ქართველი მეზღვაურები წლებია, გამოირჩევიან თავდადებითა და პროფესიონალიზმით. სწორედ აქედან გამომდინარეა, რომ მათ მსოფლიოს ნებისმიერ წერტილში შევხვდებით. ბათუმსა და ფოთში ჩვენ გვაქვს ორი უმაღლესი საზღვაო და რამდენიმე კერძო პროფესიული სასწავლებელი, სადაც მეზღვაურის პროფესიას ყოველწლიურად 2 000-მდე სტუდენტი ეუფლება. ქართველი მეზღვაურების ცოდნა და გამოცდილება ჩვენი ქვეყნის მომავალი და საზღვაო საქმის შემდგომი განვითარების საფუძველია, – ამის შესახებ საქართველოს ეკონომიკისა და მდგრადი განვითარების მინისტრმა, მარიამ ქვრივიშვილმა ბათუმში მეზღვაურის საერთაშორისო დღისადმი მიძღვნილ საზეიმო ღონისძიებაზე სიტყვით გამოსვლისას განაცხადა.

მარიამ ქვრივიშვილმა ქართველ მეზღვაურებს პროფესიული დღე მიულოცა და წინსვლა, კარიერული ზრდა და ქართული დროშის ქვეშ სიამაყით ცურვა უსურვა.

„საქართველო განსაკუთრებულ ისტორიულ მომენტს გადის, როდესაც სახელმწიფოს ერთ-ერთ ძირითად ინტერესად გამოცხადებულია ქვეყნის ეკონომიკური განვითარება. საქართველო წარმოადგენს შუა დერეფნის მნიშვნელოვან რგოლს, ამ დერეფნის საკვანძო ელემენტი კი საზღვაო პორტები, შესაბამისი ინფრასტრუქტურა და ამ სფეროში დასაქმებული პროფესიონალები არიან. დღევანდელი მონაცემებით, საქართველოს მეზღვაურთა სახელმწიფო რეესტრში 20 000-მდე მეზღვაურია დარეგისტრირებული. საქართველოს საკმარისი გამოცდილება და ტრადიცია გააჩნია იმისთვის, რომ ჩვენს ნავსადგურებს, ნაოსნობასა და საზღვაო საქმეს საკუთარი ძალისხმევით გავუძღვეთ, საკუთარ საჭიროებებს ჩვენვე მოვემსახუროთ და გამოცდილება საერთაშორისო ნაოსნობაშიც მივიღოთ“, – აღნიშნა ეკონომიკისა და მდგრადი განვითარების მინისტრმა.

მარიამ ქვრივიშვილმა თავის გამოსვლაში ისაუბრა მათ შორის საქართველოს, როგორც საზღვაო ქვეყნის განვითარების მიზნით მიმდინარე პროექტებზე.

როგორც ეკონომიკისა და მდგრადი განვითარების მინისტრმა აღნიშნა, ქვეყნის ოთხ ნავსადგურს უახლოეს მომავალში მეხუთე, ანაკლიის ღრმაწყლოვანი ნავსადგური შეემატება, რომელსაც უმნიშვნელოვანესი როლი ექნება საქართველოს მდგრად ეკონომიკურ განვითარებაში და მთლიანად ქვეყნის ტრანზიტულ-ლოგისტიკურ პოტენციალს გააძლიერებს.

„რაც მთავარია, თითოეულ მოქმედ, თუ მომავალ მეზღვაურს უნდა ახსოვდეს, რომ მათი საქმე, დაგროვებული ცოდნა და გამოცდილება მომავალში უნდა გავუზიაროთ ჩვენს დებსა და ძმებს აფხაზეთში. დარწმუნებული ვარ, რომ საქართველოს ეკონომიკის განვითარება და ჩვენი სამშვიდობო თანმიმდევრული პოლიტიკა აუცილებლად გამოიღებს შედეგს ამ მიმართულებით“, – განაცხადა მარიამ ქვრივიშვილმა.

მეზღვაურის საერთაშორისო დღისადმი მიძღვნილ ღონისძიებაში მონაწილეობა მიიღეს საქართველოს პრეზიდენტმა, მიხეილ ყაველაშვილმა, საქართველოს პრემიერ-მინისტრმა, ირაკლი კობახიძემ, აჭარის ავტონომიური რესპუბლიკის მთავრობის თავმჯდომარე სულხან თამაზაშვილმა, ასევე საერთაშორისო საზღვაო ორგანიზაციის გენერალურმა მდივანმა, არსენიო დომინგესმა და სხვა სტუმრებმა სახელმწიფო და კერძო სექტორებიდან.

ღონისძიების ფარგლებში ტრადიციულად მეზღვაურის ფიცის დადების, ღვაწლმოსილი მეზღვაურების და საზღვაო სფეროს სხვა წარმომადგენლების დაჯილდოების ცერემონიალი გაიმართა. ამასთან, ღონისძიების მონაწილეებმა წუთიერი დუმილით პატივი მიაგეს გარდაცვლილ მეზღვაურებს და მათ საპატივსაცემოდ ზღვაში გვირგვინი ჩაუშვეს.

პარლამენტმა რიგგარეშე სესიის პლენარულ სხდომაზე, პირველი მოსმენით, დაჩქარებული წესით განიხილა და 81 ხმით მხარი დაუჭირა „უცხოელთა და მოქალაქეობის არმქონე პირთა სამართლებრივი მდგომარეობის შესახებ“ კანონში ცვლილებას.

მომხსენებლის, იურიდიულ საკითხთა კომიტეტის თავმჯდომარის პირველი მოადგილის თორნიკე ჭეიშვილის განცხადებით, კანონპროექტით განისაზღვრება არალეგალური მიგრაციის გამოვლენის მიზნით საცხოვრებელი ან სამუშაო ადგილის, ან სხვა კერძო საკუთრების/მფლობელობის შემოწმების წესი.

„კანონს ემატება მუხლი, რომლის თანახმად, საქართველოში კანონიერი საფუძვლის გარეშე მყოფი უცხოელის გამოვლენის ან/და უცხოელის საცხოვრებელი ადგილის გადამოწმების, ან უცხოელის სამგზავრო დოკუმენტის მოძიების მიზნით, შინაგან საქმეთა სამინისტროს უფლებამოსილ ორგანოს შესაძლებლობა ექნება, შეამოწმოს უცხოელის საცხოვრებელი ან სამუშაო ადგილი, ან შევიდეს სხვაგვარ კერძო საკუთრებაში თუ მფლობელობაში რაიონული ან საქალაქო სასამართლოს მოსამართლის შესაბამისი ბრძანების საფუძველზე“, – განაცხადა თორნიკე ჭეიშვილმა.

მისივე თქმით, იმ შემთხვევაში, თუ იარსებებს გადაუდებელი აუცილებლობა და დაყოვნებამ შეიძლება, გამოიწვიოს უცხოელის მიმალვა ან უცხოელის სამგზავრო დოკუმენტის განადგურება, ან გადამალვა, ამ შემთხვევაში უკვე შინაგან საქმეთა სამინისტროს უფლებამოსილ ორგანოს უფლება ექნება, დაუყოვნებლივ დაიწყოს შესაბამისი საცხოვრებელი ან სამუშაო ადგილის, სხვა კერძო საკუთრების, მფლობელობის შემოწმება და 24 საათის განმავლობაში შესაბამისი შუამდგომლობით მიმართოს ამის თაობაზე მოსამართლეს.

ასევე, უცხოელის საცხოვრებელი ან/და სამუშაო ადგილის შემოწმების დროს პოლიცია უფლებამოსილი იქნება განახორციელოს პირის გამოკითხვა, იდენტიფიცირება, ზედაპირული შემოწმება, დათვალიერება და აგრეთვე საქართველოს კანონმდებლობით გათვალისწინებულ შემთხვევებში სხვა პრევენციული თუ იძულების ღონისძიებები მიიღოს.

ჩვენს მეზღვაურებს უმნიშვნელოვანესი წვლილი შეაქვთ საქართველოს ეკონომიკაში. რიცხვებში გამოხატული ეს წვლილი ყოველწლიურად დაახლოებით 200 მილიონ აშშ დოლარს შეადგენს, – ამის შესახებ საქართველოს პრემიერ-მინისტრმა ირაკლი კობახიძემ ბათუმში, მეზღვაურის საერთაშორისო დღისადმი მიძღვნილ ღონისძიებაზე სიტყვით გამოისვლისას განაცხადა.

როგორც პრემიერ-მინისტრმა აღნიშნა, ქართველი მეზღვაურების კეთილდღეობა, მათი ღირსეული შრომისა და ცხოვრების პირობები სახელმწიფოს მთავარი პრიორიტეტია.

„დღეს ჩვენ მეზღვაურის დღეს აღვნიშნავთ. ამ დღის აღნიშვნით ჩვენ პატივს მივაგებთ მეზღვაურთა თავდაუზოგავ შრომას და მათ უნიკალურ წვლილს საერთაშორისო ნაოსნობაში, მსოფლიო ეკონომიკასა და საზოგადოების განვითარებაში. დღეს ასევე ვიხსენებთ ყველა იმ მეზღვაურს, რომლებმაც თავიანთი სიცოცხლე საზღვაო საქმეს მიუძღვნეს. მათი ღვაწლი ჩვენი ქვეყნის საზღვაო ისტორიის საამაყო ნაწილია.

თითოეული ქართველი მეზღვაური ჩვენი ქვეყნის სიამაყეა. საქართველოს მიერ გაცემული მეზღვაურის სერტიფიკატები აღიარებულია ევროკავშირისა და მსოფლიოს 50-ზე მეტი ქვეყნის მიერ. ეს არის ქართველი მეზღვაურების პროფესიონალიზმის, შრომისმოყვარეობისა და სანდოობის აღიარება საერთაშორისო დონეზე.

ჩვენს მეზღვაურებს უმნიშვნელოვანესი წვლილი შეაქვთ საქართველოს ეკონომიკაში. რიცხვებში გამოხატული ეს წვლილი ყოველწლიურად დაახლოებით 200 მილიონ აშშ დოლარს შეადგენს. ამ წუთებშიც ათასობით ქართველი მეზღვაური საქართველოს სახელს ღირსეულად ატარებს მსოფლიოს სხვადასხვა კუთხეში.

ქართველი მეზღვაურების კეთილდღეობა, მათი ღირსეული შრომისა და ცხოვრების პირობები ჩვენი სახელმწიფოს მთავარი პრიორიტეტია. ამის დასტურია საერთაშორისო საზღვაო შრომის კონვენციასთან მიერთება, რომელიც თებერვლიდან შევიდა ძალაში და მეზღვაურთა უფლებების მთავარ გარანტიას წარმოადგენს“, – განაცხადა პრემიერმა.

თანმიმდევრული პოლიტიკის შედეგად მეზღვაურის პროფესია დღეს კიდევ უფრო დაფასებულია. სწორი, ეფექტური და შედეგზე ორიენტირებული ნაბიჯებით , დარგი გაძლიერდა და განვითარდა, – განაცხადა საქართველოს პრეზიდენტმა მიხეილ ყაველაშვილმა ბათუმში, მეზღვაურთა საერთაშორისო დღისადმი მიძღვნილ ღონისძიებაზე.

მიხეილ ყაველაშილმა ქართველ მეზღვაურებს პროფესიული დღე მიულოცა და მათ საქმიანობაში წარმატებები უსურვა.

„გილოცავთ შორეულ ნაოსნობასა და ჩვენს გვერდით მყოფ მეზღვაურებს, ამ სფეროს ვეტერანებსა და მათი ტრადიციების გამგრძელებელ მომავალ თაობას! მომავალო მეზღვაურებო, გისურვებთ წარმატებებსა და წინსვლას თქვენს პროფესიულ საქმიანობაში,“-განაცხადა პრეზიდენტმა.

მიხეილ ყაველაშვილმა თავის გამოსვლაში საქართველოს უნიკალურ გეორგაფიულ მდებარეობასა და მსოფლიო ნაოსნობაში ქვეყნის გამორჩეულ როლზე გაამახვილა ყურადღება.

საქართველოს სატრანზიტო პოტენციალის სრულად ათვისებაში საზღვაო სექტორის როლი განსაკუთრებულია. სახელმწიფო მრავალი მიმართულებით მუშაობს, რათა არსებული პოტენციალის სრულად ათვისება განხორციელდეს. მსოფლიოში მიმდინარე კონფლიქტებისა და დაპირისპირებების ფონზე, საქართველომ მოახერხა უწყვეტი მშვიდობისა და სტაბილურობის შენარჩუნება, რაც ჩვენს ქვეყანას სანდო და საიმედო პარტნიორად აქცევს. ხელისუფლების ფრთხილი და გონივრული პოლიტიკით, ჩვენ გვაქვს შესაძლებლობა გავხდეთ ევროპისა და აზიის ყველაზე მოკლე და უსაფრთხო დამაკავშირებელი გზის ნაწილი. დავიბრუნოთ ჩვენი ისტორიული როლი, რომელიც თითოეული ქართველისთვის „აბრეშუმის გზის“ სახელით არის ცნობილი“, – აღნიშნა მიხეილ ყაველაშვილმა.

სიტყვით გამოსვლისას საქართველოს პრეზიდენტმა განაცხადა, რომ ქართული, საზღვაო-საგანმანათლებლო სისტემის მაღალი დონე, კვალიფიციური და პროფესიონალი კადრების მომზადების შესაძლებლობას იძლევა. ამას კი ქვეყანაში საზღვაო პროფესიაზე მოთხოვნის ყოველწლიური ზრდაც მოწმობს – ამჟამად საქართველოში 19000-ზე მეტი მოქმედი მეზღვაურია.

„მეზღვაურობა მთელ მსოფლიოში საპატიო და საამაყო პროფესიაა, რომელიც ნებისყოფას, დისციპლინას და სიმტკიცეს მოითხოვს. საქართველო ყოველთვის იყო გამორჩეული ზღვაოსნების სამშობლო, რასაც ქართული ზღვაოსნობის უდიდესი ტრადიცია უდევს საფუძვლად“, – განაცხადა პრეზიდენტმა.

მიხეილ ყაველაშვილმა აღნიშნა, რომ მეზღვაურის პროფესია ბევრ გამოწვევასთან და რისკებთან არის დაკავშირებული, რასაც განსაკუთრებული გამბედაობა სჭირდება. მან სამსახურებრივი მოვალეობის შესრულების დროს დაღუპული მეზღვაურების ხსოვნას პატივი მიაგო.

მიმართვის დასასრულს, საქართველოს პრეზიდენტმა ქართველ მეზღვაურებს ქვეყნისა და პროფესიის ერთგულებისათვის, მაღალი პასუხისმგებლობისა და ღირსეული სამსახურისათვის მადლობა გადაუხადა.

დარწმუნებით შემიძლია გითხრათ, რომ ეს ადამიანები თავისით არაფერს არ წყვეტენ, – განაცხადა პარლამენტის თავმჯდომარის მოადგილე ნინო წილოსანმა ოპოზიციის იმ ნაწილზე საუბრისას, რომლებიც თვითმმართველობის არჩევნებში აპირებენ მონაწილეობის მიღებას.

„მაგალითად გიორგი გახარიას შემთხვევაში ის სანამ პრემიერ-მინისტრობიდან გადადგებოდა, ფაქტობრივად თავისი რეიტინგის პიკში იმყოფებოდა და არაფერს არ შეეძლო, რომ ასეთი სულელური ნაბიჯის გადადგმა ეიძულებინა, თუ არა გარედან წამოსულ დავალებას. იდენტურად ლელოს ლიდერებზე.

ფაქტია, რომ ეს ადამიანები სანამ საკუთარ დანაშაულებზე რაღაც საქმე არ იქნა გახსნილი, იქამდე მათთვის ყველაფერი კარგად ხდებოდა „ქართული ოცნების“ ხელისუფლების პირობებში. ერთ შემთხვევაში გარედან მიღებული ბრძანებებით მოქმედებენ, ამავე შემთხვევაში პირადი ამბიციებით. ორივე შემთხვევაში ამ პოლიტიკოსებს არ გააჩნიათ არც ქვეყნის სიყვარული, არც საკუთარი ამომრჩევლის სიყვარული. ერთადერთი რითაც ხელმძღვანელობენ ეს არის მანკიერი ფაქტორი.

ამ შემთხვევაშიც ერთადერთი მოტივაცია არის, რომ ან გარედან მოუწოდეს და ასეთი როლი მისცეს რომ ეთამაშათ, ან პირადი ამბიცია ამოძრავებთ. „ლელოს“, გახარიას და სხვებს განსაკუთრებით ნეგატიური როლი აქვთ ამ მთლიან სცენარში. ამას ძალიან კარგად გრძნობს ხალხი და ზუსტად იმიტომ ვერ ახდენენ იმ დიდ მავნებლობებს, რომლისთვისაც ქვეყნის შიგნით და ქვეყნის გარეთ უდიდესი რესურსი იხარჯება.

ეს არის ძალიან კარგად ამუშავებული მანქანა, რომელიც სამწუხაროდ გლობალური პოლიტიკური გავლენების შესაბამისად ხორციელდება და როდესაც ჩვენ ვსაუბრობთ „გლობალური ომის პარტიაზე“, აქ მხოლოდ ომზე არ არის საუბარი, ეს არის ომი, რომელიც აღწერს ქვეყნებში, მათ შორის ურთიერთობებში და ხალხში ნეგატიური პროცესების დაინიციირებას. ზუსტად ეს არის იმ გლობალური ომის პარტიის და ამ პარტიაზე მომსახურე ადამიანების შინაარსი“, – აღნიშნა ნინო წილოსანმა.

პარტია „ხალხის ძალის“ აღმასრულებელი მდივანი გურამ მაჭარაშვილი პარლამენტის მიერ პირველი მოსმენით მიღებულ „შრომითი მიგრაციის შესახებ“ კანონში განსახორციელებელ ცვლილებებს მედიასთან საუბარში გამოეხმაურა.

დეპუტატის თქმით, საქართველოს განსაკუთრებით სჭირდება მიგრაციის შესახებ გამკაცრებული კანონმდებლობა, რადგან ქვეყანას არ იცავს საერთაშორისო ქოლგა – ევროკავშირის და ნატოს სახით.

„მიუხედავად იმისა, რომ ევროპულ ქვეყნებში საკმაოდ მკაცრი რეგულაციები არსებობდა მიგრაციასთან დაკავშირებით, მაინც მოახდინეს ამ რეგულაციების გამკაცრება.

საქართველოს შემთხვევაში, როცა ქვეყანას არ იცავს არცერთი საერთაშორისო ქოლგა, არც ევროკავშირის და ნატოს სახით, ვცხოვრობთ გამოწვევებით სავსე რეგიონში ბუნებრივია, რომ გვჭირდება მიგრაციის შესახებ მკაცრი რეგულაციები. სახელმწიფო უნდა ფლობდეს ინფორმაციას იმის შესახებ, თუ რას საქმიანობს უცხოელი მოქალაქე, რომელიც იმყოფება ქვეყანაში.
ქვეყანაში უსაფრთხოების ნორმები დაცული უნდა იყოს. შეგახსენებთ, რომ დაკავებულია რადიკალური აქციების მონაწილე არაერთი უცხოეთის მოქალაქე, რომლებიც ძალადობრივ ქმედებებში იღებდნენ მონაწილეობას. არსებობს ინფორმაცია, რომ აქციებში მონაწილე უცხო ქვეყნის მოქალაქეები, არათუ მონაწილეობდნენ რადიკალურ აქციებში, არამედ ამ აქციებს აორგანიზებდნენ კიდეც.

აბსოლუტურად ლოგიკურია, სახელმწიფო ინსტიტუტები უნდა ფლობდნენ ინფორმაციას თუ რომელი ქვეყნის რომელი მოქალაქე რას საქმიანობს საქართველოში და აქვს თუ არა მას კანონმდებლობის საფუძველზე ქვეყანაში ყოფნის უფლება“, – განაცხადა გურამ მაჭარაშვილმა.