„ნაციონალურ მოძრაობა“ არის ძალა, რომელიც ჩასაფრებულია, როგორ არიოს ქვეყანა და ძალით დაითრიოს ხელისუფლება. სანამ ეს არსებობს, ძალიან ფრთხილად უნდა ვიყოთ, – ამის შესახებ ტელეკომპანია „იმედის“ მფლობელმა, ირაკლი რუხაძემ „იმედის კვირასთან“ განაცხადა.

მისივე თქმით, საქართველომ უნდა გაიაროს გამთლიანების პროცესი, რაც ბევრმა ქვეყანამ გამოცადა, სადაც ასევე მასობრივად, ადამიანის უფლებების უხეში დარღვევები იყო.

„ჩვენ ეს უნდა გავაკეთოთ. სანამ „ნაციონალური მოძრაობა“ არსებობს მთავარი დომინანტური ოპოზიციური ძალა ეს არასდროს დასრულდება, რადგან მათი ერთადერთი შანსი, რომ დაბრუნდნენ უკან, არის ასეთი არეულობა. ბოლო-ბოლო ზუსტად იციან, რომ ქართველი ხალხი მათ ხმას არ მისცემს. შესაძლოა, 50 წლის მერე მისცენ, მაგრამ მაშინ ესენი არ იქნებიან და აღარ მადარდებს, მაგრამ ახლა არ მისცემენ. ამიტომ, „ნაციონალურ მოძრაობა“ არის ძალა, რომელიც ჩასაფრებულია, როგორ არიოს ქვეყანა და ძალით დაითრიოს ხელისუფლება. სანამ ეს არსებობს, ძალიან ფრთხილად უნდა ვიყოთ. ეს არის გასაკეთებელი. „ქართულ ოცნებას“ ეს უნდა გაეკეთებინა 2012-13 წლებში. ახლა როგორ გააკეთებენ, არ ვიცი, შევხედოთ“, – განაცხადა რუხაძემ.

პარლამენტთან „უცხოური გავლენის გამჭვირვალობის შესახებ“ კანონპროექტის წინააღმდეგ საპროტესტო აქცია მიმდინარეობს. მონაწილეები ითხოვენ, ხელისუფლებამ უკან გაიწვიოს კანონპროექტი. მომიტინგეთა შეფასებით, ეს კანონი ქვეყნის ევროინტეგრაციის პროცესს ხელს შეუშლის.

აქციაზე იმყოფებიან ოპოზიციური პოლიტიკური პარტიებისა და არასამთავრობო ორგანიზაციების ლიდერები:

ნიკა მელია (ახალი)
ნიკა გვარამია (ახალი)
გიორგი ვაშაძე (აღმაშენებელი)
ლევან ხაბეიშვილი (ენმ)
სოფო ჯაფარიძე (ენმ)
ზურაბ ჯაფარიძე (გირჩი)
ელენე ხოშტარია (დროა)
გიგა ლემონჯავა (დროა)
ლაშა ფარულავა (ენმ)
მამუკა ყურაშვილი (ენმ)
გიორგი ბოტკოველი (ენმ)
ხატია დეკანოიძე (ოპოზიციონერი დეპუტატი)
გუბაზ სანიკიძე (ოპოზიციონერი დეპუტატი)
თამარ კორძაია (ოპოზიციონერი დეპუტატი)
მამუკა ხაზარაძე (ლელო)
ბადრი ჯაფარიძე (ლელო)
საბა ბუაძე (ლელო)
ირაკლი კუპრაძე (ლელო)
ოთარ ფარულავა (ლელო)
ბექა ბერიძიშვილი (ლელი)
ვატო სურგულაძე (ლელო)
მანანა ნაჭყებია (ლელო)
გაიოზ ჯაფარიძე (ფრანკლინის კლუბი)
სანდრო ზიბზიბაძე (ფრანკლინის კლუბი)
გიგა ბოკერია (ევროპული საქართველო)
თამარ ჩერგოლეიშვილი (ევროპული საქართველო)
ეკა გიგაური (გამჭვირვალობა)
ლევან გოგიჩაიშვილი (გახარია)
ნოდარ ჩაჩანიძე (ახალი)
პაატა მანჯგალაძე (აღმაშენებელი)
ლაშა დიაროვი (აღმაშენებელი)
სერგო ჩიხლაძე (აღმაშენებელი)
ბექა ბასილაია (ადვოკატი)
ლანა ღვინჯილია (ძალა ერთობაშია)
მანჩი ანდღულაძე (ენმ)
ბესო გედენიძე (ენმ)
დავით დიღმელაშვილი (სირცხვილია)
მალხაზ პატარაია (ენმ)
მამუკა გუგეშაშვილი (ენმ)
ბესო გაზდელიანი (ენმ)
გოგა ონიანი (ენმ)
შოთა გრიგოლია (ენმ)
ლადო ლაგვილავა (ენმ)
ვასო ურუშაძე (ენმ)
ირაკლი ნადირაძე (ენმ)
აბო გურჯიშვილი (ენმ)
ზაზა გოგავა (ენმ)
გიგა გიგიტელაშვილი (ენმ)
დაჩი ნატროშვილი (ენმ)
იგორ ნარმანია (ენმ)
ნიკა ნარსია (ენმ)
კახა კვეკვესქირი (ახალი)
დიმიტრი ბიძინაშვილი (ახალი)
თეა გოჩიტაშვილი (ენმ)
ანა დოლიძე (ხალხისთვის)
ზვიად ცეცხლაძე (დაფიონი)
ნადიმ ხმალაძე (უკრაინაში მებრძოლი)
ზვიად ქორიძე (გამჭვირვალობა)
ხატია ჯინჯიხაძე (ყოფილი სოროსი)

რუსთაველის გამზირზე გზის სავალი ნაწილი გადაკეტილია. აქციის მონაწილეები პარლამენტთან ღამის გათენებას აპირებენ, რადგან დილით იურიდიულ საკითხთა კომიტეტის სხდომაზე კანონპროექტის მესამე მოსმენით განხილვაა დაგეგმილი და ეცდებიან, სხდომის ჩატარებას ხელი შეუშალონ.

მამუკა მდინარაძეს მიაჩნია, რომ „ლელოს“ წარმომადგენლის, საბა ბუაძის განცხადება იმასთან დაკავშირებით, რომ დეპუტატები უკვე პარლამენტის შენობაში არიან პრემიერ-მინისტრისა და შინაგან საქმეთა მინისტრის დღევანდელ ბრიფინგებს უკავშირდება. ამის შესახებ საპარლამენტო უმრავლესობის ლიდერმა მედიასთან ისაუბრა.

მისი თქმით, მას შემდეგ, რაც გაირკვა, რომ განსაკუთრებული მნიშვნელობის ობიექტების ჯგუფურად ბლოკირებისთვის საქმეები სისხლის სამართლის კოდექსის 222-ე მუხლით აღიძვრება, ოპოზიციონერები მათ მიერ წაქეზებული ახალგაზრდების წინაშე თავის მართლებას ცდილობენ.

„რეალურად, თუ სიტყვა-სიტყვით განვმარტავთ, 222-ე მუხლში მეორე ნაწილია, სადაც წერია, რომ განსაკუთრებული მნიშვნელობის ობიექტების ჯგუფურად ბლოკირება რამაც შეაფერხა ან შეეძლო შეეფერხებინა ამ ობიექტის ნორმალური მუშაობა, ისჯება თავისუფლების აღკვეთით 4 წლამდე. მსგავსი ქმედებების შემდგარი კვალიფიკაცია რომ იყო შესატყვისი, ამასთან დაკავშირებით სისხლისსამართლებრივი დევნა საერთოდ არ იწყებოდა. დღეს შინაგან საქმეთა მინისტრმა თქვა, რომ ასეთი პრაქტიკის გაგრძელებას ჩვენ არ ვაპირებთ და შესაბამისი რეაქცია იქნება.

როგორც ჩანს, ეს რომ მოისმინეს, თავის წაქეზებულ ადამიანებთან უნდათ თავის გამართლება და ხვალ დილით იტყვიან: „იცით რა, პარლამენტარები უკვე შიგნით იყვნენ, ამიტომ აზრი არ ჰქონდა [ბლოკირებას]“. ახლა შეშინდნენ, მიხვდნენ – თვითონ მანდ მიმსვლელები არ არიან, ახლა ეს ახალგაზრდა ადამიანები უნდა წააქეზონ, რომ იქ მივიდნენ, ამისიც შეეშინდათ, როგორც ჩანს. ეს ჩემი ვარაუდია, შეიძლება ვცდებოდე, მაგრამ ერთადერთი ახსნა ეს არის“, – განაცხადა მდინარაძემ.

„ქართული ოცნების“ აღმასრულებელი მდივანი ასეთ განცხადებებს „საოცრებას“ უწოდებს.

„არა, საოცრებაა, წარმოუდგენელი ხალხია. არ ვიცი. უჩა აბაშიძის მორალის ხალხი არიან ისინი. არ ვიცი რომელმა თქვა და რა თქვა… რა პარლამენტის შენობაში არიან? ხომ უნდა მოგაფიქრდეს?“, – ამბობს მდინარაძე.

უცებ თუ აღმოცენდნენ დილით კომიტეტი სხდომაზე [საპარლამენტო უმრავლესობის დეპუტატები], სიმართლე ყოფილა, – ამის შესახებ „სტრატეგია აღმაშენებლის“ დეპუტატმა გიორგი ვაშაძემ განაცხადა, რითაც გამოეხმაურა გავრცელებულ ინფორმაციას, რომ „ქართული ოცნების“ დეპუტატები პარლამენტში უკვე იმყოფებიან.

ვაშაძის თქმით, “ყველა ამას ამბობს, რომ ისინი შიგნით არიან”.

„მინდა მოვინახულოთ და საკვები მივაწოდოთ, იქნებ შიათ – ახალგაზრდები ამბობენ, რომ გავუნაწილებთო. ყველა ამას ამბობს, რომ შიგნით არიან [საპარლამენტო უმრავლესობის დეპუტატები] და ხომ ვნახავთ? უცებ თუ აღმოცენდნენ დილით კომიტეტი სხდომაზე, ალბათ, სიმართლე ყოფილა“, – აღნიშნა ვაშაძემ.

როგორც გიორგი ვაშაძემ აღნიშნა, „მშიშარა პრემიერ-მინისტრი, რომელიც ვიწრო დაჯგუფების ზურგს უკან დგას, სამშობლოს ღალატზე აგებს პასუხს“.

„ეს კანონი ყველა მისი მუხლით არის რუსული და მას შერბილება და შელამაზება არ უშველის. ამიტომ მშიშარა პრემიერ-მინისტრი, რომელიც ვიწრო დაჯგუფების ზურგს უკან დგას, ნახავთ, რომ ის სამშობლოს ღალატზე აგებს პასუხს. კონსტიტუციაზე წინ დააყენეს საკუთარი თავი. არღვევენ საქართველოს კონსტიტუციის 78-ე მუხლს ეგეც და ყველა“, – აღნიშნა ვაშაძემ.

ამ კანონზე ავაღებინოთ ხელი, შევცვალოთ ხელისუფლება, ხალხს უნდა კოალიციური მთავრობა ყველა გამოკითხვით, ხალხმა გადაწყვიტოს, როგორი ხელისუფლება უნდა, – ამის შესახებ ენმ-ს თავმჯდომარე ლევან ხაბეიშვილი აცხადებს.

ლევან ხაბეიშვილმა მოუწოდა ხელისუფლებას, არჩევნებს დაელოდოს და კანონპროექტი არ მიიღოს.

“ხელისუფლებას მოვუწოდებ, რომ არ უნდათ ეს ისტერიკა, დამშვიდნენ, დაწყარდნენ, არჩევნებს დაელოდონ და ეს კანონი გაიტანონ. მე მგონი, ძალიან მშვიდად, წყნარად გადაწყდება ყველაფერი 4-5 თვეში, რატომ არიან მგლებივით? რატომ ჭამენ ხალხს, რატომ უვარდებიან ოჯახებში? 4-5 თვე მოითმინონ.

ასევე, მინდა, ჩემს კოლეგებს, ყველას, მოვუწოდო, ერთობა არის უმნიშვნელოვანესი. დღეს ვდგავართ ისტორიის ისეთ ეტაპზე, რომ არანაირი პარტიული კუთვნილების ეს ხაზი პროქართულ და პროევროპულ, პროდასავლურ პარტიებს, ცხადია, პირველ რიგში, პროეროვნულ პარტიებს შორის, არის მორღვეული.

ამ კანონზე ავაღებინოთ ხელი, შევცვალოთ ხელისუფლება, ხალხს უნდა კოალიციური მთავრობა ყველა გამოკითხვით, ხალხმა გადაწყვიტოს როგორი ხელისუფლება უნდა.

გეგმა არის მშვიდობიანი პროტესტი მანამ, სანამ კანონი, რომელიც არ უნდა ხალხს და შემაფერხებელია ევროკავშირის გზაზე არ იქნას მიღებული,“ – აცხადებს ლევან ხაბეიშვილი.

მან პარლამენტში შესვლა სცადა, თუმცა სამართალდამცველებმა განუმარტეს, რომ, ამ ეტაპზე, ამას ვერ შეძლებს.

ზოგიერთი ევროპელის აზრი მთლიანად ეწინააღმდეგება ქართველების ინტერესებს. ივანიშვილის მხრიდან ეს იქნება მანევრი, რომლის მსგავსს ადრეც არაერთხელ მიმართავდა: ერთი ნაბიჯის უკან გადადგმა, რის შემდეგაც გაათმაგებული აგრესიით თავს დაესხმება სახელმწიფოებრიობას, – ამის შესახებ საქართველოს ყოფილი პრეზიდენტი მიხეილ სააკაშვილი სოციალურ ქსელში წერს.

ამასთან, პოსტში სააკაშვილი აღნიშნავს: „შექმნილ ვითარებაში აუცილებელია, გამოვტაცოთ ხელიდან საარჩევნო კომისია და არავითარ შემთხვევაში, არანაირი სახეცვლილი ფორმით არ დავუშვათ „რუსული კანონის“  მიღება, რომელიც არჩევნებსაც აუქმებს“.

„დიდი საფრთხის წინაშე

ახლა ჩვენ, ერთი მხრივ, გვაქვს ეროვნული სულისკვეთების ძლიერი ამოფრქვევა, მეორე მხრივ, გვყავს რუსეთისგან სრულად მართული ოლიგარქი, რომელიც არა მარტო არ აპირებს არჩევნების გზით წასვლას, რაც ყველანაირი პროგნოზით წაგებული აქვს, არამედ არჩევნები მიაჩნია გადამეტებული საფრთხის წყაროდ, რომელიც სასწრაფოდ უნდა გააუქმოს.

მას შემდეგ, რაც ისევე, როგორც ყველამ, მანაც დაინახა, რომ დაშინებამ და ძალადობამ არ გაჭრა და რომ დასავლეთიც აღარ აპირებს თამაშს ინდივიდუალური სანქციების თემით, ამასთანავე გამოიკვეთა ვიზალიბერალიზაციის გაუქმების პერსპექტივა, რაც ხალხს კიდევ უფრო გააბრაზებს და გაზრდის წინააღმდეგობის ტალღას, მან მიიღო მაშველი რგოლი რამდენიმე ევროპელი ბიუროკრატისაგან. ეს გამოიხატება იმით, რომ უნდა დაასრულონ პროცესი, პრეზიდენტის ვეტოს შემდეგ გაითვალისწინონ ვენეციის კომისიის შენიშვნები და ხელახლა მიიღონ ეს ყველასათვის მიუღებელი კანონი, რადგან მესამე მოსმენის შემდეგ არანაირი ცვლილება ვეღარ მოხდება.

ამ შემთხვევაში ზოგიერთი ევროპელის აზრი მთლიანად ეწინააღმდეგება ქართველების ინტერესებს. ხოლო ივანიშვილის მხრიდან ეს იქნება მანევრი, რომლის მსგავსს ადრეც არაერთხელ მიმართავდა: ერთი ნაბიჯის უკან გადადგმა, რის შემდეგაც გაათმაგებული აგრესიით თავს დაესხმება სახელმწიფოებრიობასა და ქვეყნის დამოუკიდებლობას. ასეთი ვირეშმაკობით ფიქრობს ის ქვეყნის სამუდამოდ ჯიბეში ჩადებას, რაც საბოლოოდ დაასრულებს საქართველოს.

შექმნილ ვითარებაში აუცილებელია, პირველ რიგში, გამოვტაცოთ ხელიდან საარჩევნო კომისია და არავითარ შემთხვევაში, არანაირი სახეცვლილი ფორმით არ დავუშვათ „რუსული კანონის“  მიღება, რომელიც ფაქტობრივად არჩევნებსაც აუქმებს“, – წერს მიხეილ სააკაშვილი.