ჩინეთსა და აშშ-ს შორის სავაჭრო ომის ახალი ეტაპი ორ ზესახელმწიფოს შორის რამდენიმეთვიანი მოლაპარაკებების ჩაშლას ნიშნავს. ჩინეთმა დაძაბულობის ახალი რაუნდი დაიწყო ექსპორტის ლიცენზიების შემოღებით იმ ქვეყნებისთვის, რომლებიც თავიანთ წარმოებაში ჩინეთიდან შეძენილ იშვიათმიწა ლითონებს იყენებენ. იშვიათმიწა ლითონები ელექტრონიკის წარმოებაში გამოიყენება. ჩინეთი აკონტროლებს იშვიათმიწა ლითონების მოპოვების და გადამუშავების გლობალურ ბაზარს.  სავაჭრო ომში ასეთი ბერკეტის გამოყენება ეკონომიკური ბომბია. გლობალური ელექტრონიკის მწარმოებლები ჩინეთის მძევლები გახდებიან.

 ტრამპმა საპასუხოდ გამოაცხადა, რომ ჩინეთს 100%-იან ტარიფებს დაუწესებს და ვერ ხედავს სი ძინპინთან შეხვედრის საჭიროებას, რომელიც იყო მოსალოდნელი.

მიზეზები, რის გამოც სი ძინპინმა კონფლიქტის ესკალაცია გადაწყვიტა, ჩინეთის როგორც საშინაო, ასევე საგარეო პოლიტიკაში უნდა ვეძებოთ.

პირველი, ჩინეთში ძალაუფლებისთვის ბრძოლა მწვავდება, რასაც მოწმობს სი ძინპინის ავადმყოფობის შესახებ ჭორები. დახურულ პოლიტიკურ სისტემაში ლიდერის ავადმყოფობის შესახებ ჭორები არ შეიძლება იყოს უბრალო დამთხვევა. ისინი წარმოადგენენ ფარულ პოლიტიკურ ბრძოლას ძალაუფლებისთვის მებრძოლ ფრაქციებს შორის. სი ძინპინი გეგმავს ჩინეთის ლიდერის თანამდებობაზე მეოთხე ვადით კენჭისყრას 2027 წელს. კონტრელიტა, რომელსაც ჩინეთის ყოფილი ლიდერი ჰუ ძინტაო ხელმძღვანელობს, ცდილობს შეზღუდოს სი ძინპინის ძალაუფლება და ქვეყნის კურსი შეერთებულ შტატებთან და ევროპასთან უფრო პრაგმატული ურთიერთობებისკენ შეცვალოს. სი ძინპინი აპირებს თავისი პოზიციების განმტკიცებას საერთაშორისო დაძაბულობის გამწვავებით და მის გარშემო ელიტისა და მოსახლეობის მობილიზებით.

მეორე, ტრამპის წარმატებები სამხრეთ კავკასიასა და ახლო აღმოსავლეთში საფრთხეს უქმნის ჩინეთის გავლენას ამ რეგიონებში და ხსნის შესაძლებლობებს ამერიკული პროექტებისთვის ჩინეთის პროექტის „ერთი სარტყელი, ერთი გზის“ საპირწონედ. ზანგეზურის დერეფანს, აზერბაიჯანსა და სომხეთს შორის შეთანხმების ხელმოწერის შემდეგ, „ტრამპის გზა“ ეწოდა. ისრაელსა და ჰამასს შორის ღაზაში ცეცხლის შეწყვეტის შესახებ შეთანხმება აძლიერებს აშშ-ს გავლენას ამ რეგიონში.

მესამე, სი ძინპინი ამწვავებს სავაჭრო ომს შეერთებულ შტატებთან, რათა გააძლიეროს თავისი საერთაშორისო მოკავშირეების ბანაკი. ტრამპის მცდელობებმა, პუტინი თავის მხარეს გადაიბიროს, შეშფოთება გამოიწვია პეკინში. ჩინეთსა და შეერთებულ შტატებს შორის დაძაბულობის გამწვავების გამო, პუტინს ფაქტობრივად ჩამოერთვა ვაშინგტონსა და პეკინს შორის მანევრირების შესაძლებლობა.

სი ძინპინმა ძალიან სარისკო თამაში წამოიწყო. ჩინეთი არანაკლებ არის დამოკიდებული დასავლეთზე, ვიდრე დასავლეთი ჩინეთზე. ტრამპმა განაცხადა, რომ შეზღუდავს ამერიკული თვითმფრინავების კომპონენტების მიწოდებას ჩინური ავიაკომპანიებისთვის და ამერიკული პროგრამული უზრუნველყოფის მიწოდებას ჩინეთში. ამ ბრძოლაში ორივე მხარეს აქვს კოზირები.

ჩინეთის ხელმძღვანელობის გადაწყვეტილების მიღების პროცესი მკაცრად გასაიდუმლოებულია, მაგრამ ღია წყაროებიდან მიღებული ინფორმაციის საფუძველზე შეიძლება ვივარაუდოთ, რომ სი ძინპინს სავაჭრო ომში გამარჯვების იმედი აქვს. ჩინელი ექსპერტების აზრით დონალდ ტრამპის ქაოტური საგარეო და საშინაო პოლიტიკა ასუსტებს ამერიკის პოზიციებს მსოფლიოში. ტრამპი სავაჭრო ომებს აწარმოებს არა მხოლოდ მოწინააღმდეგეებთან, არამედ აშშ-ის მოკავშირეებთანაც. ჩინეთის გადმოსახედიდან, ტრამპის ქმედებები ხშირად სპონტანურია და არ გააჩნია კარგად გააზრებული სტრატეგია. სანამ ტრამპი აშშ-ის პრეზიდენტია, ამერიკა გაუაზრებლად მოქმედებს, არათანამიმდევრულია, ახლა არის საუკეთესო დრო, რომ მსოფლიო გათავისუფლებლეს ამერიკული ჰეგემონიისგან. ჩინეთის ეკონომიკაში მზარდი სირთულეებისა და ჩინეთის ხელმძღვანელობაში ძალაუფლებისთვის ბრძოლის გამწვავების გათვალისწინებით, სი ძინპინი აჩქარებს მოვლენებს და ამწვავებს ურთიერთობებს აშშ-სთან.

ავტ: ავთანდილ წულაძე – პოლიტილოგი

“ეს არის ჩვეულებრივი “ჩეკისტი” ქალი და ამ უმძიმეს ვითარებაში, რუსულ რეჟიმთან “მებრძოლი” ქალი, ცილს სწამებს მიხეილ სააკაშვილს და ბაჩანა ახალაიას. ერთი ციხეში ზის და მეორე სახლიდან არ გამოდის. ეს ქალი იმდენად ამორალურია, რომ უკვე ფსკერი გაბურღა”, – ამის შესახებ “ნაციონალური მოძრაობის” მხარდამჭერმა, მაია ორჯონიკიძემ, თამარ ჩერგოლეიშვილის შესახებ, სოციალურ ქსელში გამოქვეყნებულ ვიდეო მიმართვაში განაცხადა.

ორჯონიკიძე გამოეხმაურა გუშინ, “ფორმულას” ეთერში ჩერგოლეიშვილის მიერ გავრცელებულ ინფორმაციას იმის შესახებ, რომ ბაჩო ახალაიას სახლში 4 ოქტომბერთან დაკავშირებით შეხვედრები ტარდებოდა და კონსულტაციები მიხეილ სააკაშვილთანაც იმართებოდა. მან “ფორმულას” წამყვანი, დავით ქაშიაშვილიც გააკრიტიკა და აღნიშნა, რომ ოპოზიციურ მედიასაშუალებებში კარგი ჟურნალისტებიც არიან, თუმცა, “ყველას ჰყავს თავისი მაჯლაჯუნა”.

“გამოვაქვეყნე ჩერგოლეიშვილის ვიდეო, გამოვაქვეყნე “ჟურნალისტ” ქაშიაშვილზე ჩემი მოგონება, რომელიც სულ მახსოვდა, მაგრამ არასდროს მომივიდოდა თავში დამეწერა, რომ არა ეს ამაზრზენი. ეს არ არის ოპოზიციური ტელევიზიები. ცალკეულ ჟურნალისტებს არ ვეხები, იქ არიან მართლა ნორმალური და კარგი ჟურნალისტები და იმის მიხედვით არ ვაფასებ რომ ადრე რაღაცა იყო – დღეს რას აკეთებენ, ამით ვაფასებ. არის ნორმალური ხალხი “ტვ პირველზეც” და “ფორმულაზეც”, როგორ არ არის, მაგრამ, ყველას ჰყავს თავისი მაჯლაჯუნა. აღარ მინდა, სახელებით ჩამოვთვალო, მაგრამ, იძულებული გამხადა მე ამ ქაშიაშვილმა. მიუხედავად იმისა, რომ ექსტრავერტი ვარ, ძალიან ვუფრთხილდები, თუ დააკვირდით, ზედმეტი არასდროს არაფერი წამომცდება, რაც ქვეყანას, წინააღმდეგობის ფრონტს დააზიანებს. მხოლოდ უკიდურეს შემთხვევაში გამოვდივარ წყობიდან და ეგრეთ წოდებულ ჩვენიანებს ვურტყამ. ასე დავარტყი თავის დროზე თამარს და გიგას, მერე დავარტყი მელიას და ახლა უკვე საქმე მაქვს საკუთარ პარტიასთან”, – განაცხადა ორჯონიკიძემ.

მისივე თქმით, ოპოზიციურ მედიაში სარედაქციო პოლიტიკა მკაცრი უნდა იყოს, ვინაიდან, ქვეყანა, სახელმწიფოებრიობის წინააღმდეგ გამოუცხადებელი ომის პირობებში იმყოფება, შესაბამისად, ამ ტელევიზიებში, ისეთი “დანოსჩიკები” და “ცილისმწამებლები”, როგორიც თამარ ჩერგოლეიშვილია, არ უნდა მოიწვიონ.

“მოკლედ, ე.წ. ოპოზიციურ მედიაში სარედაქციო პოლიტიკა უნდა შეიქმნას, ეს არის ომი, ცხელი ომი არ არის, მაგრამ, არაფრით ნაკლები არ არის იმ დრამატიზმით, ტრაგიზმით და დრამატული შედეგებით. მედიაში უნდა შეიქმნას სარედაქციო პოლიტიკა, იმიტომ, რომ ეს არის ომი, გამოუცხადებელი ომი ქართველი ხალხის, საქართველოს სახელმწიფოებრიობის წინააღმდეგ და ამ დროს, ესენი ძალიან “ბაბლურ”, “კუტოკურ” […] ასე ვიქნებით და გავქრებით ბოლოს. არ არის ამის დრო, ამიტომ, უნდა შეიქმნას მკაცრი სარედაქციო პოლიტიკა, რომ ოპოზიციურ არხებზე მაინც ისეთი ბინძური ჩამშვებები და ჩეკისტები, “დანოსჩიკები”, როგორიცაა თამარა ჩერგოლეიშვილი, არ იყვნენ. უფრო სწორად, ცილისმწამებლები, “დანოსიც” არ არის, იტყუება”, – განაცხადა მაია ორჯონიკიძემ.

“4 ოქტომბერს, რაც მოხდა, ეს იყო მცდელობა იმისა, რომ სახელმწიფო გამოეცადათ. ვისაც ჰგონია, რომ სახელმწიფო არის დაბალი ღობე, ისინი მზად უნდა იყვნენ იმ პასუხისმგებლობისთვის, რა პასუხისმგებლობაც მათ დაეკისრებათ,” – ამის შესახებ პარლამენტის კულტურის კომიტეტის თავმჯდომარემ, გიორგი გაბუნიამ განაცხადა.

როგორც გიორგი გაბუნიამ აღნიშნა, რომ სახელმწიფო ინსტიტუტებზე ასეთი მასშტაბის ძალადობა რეაგირების გარეშე არ დარჩება.

“ნაცი” გინდა ღობის იქით დააბი, გინდა – ღობის აქეთ, “ნაცი” მაინც “ნაცია” და მისი აზროვნების მასშტაბი და ღირებულებები ჩვენთვის კარგად არის ცნობილი. ამიტომ, ეს უნდა იყოს კარგი გაკვეთილი და პრეცედენტი ყველა იმ ადამიანისა თუ პოლიტიკური ჯგუფისთვის, რომელიც ეცდება, რომ საქართველოში ძალადობრივი გზით შეცვალოს ხელისუფლება, დამთავრდება ზუსტად ისე, როგორც დაუმთავრდათ ამ ადამიანებს,” – აღნიშნა პარლამენტის კულტურის კომიტეტის თავმჯდომარემ, გიორგი გაბუნიამ.