უკან დასახევი გზა აღარ გვაქვს – ერთად აღვადგენთ სამართლიან წესრიგს და მშვიდობას ქვეყანაში , – ამის შესახებ „გახარია საქართველოსთვის“ განცხადებაშია ნათქვამი.

პარტიის განცხადებაში აღინიშნება, რომ „მოძალადე დეფაქტო ხელისუფლების მიერ ადამიანებზე ძალადობა, მათი მძევლად აყვანა“ ადასტურებს, რომ მათთვის საქართველოს მოქალაქეების „უწყვეტი პროტესტი ყველაზე დიდი პრობლემაა, პროტესტი, რომელიც ვერაფრით ჩაახშო“.

„გამოხატვის თავისუფლების ფორმების სახელდახელოდ კრიმინალიზება, საკანონმდებლო ძალადობა პროტესტზე და მისი ინსტრუმენტალიზება ადამიანების დევნისთვის, პირდაპირ მიანიშნებს პროტესტის მასშტაბსა და სიმძლავრეზე, რომელსაც დე ფაქტო ხელისუფლება ლეგიტიმაციის არარსებობის პირობებში ვერ უმკლავდება.

უკანონო პატიმართა რიცხვი იზრდება და მძიმდება მათ მიმართ სამართლებრივი დევნა. ახალ უკანონო პატიმრებს 4 წლამდე თავისუფლების აღკვეთით ემუქრებიან. ხალხის მიმართ ძალადობას და უსამართლობას კი ქართველი ხალხი ყოველთვის საკადრის პასუხს გასცემს. ჩვენ უკან დასახევი გზა აღარ გვაქვს და სოლიდარობით, ურთიერთმხარდაჭერით, ერთიანი ბრძოლით, ერთად აღვადგენთ სამართლიან წესრიგს და მშვიდობას ქვეყანაში.

ეს ბრძოლა ქართველი ხალხის დამაჯერებელი უპირატესობით მიმდინარეობს და მისი გამარჯვებით დასრულდება!

თავისუფლება ყველა უკანონო პატიმარს!“, – წერია პარტიის განცხადებაში.

„კონკრეტული ორგანიზაციები აფინანსებდნენ ქვეყანაში ექსტრემისტულ ორგანიზაციებს, დაპირისპირებას, რევოლუციის მოწყობას“, – ასე ეხმაურება თბილისის მერი კახა კალაძე ჟურნალისტებთან საუბრისას გავრცელებულ ინფორმაციას იმასთან დაკავშირებით, რომ ამერიკის შეერთებული შტატების ახალი პრეზიდენტი დონალდ ტრამპი USAID-ის დახურვას გეგმავს.

„ეს კიდევ ერთხელ ადასტურებს იმას, რაზეც ჩვენ ამდენი წლის განმავლობაში ვსაუბრობდით და ვადასტურებდით, რომ იყო კონკრეტული ორგანიზაციები, რომლებიც ქვეყანაში აფინანსებდნენ პოლარიზაციას, რადიკალიზმს, ექსტრემისტულ ორგანიზაციებს, დაპირისპირებებს, რევოლუციის მოწყობას. ალბათ გახსოვთ, როდესაც მიმდინარეობდა „გამჭვირვალობის კანონის“ მიღება, პირველ შემთხვევას ვგულისხმობ, როდესაც ჩვენ უკან გადავდგით ნაბიჯი და არ მივიღეთ აღნიშნული კანონპროექტი. ამის ერთ-ერთი მიზეზი იყო ის, რომ მაგალითად, NED-მა გვითხრა, გაასაჯაროებდნენ ყველა ხარჯს, რაში იხარჯება წამოსული თანხები, თუმცა, რა თქმა უნდა, არაფერი გაასაჯაროვეს, იმიტომ, რომ ვიცით, რა მიმართულებით მიდიოდა ეს თანხები. გუშინ კიდევ გავრცელდა ინფორმაცია, რომ 2024 წლის არჩევნებზე 24 მლნ-ზე მეტი დაიხარჯა საქართველოში. რას დავის მოხმარდა ეს ფული, ხედავთ, რა ხდება ქვეყანაში, რა მდგომარეობა გვაქვს ყოველდღიურად, მაგრამ მერწმუნეთ, ეს ყველაფერი დასრულდება. დასრულდება რადიკალიზმი და ფაშიზმიც, რომლის წახალისება ხდებოდა უცხოეთიდან და საკმაოდ მსუყედ ფინანსდებოდა“, – განაცხადა კახა კალაძემ.

პარლამენტის თავმჯდომარის პირველი მოადგილე, გიორგი ვოლსკი „ნაციონალური მოძრაობის“ მმართველობის პერიოდის შესწავლის აუცილებლობაზე საუბრობს და აღნიშნავს, რომ ეს ადამიანები დღემდე ცდილობენ, რომ ქვეყანა შეიყვანონ ტურბულენტურ გარემოში.

„დღემდე ცდილობენ, რომ ეს ქვეყანა შეიყვანონ ისეთ ტურბულენტურ გარემოში, რომელსაც ნგრევის გარდა არაფერი არ მოჰყვება. რასაკვირველია, ამას შეფასება სჭირდება, საიდან მოდის და რა დანაშაულები აქვთ ამ ადამიანებს ჩადენილი, რომლებიც დღეს ცდილობენ განსაკუთრებით ახალგაზრდებს წინ გაუძღვნენ რაღაც დემოკრატიის ბაირაღებით“, – განაცხადა ვოლსკიმ.

პარლამენტი „ნაციონალური მოძრაობის“ მმართველობის შესწავლას იწყებს. საკანონმდებლო ორგანო დასკვნას 6-თვიანი გამოძიების შემდეგ, სექტემბერში პროკურატურას წარუდგენს. გამოძიება სამხედრო გენერლებსა და ჯარისკაცებს არ შეეხება.

„ხალხის ძალა“ USAID-ისა და იქიდან წამოსული შავი ფულის შესახებ ინფორმაციას საზოგადოებას ჯერ კიდევ 2-3 წლის წინ ვაწვდიდით. ჩვენი განცხადებები ამ თემასთან დაკავშირებით ერთი-ერთში ჩაჯდა რუბიოს, ტრამპისა და მასკის განცხადებების შინაარსთან, – განაცხადა მედიასთან „ხალხის ძალის“ აღმასრულებელმა მდივანმა გურამ მაჭარაშვილმა.

მისი თქმით, მსოფლიოში მიმდინარე პოლიტიკური პროცესების გათვალისწინებით, აუცილებლად დადგება ის დრო, როცა, მათ შორის, ევროკავშირში, ყველა ბიუროკრატს მოუწევს ან თანამდებობიდან წასვლა, ან იმ რეალობის აღქმა, რომ ყველა ქვეყანას თავისი სუვერენიტეტი აქვს.

„USAID-ი არის სახელმწიფო სააგენტო აშშ-ში, რომელიც ამერიკელების მიერ გადახდილ ფულს სხვა ქვეყნებში აგზავნის არეულობებისა და რევოლუციების მოსაწყობად.

ოპონენტებს მინდა მივმართო – ჩვენს, „ხალხის ძალის“ განცხადებებზე რომ ამბობდნენ, ანტიამერიკულიაო, ახლა იმავეს და უფრო მკაცრ განცხადებებს რომ აკეთებენ მასკი, ტრამპი და რუბიო, მათზე რატომ არ ამბობენ იმავეს? მეტიც, დღეს ურუსლა ფონ დერ ლაიენმა ანტიამერიკული განცხადება გააკეთა, რომ აშშ-დან თუ იქნება თავდასხმები ევროკავშირზე, ჩვენ მზად ვართ პასუხი გავცეთო. ეს რა არის? გამოვიდნენ ახლა და დაგმონ ეს მართლა ანტიამერიკული განცხადებები.

მსოფლიოში მიმდინარე პოლიტიკური პროცესების გათვალისწინებით, აუცილებლად დადგება ის დრო, როცა, მათ შორის, ევროკავშირში ყველა ბიუროკრატს მოუწევს ან თანამდებობიდან წასვლა, ან იმ რეალობის აღქმა, რომ ყველა ქვეყანას თავისი სუვერენიტეტი აქვს, – აღნიშნა გურამ მაჭარაშვილმა.

5 თებერვალს, პარლამენტი სამი პოლიტიკური გაერთიანების წევრი დეპუტატებისთვის სადეპუტატო უფლებამოსილების ვადამდე შეწყვეტის საკითხზე იმსჯელებს.

დღის წესრიგში “ერთიანობა – ნაციონალური მოძრაობის”, “კოალიცია ცვლილებებისთვის” და “ძლიერი საქართველოს” წევრებისთვის – ჯამში, 49 დეპუტატისთვის უფლებამოსილების შეწყვეტის საკითხი დგას. მათ პარლამენტს მანდატების შეწყვეტის მოთხოვნით ჯერ კიდევ ნოემბერში მიმართეს, თუმცა “ქართულ ოცნებას” შესაბამისს წერილობით განცხადებებზე ამ დრომდე არ უმსჯელია.

აღნიშნული საკითხი ხვალ საპროცედურო საკითხთა და წესების კომიტეტზე გადის, რომელიც საკუთარ დასკვნას გადაწყვეტილების მისაღებად პლენარულ სხდომას წარუდგენს.

ცესკოს შემაჯამებელი ოქმის თანახმად, 2024 წლის 26 ოქტომბრის არჩევნების შედეგად “ძლიერმა საქართველომ” 14 მანდატი მიიღო, “კოალიციამ ცვლილებებისთვის” პარლამენტში 19 წევრი გაიყვანა, ხოლო “ერთიანობა -ნაციონალურმა მოძრაობამ” 16 მანდატი მოიპოვა.

პარლამენტში 12 მანდატი აქვს პარტიას “გახარია საქართველოსთვის”. გიორგი გახარიას პოლიტიკური გაერთიანება სხვა პარტიების მსგავსად, 26 ოქტომბრის არჩევნებს არალეგიტიმურად აცხადებს და საპარლამენტო საქმიანობაში არ მონაწილეობს, თუმცა უფლებამოსილების შეწყვეტის თაობაზე მათ განცხადება არ დაუწერიათ.

„პრეზიდენტმა ისაუბრა იმ გამოწვევებზე, რის წინაშე იდგა ჩვენი ქვეყანა, რა სირთულეები გამოვიარეთ, თუმცა აღნიშნული სირთულეები ჯერ კიდევ არსებობს. ხედავთ, თუ როგორი შემოტევები მიმდინარეობს, როგორი უსამართლო დამოკიდებულება აქვთ საქართველოს მიმართ და ამის მთავარი მიზეზებიც საზოგადოებამ იცის, თუმცა ბოლო დღეების განმავლობაში კიდევ ბევრი რამე გამოჩნდა და კიდევ უფრო მეტი ინფორმაცია მიეწოდება საზოგადოებას. კერძოდ ის, რაზეც ჩვენ ვსაუბრობდით ამდენი ხნის განმავლობაში – რატომ ჰქონდათ ამხელა ინტერესი საქართველოსთან მიმართებით; ის, რაზეც პირდაპირ ვამბობდით, რომ ქვეყნის ჩართვა უნდოდათ ომში, მეორე ფრონტის გახსნა, ამისკენ მოწოდებებიც კეთდებოდა. რა თქმა უნდა, ეს საფრთხეები ჯერ კიდევ არსებობს“, – განაცხადა კახა კალაძემ.

მისი თქმით, პრეზიდენტმა ასევე ყურადღება გაამახვილა „დიფ სთეითთან“ ბრძოლის მნიშვნელობაზე.

„როდესაც ვნახეთ ტრამპის არჩევა, პირველი, რაზეც მან ისაუბრა, იყო „დიფ სთეითის“ დამარცხება. გვაქვს მოლოდინი, რომ ეს პროცესი ბოლომდე მივა“, – აღნიშნა კახა კალაძემ.

როგორც თბილისის მერმა განაცხადა, პრეზიდენტმა მადლობა გადაუხადა ყველას, ვინც ღირსეულად ემსახურება ქვეყანას და მადლობას იმსახურებს.

„რა თქმა უნდა, ყველაზე მნიშვნელოვანი არის ის, რომ ქვეყნის ინტერესების გამო და ქვეყნისთვის მნიშვნელოვან საკითხებზე უნდა მოვახერხოთ გაერთიანება, მიუხედავად შესაძლო აზრთა სხვადასხვაობისა და პოლიტიკური შეხედულებისა. ის, რომ არსებობს სხვადასხვა მოსაზრება, ამაში ცუდი არაფერია, მაგრამ რადიკალიზმი და ფაშიზმი კატეგორიულად მიუღებელია და ის ერთად უნდა დავამარცხოთ“ , – განაცხადა კახა კალაძემ.