლაპარაკება შეგვიძლია“.
ერთ ფაქტს გეტყვით: უკრაინელებმა გამოკითხვა ჩაატარეს, რომლის თანახმად, მოსახლეობის 88%-ს სურს, რომ რუსეთთან გარიგება დაიდოს. არადა, სამი წლის წინ ყველა ბრძოლის გაგრძელების მომხრე იყო. საერთოდ, ყველას უნდა ბრძოლა, სანამ ბრძოლა უშუალოდ არ დაიწყება.
– მე რამდენიმე კითხვა მაქვს: ვოლოდიმირ ზელენსკი ნამდვილად არ არის მიწვეული პარასკევს?
– ჩვენს შეხვედრაში მისი მონაწილეობა არ იგეგმება. მე შემეძლო ისე გამაკეთებინა, რომ ის ალასკაზე ჩამოსულიყო, მაგრამ იცით… მას ბევრი შანსი ჰქონდა [ომის შესაწყვეტად], მაგრამ ბრძოლები სამ წელზე მეტია გრძელდება და ამ ხნის განმავლობაში არაფერი არ გაუკეთებია.
– რას ნიშნავს „კარგი გარიგება“?
– მე ამას მაშინ გეტყვით, როცა გავიგებ, კონკრეტულად რა სურს პუტინს. „კარგ გარიგებას“ ბევრი განმარტება აქვს. ჩვენ ახლა ძალიან რთულ სიტუაციაზე ვლაპარაკობთ… ომი, რომელიც მე ახლახან მოვაგვარე [სომხეთ-აზერბაიჯანს შორის], ისეთივე რთული იყო, როგორც ეს [რუსეთ-უკრაინის] ომი, თან საქმე მარშრუტებს და ვაჭრობას ეხებოდა. როცა ვლადიმერ პუტინს შევხვდები, პირველივე ორ-სამ წუთში მივხვდები, შეიძლება თუ არა გარიგების დადება.
– საიდან იცით?
– იქიდან ვიცი, რომ ეს ჩემი სამუშაოა. მე ვდებ გარიგებებს.
წლიური ინფლაცია ივლისში 4.3%-მდე გაიზარდა, რაც ივნისის მონაცემს 0.3 პროცენტული პუნქტით აღემატება და 2023 წლის მარტის შემდეგ ყველაზე მაღალი მაჩვენებელია. მიუხედავად ამისა, ივნისის 7.3%-თან შედარებით საგრძნობლად შემცირდა სეზონურად შესწორებული და გაწლიურებული ყოველთვიური ინფლაცია და ივლისში მიზნობრივ მაჩვენებელზე უმნიშვნელოდ მეტი, 3.1% შეადგინა. თვიურ ჭრილში ინფლაციური ზეწოლის კლებაზე მიუთითებს სხვა ანალიტიკური საზომებიც, როგორიცაა სხვადასხვა მეთოდით გაანგარიშებული საბაზო ინფლაცია. მთლიანობაში, 2024 წლის ნოემბრის შემდეგ, სეზონურად შესწორებული ყოველთვიური ინფლაცია, წინა პერიოდებთან შედარებით, საკმაოდ მაღალია, რაც ყურადსაღები ფაქტორია. ამავდროულად, ინფლაციის მიმდინარე დინამიკა ჩვენს მოლოდინებთან თანხვედრაშია. თიბისი კაპიტალის პროგნოზით, მომდევნო თვეებში ინფლაცია კვლავ გაიზრდება, წლის ბოლოსთვის კი, საბაზო ეფექტის გათვალისწინებით, მცირედით შენელდება.
მომსახურების ინფლაციამ, რომელიც ინფლაციური მოლოდინებისა და გრძელვადიანი ტენდენციის შეფასებისთვის ყველაზე შესაფერისია, რადგან ნაკლები მერყეობითა და იმპორტული კომპონენტის შედარებით მცირე წილით ხასიათდება, ივლისში 3% შეადგინა. მომსახურების ინფლაცია მიმდინარე წელს ჯამური მაჩვენებლის ზრდის ერთ-ერთი მნიშვნელოვანი კომპონენტია და, მომდევნო თვიდან ინტერნეტის გადასახადის ერთჯერადი ეფექტის ამოწურვის შემდგომ, კვლავ გაიზრდება. ამასთან, საყურადღებოა, რომ მომსახურების ფასების ზომიერი ზრდა, თუნდაც მიზნობრივ მაჩვენებელზე მეტად, აუცილებლად ინფლაციურ ზეწოლაზე არ მიუთითებს, რადგან განვითარებად ეკონომიკებში მწარმოებლურობის დონის ზრდას არავაჭრობად სექტორებში ფასების ზრდა კანონზომიერად მოსდევს. მომსახურებასთან ერთად, გაზრდილია საქონლის ინფლაციაც, დიდწილად სურსათის ფასების მნიშვნელოვანი მატების გამო. საერთაშორისო და ადგილობრივი ფაქტორების ერთობლიობით, მოსალოდნელია, რომ საკვებზე ფასების ზრდა მომდევნო თვეებშიც გაგრძელდება.
ამავდროულად, ინფლაციის ბოლოდროინდელი აჩქარება ადგილობრივ და შერეულ პროდუქტებზე მზარდი ფასებითაა განპირობებული, ხოლო იმპორტული ინფლაცია უარყოფითია. ამდენად, სურათი განსხვავებულია 2021-2022 წლების ეპიზოდისგან, როდესაც ინფლაციის ზრდის მთავარი წყარო იმპორტული საქონელი იყო.
ადგილობრივი პროდუქციის ინფლაციის მატებაში მიმდინარე წელს ყველაზე დიდი წილი სურსათზე მოდის – განსაკუთრებით, პურზე, ყველსა და ხორცზე – თუმცა, საკვების გარდა, ფასები პროდუქტების ფართო სპექტრზეა გაზრდილი. სურსათი – უპირველესად, მზესუმზირის ზეთი, კარტოფილი და შოკოლადი – განაპირობებდა ყველაზე მეტად შერეული პროდუქციის ინფლაციის ზრდასაც, მედიკამენტებთან ერთად. რაც შეეხება იმპორტულ ინფლაციას, რომელიც უარყოფითია, ერთი მხრივ, ზრდის კუთხით გამოვყოფთ ყავისა და სიგარეტის (მათ შორის, აქციზის გადასახადის გავლენით) ფასებს, ხოლო, მეორე მხრივ, კლების კუთხით აღსანიშნავია, პირველ რიგში, ფასები საწვავზე და, აგრეთვე, ელექტრონულ მოწყობილობებსა და ჭურჭელზე, სხვა სიტყვებით – გრძელვადიანი მოხმარების საქონელზე.
მართლაც, თუ პროდუქტებს მოხმარების ხანგრძლივობის მიხედვით დავაჯგუფებთ, 2025 წელს მოკლევადიანი მოხმარების საქონელს ჯამურად იმპორტულ ინფლაციაში წვლილი, ფაქტობრივად, არ შეუტანია, მიუხედავად იმისა, რომ რაოდენობრივად იმპორტული პროდუქციის ნახევარზე მეტს წარმოადგენს. საპირისპიროდ, დეფლაცია მთლიანად საშუალო და გრძელვადიანი მოხმარების საქონელზე მოდიოდა. ამავდროულად, ადგილობრივი პროდუქტების ინფლაციაში წამყვანი მომსახურება და მოკლევადიანი მოხმარების საქონელი იყო, ხოლო შერეული პროდუქტების ინფლაციაში – აგრეთვე მოკლევადიანი მოხმარების საქონელი. ინფლაციის ფაქტორების ეს ასიმეტრია კიდევ ერთხელ უსვამს ხაზს გრძელვადიანი მოხმარების საქონლის როლის მნიშვნელობას მიმდინარე მაკროეკონომიკურ გარემოში, რაზეც არაერთხელ გვისაუბრია, და ადასტურებს, რომ ინფლაცია სულ უფრო მეტადაა განპირობებული ადგილობრივი ფაქტორებით.
გრძელვადიანი მოხმარების საქონლის კუთხით, ასევე საყურადღებოა, რომ, უახლეს ინდიკატორებზე დაყრდნობით, აგვისტოს პირველ კვირაში ასეთ საქონელზე უნაღდო დანახარჯები ზრდის ტენდენციით ხასიათდება, წინა თვეებისგან განსხვავებით. გაუმჯობესება იკვეთება ჯამური უნაღდო დანახარჯების მხრივაც, რაც, შესაძლოა, აგვისტოში უფრო ძლიერ ეკონომიკურ აქტივობაზე მიუთითებდეს. მეორე მხრივ, არარეზიდენტებისა და მიგრანტების ხარჯვის დინამიკა წინა თვეებთან შედარებით დიდწილად უცვლელია. კერძოდ, არარეზიდენტების დანახარჯები ზრდას აგრძელებს, მიგრანტების ხარჯები კი მცირედით შენელებულია.
სხვა მაჩვენებლების მხრივ, მთლიანმა სავალუტო რეზერვებმა ივლისის ბოლოს მდგომარეობით 5 მილიარდ აშშ დოლარს მიაღწია, რაც ივნისთან შედარებით 7.1%-ით, ანუ $331 მილიონი აშშ დოლარითაა გაზრდილი. რეზერვების ზრდა თანხვედრაშია საქართველოს ეროვნული ბანკის (სებ) მიერ ივლისში ინტერვენციების აჩქარების ჩვენს მოლოდინებთან. არსებული შეფასებით, მოცულობითი ინტერვენციები აგვისტოს პირველ კვირაშიც გრძელდება. როგორც ადრეც აღინიშნა, ინფლაციური ზეწოლის დამატებით მნიშვნელოვანი გაძლიერების შემთხვევაში, რაც, ვფიქრობთ, რომ სადღეისოდ საბაზო სცენარი არაა, უცხოური ვალუტის არსებული სიჭარბე, სავარაუდოდ, ლარის უფრო მეტ სიმყარეში აისახება. ეს განსაკუთრებით საყურადღებოა იმის ფონზე, რომ თიბისი კაპიტალის მოკლევადიანი და გრძელვადიანი წონასწორობის ჩარჩოს თანახმად, ლარი წონასწორულ დონესთან შედარებით უფრო სუსტი რჩება. კერძოდ, მართალია, დოლარის გლობალური გაუფასურების ფონზე ლარი დოლართან მიმართებით მცირედით გამყარდა, თუმცა კიდევ უფრო მეტად გამყარდა საქართველოს მთავარი სავაჭრო პარტნიორი ქვეყნების ვალუტები. ამდენად, ლარის რეალური ეფექტური გაცვლითი კურსი, შეწონილი სავაჭრო პარტნიორების ვალუტების მიმართ, პირიქით, გაუფასურდა, რაც იმპორტული პროდუქციის გაძვირების გარკვეულ რისკს შეიცავს.
ამავდროულად, ინფლაციის მიმდინარე დინამიკა ჯერ კიდევ აქცენტის გაკეთებას უფრო ადგილობრივ მოთხოვნასა და საპროცენტო განაკვეთებზე მოიაზრებს, ვიდრე ლარის გაცვლით კურსზე, რადგან, როგორც ზემოთ აღინიშნა, ინფლაციის მხრივ არა იმპორტული, არამედ ადგილობრივი პროდუქტები დომინირებს. რასაკვირველია, გასათვალისწინებელია ისიც, რომ ადგილობრივად წარმოებული პროდუქცია შუალედური მოხმარებისთვის იმპორტის საკმაოდ მაღალ კომპონენტსაც მოიცავს. ამ მხრივ, აღსანიშნავია, რომ ბოლო შეხვედრისას, რომელიც 30 ივლისს გაიმართა, სებ-მა საპროცენტო განაკვეთი 8%-იან ნიშნულზე შეინარჩუნა.
დასასრულს, ასევე საყურადღებოა, რომ, ვინაიდან ლარის წონასწორულ ნიშნულთან ჩამორჩენა მისი გამყარების ალბათობას ზრდის, ინფლაციის დინამიკისგან დამოუკიდებლადაც, ეს მნიშვნელოვანი გასათვალისწინებელი ფაქტორია თიბისი კაპიტალის ლარი-ევრო-დოლარის სტრატეგიის კონტექსტში, სადაც საშუალო და გრძელვადიან ინდიკატორებზე აქცენტის გაკეთება მნიშვნელოვანი სარგებლის მიღების საშუალებას იძლევა.
2025 წლის 4 ოქტომბერს მუნიციპალიტეტის ორგანოთა არჩევნები გაიმართება. 4 ოქტომბერს საქართველოს მოქალაქეები აირჩევენ 64 მერს და 64 საკრებულოს 2 058 წევრს, როგორც პროპორციული, ისე მაჟორიტარული სისტემით.
ამომრჩეველთა თითქმის 90% საკუთარ არჩევანს ვერიფიკაციისა და ხმის მთვლელი აპარატების გამოყენებით დააფიქსირებს. ქვეყნის მასშტაბით სულ გაიხსნება 3051 საარჩევნო უბანი, რომელთაგან 2284 უბანზე კენჭისყრა ელექტრონული, ხოლო 767 უბანზე ტრადიციული წესით ჩატარდება.
საარჩევნო ადმინისტრაცია სრული დატვირთვით მუშაობს იმისათვის, რომ 4 ოქტომბრის არჩევნები მაღალ პროფესიულ დონეზე იყოს ადმინისტრირებული. საარჩევნო ღონისძიებათა გრაფიკის შესაბამისად არჩევნებთან დაკავშირებული საქმიანობა, პროცედურები და ღონისძიებები აქტიურად ხორციელდება. საარჩევნო კანონმდებლობის შესაბამისად, სხვადასხვა მნიშვნელოვან საარჩევნო საკითხთან დაკავშირებით, პერიოდულად იმართება ცესკოსა და საოლქო საარჩევნო კომისიების სხდომები. ამ პროცესის გამჭვირვალედ წარმართვა საარჩევნო ადმინისტრაციისთვის ერთ-ერთი უმნიშვნელოვანესი პრიორიტეტია.
შევახსენებთ საარჩევნო პროცესში ჩართულ მხარეებს, როგორც მედიას, ისე საერთაშორისო ორგანიზაციებსა და ადგილობრივ არასამთავრობო სექტორს, რომლებიც დაინტერესებული არიან აღნიშნული პროცესის დაკვირვებითა და გაშუქებით, დროულად გაიარონ კანონმდებლობით განსაზღვრული პროცედურები ცენტრალურ ან შესაბამის საოლქო საარჩევნო კომისიებში რეგისტრაციისა და აკრედიტაციის მისაღებად.
აკრედიტაციის მისაღებად შესაბამის საარჩევნო კომისიაში განაცხადის წარდგენის ბოლო ვადა მედიის წარმომადგენლებისთვის 29 სექტემბერია (18:00 სთ.). რეგისტრაციის მიზნით ადგილობრივ დამკვირვებელ ორგანიზაციას განაცხადის წარდგენა შესაბამის საარჩევნო კომისიაში 24 სექტემბერის (18:00 სთ.) ჩათვლით შეუძლია, საერთაშორისო სადამკვირვებლო ორგანიზაციებმა კი ცესკოს 27 სექტემბრის (18:00 სთ.) ჩათვლით უნდა მიმართონ. აკრედიტაცია/რეგისტრაციის პროცედურებთან დაკავშირებით ინფორმაციისთვის ეწვიეთ ცესკოს ვებგვერდს – www.cesko.ge ან დაგვიკავშირდით კონტაქტ-ჰაბის ნომერზე – 2 51-00-51.
დედაქალაქის მერის განცხადებით, ავარიული სახლების ჩანაცვლების დროს, მოსახლეობის 100%-იანი თანხმობის არქონის შემთხვევაში, მიდგომა არ შეიცვლება. ამის შესახებ მან მედიასთან შესაბამისი კითხვის საპასუხოდ ისაუბრა.
კახა კალაძის თქმით, რადგან საკუთრების უფლებას კანონი განსაზღვრავს, მუნიციპალიტეტი საკუთარი საცხოვრებელი სახლიდან ძალით არავის გამოიყვანს.
„მიდგომა არ და ვერ შეიცვლება, რადგან საკუთრების უფლებას განსაზღვრავს კანონი. შესაბამისად, ჩვენ არ გვაქვს იმის საშუალება, რომ ვიღაც ძალით გამოვიყვანოთ თავისი სახლიდან და საცხოვრებელი ფართი დავუნგრიოთ. ამ საკითხზე იყო გარკვეული სპეკულაციები და მაგალითად მოჰყავდათ კერძო საკუთრებაში შეჭრილი ადამიანების გამოყვანა ან სახელმწიფო მიწებზე უკანონოდ აშენებული სახლების დემონტაჟი. ეს აბსოლუტურად სხვადასხვა რამეა.
კიდევ ერთხელ ვიმეორებ, ჩვენ, მუნიციპალიტეტს არ გვაქვს ამის უფლება, არასდროს გაგვიკეთებია და არ გავაკეთებთ, რომ ადამიანები საკუთარი საცხოვრებელი სახლიდან, რომელიც მათია, იძულებით გამოვიყვანოთ“, – აღნიშნა თბილისის მერმა.
კეთილსინდისიერება, პატრიოტიზმი და პროფესიონალიზმი. [მერობის თითოეული კანდიდატი] განმსჭვალულია ამ თვისებებით, – განაცხადა ფრაქცია „ქართული ოცნების“ თავმჯდომარის მოადგილე, ლევან მაჭავარიანმა. დეპუტატის თქმით, მისი და მისი თანაგუნდელების მოლოდინია, რომ „ქართული ოცნება“ თვითმმართველობის არჩევნებს 64-ვე მუნიციპალიტეტში მოიგებს.
„ჩვენი მოლოდინი არის, რომ 64-ვე მუნიციპალიტეტში მოვიგებთ მერობის არჩევნებსაც და საკრებულოს არჩევნებსაც.
კრიტერიუმებიი, რომლებითაც კანდიდატების შერჩევა მოხდა ეს არის – კეთილსინდისიერება, პატრიოტიზმი და პროფესიონალიზმი. თითოეული ეს ადამიანი განმსჭვალულია ამ თვისებებით“, – აცხადებს მაჭავარიანი.
საუკუნოვანი ტრადიცია გრძელდება – დღეს თეთრიწყაროს მუნიციპალიტეტში, დიდგორის ველზე სახალხო დღესასწაული „დიდგორობა“ გაიმართება.
11:00 საათზე დიდგორის წმინდა დავით აღმაშენებლის სახელობის ტაძარში დაგეგმილია სადღესასწაულო პარაკლისი, რის შემდეგაც დიდგორის მემორიალამდე ფეხით მსვლელობა მოეწყობა. ღონისძიება კი 12:00 საათზე დაიწყება, სადაც სიტყვით გამოვლენ საქართველოს მთავრობისა და წმინდა სინოდის წევრები.
ადგილზე მისულ სტუმრებს დახვდებათ საგამოფენო სივრცეები, მოეწყობა სპორტული შეჯიბრებები. გარდა ამისა, გაიმართება კონცერტი ფოლკლორული და ქორეოგრაფიული ანსამბლების მიერ შესრულებული მუსიკალური ნომრებით, ასევე, თეატრალიზებული პერფორმანსი, სადაც დავით აღმაშენებლის ეპოქა გაცოცხლდება.
„დიდგორობა 2025-ის“ ფარგლებში სამხედრო პირები დიდგორის ჯვრის ორდენით დაჯილდოვდებიან.
შეგიძლიათ უსაფრთხოდ აიღოთ ახალი ან უცნობი ამოცანები. იღბალი თქვენს მხარეს იქნება და ყველა საკითხი სწრაფად და წარმატებით მოგვარდება. პრიორიტეტი მიანიჭეთ იმას, რაც გადადებული გქონდათ. იყავით უფრო მშვიდად სხვების კომენტარებსა თუ კრიტიკაზე, ნუ გაბრაზდებით.
კურო
დღევანდელი დღის დაგეგმვისას დაეყრდენით მხოლოდ საკუთარ ძალებს. თქვენ არ დაგჭირდებათ კოლეგების ან მეგობრების დახმარება, მოგიწევთ საქმის კეთება დამოუკიდებლად. ნუ იეჭვიანებთ, თუ ვინმემ უკეთეს უკეთეს შედეგს მიაღწია. გამოიყენეთ ეს, როგორც მოტივაცია თქვენი აქტიური და ნაყოფიერი მუშაობისთვის.
ტყუპი
გახშირდება კონფლიქტები, მოგვეთხოვება კანონებისა და დადგენილი ბრძანებების დაცვა – 12-18 აგვისტოს მნიშვნელოვანი ასტროლოგიური მოვლენები
წარმატებული დღისთვის, უმჯობესია იმუშაოთ გუნდში, გახდეთ ახალი მსხვილი პროექტის წევრი. ეს საინტერესო გამოცდილება იქნება და პროფესიულ სფეროში ახალ დონეზე ასვლაში დაგეხმარებათ. არის შანსი, რომ პირად ურთიერთობებში მიიღებთ იმას, რისკენაც ისწრაფოდით.
კირჩხიბი
ვარსკვლავები წარმატებულ და ნაყოფიერ დღეს გპირდებიან. წარმატებას მიაღწევთ ყველა ასპექტში, ამიტომ უპირატესობა მიანიჭეთ რთულ და შრომატევად ამოცანებს, რომლებიც ადრე თქვენს შესაძლებლობებს აღემატებოდა. ეცადეთ, 12 აგვისტოს უცხო ადამიანებთან ნაკლები ურთიერთობა გქონდეთ, რათა განწყობა არ გაიფუჭოთ.
ლომი
ხელსაყრელი დღე გელით. ბევრი რამ თქვენს სასარგებლოდ გადაწყდება, თუმცა, თუ რამე არ გამოდის, ამაზე არ უნდა შეჩერდეთ. ცოტა ხნით გვერდზე გადადეთ და გადადით ნაცნობ საქმეზე. უფროსები უთუოდ შეამჩნევენ თქვენს აქტიურობას.
ქალწული
სამუშაო ნელა წავა, მაგრამ შეძლებთ სასურველ შედეგს მიაღწიოთ და კმაყოფილება მიიღოთ თქვენი სამუშაოდან. შესაძლოა სამსახურში გვიანობამდე დარჩენამ მოგიწიოთ. საღამოს შეეცადეთ დაისვენოთ და მოიხსნათ გრძელი დღის სტრესი.
სასწორი
ფრთხილად შეარჩიეთ კომპანია: აქტიური და მიზანდასახული ადამიანები, რომლებიც დღეს თქვენ გვერდით იქნებიან, შთააგონებენ რაიმე უჩვეულოს გაკეთებას და დაგეხმარებიან მიზნისკენ სვლაში. გაატარეთ დრო საყვარელ ადამიანებთან, ისაუბრეთ იმაზე, რაც გაწუხებთ და თქვენს ურთიერთობაში ნეგატივს იწვევს.
მორიელი
წარმატება გექნებათ ბიზნესში, მაგრამ შესაძლოა სირთულეები შეგექმნათ ცხოვრების სხვა სფეროებში. ნუ გადატვირთავთ საკუთარ თავს სამსახურში. საღამოს შეეცადეთ დაისვენოთ და აღიდგინოთ ენერგია.
კარგი დღეა შემოსავლის დამატებითი წყაროების მოსაძებნად. პირად ურთიერთობებში შესაძლებელია რთული სიტუაციები, ეცადეთ იყოთ უფრო თავშეკავებული და ჩხუბის პროვოცირება არ მოახდინოთ. არის შანსი მიიღოთ საინტერესო შეთავაზება, რომელიც ახალი გამოცდილებას შეგძენთ.
მერწყული
წარმატებული და პოზიტიური დღე გელოდებათ. რასაც გააკეთებთ 12 აგვისტოს, მშვენივრად გამოვა. უფრო ხშირად ესაუბრეთ საყვარელ ადამიანებს: ეს გააძლიერებს თქვენს ურთიერთობებს და დაგეხმარებათ ყველა საკამათო საკითხის გარკვევაში. მათი რჩევები გამოგადგებათ.
თევზები
გაატარეთ დღე აქტიურად, დაასრულეთ რთული საკითხები, რომლებიც გადადებული გქონდათ. დღეს ვარსკვლავები თქვენს მხარეს არიან, ამიტომ წარმატება გელით ნებისმიერ საქმეში. მოერიდეთ დიდი თანხის დახარჯვას. უმჯობესია დაზოგოთ ფული მომავლისთვის.
ადვოკატ თორნიკე გიგინეიშვილის ინფორმაციით, 2023 წლის მარტის აქციების დროს დაშავებული 19 ჟურნალისტისა და ოპერატორის საქმე სტრასბურგის სასამართლოში გაიგზავნა.
ადვოკატი ამასთან დაზარალებული ოპერატორებისა და ჟურნალისტების სიას აქვეყნებს.
ადვოკატ თორნიკე გიგინეიშვილის განცხადებით, მიუხედავად გამოძიების დაწყებისა, არც ერთი ფაქტი არ გამოძიებულა, ვიდეომასალა კი 2 წლის განმავლობაში არ განხილულა.
“რამდენიმე თვიანი მუშაობის შემდგომ, სტრასბურგის სასამართლოში გაიგზავნა 19 ჟურნალისტისა და ოპერატორის საჩივარი.
ეს ადამიანები არიან 2023 წლის მარტის აქციებისას (რუსული კანონის პირველად მიღების პროცესში) დაზარალებული ჟურნალისტები, რომლებზედაც იძალადა სისტემამ.
დღემდე გამოძიების მიხედვით არცერთი ფაქტი გამოძიებული არ არის. ამოღებული ვიდეო მასალის დათვალიერებაც კი არ დასრულებულა 2 წლის თავზე.
დიდი შრომა დაგვჭირდა რომ დაზარალებულის სტატუსი მაინც მიეღოთ აღნიშნულ პიროვნებებს (ნაწილს) საგამოძიებო ორგანოს მიერ.
მადლობა მედიაომბუდსმენის გუნდს კვალიფიციური და დიდი შრომის გაწევისთვის. (ილონა დიასამიძე, ჯანო ჭკადუა)
განსაკუთრებული მადლობა კი ნათია კაპანაძეს (Natia Kapanadze), რომელიც ათასობით კილომეტრის დაშორებით არის საქართველოდან, მაგრამ ყოველთვის ჩვენ გვერდით – საჭირო დროს.
19 ჟურნალისტისა და ოპერატორების სახელები და გვარები:
შემდეგი შეხვედრა ზელენსკისა და პუტინს შორის, ან ზელენსკის, პუტინსა და ჩემ შორის იქნება, – ამის შესახებ აშშ-ის პრეზიდენტმა, დონალდ ტრამპმა თეთრ სახლში ბრიფინგზე განაცხადა.
„მე ვლადიმერ პუტინთან ვისაუბრებ და ვეტყვი, რომ ეს ომი უნდა დაასრულოს. მის ქვეყანაში ჩვენი ჩასვლის ნაცვლად, რუსეთის პრეზიდენტი ჩვენს ქვეყანაში ჩამოდის“, – განაცხადა დონალდ ტრამპმა.
მისი თქმით, რუსეთის პრეზიდენტთან „კონსტრუქციული“ საუბრის იმედი აქვს.
„სავარაუდოდ, პირველი ორი წუთის განმავლობაში ზუსტად მეცოდინება, შესაძლებელია თუ არა შეთანხმების მიღწევა. ეს არის ის რასაც მე ვაკეთებ, მე შეთანხმებებს ვაღწევ“, – აღნიშნა აშშ-ის პრეზიდენტმა.
დონალდ ტრამპის ცნობით, ვლადიმერ პუტინთან შეხვედრის შემდეგ ევროპელ ლიდერებსა და უკრაინის პრეზიდენტ, ვოლოდიმირ ზელენსკის დაურეკავს.
„გამოფრენისას, შესაძლოა ოთახიდან გამოსვლის შემდეგაც კი, მე ევროპელ ლიდერებს დავურეკავ, რომელთანაც კარგი ურთიერთობა მაქვს. მე ზელენსკისაც კარგად ვუგებ, მაგრამ არ ვეთანხმები იმას, რასაც აკეთებს. ეს ომი არასდროს უნდა მომხდარიყო, მაგრამ მე ზელენსკისთან ვისაუბრებ. შემდეგი შეხვედრა ზელენსკისა და პუტინს შორის, ან ზელენსკის, პუტინსა და ჩემ შორის იქნება“, – განაცხადა აშშ-ის პრეზიდენტმა.
