გერმანიის ელჩის განცხადებები უსუსურია იმ რეალობასთან შედარებით, რაც მსოფლიოში მართლაც არსებობს, – ასე აფასებს პარლამენტის თავმჯდომარის პირველი მოადგილე გიორგი ვოლსკი საქართველოში გერმანიის ელჩის, პეტერ ფიშერის განცხადებას.

„ეს არ არის მხოლოდ დაპირისპირება ორ შეხედულებას შორის, ეს არის გარკვეული პოზიცია, პოლიტიკა, რომელსაც დემაგოგიურად ცდილობენ ზოგიერთნი, მათ შორის გერმანიის ელჩი, თავს მოახვიონ იმ საზოგადოებას, რომელიც უნდათ, რომ ქუჩაში იდგეს და დაპირისპირებაში მონაწილეობდეს“, – აღნიშნა გიორგი ვოლსკიმ.

გერმანიის ელჩმა პეტერ ფიშერმა ერთ-ერთ მედია საშუალებასთან თქვა, რომ „დიფ სთეითი“ არ არსებობს და ეს გამოგონილია.

გვახსოვს ჰერჩინსკის არაერთი განცხადება, როდესაც არა თუ ერეოდა ქვეყნის შიდა საქმეებში, არამედ საზოგადოებას რადიკალური ოპოზიციის მხარდაჭერას სთავაზობდა, – ამის შესახებ საპარლამენტო უმრავლესობის წევრმა, დავით მათიკაშვილმა განაცხადა.

მისივე თქმით, საზოგადოებისთვის უკვე გასაგებია, თუ რამდენად დაცილებულია ევრობიუროკრატების პოზიცია, რეალურ ევროპულ ღირებულებებთან.

„ჩვენ ყველას ძალიან კარგად გვახსოვს ჰერჩინსკის არაერთი განცხადება როდესაც ის არა თუ ერეოდა ქვეყნის შიდა საქმეებში, არამედ პირდაპირ, რადიკალურ ოპოზიციას და საზოგადოებას ურთიერთთანამშრომლობას, საზოგადოებას რადიკალების მხარდაჭერას სთავაზობდა. ისეთ პოზიციაზე დგომას სთავაზობდა, რომელიც ხაზგასმით მიუთითებს ჰერჩინსკის და სხვა ევროპელი ბიუროკრატების სურვილს, ჩაერიონ საქართველოს შიდა საქმეებში. ეს შეცვლილი პოზიცია ქართველი ხალხის მიმართ ორმაგ სტანდარტზე მეტყველებს. მეტყველებს ევროპელი ბიუროკრატების დღის წესრიგსა და მათ სურვილზე, საზოგადოება შეცდომაში შეიყვანონ.

ორკვირიანი მზადების, პროპაგანდისტული მანქანის სრულად ამოქმედების მიუხედავად, ვერ შეძლეს 2 000 კაცზე მეტის შეკრება. საზოგადოებისთვის უკვე სრულად გასაგებია, თუ რამდენად დაცილებულია ევრობიუროკრატების პოზიცია, რეალურ ევროპულ ღირებულებებთან, ამიტომაც მოხდა ის, რაც მოხდა. რეალურად მათ 2 000 კაცზე მეტი ვერ შეკრიბეს და ჰერჩინსკიმ ვერ შეძლო კიდევ ერთხელ ჩვენი საზოგადოების შეცდომაში შეყვანა“, – აღნიშნა მათიკაშვილმა.

როგორც მათიკაშვილი აღნიშნავს სხვადასხვა ქვეყნის ელჩების სასამართლო პროცესებზე დასწრება სხვა არაფერი იყო, თუ არა საქართველოს შიდა საქმეებში ჩარევა.

„გვახსოვს, მაგალითად კონკრეტულ სისხლის სამართლის საქმეებზე ჰერჩინსკის განცხადებები, როდესაც ის კონკრეტულ ბრალდებულ პირებს, იქნება ეს მზია ამაღლობელი თუ სხვა, ის აცხადებდა მის სურვილებს და არა იმ რეალობას რაც საქართველოსვე არის და საზოგადოებამ იცის.

ჩვენ ძალიან კარგად გვახსოვს, დამნაშავე მიხეილ სააკაშვილთან მიმართებით ჰერჩინსკის და სხვა ევრობიუროკრატების პოზიცია, როდესაც ქმნიდნენ მოცემულობას თითქოს სააკაშვილს პენიტენციურ დაწესებულებაში, ვინმე აწამებს, არაადამიანურ პირობებს უქმნის. სინამდვილეში აბსოლუტურად საპირისპიროა და ეს საზოგადოებამ კარგად იცის. ჩვენ გვახსოვს, სასამართლო სხდომებზე, კონკრეტული ჩინოსნების, ელჩების დასწრება, რომელიც რა არის სხვა თუ არა ქვეყნის შიდა საქმეებში ჩარევა. ეს საზოგადოებას ძალიან კარგად ახსოვს“, – განაცხადა მათიკაშვილმა.

განცხადება, რომელიც დღეს სამწუხაროდ, კიდევ ერთხელ მოვისმინეთ საქართველოში ევროკავშირის ელჩის მხრიდან, კიდევ ერთხელ გვაჩვენებს იმას, რომ ევროკავშირში გაერთიანება, წევრობა, კანდიდატის სტატუსი, ისტორია, რომელიც გვახსოვს, მოგცემ-არ მოგცემ, მოლაპარაკებებს გავხსნი-არ გავხსნი, არის ქართველი ხალხის საშანტაჟოდ გამოყენებული, რომ იქნებ, როგორმე ძალადობრივი გზით დაამხონ ხელისუფლება ქართველებმა, – განაცხადა პარლამენტის გარემოს დაცვისა და ბუნებრივი რესურსების კომიტეტის თავმჯდომარემ, მაია ბითაძემ საქართველოს პირველი არხის გადაცემაში „აქტუალური თემა მაკა ცინცაძესთან ერთად“ სტუმრობისას.

„ვერ გაიგეს ევროპის დედაქალაქებში, რომ ეს ასე აღარასდროს აღარ მოხდება ამ ქვეყანაში”, – განაცხადა ბითაძემ.

მისი თქმით, ურთიერთობები, რომელიც საქართველოს ხელისუფლებას აქვს ევროკავშირის სახელმწიფოებთან და სხვა ევროპულ სახელმწიფოებთან, რომლებიც არ არიან ევროკავშირის წევრები, ასევე საერთაშორისო ორგანიზაციებთან, რომლის წევრი სახელმწიფოები არიან იგივე სახელმწიფოები, რომლებიც ევროკავშირში არიან გაერთიანებული, მართალია, არ არის ისეთი ინტენსიური, როგორიც უნდა იყოს იმ სახელმწიფოსთვის, რომელსაც კანდიდატის სტატუსი აქვს მინიჭებული, თუმცა პროცესი მუშა რეჟიმშია და მიმდინარეობს უწყვეტად.

„ჩვენ გვინახავს არაერთი ვიზიტი, როგორც აღმასრულებელი, ისე საკანონმდებლო ხელისუფლების დონეზე, რომელიც გაიმართა სხვადასხვა სახელმწიფოში, მათ შორის, ევროკავშირის წევრ სახელმწიფოებში და საერთაშორისო ორგანიზაციებში. მათ შორის, იყო მაღალი დონის ვიზიტები, სადაც ჩვენ მუშა პროცესში განვიხილავდით მათ შორის, იმ გამოწვევებს, რომელიც სხვათა შორის, ევროკავშირის აქაური წარმომადგენლობის დახმარებით შეიქმნა დღევანდელი მოცემულობით, ერთი მარტივი მიზეზის გამო, რომ საქართველოს მთავრობამ, „ქართულმა ოცნებამ” არ შეასრულა ის პირდაპირი დავალებები, რომლის შედეგებს ჩვენ უკვე კარგად ვხედავთ, რა შეიძლებოდა, ყოფილიყო. ჩვენ დღეს იმაზე მკაფიოდ ვხედავთ, რა სავალალო შედეგები შეიძლებოდა, დამდგარიყო საქართველოსთვის, თუ ჩვენ ყველა იმ დავალებას გავითვალისწინებდით, რა ინდიკაციებსაც გვაძლევდნენ ევროპული დედაქალაქებიდან, თუ ავიღებთ უკრაინის მაგალითს, უკრაინის, რომელიც პრაქტიკულად, განწირული და მიტოვებულია ამ ძალიან დიდ და საშიშ ძალასთან, რასაც რუსეთი ჰქვია. დღესაც მოვისმინეთ ჩვენ ნატო-ს გენერალური მდივნის განცხადება იმასთან დაკავშირებით, რომ უკრაინა რომ ამ დიდ ომშია ჩართული, ეს არ არის იმის გარანტია, რომ უკრაინა ნატო-ს წევრი გახდება”, – განაცხადა ბითაძემ.

როგორც ბითაძემ აღნიშნა, საქართველოს მოსახლეობამ ძალიან კარგად გაითავისა, რომ 21-ე საუკუნის ამ ტურბულენტურ გარემოში უმთავრესი არის ეროვნული ინტერესები.

„იმიტომ, რომ ამ პლანეტაზე დიდი სახელმწიფოების ჭიდილის ფონზე ძალიან მნიშვნელოვანია, ჩვენ შევინარჩუნოთ არათუ ჩვენი იდენტობა, ისტორია და რელიგია, არამედ აქ არის გადარჩენაზე საუბარი. საქართველო არის ქვეყანა, რომლის ტერიტორიის 20% ოკუპირებულია რუსეთის მხრიდან და, რომელიც გარშემორტყმულია ისეთი სახელმწიფოებით, სადაც ომები მიმდინარეობს, ან გაყინული ომებია და ამ სიტუაციაში საქართველო ვითარდება. ეკონომიკური განვითარების ისეთი მაჩვენებელი გვაქვს, როგორიც პრაქტიკულად, არასდროს არ გვქონია. შესაბამისად, მე მგონი, ვერავინ ვერ გაიგო, ბოლომდე ვერ აღიქვეს, რომ საქართველოს მოსახლეობა არ დაექვემდებარება ძალიან მარტივად ამ შანტაჟს. ევროკავშირში წევრობა საქართველოს მოსახლეობას იმიტომ არ უნდა, რომ საიდანღაც იმართოს. საქართველოს მოქალაქისთვის არანაირი მნიშვნელობა არ აქვს, საიდან მიიღებს დირექტივას, ბრიუსელიდან, მოსკოვიდან, თუ ნებისმიერი სხვა დედაქალაქიდან. ასე რომ, ერთადერთი გზა, რომელიც შესაძლებელია, ჩვენ მიერ იქნას განხილული იმისთვის, რომ გადაიტვირთოს ურთიერთობები ევროკავშირთან, არის გზა მეგობრული და თანასწორი დამოკიდებულება ჩვენი ერის მიმართ. ეს მათ შორის, საქართველოში ევროკავშირის წარმომადგენლობამ ყველაზე კარგად უნდა იცოდეს, რადგან ისინი აქ არიან და ძალიან კარგად გრძნობენ ატმოსფეროს, რომელიც ქვეყანაშია. ყველაზე სამწუხარო არის ის, რომ ევროკავშირის ელჩმა იცის ყველაზე კარგად, თუ რა ძალისხმევა გაიღო „ქართულმა ოცნებამ” იმისთვის, რომ მიეღო ყველა ის წარმატება ევროკავშირთან ინტეგრაციის გზაზე, რაც აქამდე მივიღეთ”, – განაცხადა ბითაძემ.

პარლამენტის გარემოს დაცვისა და ბუნებრივი რესურსების კომიტეტის თავმჯდომარემ ასევე განაცხადა, რომ მთელი ეს პროცესი, რაც აქამდე მიმდინარეობდა, იყო ერთადერთი მიზნისთვის შექმნილი და წარმოებული, რომ ძალადობრივი გზით დაემხოთ ხელისუფლება.

„ამ მიზანს ვერ მიაღწიეს და ახლაც რაღაც ჰიბრიდული ფორმები, გამოგონილი მასკარადები და სცენები არჩევნების ტელეფონით ჩატარებასთან დაკავშირებით და ა.შ, მიმართულია იმისკენ, რომ დასასრულს ვერ პოულობენ საკუთარი ქმედებებისთვის და ჩარჩენილი არიან იმ გეგმაში, რომელიც თავიდან წამოიწყეს. პრაქტიკულად, ჩვენი რადიკალური ოპოზიცია, თავისი დამკვეთებიანად, თვითონვე გაება იმ თავის მახეში, რომლის დაგებასაც საქართველოს მოსახლეობისთვის აპირებდნენ”, – განაცხადა ბითაძემ.

მაკა ცინცაძის შეკითხვაზე, რა პოლიტიკური ძალა აქვს მეგობარი აქტის მიღებას, რომელიც ჯო უილსონის მიერ იქნა ინიცირებული, რასაც ოპოზიციაში დიდი ზეიმი მოჰყვა და ითქვა, რომ ამით ამერიკამ ქართველ ხალხს გიორგობა მიულოცა, მაია ბითაძემ განაცხადა, რომ ჯო უილსონი არ წარმოადგენს აშშ-ის ადმინისტრაციის პოზიციას და ის არის ადამიანი, რომელიც პრაქტიკულად, მონაწილე იყო საქართველოში გადატრიალების მოხდენის მცდელობის, დღევანდელ ადმინისტრაციასა და ბაიდენის ადმინისტრაციას შორის განსხვავება არის ძალიან მარტივად დასანახი და ე.წ. მეგობარი აქტი, რომელიც „სინამდვილეში არამეგობრული აქტია, არის იმ ძველი პროცესის გაგრძელების კუდი, ის უკვე დაწერილი იყო ბაიდენის ადმინისტრაციის დროს და პროცედურულად გაგრძელდა მისი განხილვა.“

„მესმის, რომ მხარდაჭერა მიიღო, მაგრამ მთავარი აქ არის ის, რომ ამ აქტს საბოლოო ჯამში, კიდევ სჭირდება განხილვა მეორე პალატაში და ასევე სჭირდება პრეზიდენტის ხელმოწერა, რომელსაც დარწმუნებული ვართ, ეს აქტი ვერასდროს ვერ ნახავს”, – განაცხადა მაია ბითაძემ.

„ძალა ერთობაშია, „ძალა ევროპაშია“ – ამ ლოზუნგით მეტროსადგურ „ავლაბრიდან“ ევროპის დღისადმი მიძღვნილი მარში დაიძრა.

ისინი აღნიშნული ლოკაციიდან ევროპის მოედნისკენ მიემართებიან. მსვლელობა-მარშში ასევე მონაწილეობენ საპროტესტო აქციების ფარგლებში დაკავებულთა ოჯახის წევრები და „კოალიცია ცვლილებისთვის“ წევრები.

აქციის მონაწილეებს სხვადასხვა შინაარსის ბანერები აქვთ გაშლი. მათ დაკავებულთა ფოტოსურათები უჭირავთ წარწერით – „თავისუფლება რეჟიმის ტყვეებს“.

მსვლელობის მონაწილეები პერიოდულად სკანდირებენ – „ცეცხლი ოლიგარქიას“.