ამერიკის შეერთებული შტატების სახელმწიფო დეპარტამენტმა საქართველოს 20 მოქალაქეს, მათ შორის, მინისტრებს, პარლამენტარებს, სამართალდამცავი და უსაფრთხოების სამსახურების წარმომადგენლებს სავიზო შეზღუდვები დაუწესა. ამის შესახებ განცხადება სახელმწიფო დეპარტამენტმა ოფიციალურ ვებგვერდზე გამოაქვეყნა.

“შეერთებული შტატები მკაცრად გმობს ძალადობას საქართველოს მოქალაქეების მიმართ, მათ შორის მომიტინგეების, მედიის წარმომადგენლების, უფლებადამცველების და ოპოზიციის მოღვაწეების.

მაღალი თანამდებობის პირები, რომლებიც პასუხისმგებლები არიან დემოკრატიისთვის ძირის გამოთხრაში, სავიზო შეზღუდვებს დაექვემდებარებიან”, – ვკითხულობთ განცხადებაში.

შეგახსენებთ, რომ შტატების გადაწყვეტილებით სანქცია უკვე შეეხეო “ქართულ ოცნებასთან” დაკავშირებულ 100-ზე მეტ პირს და მათ ოჯახის წევრებს.

“მთავარი არხის“ ერთ-ერთი დირექტორი გიორგი ქურდაძე განცხადებას ავრცელებს.

განცხადებაში ქურდაძე აღნიშნავს, რომ „ყველა ტყუილს“ უპასუხებს შესაბამისი დოკუმენტებით.

„დღეს და გუშინ “მთავარი არხის” დირექტორი გიორგი გაბუნია და არხის იურისტი დიმიტრი საძაგლიშვილი აცხადებენ, რომ თურმე მე ხელს ვუშლი დაზღვევის თანხის გადახდას ამ კრიტიკულად მნიშვნელოვან დროს.

და სწორედ, დღეს მივიღე მეილით პსპ-ს დაზღვევისგან წერილი, რომ “მთავარ არხს” არ გადაუხდია დაზღვევის თანხა 2020 წლიდან და დავალიანება დაგროვილია 818,921.50 ლარი (რვა ასი ათასი ლარი).

საერთოდ, რას ემსახურებოდა ან ვის ინტერესებში იყო გუშინდელი აბსურდული გამოსვლა გიორგი გაბუნიასი და დღეს მოსული წერილი, თქვენ გასაზღვრეთ.

ყველა ტყუილზე ვუპასუხებ შესაბამისი დოკუმენტებით, რასაც ასე ურცხვად ტირაჟირებენ.

დაზღვევის თანხას არ უხდიდა სადაზღვევო კომპანიას ჯერ ნიკა გვარამია 2020 წლიდან და მერე გიორგი გაბუნია დღემდე. მე რა შუაში ვარ!”, – აღნიშნავს გიორგი ქურდაძე განცხადებაში.

არის ზრდადი ალბათობა, რომ მსხვერპლი მოჰყვეს ხელისუფლების უგუნურ და აბსოლუტურად ძალადობრივ ქმედებას, – ამის შესახებ „საქართველოს სტრატეგიული ანალიზის ცენტრის“ დამფუძნებელმა, ნოდარ ხარშილაძემ ერთ-ერთი მედიის ეთერში განაცხადა.

ხარშილაძეს ჟურნალისტმა კითხვა დაუსვა, „სადამდე შეიძლება მივიდეთ, თუ კრიზისის განმუხტვაზე ფიქრი არ დაიწყო იმან, ვისაც შესაბამისი პასუხისმგებლობა აკისრია. ამაზე უფრო ღრმა ფაზა თუ არის და ამაზე უფრო ღრმა ფაზას უკვე რაღა ჰქვია?“.

„ამაზე ღრმა ფაზა არის და, სამწუხაროდ, მისვლადია – ყველაფერს თავისი სახელი უნდა დავარქვათ, იმისი ზრდადი ალბათობა არის, რომ მსხვერპლი მოჰყვეს ამ ყველაფერს, ხელისუფლების უგუნურ და აბსოლუტურად ძალადობრივ ქმედებას და ჩვენ, შესაძლოა, მივიდეთ სამოქალაქო დაპირისპირებამდე. პირდაპირი სახელი დავარქვათ, სამოქალაქო ომის შესაძლებლობაც განხილვადია, ეს თუ ასე გაგრძელდა“, – განაცხადა ნოდარ ხარშილაძემ.

მედიის წარმომადგენელმა ნოდარ ხარშილაძეს ასევე მიმართა: „შესაძლოა, მივიდეთ მდგომარეობამდე, როცა „ქართულ ოცნებას“ შეიძლება, პროცესების მართვა გაუჭირდეს და გახდეს უმართავი?“, რაზეც ხარშილაძემ აღნიშნა:

„კი. მასში არსებული რადიკალური ძალები უკვე თვითონ აიღებენ თავის თავზე რაღაცებს. იქ არის უფრო რადიკალური, ნაკლებად რადიკალური, თუმცა ნორმალური იქ არავინ დარჩა. ასეთი პროცესები თუ მოჰყვა და მსხვერპლი, რა თქმა უნდა, ხალხიც არ იქნება ტყუილად. ძალიან ცუდ სცენარზე ვსაუბრობთ, მაგრამ ამის შესაძლებლობა, სამწუხაროდ, არსებობს. ამაზე პასუხისმგებლობა ეკისრება „ქართულ ოცნებას“, რადგან ის არის დღეს ხელისუფლებაში და მისი გადაწყვეტილების გამოა, რომ დღეს ყველას გვიწევს რუსთაველზე დგომა და, პრაქტიკულად, მორიგეობა ჩვენი ქვეყნის დასაცავად“.

გერმანიის ბუნდესტაგის საგარეო საქმეთა კომიტეტის თავმჯდომარე მიხაელ როთი „ქართული ოცნების“ საპატიო თავმჯდომარეს, ბიძინა ივანიშვილსა და საფრანგეთის პრეზიდენტ ემანუელ მაკრონს შორის სატელეფონო საუბარს გამოეხმაურა.

„მაკრონის საუბარი ოლიგარქ ივანიშვილთან აშკარად უშედეგოდ დასრულდა. ცვლილებისთვის ევროპელ ლიდერს შეეძლო, პროევროპელ ქართველებს სტუმრებოდა სოლიდარობისა და მხარდაჭერის გამოსახატავად. ყველას ყურადღება საქართველოსკენაა“, – წერს მიხაელ როთი სოციალურ ქსელ X-ში.

საფრანგეთის პრეზიდენტის ინიციატივით, „ქართული ოცნების“ საპატიო თავმჯდომარეს, ბიძინა ივანიშვილსა და ემანუელ მაკრონს შორის სატელეფონო საუბარი შედგა. „ქართული ოცნების“ ცნობით, მაკრონმა სურვილი გამოთქვა, ვითარების სრულად განმუხტვაში თავისი წვლილი შეიტანოს. ბიძინა ივანიშვილთან ემანუელ მაკრონის სატელეფონო საუბრის შესახებ ინფორმაცია გაავრცელა ელისეის სასახლემაც.

მინდა, გავიმეორო სრული მხარდაჭერა საქართველოს ევროპული გზისა და დემოკრატიის დამცველებისადმი და გამოგვხატო ღრმა შეშფოთება, რომელიც გავქვს ახალგაზრდების რეპრესიებისადმი, მთავრობის მეთაურის შემაშფოთებელი განცხადბებისადმი და არსებითად ევროპული გზის ღალატისადმი, – ამის შესახებ განცხადება საფრანგეთის პრეზიდენტმა, ემანუელ მაკრონმა პოლონეთის პრემიერ-მინისტრ დონლად ტუსკთან გამართულ ერთობლივ პრესკონფერენციაზე გააკეთა.

მაკრონმა ისაუბრა რუსეთის მხრიდან ევროპაში საარჩევნო პროცესზე განხორციელებულ ჰიბრიდულ თავდასხმებზე. ამის მაგალითად საფრანგეთის პრეზიდენტმა მოიყვანა საქართველო, მოდლოვა და რუმინეთი.

„საქართველო გახდა მკაფიო თავდასხმის, მანიპულაციების მსხვერპლი. მე მინდა, გავიმეორო ჩვენი სრული მხარდაჭერა საქართველოს ევროპული გზისა და დემოკრატიის დამცველებისადმი და გამოვხატო ღრმა შეშფოთება, რომელიც გავქვს ახალგაზრდების რეპრესიებისადმი, მთავრობის მეთაურის შემაშფოთებელი განცხადებებისადმი და არსებითად ევროპული გზის ღალატისადმი, რაც არჩევნების შემდეგ მაშინვე მოხდა და ფუნდამენტურად, სრულად ეწინააღმდეგება იმას, რაც უთხრეს ამომრჩევლებს კამპანიის დროს“, – განაცხადა ემანუელ მაკრონმა.

ვერაფრით დავამშვიდებ მათ, ვინც ჩემი შეხვედრებით ღელავს – მათ მოუწევთ იმის ყურება, რომ საგარეო საქმეთა სამინისტრო და მინისტრი იმუშავებს. ყველაფერს გააკეთებს იმისთვის, რომ სახელმწიფოს ინტერესები დაიცვას და ეს არის ჩემი პირველი საქმე – კომუნიკაცია და კონტაქტი ჩვენს პარტნიორებთან, – განაცხადა დღის ქრონიკაში“ ჩართვისას საქართველოს საგარეო საქმეთა მინისტრმა, მაკა ბოჭორიშვილმა.

მისივე თქმით, მას კომუნიკაცია და კონტაქტი ექნება მათთან, ვინც საქართველოში მუშაობს და მათთან, ვინც საქართველოს საკითხზე მუშაობს და ასევე, ვისაც სურს, რომ ურთიერთობები ჰქონდეს საქართველოსთან.

„ეს არის ჩემი პირველი საქმე, რომ ეს გავაკეთო და მათ მოუწევთ ამის ყურება. ნუ, აღშფოთდნენ! რა გავაკეთოთ?! ჩვენ ვერ გავაჩერებთ მუშაობას და ნამდვილად ვერ დავდგებით მათ დღის წესრიგში. მათი დღის წესრიგი არის ის, რომ საქართველო არ უნდა იყოს სახელმწიფო. საქართველოს არ უნდა ჰქონდეს ინსტიტუტები და არ უნდა დაიცვას საკუთარი ინტერესები. საქართველომ უნდა იაროს სხვის ჭკუაზე და აკეთოს ის, რაც სხვას უნდა. სამწუხარო, მე მათ დღის წესრიგს ვერ გავიზიარებ და მოუწევთ, სხვა დღის წესრიგს უყურონ“, – განაცხადა ბოჭორიშვილმა.

მან ასევე კომენტარი გააკეთა ევროკავშირის ელჩის, პაველ ჰერჩინსკის განცხადებაზე, რომ დიპლომატიური საუბარი არ გულისხმობს აღიარებას ან არ აღიარებას. ამასთან, ბოჭორიშვილმა ელჩის მიმართ, მასთან შეხვედრის გამო, სოციალურ ქსელში გაკეთებული განცხადებებიც შეაფასა.

„წარმოუდგენელ დღეში ჩააგდეს ეს ადამიანი, რომელიც მოვიდა (სამინისტროში). მისი ვალია ასევე, ჰქონდეს ურთიერთობა საქართველოს ხელისუფლების წარმომადგენლებთან. მოვიდა შეხვედრაზე და ჩვენ საუბარი გვქონდა, საქართველოსა და ევროკავშირის ურთიერთობებზე. კარგ მდგომარეობაშია, თუ ცუდ მდგომარეობაშია ეს ურთიერთობები, ჩვენ უნდა ვისაუბროთ. ეს არის მისი ვალიც და ჩემი ვალიც. წარმოუდგენელია, რომ მან ასეთი კრიტიკა მიიღო არა მარტო ოპოზიციის, არამედ უცხო ქვეყნის წარმომადგენლების მხრიდანაც, რომლებიც სოციალურ ქსელებში მას საოცრად აკრიტიკებდნენ.

კიდევ ერთხელ, ყველას მოუწევს რაღაცნაირად უყუროს იმას, რომ საქართველო ეცდება საკუთარი ინტერესების დაცვას და საქართველოს ექნება ურთიერთობები პარტნიორებთან. იქნება ეს ელჩის სახით წარმოდგენილი, საგარეო საქმეთა მინისტრებით, თუ სხვა ოფიციალური პირებით წარმოდგენილი. ეს დიალოგი ჩვენ გვჭირდება, მათაც სჭირდებათ და რა თქმა უნდა, ჩვენ გავაკეთებთ ჩვენს საქმეს“, – განაცხადა ბოჭორიშვილმა.

საქართველოს საკითხი აქტიურად დგას საერთაშორისო დღის წესრიგში და მის მიმართ ინტერესი დიდია, განაცხადა „დღის ქრონიკაში“ საქართველოს საგარეო საქმეთა მინისტრმა მაკა ბოჭორიშვილმა ივანიშვილი-მაკრონის სატელეფონო საუბრის საკითხის კომენტირებისას.

„ზოგადად ვხედავთ, რომ განსაკუთრებული ინტერესი არსებობს საქართველოსთან მიმართებაში და სწორედ ამიტომაც ხდება, რომ საქართველო არის ძალიან ხშირად საერთაშორისო დღის წესრიგში. რა ფორმით და როგორ, ეს მეორე საკითხია, თუმცა ჩვენ ვხედავთ, რომ საქართველოს საკითხი ნამდვილად აქტიურად დგას საერთაშორისო დღის წესრიგში. ეს ზარიც, რა თქმა უნდა, გამოხატავს ინტერესს იმასთან დაკავშირებით, თუ რა ხდება საქართველოში, მაგრამ მეორე მხრივ, ისიც უნდა ითქვას, რომ ეს შეფასებები, თუ ეს განცხადებები, რომლებიც კეთდება საქართველოსთან დაკავშირებით უნდა ხდებოდეს გარკვეულწილად ობიექტური შეფასებების საფუძველზე“, – განაცხადა ბოჭორიშვილმა.

მისი თქმით, მაშინ, როდესაც ვიღაც აკეთებს ისეთ დასკვნას, რომ საქართველომ გადაუხვია ევროპული გზიდან, წარმოუდგენელია არ მოისმინო ხელისუფლების პოზიცია და არ გაარკვიო რას აკეთებს ამ ქვეყნის ხელისუფლება იმისათვის, რომ სწორედ ევროკავშირში ინტეგრაციის გზაზე იდგეს ქვეყანა და სწორედ იქით გააგრძელოს სვლა.

„რა თქმა უნდა, ბევრ კითხვებს აჩენს ერთგვარი შეფასებების გაკეთების მიზნობრიობა. რას ემსახურება, ვის მიზანს და რა მიზანს ემსახურება საქართველოს ამგვარი შეფასებები. ჩვენ აქ თითო-ოროლა ადამიანზე არ ვსაუბრობთ, ჩვენ ვსაუბრობთ ქვეყანაზე, სახელმწიფოზე, რომელშიც ცხოვრებს ხალხი, რომელიც ირჩევს ხელისუფლებას და ეს ხელისუფლება ახორციელებს მის საქმიანობას სწორედ ქართველი ხალხის ინტერესებიდან გამომდინარე. როდესაც აპელირება ხდება ქართველი ხალხის ინტერესებზე, უკვე სასაცილოც არის, როდესაც ამას აკეთებენ რაღაც ჯგუფების ინტერესებიდან გამომდინარე. სახელმწიფოში ხალხის ლეგიტიმურ ინტერესს გამოხატავს ხელისუფლება და, რა თქმა უნდა, ეს უნდა იყოს ყოველთვის ანგარიშგაწეული. საქართველოს ხელისუფლებას არასდროს უთქვამს და არასდროს გაუკეთებია ისეთი რამ, რომ გაემართლებინა ეს განცხადებები“, – აღნიშნა ბოჭორიშვილმა.

ბოჭორიშვილმა ასევე აღნიშნა, რომ საქართველოს ხელისუფლებამ ძალიან სერიოზული განაცხადი გააკეთა 2022 წელს, როდესაც ევროკავშირში გაწევრიანების განაცხადი გააკეთა.

„სწორედ ქართველი ხალხის ნების, პროგრესის გათვალისწინებით და იმ მდგომარეობის გათვალისწინებით, რაც არის საქართველოში გაკეთდა ეს განაცხადი და მივიწევთ იმისკენ, რომ განაცხადი არ დარჩეს განაცხადად და როდესაც შემდგომი გაფართოება მოხდება საქართველო იყოს მზად ევროკავშირის წევრობისთვის. ეს არის ჩვენი განაცხადი და, შესაბამისად, მნიშვნელოვანია, რომ პარტნიორებმაც კარგად გააცნობიერონ, როდესაც ასეთ შეფასებებს აკეთებენ. ვის წისქვილზე ასხამს ეს წყალს და ვის ინტერესშია ასეთი განცხადებების გაკეთება“, – განაცხადა ბოჭორიშვილმა.